47
لە نووسینێکی پێشوومدا باسی نازناوی وەستام کرد کە لای ئێمە هەندێک خەڵک دەستیدایە پیشەیەک یەکسەر ناوی وەستا لەخۆی دەنێت بێئەوەی هیچ بەهرە و شارەزاییەکی لەو پیشەیەدا هەبێت و حەرفێکی لەبارەوە خوێندبێت، هەیە بە مەبەستی دەستکەوتی خێرا زوو زوو پیشەکەی دەگۆڕێ و بێ هیچ شارەزاییەک لە هەمووشیاندا وەستایە و کەسیش لێی ناپرسێتەوە بۆچی و چۆن؟ لە شاردا ئەم کار و پیشانە شارەوانی رێکیدەخات و بەبێ مۆڵەت کەس بۆی نییە پیشەکەی لە کورتان دوورینەوە بکات بە خەیاتی، بەو پاساوەی کە هەردووکیان ئەهلی تەقەڵن!.
لەم بوارەدا لای خۆمان فرەگوتن بێسوودە و زستانی ئێمە ساردە و بڕایەوە، لە سەردەمێکدا رێم کەوتە ئەم ئێرانەی دراوسێمان، کە زۆرێکمان سەردانی دەکەین هەریەک بۆ مەبەستێک، پیاو راست بڵێ لەم وڵاتەدا، سەرباری دەردەکانیشی، هەندێک جومگەی بنەڕەتی مەعافە و کەس گلەیی لێ نییە، بۆ نموونە ئاو، کارەبا، بەنزین، غاز بۆ گەرمکردنەوە و پێداویستیی دیکە، هێشتا بەم دۆخە سەختەش لە نرخی تۆڵەکەدایە و کوێرە دێیەکیش لێی سوودمەندە، ئەم بارە پێی دەوترێت ژێرخانی ئابووری و دەبێتە هۆکاری بەرگەگرتن لە هەر رەشەبا و زریانێکدا.
مەسەلەیەکی دیکەش سەرنج رادەکێشێت و ئەویش هەر دەچێتە خانەی ژێرخانەوە کە بە عەرەبی پێی دەگوترێت (بینای تەحتی)، لەم وڵاتەدا دەزگایەکی راهێنان و خوێندنی تیۆریی و پراکتیکی مامەڵە لەگەڵ بواری پیشەگەریدا دەکات کە بە فارسییەکەی ناوی (مراکز فنی و حرفەای)یە و ئێمەش و خەڵکی عەرەبی زمانیش باش لێی تێدەگەین. نزیکەی هەموو شارێکی ئێران ناوەندێکی وای تێدایە و ئەرکی پێگەیاندنی پیشەگەری شارەزا و کارامەیە، بە واتا وەستا.
لەم ناوەندانەدا وەرشەی فێربوونی کار و پیشەی ئاو، کارەبا، دارتاشی، جۆشکاری، ئاسنگەری، فیتەری، جلوبەرگ دوورین، کۆمپیوتەر تا دەگاتە رۆبۆت و هەموو جۆرە پیشەیەکی دیکە کە تۆ بە خەیاڵتدا دێ و بینا و ساختمانی تۆکمەی بۆ سازکراوە بە بەشی ناوخۆییشەوە، خوێندکار لێرە لە ماوەی چەند مانگێکدا دەبێت 400 سەعات بخوێنێت و راهێنان بکات، کە 150 سەعاتی تیۆری و 250 سەعاتی پراکتیکییە، بە هەماهەنگی لەگەڵ رێکخراوی کاری نێودەوڵەتیداInternational Labor Organization کە بارەگاکەی لە وڵاتی نەمسایە.
وەزارەتی کاری ئەم وڵاتە سەرپەرشتیی تەواوی پرۆسەکە دەکات و ئەم راهێنانە هەر لەکۆڵکردنەوە نییە و زۆر جدین تێیدا و دوا تاقیکردنەوەش ئەو رێکخراوە نێودەڵەتییە دەیکات و کوڕ و کچی هیچ کەسێک ناتوانێ بە موو لێی لابدات، دوای ئەمە مۆڵەتی کار و پیشەت دەدەنێ و دەتوانیت لەو بوارەدا کە هەڵتبژاردووە کاری خۆت بکەیت و هێندەت زانیاری وەرگرتووە و راهێنانت پێکراوە کە لە پیشەکەتدا شوورەیی و حەرام بێت دەستی هاووڵاتییەکانی خۆت ببڕیت. جا بزانم کەس دەتوانێت کارەکەی خۆی لە تەماتە فرۆشییەوە بکات بە کۆمپیوتەرسازی، لەگەڵ ئەوپەڕی رێزم بۆ هەموو کارێکی شەرەفمەندانە.
