بەباوەڕی من رەخنە تەنها چەکی نووسەرە، کە لەڕێگەیەوە دەیەوێت وێڕای نیشاندانی برین و خەمەکان، تانەش لە هەموو ئەوانە بدات، کە چەکی دەسەڵاتیان بەدەستە و ناتوانن یان نایانەوێ بە ئەرکی خۆیان هەستن، قانعی شاعیر تەنێ شیعری شک دەبرد بۆ ئەوەی لەڕێگەیەوە رەخنە کۆمەڵایەتی و سیاسییەکانی بنووسێ، کەلەپچەکەی کە دەکرایە دەستی، یان کە لە گوندێک پەڕاگەندە دەکرا، لە شوێنی سەرترەوە بوو، لەو شوێنەی لە رەخنە ناگەن، من کە سەیری کەرکوک و هەڵەبجە دەکەم، دەمەوێ زۆر بە رەقی رەخنە لەو خۆدەسەڵاتییە بگرم، کە لەو هەموو ساڵەدا دەکرا زۆر کار بکات و نەیکرد، دەسەڵاتدارانی کورد قەرزاری زۆری کەرکوک و هەڵەبجەن، قەرزاری زۆری ئازاد هەورامی و عومەری خاوەرن، با هەر ئەم دوو ناوە بەس بێت، دەنا سەدان ناوی درەوشاوە هەن، خزمەتی کەرکوک و هەڵەبجە بەردی بناغەی ناویست، ئەرک بوو، ئەرکە.
ئێستا کە یادی پڕ ئازاری هەڵەبجە دەکەینەوە و لەو مانگی ئادارە پڕ ئازار و ئومێد و هیوایەداین، شازدەی سێ بۆنی سێو هەناسەمان تەنگ دەکات و بیستی سێ ئامێز بە بابە گوڕگوڕدا دەکەین و بیست و یەکی سێ، بۆنی نێرگزی نەورۆزی سییەکانمان لە بۆنی خەردەل و سیانید پاک دەکاتەوە، لە کوێی دنیاو کام نەتەوە، رۆژەکانیان بەو جۆرە رەنگڕێژن، رۆژێ رەشی سەراپا و رۆژێ سوور و زەرد و سەوز و ئاڵ و واڵا، ئەگەر هەڵەبجە هێشتا برینێکی قوڵی دیرۆکی کوردەو زۆرجار لەو بەغدایە کورسی نشینانی دەسەڵات بیریان دەچێت ناوی بێرن، کەرکوک و رزگارکردنی لە چنگی بەعس، پاش چوار رۆژ لە یادی ئەو برینە، شانازییەکی گەورەی کوردبوونی ئێمەیە، ئەو کوردبوونەی بەوهەموو کەند و لەند و کێماسیەشەوە، هەر جوانەو دەدرەوشێتەوە.
سێ رۆژ پێش یادی ئازار، بەردەوامی هەڵەبجە بۆ پرسەی جوانخاسێ لەو شارە بووین، راستە مۆنیمێنت و گۆڕستان و عومەری خاوەر و زۆر سیمای خەمزەدەی دیکەی تێدایە، بەڵام کەمتر بۆنی ژیانی لێدێت، ئێمە وەک چۆن بۆ کەرکوک ژیان و جوانیمان دەوێت، بۆ هەڵەبجە زیاتر، ما هەڵەبجە ئەو پارێزگا نازدارە بێنازە نییە، کە تائێستا پرسی بە پارێزگابوونەکەی لە نێوان پەرلەمانی عیراق و حکومەتەکەیدا ئەم بەر و ئەوبەری پێدەکرێت، پرسی بە پارێزگا بوون بۆ شارەکەی گۆریان و بامۆکی و سەباوی چیرۆک و عومەر عەبدول و ئاراس عابد و زۆر ناوی تر نەمنەتەو نە ئازایەتی، دیرۆکی ئەو شارە، بێ کیمیایی بارانەکەش هەڵدەگرێت بکرێتە پارێزگایەکی بە شکۆ، شەرم و شورەییە ئەم بابەتە ئەوەندە بێنەو بەرەی پێوە بکرێت.
بۆ کەرکوکە قودس و دڵەکەش، کە کاتی خۆی حزبی دیکەش دەیانویست لە داخی لایەنگەلی دیکە بەناوی ئەندامێکی دیکەی جەستەی بکەن، هیچ دەلالەتێک یان ئاماژەنمایەک لەوشارە نابینرێت، کە رۆژی رزگاریمان نیشان بدات، پەیکەری پێشمەرگە شکۆدارەکەش هێشتا بەناچاری ئاڵای دیکەی بەدەستەوەیە و ئاڵای کوردستانیش لەلایەن پلەداری سەربازییەوە نیشانەی تفەنگی لێدەگیرێت.
ئێمە هەموو ساڵێ هیوادەخوازین کە ساڵی دادێ کەرکوک و هەڵەبجەیەکی جیاوازتر لە ساڵی بەرێ ببینین.
