شتێکی چاوەڕوانکراوبوو کە سەرۆک بافڵ تاڵەبانی وەکو یەکەم سەرۆک و سەرکردەی هێز و لایەنە سیاسییەکانی کوردستان، لە پەیامێکی رەسمیدا پشتگیریی خۆی بۆ رێککەوتننامەکەی نێوان ژەنەراڵ مەزڵوم عەبدی و ئەحمەد شەرع سەرۆکی کاتیی سوریا دەربڕی، چونکە نەک هەر ئاگاداری رێکەوتنەکە بووە، بەڵکو هەوڵێکی زۆری دیپلۆماسی داوە بۆ بەئەنجام گەیشتنی رێککەوتنەکە.
لەلایەکی دیکەوە، جگە لەوەی لە سەختترین و دژوارترین قۆناغی شەڕی تیرۆریستانی داعشدا، یەکێتی بەردەوام بووە لە پشتیوانیکردنی کوردانی رۆژئاوا، لەدوای رووخانی دەسەڵاتی ئەسەد و هاتنەکایەی دۆخێکی نوێ لە سوریاش، تا ئیمزاکردنی رێککەوتننامەکە، سەرۆک بافڵ تاڵەبانی لە چوار پەیامی رەسمیدا هەڵوێست و سیاسەتی نەگۆڕی یەکێتیی نیشتمانیی کوردستان بەرامبەر بە دۆخی سوریای نوێ، پشتگیریکردن لە مافی هەموو پێکهاتەکانی ئەو وڵاتە، بەتایبەتی مافی گەلی کورد لە سوریا و چارەسەرکردنی کێشە ناوخۆییەکانی ئەو وڵاتە، لەڕێی دانوستان و ئاشتی و کۆتاییهێنان بە شەڕ و توندوتیژی رایگەیاندووە، بەمشێوەیە:
- یەکەم پەیام لە شاری سلێمانی بوو.
- دووەم پەیام لە کۆنفرانسی نێودەوڵەتیی میونشن، لەو کۆنفرانسەدا سەرۆکی یەکێتی ئەو بۆشاييەی پڕکردەوە کە لە ئەنجامی بەشدارينەکردنی نوێنەرانی کوردانی رۆژئاوا دروست بوو بوو.
- پەیامی سێیەم لە بەغدای پایتەخت بوو کە لە پانێڵێکدا جارێکی دیکە سیاسەتی نەگۆڕی یەکێتی بەرامبەر بە دۆخی سوریا و چۆنییەتی چارەسەرکردنی کێشەکان و پشتیوانیکردنی کوردانی سوریا دەربڕی.
- پەیامی چوارەمیش بە بۆنەی ئیمزاکردنی رێککەوتننامەکەی دیمەشق بوو کە تیایدا پشتگیریی خۆی بۆ رێککەوتننامەکە دەربڕی.
- جگە لەو چوار پەیامە لەسەر ئاستی خەباتی دیپلۆماسی بەردەوام بووە لەسەر هەوڵەکانی خۆی بۆ فەراهەمکردنی پشتگیریی نێودەوڵەتی بۆ ئەو پرسە بەتایبەتی لەدوا سەردانیدا بۆ ئەمریکا و وڵاتانی دیکە.
- سەرەنجام رێککەوتننامەکە بە پشتیوانییەکی نێودەوڵەتی بە ئەنجام گەیشت و لەدوای ئیمزاکردنیشی پێشوازییەکی فراوانی نێودەوڵەتی لێکراوە.
- هەرچەندە هەر رێککەوتنێک کە ببێتە هۆی کۆتاییهێنان بە شەڕ و توندوتیژی و چارەسەرکردنی کێشەکان بەئاشتی، لە بەرژەوەندیی هەموو لایەنە ناکۆکەکاندایە، بەڵام بۆ گەلی کوردستان رامانێکی دیکەش دەبەخشێت و بە رۆژێکی مێژوویی بۆ هەموو گەلی کوردستان تۆماردەکرێت و دۆزی گەلی کورد لەو وڵاتە پێدەنێتە قۆناغێکی ئەرێنیترەوە، چونکە:
- بۆ یەکەمجارە لە مێژووی ئەو وڵاتەدا لە رێککەوتنێکی رەسمیدا و بە چاودێریی وڵاتانی جیهان دان بە مافە رەواکانی گەلی کورددا دەنرێت.
- کۆتاییهێنان بەو شەڕ و پەلامارە ناڕەوایانەی کە لە دژی ناوچە کوردییەکان بەردەوام بوو.
- لەمەودوا کورد دەبێتە شەریکێکی راستەقینە لە بەڕێوەبردن و حكومڕانیی سوریادا و بەشێکی سەرەکی لە هێزە رەسمییەکانی ئەو وڵاتە لە نەتەوەی کورد دەبن.
- ئاوارەکانی رۆژئاوا دەگەڕێنەوە سەر زێدی خۆیان.
- رێککەوتننامەی دیمەشق کاریگەریی ئەرێنی لەسەر پرۆسەی ئاشتیی تورکیا دروست دەکات و سەقامگیریی ئەمنی و سیاسی لە سوریا و تورکیا کە کوردانی ئەو دوو وڵاتە بەشداربن لە هێنانەکایەی ئەو سەقامگیرییەدا، کاریگەرییەکی راستەوخۆی ئەرێنی لەسەر دۆخی هەرێمی کورستان و ناوچە دابڕێنراوەکانیش دروست دەکات، بۆیە گرنگە کورد بە سەرجەم هێز و لایەنە سیاسییەکانەوە پێشوازیی لەم رێککەوتننامەیە بکەن و هاوکار و یارمەتیدەربن بۆ سەرخستن و جێبەجێکردنی بەند و بڕگەکانی.
