لە سەرەتای ئەم مانگەدا، هاکان فیدان لە تورکیا هەریەک لە راکان جبوری، خالید مەفرەجی، حەسەن تۆران-ی بینی بوو، هەر ئەودەم لە سەرچاوەیەکی ناوخۆیانەوە، پێیان وتم گوایە هاکان فیدان بۆ پەرلەمانی عیراق لە عەرەبی سوننەی کەرکوک، ریزێک ناوی دیاری کردووە، ناوەکانیشم بۆ هات، خۆی ئاسایی نییە دەر و دراوسێ دەس لە کاروباری ناوخۆی وڵاتانی تر وەر بدەن، لێ پێدەچێت، بەهەمان ئاوەزی عوسمانی نوێ و لەسەر میراتی پێنج سەت ساڵەی عوسمانی ئەمە بۆ تورکیا ئاسایی بێت، چونکە بابەتەکە هەر لە عیراق نییە، لە سوریا و سودان و لیبیا و شوێنگەلی دیکەشە، ئەگەر ئەم دەستوەردانە بۆ چارەسەری کێشە نێوخۆییەکان و بۆ پێکەوەژیانی ئاشتیانەی نێوان کورد و عەرەب و تورکمان بێت هەر نەیسە، لێ بۆ ئەوە نییە، بۆیە جێی خۆیەتی رووی رەخنە لە تۆران و جبوری و مەفرەجی بێت، ئێوە بۆ لە کەرکوک و لەگەڵ کەرکوکییەکان کێشەکە چارەسەر ناکەن، بۆ دەیبەنە بەردەم عەرشی هاکانی؟.
کەرکوک پێویستە لە ناوخۆیدا بە دوای دەرفەتی پێکەوەژیان و پێکەوە کارکردن و هەرەوەز و هاوکاریدا بگەڕێت، نەک لەشوێنی تر، ئەوان لەناو خۆیاندا لەهەر کەس زیاتر یەکتر دەناسن، دڵنیام کەسێتییەکی هێژای وەک خالید مەفرەجی کە پیاوێکی ناسراوەو کورد و تورکمان و عەرەب رێزی دەگرن، لە کەرکوک دەتوانێ رۆڵی زیاتری ئاشتیانە و پێکەوەیی ببینێت، نەک لە ئەستەنبوڵ و ئەنقەرە و تاران، هەروەها ئەو لەگەڵ رێبوار تەها زیاتر لەیەک حاڵی دەبن، نەک لەگەڵ کەسێکی دەرەوەی سنوورەکە، ما نەوتراوە (شعب مکە ادری بشعابها)، کەرکوکی لە هەر کەسی دیکە زیاتر یەکدی دەناسن.
کورد لەهەموو ئەوانی دیکە زیاتر باسی پێکەوەژیانی کەرکوکییانە دەکات، بۆ چارەسەری هەموو ئەو کێشانەی لە کەرکوکیش هەن، هەرگیز پەنای نەبردوەتە بەر دەرەوە، رەنگە ئەمە هەنگاوێکی ئەرێنی بێت، بۆ ئەوەی ئەوانی دیکەش چاوی لێبکەن، خەڵکی کەرکوک لە خەڵکی شوێنی تر زیاتر خاوەنی یەکترن، کاتێک ئەحمەد داود ئۆغڵو سەردانی کەرکوکی کردو وتی من هاتووم بۆ لای کەس و کار و خزمانی خۆمان، چاوەڕێ بووم تورکمانێک بڵێت کەس و کاری ئێمە کورد و عەرەبی شارەکەن، نەوترا، من هەر ئەودەمیش لەسەر قسەی داود ئۆغڵو سەرنجی خۆم نووسی، بۆ خالید و راکان و تۆران، کەس لە خەڵکی کەرکوک نزیکتر نییە، بۆیە هەق نەبوو لە شوێنی تر دەستیان رابکێشرێت.
خەڵکی کەرکوک، رۆشنبیر و سیاسی و مەلا و کەسایەتیی کەرکوک، پێویستیان بە دۆزینەوەی زمانی هاوبەشە، بۆ نیشاندانی برینی خۆیان بە یەکتر، لەناو کەرکوکدا و لە هەموو پێکهاتە و ئاوەزەکاندا، خەڵکی ئاوەزمەند و بیرکەرەوە هەن، کە چارەنووسی ئەو شارەیان پێ گرنگە، بۆیە هەقە ئەو ئاوەزمەند و بیرمەندانە لێرە لە دەوری یەکتر بن، نەک لەبەر دەست و فەرمانی خەڵکی تردا.
