سەڵاح محەمەد، هونەرمەندی دێرینی شاری کۆیە:

تائێستا وازم لەكاری هونەری نەهێناوە

ئا: رەوەست نەوزاد

سەڵاح محەمەد، یەكێكە لەهونەرمەندە دێرینەكانی شاری كۆیە، كە خزمەتێكی زۆری بواری گۆرانی و هونەری كوردی كردووە، ماوەیەكی زۆر گۆرانی سۆزداریی و نیشتیمانی وتووە، بەڵام دواتر بەشێكی تەمەنی بۆ هونەری گۆرانی منداڵان تەرخانكردووە. سەبارەت بەسەرەتای دەستپێكردنی كاری هونەری خۆی بە کوردستانی نوێ دەڵێت: یەكەم كارم لە ساڵی 1958 بوو، بەڵام لە ساڵی 1959 وەكو بچووكترین ئەندامی تیپی باواجی كۆیە، بەشدارییم لە ئاهەنگەكانیان لەشاری كۆیە كرد و گۆرانیم وتووە، كە هونەرمەندی كۆچكردوو مامۆستا باكووری سەرپەرشتیی دەكرد.
وتیشی: تائێستا دوو سیدی گۆرانیم تۆمار كردووە، كە یەكێكیان 7 تراك و ئەویتریان 8 تراكە، جگە لەوە گۆرانی ترم هەیە، كە سەرجەمیان نزیكەی 30 گۆرانی دەبن، یەكەم گۆرانیشم لە ساڵی 1973 لەبەغدا لەگەڵ تیپی باواجی كۆیە تۆمار كرد، ئەویش گۆرانی (بازان باز قەتار قولینگان هەوایی حەیفە بۆ باڵات شەو بەتەنیایی) بوو.
باسی لەوەشكرد: تۆماركردنی گۆرانی(جوانی كوێستان)لە ساڵانی حەفتاكاندا، بەگرنگترین وێستگەی ژیانی ئەو هونەرمەندە دادەنرێت، لەوبارەیەوە دەڵێت: لە ساڵی 1978 لەگەڵ تیپی هونەری هەولێر، كە مامۆستا وریا ئەحمەد سەرپەرشتیی دەكرد، ئەو گۆرانییەمان تۆماركرد، كە شیعرەكەی هی شاعیری كۆچكردوو جەلال جۆبار و ئاوازەكەشی فۆلكلۆرە و مامۆستا وریا ئەحمەد موزیكی بۆ دانا.
لەبارەی دەنگۆی وازهێنانی لە گۆرانی وتن روونیكرەوە: تائێستا وازم لەكاری هونەری نەهێناوە، بەڵكو دوو گۆرانیم ئامادەیە، بۆ یەكێكیان بەناوی (چەند شارێك گەڕام، چەند ئاوەدانی) كە شیعر و ئاوازی خۆمە، هەوڵدەدەین لەماوەی نزیكی داهاتوو كارەكانی تەواوبكرێت.
ئەو هونەرمەندە ماوەی 25 ساڵە هونەرەكەی بۆ منداڵان تەرخانكردووە بۆ ئەمەش بەكاراكتەری (مام عەوڵڵا) لەناو خەڵك و منداڵاندا ناسراوە، لەوبارەیەوە دەڵێت: لە ساڵی 2000 دەستم بەكاری هونەری منداڵان كرد، هۆكارەكەی بۆ كەمی یان نەبوونی گۆرانی بۆ منداڵان دەگەڕێتەوە، منیش بڕیارمدا خزمەتێك لەو بوارەدا پێشكەش بكەم، یەكەم گۆرانیشم (دێوەرە) بوو، سیناریۆ و جلوبەرگەكەشی هەر خۆم ئامادەمكردبوو.
وتیشی : كارە هونەرییەكانم بۆ منداڵان نزیكەی 20 كلیپن، بریتین لە (دێوەرە، هەلوور بەلوور، شەمولە) و هیتر، جگە لەوە تائێستا لەوانەیە 100 كۆنسێرتم بۆ منداڵان لە باخچەكانی شاری هەولێر و سلێمانی و كەركوك و دهۆك و ئامێدی سازكردووە و هەموو ساڵێكیش لەڕۆژی جەژنی منداڵان بەشداری ئاهەنگی منداڵانم كردووە.