لە روانگەی زانیاریمان لەبارەی دنیای عەرەبی و ئیسلامییەوە، كە بەپێی ئەندامانی رێكخراوی هاریكاریی ئیسلامی(OIC) زیاترە لە 57 وڵاتی دانپیانراو، ئەمە بێ لەكەمینەی موسڵمان لەناو دەیان وڵاتی تری جیهاندا، ئاگادارین كە لەم مانگە پیرۆزەدا گرنگی بە رێوڕەسم و نەریتەكانی مانگی رەمەزان دەدرێت.
بەهۆی ناسراوی و پەیوەندیشەوە لەگەڵ زۆر هاوڕێ و هاوكار لەكۆمەڵێك وڵاتی عەرەبیدا، ئەمە جگە لەوەی هەندێك لەو وڵاتانەمان دیوەو تیایاندا ماوینەتەوە، بۆمان ساغبۆتەوە كە كۆمەڵگەی ئێمە، لە زۆر كۆمەڵگەی تری جیهانی عەرەبی و ئیسلامی، پابەندترە بە ناسنامەی موسڵمانبوون و رەمزو ریچواڵەكانییەوە. زۆر مەڕۆ هەر لە عیراق خۆیدا، تەنها بەراوردی ژمارەی مزگەوتی هەر پارێزگایەكی كوردستان بە پارێزگاكانی ناوەڕاست و باشوور بكەیت، دەردەكەوێت كە زۆر زیاترن، زۆر خاوێنتر و رازاوەتریشن، وەكچۆن زۆر قەرەباڵغترو پڕخواناسترن. لە سروت و رێوڕەسمەكانی تریشدا، هەروا.
كورد، كە زۆرینەی موسڵمانەو بەپێی هەندێ ئامار گەیشتۆتە 36 ملیۆن كەس، جگە لەوەی رۆڵێكی مێژوویی هەیە لە دیرۆكی ئەم ئاینەو بەرگری لێكردنیدا، ئاوهاش پارێزەری بەردەوامی ئەم دیوەی ناسنامەی خۆیەتی. زۆر كەس بەشانازییەوە دەڵێت: من موسڵمانێكی كوردم، یان كوردێكی موسڵمانم. ناسنامەكە خۆیشی، رایەڵێكی مەعنەوی و كۆكەرەوەیە لەگەڵ گەلانی موسڵمانی ناوچەكەدا. جا كورد خۆیشی لەبەر ئەوەی ئاینپەروەریی تیایدا نەبۆتە دەمارگیری، دەبینین ئارامترین خاكیشی هەیە بۆ پێكەوەژیان لەگەڵ ئاین و ئاینزاكانی تردا.
بیرخستنەوەی ئەم وێنە پرشنگدارە بەو هیوایەیە كە پاڵنەربێت بۆ ئەوەی هەموو هاووڵاتییەكی كوردی موسڵمان، لەم مانگە پیرۆزەدا، تایبەتمەندییەكی تری جوانی كۆمەڵگەی كوردەواری بپارێزێت كە لالێكردنەوەو بەدەمەوەچوونی نەدارو هەژارانی ناو كۆمەڵگەكەی خۆی. راستە بەپێی ئەو ئامارانەی كە ساڵانە لەبارەی دیاردەی هەژارییەوە لەرۆژنامەو میدیاكانەوە دەیانخوێنینەوە، رێژەی هەژاری لەكوردستاندا، لەهەموو پارێزگاكانی عیراق و تەنانەت چەندین پارێزگای وڵاتانی وەك توركیا، ئێران، سوریا، لوبنان، فەلەستین، ئەردەن، میسر، یەمەن، كەمترە، بەڵام رێژەكە كەم بێت یان زۆر، پێویستە بەخەمیانەوە بین، بەتایبەتی ئەو خێزانانەی كە میدیاكان لەم مانگەدا رێككەوتیان ناكەن، بەدیاریكراویش ئەو ماڵانەی كە بەبێدەنگی ئازاری نەبوونی دەچێژن و عیززەتی نەفس رێیان نادات خۆیان بناسێنن. ئەوە ئەركی هاووڵاتیانە كە لەكۆڵان و گەڕەكەكانی خۆیاندا بیاندۆزنەوە، ئیشی خواپێداو و دەوڵەمەندەكانە كە زەكات و خێرەكانیان بەسەردا دابەشبكەن. میدیاكان ناتوانن لە هەندێ نموونەی زەق بەولاوە رووماڵی تەواوی ئەم دیاردەیە بكەن. زۆر خێزانی نەداریش هەن خۆیان نایانەوێت دەربكەون، بەڵام نابێت ئێمەش فەرامۆشیان بكەین.
