یەكێتی هەمیشە پێشەنگ بووە لە نوێكردنەوە و تازەگەریی سیاسی، هەرگیز نەسڵەمیوەتەوە لە هەنگاوی كردەیی بۆ بووژاندنەوەی بیر و هزری خۆی، ئەم وەرچەرخانە رێكخراوەییەی یەكێتی هەمیشە هەنگاوی بۆ دەنێت، ئێستا لە دیداری یەكێتی خۆی دەبینێتەوە، بەتایبەتیش كە كۆنفرانسەكانی تایبەت بە ئامادەكارییەكان بۆ ئەنجامدانی دووەمین دیداری یەكێتیی نیشتمانیی كوردستان، كات و سەردەمێكی گرنگ و تایبەتە، چونكە:
ـ لەكاتێكدایە یەكێتی لەدوای هەڵبژاردنی پەرلەمانی كوردستان نزیكەی 100 % دەنگەكانی زیادی كردووە، بەڵام دەیەوێ شەنوكەوی بەڕێوەچوونی پرۆسەی هەڵبژاردن بكات و خەوشییەكان بخاتەڕوو تاوەكو لە هەڵبژاردنی ئەنجومەنی نوێنەرانی عیراقدا چارەسەرێكی ریشەیی بۆ كەموكوڕییەكان بدۆزێتەوە.
ـ لەكاتێكدایە دانوستانەكانی یەكێتی و پارتی لەسەر پێكهێنانی حكومەتێكی دادپەروەری رەشید و خزمەتگوزار بەردەوامە.
ـ لەكاتێكدایە پرۆسەی ئاشتیی توركیا، كە یەكێتی و بەتایبەت سەرۆك مام جەلال ئەندازیار و داڕێژەری بیرۆكە و پرۆسەكە بوو، خەریكە دەچێتە قۆناغێكی باشترەوە و چاوەڕوانی هەنگاوی كردەیی لێ دەكرێت.
ـ لەكاتێكدایە دۆزی كورد لە سوریا بووەتە مژارێكی ناوخۆیی و ئیقلیمی و نێودەوڵەتی.
ـ لەكاتێكدایە لە كەركوك هەڵمەتی خزمەتگوزاری و سەقامگیریی سیاسی و ئەمنی و ئاشتەوایی كۆمەڵایەتی و روحیەتی پێكەوەژیانی پێكهاتەكانی شارەكە، بوژانەوەیەكی بەرچاوی بەخۆیەوە بینیووە، بۆ شار و شارۆچكەكانی دیكەی ناوچە دابڕێنراوەكان پێویستیان بە هەمان ئەزموونی كەركوك هەیە.
هەموو ئەم پرسانە، كات و پێویستیی سازدانی دیداری یەكێتی بایەخدارتر دەكەن، لەبەرئەوەی:
ـ لەڕێی دیداری یەكێتییەوە دیدگا و سیاسەتی یەكێتی بەرامبەر بەو پرسانە رۆشنتر دەبێت، بەڵام بۆ ژیانی ناوخۆیی حزبایەتی گرنگیی دیدارەكە لەوەدایە، كە دیدار فراوانترین مینبەری حزبایەتییە چونكە:
ـ دەرفەت دەڕەخسێنێ بۆ زۆرترین هەڤاڵی یەكێتی تاوەكو بەشدارییەكی كارا بكەن لە داڕشتنی راسپاردەكانی دیدار كە دەبێتە بەرنامەی كاری داهاتووی حزبەكەیان و بناغەیەكی گرنگ بۆ پێداچوونەوە و هەڵسەنگاندن لە بڕگە و ماددەكانی پەیڕەو و پرۆگرامی حزبی و ئامادەكاری بۆ كۆنگرەی داهاتوو.
ـ دیداری یەكێتی فراوانترین مینبەری حزبییە بۆ هاوبەشیكردنی زۆرترین هەڤاڵی یەكێتی لەسەر دید و دیدگا بۆ ئایندەی حزبەكەیان.
ـ فراوانترین مینبەرە، چونكە زۆرترین هەڤاڵ بەشداری دەكەن لە هێنانەكایەی پرۆژەیەكی هزری، سیاسی، رێكخراوەیی، میدیایی، مەعریفی و سەرلەنوێ هەڵوەستەیەكی جددی دەكرێت لەسەر پەیكەربەندی حزبەكەیان.
ـ زۆرترین هەڤاڵ دەرفەتیان بۆ دەڕەخسێت، كە لەسەر پرسە گرنگ و هەمەجۆرەكان لە جیاتی سەركردایەتی بیر بكەنەوە لەسەر ئایندەی حزبەكەیان و بكرێن بە راسپاردە بۆ باڵاترین ئۆرگانی یەكێتی.
ـ زۆرترین هەڤاڵی یەكێتی بە جیاوازی پلەوپایە و تەمەن و رەگەز و ئۆرگان و دەڤەر و شار و شارۆچكەوە، هەڵسەنگاندن بۆ شێوازی حكومڕانی و رۆڵ و رەنگدانەوەی سیاسەتی یەكێتی لە حكومەتێكی خزمەتگوزار دەكەن.
ـ زۆرترین هەڤاڵی یەكێتی دەرفەتیان بۆ دەڕەخسێت، كە بەشداری لە پلانێكی نوێدا بكەن بۆ بەهێزتركردنی یەكێتی.
ـ فراوانترین مینبەری كاری حزبییە كە زۆرترین هەڤاڵی یەكێتی بتوانن ئازادانە رەخنە بگرن و بیروبۆچوون و دیدگا و سەرنج و پێشنیارەكانی خۆیان بخەنەڕوو.
ـ فراوانترین مینبەرە، كە دەبێتە سەرچاوەی ئاوێتەبوونی ئەندامان و كادران و سەركردەكانی یەكێتی لە سنووری سەرجەم بازنەكان و یەكسانی و دادپەروەریی حزبی فەراهەم دەكات.
ـ فراوانترین مینبەرە كە دەرفەت بڕەخسێنێت، زورترین رێژەی ژنان و گەنجان بتوانن لەڕێی ئەو مینبەرەوە رۆڵی كاریگەری خۆیان هەبێت لە داڕشتنی سیاسەتی نوێی حزبەكەیان و بەهێزتركردنی پێگەی خۆیان لەناو یەكێتیدا.
ـ دیدار باشترین مینبەرە كە دەرفەت دەڕەخسێنێت بۆ هەڤاڵانی سەرجەم بازنە و ناوچەكان كە بتوانن تایبەتمەندیی دەڤەرەكانیان لەڕووی (سیاسی، كۆمەڵایەتی، ئیداری، ئەمنی، ئابوری، كەلتوری و ... هتد) بخەنەڕوو.
لەبەر ئەو هۆكارانەی كە ئاماژەمان پێداوە، دیداری یەكێتی وەكو پێداویستیەكی گرنگی حزبایەتی لە سەرجەم قۆناغ و وێستگە جیاوازەكاندا وێنا دەكرێت و لەڕێی دیدارەوە هەڵسەنگاندن و بەدواداچوون بۆ سەرجەم كایەكانی ژیانی حزبایەتی دەكرێت كە گرتنەبەری ئەم رێچكە تەندروستەی حزبایەتی هەنگاوەكانی ئێمە بەرەو بەدیهێنانی ئامانجە بەدینەهاتووەكان خێراتر و بەهێزتر و كاریگەرتر دەكات.
