48
کۆمەڵگە پیس لێی قەوماوە، هەموو دەرد و بەڵایەک رووی تێکردووە و کەسیش خۆی لێ تێناگەیەنێت و هەر رووداوێکی ناخ هەژێنی وەک ئەوەی لەم چەند رۆژەدا لە هەولێر و گوندی گرێزەی شارەزوور روویدا، لە هەر شوێنێکی دیکەی شارستانی و ناشارستانیشدا رووبدات قسە و باسی زۆر لێدەکرێت و دەبێتە مایەی لەسەر وەستانێکی جدی و لە گەلێک رەهەندی کۆمەڵایەتی، ئابووری، سیاسی، دەروونی و...هتد، شیکردنەوەی بۆ دەکرێت، نەک هەر کەفوکوڵی چەند رۆژێکی راگەیاندن و سۆشیاڵ میدیا و پۆلیس گرتی و درایە دادگا یان هەڵات و ئاو بێنە و دەست بشۆ.
بێگومان ئەم هەواڵە دڵتەزێنە نانیشێتەوە و خێرا یەکێکی دیکەی بەدوادا دێت لەوی پێشوو سەختتر و سامناکترە و زمانحاڵی خۆمان و دامودەزگا پەیوەندیدارەکانیشمان هەر بەداخەوە و خوا خراپتر نەدا و ئاگرە سوورە لە خۆم دوورەیە، کە دووریش نابێت و هەر یەک لە ئێمە لەو بازنەیەدایە کە ئەمڕۆ تووش نەبێت سبەی بەرۆکی دەگرێت.
لە وڵاتێکدا کە چەک لە تۆڵەکە هەرزانتربێت و لای هەموو گروپێک و تاکەکەسێک هەبێت و هەمووشی نەوەی زنجیرەیەکی بێبڕانەوەی جەنگەکان و شەڕ و کوشتارەکان بێت، جا با هەرچی سیفەتی رەوا و ناڕەوایە بیدەینە پاڵیان، کە نە لە رەواکەی خێرمان بینی و نە لە ناڕەواکەی و هەمووشی لە ماڵوێرانی بەولاوە هیچی بۆ نەهێناین. خراپترینەکەشی ئەمەیە کە ناخی تێکشکاندوین و هەزاران دەردی دەروونی و کۆمەڵایەتیی توشکردووین. دەردی هەرە کوشندەش ئەوەیە هێندە خۆشەبووین و لەگەڵی راهاتووین هیچ شتێک لە شوێنی خۆمان نامان بزوێنێت و کار واکەوتووەتەوە سەری زمانمان هەر کوشتن و بڕین بێت.
ئاخر هەی داد ئێمە تائێستاش هەر بە دەست ئاسەواری تاککوژی و کۆمەڵکوژییەکانمانەوە دەناڵێنین و زامی هیچیان ساڕێژ نەبووە و پاساومان بۆ ئەو مێژووە نزیکە ئەوەیە کە دوژمنانمان پێیان کردوین و تاوانی ستەمکاران بووە. باشە ئەی ئەمەیان چییە و بۆ خۆمان بەم جۆرە ریسوا کردووە؟ جاران و ئێستاشی لە گەڵدابێت هەر بە ژنکوژی ناومان دەکردبوو و بووبووینە گاڵتەجاڕی هەموو دنیا و دزی و تاڵانی و بازرگانیکردن بە هەموو مۆراڵ و بەهاکانمانەوە رەوایە و ئەوی دیکەی خەوش و لەکەیە بۆ شەرەفمان! وایلێهاتووە ئێستا کار گەیشتووەتە کوشتنی بە کۆمەڵی باوک و دایک و برا و خوشک و خەزوور و خەسوو و ژنخوشک بە دەستی نزیکترین ئەندامانی خێزان!.
راستییەکەی بێجگە لەم هەموو هۆکارانە قەناعەتم وایە ئێمە رەنگە هەر ماک و نەریتی مرۆڤ کوشتن و تاڵانی و راوڕووتمان بە رەچەڵەک بۆمابێتەوە کە خووی مێژووی دوور و نزیکمان بووە و تائێستاش مێژوو باسمان دەکات، خێڵە کوردەکان چ دەردێکیان داوە بە سوپا 10 هەزار کەسییەکەی زەینۆفۆن و چۆنیان تاڵانکردوون. ئێمە لەو سەردەم و زەمانەوە هەر وامانهێناوە تائێستا و ئەم مێژووە نوێیەشمان شایەتە. بەرگی نوێمان لە بەردایە و ئۆتۆمبێلی نوێمان پێیە و دەمێکە لە رەشدەوارەوە گواستوومانەتەوە بۆ خانووبەرەی نوێ و دەمێکیشە دەستبەرداری ژیانی کۆچەری بووین و زۆر دەمێکیشە لە ژیانی مرۆڤی نیاندەرتاڵ دوورکەوتووینەتەوە، بەڵام رەفتارمان هەر ماکی مرۆڤەکەی ئەشکەوتی شانەدەری تێدا ماوە و هەرجارە و لە یەکێکماندا رەنگدەداتەوە کاتێک دەستی دەچێتە باوکی خۆی و دەیکوژێت!.
