ئا: كوردستانی نوێ/ هەولێر
بەتێكدانی كارگەكە، شوێنی كاركردنەکەمان زیانێكی زۆری بەردەكەوێت، دەبوو زووتر ئێمەیان ئاگادار بكردایەتەوە
كارگەی جگەرەی هەولێر، لە ساڵانی حەفتاكانی سەدەی رابردوودا، هاوشێوەی چەندین كارگەی دیكەی وەك رستن و چنین و مافور و دارتاشی دروستكرا، بۆئەوكات رۆڵی گرنگی هەبووە لە دابینكردنی پێداویستییەكان بەكواڵێتییەكی بەرز، بەڵام لەسەرەتای ساڵی نەوەدەكان و لەدوای راپەڕینی بەهاری 1991، زۆربەی ئەو كارگانە لەكاركەوتن و شوێنەكانیان درا بەكەرتی تایبەت.
ئەوەی پەیوەندیی بەكارگەی جگەرەی هەولێرەوە هەیە، كە دەكەوێتە سەر رێگای هەولێر پیرمام، ماوەیەكە بڕیاری تێكدانی باڵەخانەكەی دەرچووە، هەربۆ ئەو مەبەستە نزكەی 100 دوكانداری ناوچەی پیشەسازیی باكوور بۆ ئۆتۆمبێل ئاگادار كراونەتەوە، شوێنەكانیان چۆڵ بكەن، بەو پێیەی دوكانەكانیان دەكەوێتە ژێر دیواری باڵەخانەكە.
حاجی كەریم محەمەد، خاوەن شوێنی رۆنگۆڕینی ئۆتۆمبێل لەنزیك كارگەی جگەرە بۆ كوردستانی نوێ وتی: ماوەیەكە ئاگاداركراوینەتەوە شوێنەكەمان چۆڵ بكەین و پێیانڕاگەیاندووین، ئەم دیوارە تێكدەچێت كە پەیوەندیی بە كارگەی جگەرەوە هەیە، وتیشی: بەتێكدانی كارگەكە، شوێنی كاركردنەکەمان زیانێكی زۆری بەردەكەوێت، دەبوو زووتر ئێمەیان ئاگادار بكردایەتەوە، تاكو ئێمەش شوێنێكی دیكەمان بۆخۆمان دابیندەكرد.
باسی لەوەشكرد: ئێمە بەشێوەیەكی رەسمی لێرە كار دەكەین، چونكە پارەی كارەبا و سەرجەم خزمەتگوزارییەكان دەدەین، بەڵام ئێستا كە پێمان دەڵێن ئێرە چۆڵ بكەن، ئەگەر ئەوە جێبەجێ بكرێت زیاتر لە 100كەس بێكار دەمێنینەوە و هەر كەسێكیش ئەگەر پێنج سەرخێزانی هەبێت، ئەوا زیان بە نزیكەی 500 كەس دەكەوێت.
وەستا مەغدید، وەك یەكێك لە دوكانەكانی لەژێر دیواری كارگەی جگەرە، كە خەریكی چاككردنەوەی ئۆتۆمبێلێك بوو وتی: بەڵێ ئێمەش لەلایەن شارەوانی ئاگاداركراوینەتەوە ئێرە چۆڵ بكەین، چونكە كارگەی جگەرە تێكدەدەن و دەبێ ئەو دیوارەش هەڵبگیرێت، كە ئێمە لە ژێرییدا دوكانمان دروست كردووە.
باسی لەوەشكرد: راستە لە شوێنێك زەوییان بۆ دابینكردووین، بەڵام ئەو شوێنە زۆر دوورە و بەچەند ساڵێكی تر نابێتە بازاڕێك، سوودی بۆ ئێمە هەبێت. وتیشی: ئەگەر حكومەت بیەوێت كاسبكاران زەرەرمەند نەبن، با هەر لە شوێنەكەی خۆمان دوكانمان بۆ دروستبكەنەوە، چونكە ئێمە لە نزیك ناوچەی پیشەسازیی باكوورین(سناعەی شیمالی)، هەر لێرەش ناسراوین.
ئەركان خالید، كاسبكارێكی دیكەیە لەو شوێنە پێیڕاگەیاند: جگە لە تێكدانی دوكانەكانی نزیك كارگەی جگەرە، كە زیاتر لە رۆنگۆڕ و گزۆزچی و فرۆشیاری كەلوپەلی ئۆتۆمبێل و چایخانە و تایەفرۆش پێكدێت، مەترسی لەسەر تێكدانی تەواوی دوكانەكانی ناوچەی پیشەسازیی باكوور بۆ ئۆتۆمبێل هەیە.
روونیشیكرەوە: كارگەی جگەرەی هەولێر لەتەنیشت ناوچەی پیشەسازیی ئۆتۆمبێلی باكوورە، رێگاكەی بۆ بەرپرسانی هەولێر زۆر ستراتجییە و دەكەوێتە سەر رێگای پیرمام و شەقڵاوە، لەماوەی رابردووشدا چەندین كارگە و شوێنی دیكەی حكومی لەم شەقامە تێكدراوە و كراوەتە باڵەخانە و شوێنی حەوانەوەی بەرپرسان.
تەئكیشیكرەوە: هەرچەندە دیار نییە شوێنی باڵەخانەی كارگەی جگەرە دەكرێتە چی، بەڵام بەتەئكید بۆ باڵەخانە و پڕۆژەی كۆمپانیا دەستڕۆیشتووەكانە، چونكە لەكاتی ئێستادا لە بەرامبەر كارگەكە، شارێكی مۆدێرن بۆ كەسانی دبلۆماسی دروست دەكرێت، بۆیە دواجار هەموو دەوروبەرەكەی دەكرێتە شوێنی تایبەت.
