ئەم ماوەیە، كورد، لەهەر چوار بەشەكەی كوردستاندا، كەوتۆتە ژێر چاودێریی وڵاتانی ناوچەكەو جیهانیشەوە. لە باكوور، لەلایەك پرسی چارەسەری ئاشتی و دەستپێشخەریی باخچەلی و ئیمرالی، لەلایەكی تریش بۆنەی نەورۆز و خۆپیشاندانەكانی ناو توركیا لەدژی دادگاییكردنی ئەكرەم ئیمام ئۆغلۆ، بەگشتی وایانكردووە كە حسابی زیاتر بۆ رۆڵی كورد لەو بەشە لەناو هاوكێشە سیاسییەكاندا، بكرێت.
لە رۆژئاوای كوردستان، پاڵپشتیی جیهان لە دەستوورێكی دیموكراتی و بەشداریی پێكهاتەكان و لەسەرویانەوە كورد لە پرۆسەی سیاسیی نوێی ئەو وڵاتەو رەخنەگرتن لە رەفتاری حكومەتی شەرع لە ناوچە عەلەوینشینەكان و پشتگیریی ئیسرائیل لە دروزەكان و ناڕاستەوخۆیش لە كورد، هاوكات رەتكردنەوەی دەستووری نوێی سوریا لەلایەن كوردانی رۆژئاواو هاوئاهەنگیی زیاتری نێوان هەسەدەو ئەنەكەسە، رۆڵیان هەیە لە زەقكردنەوەی زیاتری پێگەی ئەو بەشەی تری كوردستان لەناو رووداوەكاندا.
لە رۆژهەڵاتی كوردستانیشدا، گێڕانی ئاهەنگی نەورۆز لە شارە جیاجیاكانداو بە گەرموگوڕی و بەكەژاوەی جەماوەریی كەموێنە، لەبەرامبەریشدا كرانەوەی كۆماری ئیسلامیی ئێرانیش بەرووی هەندێ سروتیی سیاسیی ئاهەنگەكاندا كە ساڵانێك پێش ئێستا رێگەپێدراو نەبوون، دەرخەری ئەوەیە كە كورد لەو بەشەی كوردستانیش لە قۆناغێكی نوێی گوزارشتكردنە لە تایبەتمەندێتی و ناسنامەی خۆی و دەوڵەتیش مامەڵە لەگەڵ قۆناغەكەدا دەكات، بەتایبەتی كە تاران پیلانی دەرەكیی زۆری لەسەرە.
لە باشووری كوردستانیش، خێرابوونی جموجوڵەكانی پێكهێنانی كابینەی نوێی حكومەت و چارەسەری رێژەیی بۆ پرسی مووچەو كاركردن بۆ یەكخستنی هێزی پێشمەرگەو هاوسۆزیی بۆ كێشەی پارچەكانی ترو هەناردەكردنەوەی نەوت لەژێر كۆنترۆڵی سۆمۆو پلانی خەرجكردنی داهاتەكەی بۆ مووچەخۆرانی هەرێم، سەرلەبەر دەربڕی رستێك ئاڵوگۆڕی سیاسین كە سەرچاوەكەیان ئەوەیە هەمووان لەوە گەیشتوون كە عیراق و ناوچەكەش لەبەردەم پێشهاتی جیاجیادایە، كوردیش لەم بەشەدا نابێت بە نەفەسی تیروشیر لەیەكترسواندنی ماوەی بانگەشەی هەڵبژاردن و گرژییە میدیاییەكانی، مامەڵە بكات، ئەمە نەك تەنها بۆ پەیوەندیی نێوان یەكێتی و پارتی، بەڵكو بۆ نێوان دەسەڵات و ئۆپۆزسیۆن و تەواوی هێزە سیاسییەكانیشمان.
لەدەرەوەی پارچەكانی كوردستان، كورد لە تاراوگەو دنیای پەڕاگەندە-ش Diaspora لەجۆرێك لەجۆشوخرۆشی كوردانەدایە بۆ دۆزی كورد لە هەموو بەشەكانی كوردستاندا. ئەمڕۆ هەستێكی ناسیۆنالیستیی پۆزەتیڤ هەیە كە كوردانی تاراوگە لەدەوری یەكتر كۆدەكاتەوە، بەتایبەتی بۆ پشتگیری لە باكوورو رۆژئاوای كوردستان كە بە هەلومەرجێكی سیاسیی زۆر هەستیارو چارەنووسسازدا تێدەپەڕن.
بە مانایەكی روونتر، ئێستا بەهەموو ئاراستەكان، دۆزی كورد لە ناوچەكە چۆتە پێشەوە، بەڵام رێگاكەش پڕوكێنەرەو پڕیشە لە مینی سیاسی!. مامەڵەی عەقڵانی لەم ماوەیەدا، ئەوەیە كە لەهەموو بەشەكانی كوردستانەوە پشتگیری لەچارەسەری سیاسی و دەستووری كێشەی كورد بكرێت. كورد لە پیلانی راستەوخۆو دژبەیەكی هێزە هەرێمایەتی و جیهانییەكانەوە نەگلێت. دەرفەتەكان بخوێنێتەوەو بژاردەكان بناسێت و لانیكەمی هەماهەنگییش هەبێت بۆ ئەوەی هیچ پارچەیەكی كوردستان هەست بە تەنیایی و بێ پشتیوانیی نەكات، هیچ نەبێ لەناو قەومەكەی خۆیدا !.
[email protected]
