كۆنفرانسەكانی دووەمین دیداری یەكێتی بەردەوامن و ئەمڕۆ لە كەركوك دەبێت. رێژەی بەشداربووان تیایاندا، چەند بۆ حزبەكە دڵخۆشكەربێت، ئەوەندەش ئەركی سەرشانی قورسدەكات، بەتایبەتی لەبەرئەوەی زۆرێ لەو كەس و ئەندامانەی كە گفتوگۆی تەوەرە جیاوازەكانی ئەو سێكتەرانە دەكەن كە لەهەر كۆنفرانسێكدا دیاری دەكرێن، بەو گرەوەوە دێن كە، چ وەك خەڵكی پەیوەندیدار، یان پسپۆڕ، گوێیان لێبگیرێت و تێز و رەخنەكانیان لەناو هەر پرۆژەیەكی چاكسازیدا رەچاو بكرێن، بەتایبەتی كە گریمانەكە، لەبنەڕەتدا، ئەوەیە كە چاكسازی لە حزبی فەرمانڕەوادا، دەشێت ببێتە مایەی چاكسازی لە ئەدای فەرمانڕەواییش، دۆخی فەرمانڕەواییش لەكۆتاییدا پەیوەندیی بە كۆمەڵگەوە هەیە بەگشتی، نەك هەر حزبە فەرمانڕەواكان و ئەندامانی خۆیان، بۆیە سەیرنییە بەشێك لە بەشداربووانی كۆنفرانسەكانی دیداری یەكێتی، یان ئەوانەی لەبارەیەوە دەدوێن و دەنووسن، هەر یەكێتی نین.
ئەوەی كە هەندێجار لەمیانەی كۆنفرانسەكانی دیداردا، جێی سەرنجە و پێویست دەكات كە لیژنەی باڵا بەدوایدا بچێت، هەندێ پڕوپاگەندەی لابەلایە كە هەر لەسەرەتاوە، لێرەو لەوێ، لە ناحەزانی سیاسییەوە بن، یان ركابەران، لەبارەی ئامانجەكانی دیدارەوە دەوترێن و لە هەندێ هەژمار و پەڕەی تۆڕە كۆمەڵایەتییەكان و هەندێ شوێنی گشتیدا باس دەكرێن. لەو پڕوپاگەندانە، بۆ نموونە ئەوەی كە دەڵێت ئەم دیدارە ئامانجی تری هەیە كە رانەگەیەنراوە!، لەوانە: بە ئامانجگرتنی ئەم یان ئەو ئۆرگانی حزب، ئەم یان ئەو سەركردەی یەكێتی، ئەم یان ئەو بڕیار و رێنمایی و هتد.. لەوەش زیاتر، وێناكردنی دیدارەكە وەك ئەوەی پرۆژەی كۆمەڵێك هەڤاڵ بێت بێ ئەوانیتر و تایبەت بە كارنامەی هەندێ سەركردە بێت بەدەر لە سەركردەكانی دیكە!، ئەمە لەكاتێكدا كە هەموو تەقریبەن ئەوە دەزانین كە دیدار بۆنەیەكی حزبیی كراوەیە تائێستا، كراوە هەر بۆ یەكێتییەكان نا، بەڵكو بۆ هەر كەس و هاووڵاتییەك كە پسپۆڕییەكی دیاریكراوی لە سێكتەرە جیاوازەكاندا هەبێت و بیروڕای خۆی پێشكەشی یەكێتی بكات وەك حزبێك كە لە دەسەڵاتدایە و لەبەردەم ئیستحقاقی پێكهێنانی كابینەی نوێ و گەڕێكی نوێی شەریكایەتیشە لە فەرمانڕەوایی.
ئەو پڕوپاگەندە لابەلایانە، ئەگەرچی تائێستا كاروانی كۆنفرانسەكان و بەشداریی ئامادەبووانیان خاونەكردۆتەوە، بەڵام باشتروایە ناڕاستەوخۆش بێت، وەڵام بدرێنەوە. راستە بەشێك لە وەڵامەكان لە داهاتووی كاری حزبایەتی و حوكمڕانیی یەكێتیدا بەدیار دەكەون، بەڵام روونكردنەوەی زیاتری هەڵوێستەكان یارمەتیدەرە بۆ ئەوەی دردۆنگی و گومان، یان واتەواتی خاڵی لە زانیاری، نەمێنێت، رەنگە ئەمەش بەو ئالیەتە بەدیبێت كە لەدوای هەر كۆنفرانسێك، پەیامێكی پڕ لە زانیاریی پێویست لەسەر كار و هەنگاوی كۆنفرانسەكانی دیدار، بڵاوبكرێتەوە.
[email protected]
