جگە لەكارنامەی كابینەی داهاتووی حكومەت، كە چاوەڕوان دەكرێت گرنگیی بە ناوچە كوردستانییەكان دابێت، بەتایبەتی لەبەر ئەوەی هێزێكی وەك یەكێتی، وەك لایەنێكی پێكهێنەری حكومەتەكە، ناوەندێكی نفوزی سیاسیی خۆی لەو ناوچانەدایە، ئەركێكی نەگۆڕو تەقلیدیی هێزە سیاسییەكانی هەرێم بەگشتی ئەوەیە كە، داكۆكی لەناسنامەی مێژوویی ئەو جیۆپۆلۆتیكە ئاڵۆزە بكەن، كە سەرزەمینی دۆزێكی مەركەزی و چەقی ململانێیەكی ستراتیژییە لەعیراقدا.
بێگومان راسپاردەیەكی وەها، وەك دروشم وایە ئەگەر لە تایتڵەوە نەكرێت بە پلان و پرۆژەیەكی هاوبەشی سیاسی، ئەگەر هێزە كوردییەكان - یەكێتی لێ دەربێنە - هەروەك جاران، بە تەماحی حزبییەوە، نەیانەوێت بچنە ناو هیچ هاوپەیمانێتییەكی سیاسیی نیشتمانییەوە.
دەرهێنانی یەكێتی لەم باسە، بۆ ئەوە نییە بەرپرسیارێتیی لەسەرشان هەڵبگیرێت، بەڵكو پەیوەندیی بەوەوە هەیە كە جیا لەهەر هێزێكی كوردیی تر، هەڵوێستی روون و راشكاوی هەیە بۆ ئەم پرسە ستراتیژییە. ئەمڕۆ ئەرشیفی میدیای كوردی و عیراقی هەڵبدەیتەوە دەیان بانگەوازی پێشوەختەی ئەم هێزەی تیایە بۆ ئەوەی لایەنە كوردییەكان، لەناوچە كوردستانییەكاندا یەك بن و وەك قەوارەیەكی كوردستانی لەبەرامبەر نوێنەرانی پێكهاتەكانی تردا، دەربكەون.
لەوە زیاتر، بۆ مێژوو دەبێ شایەتی بۆ ئەوە بدرێت كە خەیاڵدانی سیاسی و ستراتیژیی یەكێتی بۆ ناوچە كوردستانییەكان، لەمێژە بازنەی هێڵی ناسیۆنالیستیی تەقلیدی تێپەڕاندووە. خەیاڵدانی یەكێتی بانگەشەی روونی تیابووە بۆ پێكهێنانی هاوپەیمانێتی لەگەڵ هەر لیستێكی تری پێكهاتەكانیشدا كە بەشێك نەبن لەئەجێندای دەرەكی، یان لانیكەم دان بەكوردستانێتیی ناوچەكانی جێی ناكۆكیدا بنێن تا لە بەرامبەردا كوردیش پابەندیی تەواو بە هاووڵاتیبوونی عیراقییانەو مافی رەوای پێكەوە ژیان لەژێر تایتڵی عیراقی ئیتیحادیدا، بنوێنن. بە مانایەكی روونتر، بۆ داڕشتنی پرۆژەیەكی نیشتمانی و ستراتیژیی تایبەت بە ناوچە كوردستانییەكان، كێشەكە زیاتر لەگەڵ هێزە كوردستانییەكانی تردایە. لەدواین هەڵبژاردندا حزبی شیوعیی كوردستان، دركی بەگرنگێتیی ئەو پرۆژەیە كردو خۆی جیا نەكردەوە، ئەمما هێزەكانی ترمان، لەسەرویانەوە(پ.د.ك)، نەك هەر ماڵی جیاكردەوە بەداخەوە، بگرە چووە سەرخوانی سیاسیی ئەو بەشە لەنوێنەرانی پێكهاتەكان كە دان بە كوردستانێتیی ناوچەكانی جێی ناكۆكیدا نانێن، بەتایبەتیش لەكەركوك، لەوەش زیاتر تائێستا، بەرهەڵستكاری ئیدارەی پارێزگایەكی گەورەی وەك كەركوكن كە ئەمڕۆ كوردێك بەڕێوەی دەبات.
ئەو دۆخە، بێگومان، دەربڕی واقعێكی دڵخواز نییە، بەڵام نابێت ببێتە هۆی ساردبوونەوەو پەكخستنی مەهامی هێزێكی سیاسیی وەك یەكێتی خۆی كە هێزی نمرە یەكی ئەو ناوچانەیە. بایەخدان بەدانیشتوان و داخوازی و كێشەكانیان، ئاوەدانكردنەوەی شارو شارۆچكەكانی، پیشاندانی نموونەیەكی جیاوازی بەڕێوەبردن تیایاندا بەبێ جیاكاری بەرامبەر بەپێكهاتەكان، دەتوانێت هیچ نەبێت هاوپەیمانێتیی سیاسیی جێگرەوە لەداهاتوودا گرەنتی بكات، كە لەخزمەتی پرۆژەی نیشتمانی و ستراتیژیی كورد بێت لەو ناوچانەدا. لەو رووەوە، زەرورە سەرۆك و سەركردایەتیی یەكێتی، بكەونەگەڕو جوڵەو چالاكییان چڕبكەنەوە، لەكام شاریش دەسەڵاتیان هەبێت، خزمەتگوزاری و نموونەیەكی باشی ئاوەدانی پێشكەش بكرێت وەك ئێستا خۆشبەختانە، بەهەموو كۆسپێكیشەوە، لەكەركوك و خانەقین و خورماتوو، كەم كەم دەچێتە پێشەوە.
[email protected]
