سەرۆكی رێكخراوی جووتیارانی سەردەم:

لە دەشتی بەڕانەتی هەولێر، زەوییەكی زۆری كشتوكاڵی بەهەدەر دەدرێت

كوردستانی نوێ/ هەولێر

 
رێكخراوەكانی تایبەت بە جووتیارانی هەرێمی كوردستان، هۆشداری دەدەن بە حكومەتی هەرێم و لایەنی پەیوەندار، لە فراوانبوونی مەترسییەكان بۆ سەر زەوی بەپیتی كشتوكاڵی و پاشەكشەی ئەو كەرتە لە هەرێمی كوردستان. مام فارس سەرۆكی رێكخراوی جووتیارانی سەردەم و وەك یەكێك لەو رێكخراونە رایدەگەیەنێت: لە ماوەی 30 ساڵی رابردوودا، نزیكەی 2 ملیۆن زەوی كشتوكاڵی  بەهەدەر دراوە، ئاماژە بەوەش دەكات پێویستە ئاستێك بۆ ئەو هەوڵانە دابنرێت، بەپێچەوانەوە نەوەی داهاتوو باجەكەی دەدات.

  فارس حسێن عەبدوڵڵا     

 فارس حسێن عەبدوڵڵا ناسراوە بە مام فارس، سەرۆكی رێكخراوی جووتیارانی سەردەم بە كوردستانی نوێی راگەیاند: ئێمە وەكو رێكخراوێكی تایبەت بە جووتیاران، نیگەرانین لە بەهەدەردانی زەوی كشتوكاڵی لە هەرێمی كوردستاندا، بەتایبەتی لەماوەی رابردوودا، لە ئەنجامی تەرخانكردنی زەوی بۆ فەرمانبەران، زیانێكی زۆریان بە زەوی كشتوكاڵی بەپیت گەیاندووە، بۆئەمەش رێژەیەكی زیاتر لە سنووری بەڕانەتی خۆرئاوای هەولێر بووە.

وتیشی: لە هەرێمی كوردستاندا 18ملیۆن دۆنم زەوییمان هەیە، كە زۆربەیان زەوی بەپیتی كشتوكاڵین، لە ماوەی 30 ساڵی رابردوودا، نزیكەی دوو ملیۆن دۆنم زەوی بەپیتی كشتوكاڵی بە مەبەستی دروستكردنی باڵەخانە و دامەزراندنی كۆمپانیا و كارگەی تایبەت، بەهەدەردراون، ئەمەش نیشانەی گرنگی نەدانە بە كەرتی كشتوكاڵ.
راشیگەیاند: ئەو بارودۆخەی هەرێمی كوردستان لەكاتێكدایە، کە لە وڵاتان بەهیچ شێوەیەك نابێت دەستكاریی لەو جۆرە زەوییانە بكرێت، بەڵكو ئەوان ئەو جۆرە زەوییانە، بۆ نیشتەجێبوون و پڕۆژەكان بەكاردەهێنن، كە بە كەڵكی كشتوكاڵ نایەت، لە هەرێمی كوردستانیش دەكرا رێگریی لە بەكارهێنان زەوی كشتوكاڵی بكرێت، بۆ شوێنی نیشتەجێبوون و كۆمپانیا و كارگەكان و مەبەستی تایبەتی.
ئاماژەی بەوەشكرد: بەردەوامبوونی  بەهەدەردانی زەوی كشتوكاڵی، جگە لە زیانگەیاندن بە نەوەی ئێستا، غەدرێكە لە نەوەی داهاتووش دەكرێت، چونكە لە كاتی ئێستادا، ژمارەی دانیشتوانمان شەش ملیۆن كەسە، بەڵام كاتێك دوای 20 ساڵی تر ژمارەی دانیشتوانی هەرێم بوو بە 15 ملیۆن كەس، ئەوكات زەوی كشتوكاڵی بەشی ئەو خەڵكە ناكات. 
مام فارس وتیشی: جگە لە بەهەدەردانی زەوی، لەهەمانكاتدا بەهۆی پیسبوونی ژینگەوە، جارێكی تر زیانێكی زۆر بە كەرتی كشتوكاڵی كەوتووە، بەتایبەتی لە شارێكی وەك هەولێر، بەهۆی بوونی پاڵاوگەیەكی زۆر، زیانی زۆری لە زەوی كشتوكاڵی و بەرهەمەكانی داوە، كە پێویستە ئاستێكی بۆ دابنرێت، ئەگەرچی لەوبارەیەوە ئێمە وەك رێكخراوەكانی جووتیاران، چەندینجار لایەنی پەیوەندارمان لەو مەترسییانە ئاگادار كردۆتەوە، بەڵام ئەنجامێكی ئەوتۆی نەبووە، بۆیە لەسەر هەرسێ سەرۆكایەتییەكەی هەرێمی كوردستان و پەرلەمان و ئەنجوومەنی وەزیران پێویستە، بڕیارێكی یەكلاكەرەوە لەوبارەیەوە دەربكەن و رێگا نەدەن بەو جۆرە زیان بە زەوی كشتوكاڵی بكەوێت.پێشیوابوو: ئێستا لە هەرێمی كوردستاندا تەنیا یەك وەرز بەرهەمی ناوخۆی كشتوكاڵییمان هەیە، لە وەرزەكانی تردا، سەرجەم بەرهەمەكان لە دەرەوە هاوردەی دەكەین، ئەمەش زیانێكی دیكەیە بەر ئابووریی هەرێمی كوردستان دەكەوێت، لەكاتێكدا ئێمە چەندین سەرچاوەی ئاومان هەیە، دەكرێت لەرێگەی پڕۆژەی ئاودێریی و سوودوەرگرتن لە بەنداوەكان، زەوییە كشتوكاڵییەكان بکرێنە زەوی  بەراو، بەتایبەتی لەم ماوەیەدا، کە رێژەی بارانبارین وەكو پێویست نییە.