ئامانجی توركیا لە چەكدانانی پەكەكە و هەڵوەشاندنەوەی ئەو حزبە، بە پلەی یەكەم، كۆتاییهێنانە بە ئیدارەی خۆسەری رۆژئاوا و هەڵوەشاندنەوەی هێزەكانی یەپەگە، چونكە ئێستا مەترسی گەورە بۆ سەر توركیا بە فیدراڵیكردنی سوریایە، كە سیاسەتی ئێستای ئیسرائیلە و ناوچەكانی دروز و كوردیش، دوو بەشی ئەو فیدراڵیەتە دەبن، بەڵام مەزڵووم عەبدی هەر زووبەزوو توركیای بێ ئومێد كرد لە چەكدانانی یەپەگە و رایگەیاند: «مەسەلەكە تایبەتە بە پەكەكە و هیچ پەیوەندییەكی بە ئێمەوە نییە لە سوریا»، ئەمە لە ئاستی رۆژئاوای كوردستان.
لە ئاستی باشووری كوردستانیش، هەڵوەشاندنەوەی پەكەكە و چەكدانانی قەندیل، هەنجەتی لەشكركێشیی و مانەوەی بنكە و بارەگاكانی سوپای توركیا لە هەرێمی كوردستاندا ناهێڵێت، كە لەژێر ناوی جەنگی دژە تیرۆر تەواوی بادینان و ناوچەی برادۆستی داگیركردووە و بە هۆیەوە سەدان گوند چۆڵكراون و سەدان هاووڵاتی هەرێمی كوردستانیش، لە بادینانەوە تا بناری قەندیل و كوڕەكاژاو بە بۆردومانی فڕۆكە و تۆپخانەی توركیاوە شەهید كراون.
لە ئاستی باكووری كوردستانیش، توركیا دەوڵەتێكی وەزیفی درووستكراوی سەدەی بیستی دەستی خۆرئاوایە لە رووی جوگرافیا و سیستەمی حوكمڕانییەوە، تا دەگاتە ئایدۆلۆجیا و دەستوورەكەی، لەو باهۆزە گۆڕانكارییە حەتمییەی جیهان و خۆرهەڵاتی ناوەڕاستی گرتۆتەوە، لە سەدەی بیست و یەكەمدا، بێگومان قابیلی گۆڕانی حەتمیی و ریشەییە، لەبەرئەوەش، بوونی پەكەكە وەكو هێزێكی چەكدار و تەنانەت وەكو ئایدۆلۆجیاش كە لێكەوتە و كاردانەوەی هاوكێشەكانی سەدەی بیستە «وەكو ئۆجالان لە بانگەوازەكەیدا باسی لێوەكردووە»، كۆسپ درووستكەر دەبێت، لەبەردەم ئەو گۆڕانكاریانە، هەم لە ناوخۆ و هەم لە دەرەوەدا، لەبەر ئەوە هەڵوەشاندنەوە و چەكدانانی كارێكی یەكجار حەكیمانەیە، بەتایبەت كە ئەمڕۆ گەلی كورد لە باكووری كوردستاندا هۆشیارەو شانازی بە كوردبوونی خۆیەوە دەكات و خاوەنی چەندین پارتی جیاجیا و دەیان پەرلەمانتاریشە لە پەرلەمانی توركیادا. لە هەمووی گرنگتر، ئەمڕۆ مەسەلەی كورد لە مەسەلەی بوون و نەبوونی پەكەكەو حزبێك و دوو حزب دەرچووەو میللەتی كورد، وەكو كارەكتەرێكی سەرەكی گۆڕەپانەكە كەوتۆتە ناو هاوپەیمانێتییەكانی هاوسەنگی هێز و سیاسەتی دەولیی و هاوكێشە ستراتیجییەكانی داڕشتنەوەی خۆرهەڵاتی ناوەڕاست. فاكتەرە مێژوویی و شارستانییەكانیش، كوردستان و كوردی وەكو خاك و میللەتێكی پیرۆز، كردووە بە ئەمری واقیع و بەسەر هەموو لایەكدا فەرزی كردووەو ناتوانرێت نادیدە بگرێت، یان فەرامۆش و بێ كاریگەر بكرێت، لەبەر ئەوە لە پرۆسەی داڕشتنەوەی خۆرهەڵاتی ناوەڕاستدا، كە پڕۆسەیەكی حەتمی و ریشەیی و گشتگیرەو ئەمڕۆ ئارایشەكانی لە ئیسرائیل و غەززەو لوبنان و سوریا و یەمەن و تەواوی ناوچەكەدا دەبینرێن، توركیای خستۆتە پەلەقاژەوە، رۆڵێكی گەورەو تەنانەت یەكلاكەرەوەی دەبێت، لەبەرئەوەش ئەوەی كوردی لەگەڵ بێت لەو ململانێیەدا دەیباتەوە، یان راستتر بڵێین «ئەوەی لەگەڵ كورد بێت دەیباتەوە»، چونكە جیهانی ئەمڕۆمان ژانی بووژانەوەی سێیەمی مرۆڤایەتی لەسەر خاكی كوردستاندا بەخۆوە دەبینێت، كە جارێكی دیكە هاوسەنگی دەگەڕێنێتەوە بۆ گوتەو كرداری مرۆڤ، پاش تێكچوونی لە سلوكی راستەقینەی مرۆڤایەتیدا و تەمومژی تاریكیی بە رۆشنایی مەعریفە دەڕەوێنێتەوە.
