بوونی ژمارەیەکی زۆر لە ئامێری Infusion Pump هیوا بەخشە بۆ منداڵانی توشبووی شێرپەنجە، لەبەرئەوەی کاریگەرە لە دروست چارەسەرکردنیاندا
شێرپەنجە ئەو نەخۆشییەی سەردەمە کە لە هەموو جیهاندا بڵاوە، تائێستا هیچ چارەسەرێکی لە سەدا سەدی بۆ نەدۆزراوەتەوە و لە هەموو تەمەنێکدا قوربانیی هەیە، یەکێک لەو قوربانییانە بە داخەوە منداڵانن.
بەپێی ئاماری رێکخراوی نەتەوەیەکگرتووەکان، ساڵانە لە جیهاندا 400 هەزار منداڵ تووشی نەخۆشی شێرپەنجە دەبێت، رێژەی 80 % ی ئەو توشبووانە چاک دەبنەوە لە دوای وەرگرتنی چارەسەر، بەهۆی ئەم ئەمارانەوە رێکخراوی نەتەوەیەکگرتوووەکان بڕیاریدا کە ساڵانە ناوەڕاستی مانگی شوبات بکرێتە رۆژی جیهانیی شێرپەنجەی منداڵان، لە هەموو وڵاتانی جیهاندا ئەم یادە بەرز رادەگیرێت و دەکرێتەوە.
یەکێک لەو شوێنانەی کە ئەم یادەی تێدا دەکرێتەوە (نەخۆشخانەی هیوا)یە لە شاری سلێمانی بۆ توشبووانی شێرپەنجە، کە بێجگە لە منداڵانی هەرێمی کوردستان منداڵانی ناوەڕاست و باشووری عیراقیش بۆ چارەسەر رووی تێدەکەن.
بەپێی ئامارەکانی ساڵی 2024 رێژەی ئەو منداڵانەی کە روویان لە نەخۆشخانەی هیوا کردووە لەو ساڵەدا گەیشتووەتە زیاتر لە 200 منداڵ، کە ژمارەیەکی زۆریان منداڵانی دەرەوەی هەرێم بوون و زۆرینەیان توشبووی شێرپەنجەی خوێن و شێرپەنجەی مێشک بوون.
دەکرێت ئەمانە هەمووی تەنها داتا و ئەنجامی لێکۆڵینەوە لە نەخۆشییەک و توشبووانی بێت، هەروەها زانیاری بێت و ببەخشرێت بە وەرگر و لایەنی پەیوەندیدار، بەڵام ئەوەی جێگەی تێڕوانین و هەوڵدانە لەمەڕ ئەم بابەتە و جێگەی داخە، کەمیی ژمارەی ئامێرێکی گرنگە لە بەشی شێرپەنجەی منداڵاندا لە نەخۆشخانەی هیوا، ئەویش ئامێری Infusion Pump ە کە بەکاردێت بۆ پێوانەی پێدانی بڕی دەرمانی پێویست بە نەخۆش لەکاتی خۆیدا، بوونی گرنگە بۆ چارەسەری منداڵانی توشبوو.
بە بۆچوونی پزیشکێکی پسپۆڕ، بوونی ژمارەیەکی زۆر لەم ئامێرە هیوا بەخشە بۆ منداڵانی توشبووی شێرپەنجە، لەبەرئەوەی کاریگەرە لە دروست چارەسەرکردنیاندا.
لێرەوە داواکارین لە هەموو لایەنە پەیوەندیدارەکانی بەرپرس لە نەخۆشخانەکە و تەنانەت هەموو کەسانی خاوەن دەرامەت و سەرمایەدار کە بە هەمووان هەوڵێک بدەن بۆ دابینکردنی رێژەیەکی زیاتری ئەو ئامێرە بۆ نەخۆشخانەی هیوا و منداڵانی توشبووی شێرپەنجە، لە پێناو بەخشینی هیوایەک بە منداڵانی نەخۆشخانەی هیوا.
