هەلومەرجی گرژیی ئێستای شەقام لە توركیا، كە لەگەڵ خۆپیشاندانی دەیان هەزار لایەنگری جەهەپە بۆ پشتگیریكردنی سەرۆكی شارەوانیی ئیستەنبوڵ سەریهەڵداوە، وەكچۆن دۆسێی دەسەڵاتی قەزاو سەربەخۆبوونی دەوروژێنێتەوەو لەم وروژاندنەشدا زیندانیانی سیاسیی كوردی باكوور و رەوایی و ناڕەوایی دادگاییكردنیان دێنێتەوە بەرباس، ئاوهاش بەندكردنی ئۆغڵۆ و مامەڵەی توندی هێزە ئەمنییەكان لەگەڵ خۆپیشاندەران و دەستگیركردن و راگرتن و ئازاردانی دەیان و سەدانیان، سەرلەنوێ پرسی دیموكراسی و ئازادییە سیاسییەكانمان لەو وڵاتەدا بۆ گەرموگوڕ دەكەنەوە، هەروەك پێرێ تەنانەت رۆژنامەی فاینەنشاڵ تایمزی ئەمریكی-یش Financial Times بڵاوی كردبووەوە.
بەرژەوەندیی ستراتیژیی كورد لە توركیادا ئەوەیە، كە خواست لەسەر دیموكراسی و ئازادییە سیاسییەكان و رووبەری ململانێ ناوخۆییەكانی ئەو وڵاتە لەم پرسانەدا فراوانترببن، ببنە دۆسێی زۆرینەی خەڵكی وڵات نەك تەنها پێكهاتەی كورد، بگرە ئەم پرسانە، لەجێی دۆزە ئەمنییەكان، كە بەردەوام زیانیان لە گەشەی دیموكراسیی وڵاتەكە داوە، ببنە دۆزی سەرەكی.
راستە كورد كێشەكەی پەیوەستە بە پرەنسیپ و بەهاكانی مافی مرۆڤ و دیموكراسی و ئەندازەی پابەندبوونی دەوڵەت پێیانەوە. راستە خۆشبەختانەش وڵاتانی رۆژئاواو بە دیاریكراوییش ئەوروپا، هەمان چاوەڕوانی و هیوایان بۆ توركیا هەیە تا نەك پەنجەرەیەك، بەڵكو هەموو دەرگاكانی بەئەندامبوونی لە یەكێتیی ئەوروپا بۆ بخەنەسەر گازەرەی پشت، بەڵام لەوانە راستتر ئەوەیە كە ئەو پرەنسیپ و بەهایانە، ئەو چاوەڕوانی و هیوا دەرەكییانە بۆ دەوڵەتی توركیا، لە ئێستاوە لەهەر كاتێك زیاتر، ببنە هۆی جۆشدانێكی جیاوازی فەزای گشتی و سەرهەڵدانی مەیلێكی سیاسیی بەهێزی ناوخۆیی بەرەو دیموكراسی، هاوكات پاشەكشەی ئەنگێزەی ناسیۆنالیستیی تەقلیدیی توركی، یان لانیكەم بگۆڕێن بۆ ئاراستەیەكی سەرەكیی پەسەندكراوی كۆمەڵگەی سیاسیی بەرهەڵستكار لە تەواوی توركیا خۆی!. واتە، كورد، بەهۆی ئەم رووداوانەوە، ساڵ بۆ ساڵ، هاوبەشی سیاسیی زیاتری لەناوخۆدا بۆ دروستببێت، دەوڵەتیش لەژێر فشاری رەوتی بەرهەڵستكاریدا كرانەوەی سیاسی و گۆڕانكاریی دەستووری و ئاڵوگۆڕی دیموكراتییانە، هەرس بكات.
كورد لە باكوور، خۆیشی لەم دەرفەتە مێژووییەدا دەتوانێت ببێتە خاوەنی گوتارێك Discourse كە بڕێكی زۆر لەنەرمونیانی Flexibility تێدا بێت، كراوە بێت بەڕووی هەر هاوپەیمانێتییەكی سیاسیدا كە گرەنتیی مافە سیاسی و كولتورییەكانی بكات، لەمەشدا ژیرانە بچێتە ناو بۆندی سەرخستن یان خستنی هەر هێزێكی سیاسییەوە لە هاوكێشەی فەرمانڕەوایی وڵاتدا.
[email protected]
