پێشتر جەنگ بۆ ئەوروپاییەكان تەنها لە دوورەوە دەنگەكەی دەبیسترا، تا شەڕی ئۆكرانیا و روسیا هەڵگیرسا، بەڵام ئێستا ئەوروپا لە بەردەم دەرگاكەیدا هەست بە مەترسی جەنگ دەكات. هەم خەڵك و هەم سوپاكان لە رووی دەروونییەوە بۆ جەنگ ئامادە دەكرێن.
ئیمانوێل ماكرۆنی سەرۆكی فەرەنسا لە وتارێكیدا، كە دروشم و ئاڵای فەرەنسا و ئەوروپای لە پشتەوە بوو، وەكو بەیاننامەیەك بۆ ئەوروپا بخوێنێتەوە، لە شاشەكاندا تەئكیدی كردەوە، كە «نیشتیمان لە مەترسیدایە و هەڕەشەی روسیا بۆ سەر فەرەنسا و ئەوروپا» گەورەیە.
سوید و نەرویج و فینلەندا نامیلكەیان بەسەر هاووڵاتیانیدا دابەشكردوە، تێیدا رێنماییان بڵاوكردۆتەوە سەبارەت بەوەی كە لە ئەگەری شەڕدا چی بكەیت؟
هەواڵگری دانیمارك، پێشبینی كردووە كە «روسیا لە ماوەی پێنج ساڵدا هێرش دەكاتە سەر ئەوروپا».
لای خۆیەوە كارستن بریوەر، سەرۆكی ئەركانی گشتیی ئەڵمانیا رایگەیاندووە، كە بەهۆی هەڕەشەكانی ڕوسیاوە، دەبێت لە ماوەی پێنج ساڵدا سوپا بۆ جەنگ ئامادە بكرێت. بریوەر ئامۆژگاری ئەڵمانییەكانیشی كردووە كە «رادیۆ و چرای دەستی كە بە پاتری كاردەكەن لە ماڵەوە دابنێن.»
لە كۆتاییدا برۆنۆ كارل، سەرۆكی دەزگای نهێنی ئەڵمانی BND رایگەیاندووە، كە ئامانجی درێژخایەنی روسیا ئەوروپایە. كارل لە لێدوانێكیدا بۆ رۆژنامەیەك دەڵێت: كۆتایی هاتنی پێشوەختەی جەنگ لە ئۆكرانیا، روسیا ناچار دەكات، توانای خۆی بەرەو ئامانجە سەرەكییەكەی كە ئەوروپایە ئاراستە بكات.
بەڵێ لە ئەوروپادا تەپڵی جەنگ لێدەدرێت، بەڵام نەك تەنها سوپای ئەڵمانیا، بەڵكو سوپای هەموو وڵاتانی دیكەیش لە دۆخێكدا نین بەشداری جەنگ بكەن، لە ئەڵمانیا باس لەوە دەكرێت جارێكی دیكە خزمەتی سەربازی بكرێتەوە بە ئیلزامی.
لە راستیدا ئەوروپا پێشتر پشتی بە ئەمریكا بەستبوو لە چوارچێوەی ئەندامێتی ناتۆدا، بەڵام بە هاتنی ترەمپ دۆخەكە خراپ بوو، بەتایبەت دوای ئەوەی وتی: «ئەگەر بودجەی پێویست بۆ بەرگری تەرخان نەكەن، من بەرگرییان لێ ناكەم».
لە كاتێكدا ئەوروپا، لە زۆر بابەتدا «یەكگرتوو» بووە، بەڵام هێشتا لە پرسە سەربازییەكاندا «یەكگرتوو» نییە. پلانی دامەزراندنی سوپای گشتی بە بەشداری وڵاتانی ئەندام لە ئەوروپا ساڵانێكە لەسەر مێزەو تا ئێستا جێبەجێ نەكراوە، ئەمەش ئەوروپا لاواز دەكات.
توركیا، یەكێكە لەو وڵاتانەی كە بۆ تاوتوێكردنی رەوشی ئەمنی و سەربازی ئەوروپا، بانگی كۆبوونەوەی لەندەن كرابوو، هاكان فیدانیش رایگەیاند، «ناكرێت مەسەلەی ئاسایشی ئەوروپا بەتەنها لە شەڕی ئۆكرانیادا كورت بكرێتەوە، مەسەلەی هەیكەلی ئەمنی ئەوروپاش دەبێت لە روانگەیەكی درێژخایەن و ستراتیژییەوە چارەسەر بكرێت. لەو چوارچێوەیەشدا هەیكەلێكی ئەمنی بەردەوام و پۆڵایین تەنها بە بەشداریی توركیا مەیسەر دەبێت».
ئەمەش توركیا دەخاتە بەردەم هەڕەشەی چەكوش و سندانەوە، چونكە بە حوكمی جیۆپۆلەتیكەكەی لە لایەك رووبەڕووی پەلاماری ورچەكەی روسیا و لە لایەكی دیكەوە دووچاری پشت تێكردنی فیلەكەی ئەمریكا دەبێتەوە، بەمەش كەشتی توركیا، كە ساڵانێكە خۆی لەبەر باوبۆرانی بەهێزی گۆڕانكارییەكانی هاوسەنگی هێزدا بە سەلامەتی ماوەتەوە نقوم دەبێت.
