دیدار، وێستگەیەك بۆ رێكخستنەوەی كاری حزبی

یەكێتی وەكو حزبێكی نوێگەر، هەردەم چاوەڕوانی هەنگاوی لەم جۆرەی لێكراوە، هەوڵ دەدات، لەگەڵ گۆڕانكارییە سیاسییە ناوخۆیی و هەروەها هەرێمی و جیهانییەكاندا خۆی ئەبدەیت بكاتەوە بۆ ئەوەی بتوانێت لەگەڵ ئەو گۆڕانكارییانەدا رێبكات و خۆی بگونجێنێت

دیداری دووەمی یەكێتیی نیشتمانیی كوردستان، كە شەمەندەفەرەكەی زۆربەی شار و شارۆچكەكانی هەرێمی كوردستانی بڕیوە، سبەی دەگاتە سلێمانی، بۆ تەواوكردنی گفتوگۆی هەڤاڵانە و ئاڵوگۆڕكردنی بیروڕاكان، سەبارەت بە سیاسەتی داهاتوو و پەیڕەو پڕۆگرامی یەكێتی.
هەنگاوێکی تازە و مۆدێرن
 دیداریش وەكو هەنگاوێكی تازەو مۆدێرن دێت لە ئاستی هەرێمی كوردستان و عیراقدا، بۆ تاوتوێكردنی سیاسەت و جووڵەی یەكێتییە، وەكو حزبێك لەسەر گۆڕەپانی سیاسیی، ئەمەش بۆ یەكەمجارە كارێكی لەو شێوەیە بكرێت، لەلایەن حزب و رێكخراوێكی سیاسییەوە، یەكێتیش مەبەستێتی لە رێگەی ئاڵۆگوڕكردنی راوبۆچوونەوە لە نێوان سەركردایەتی و كادیران و قاعیدەی حزبی و ئۆرگانەكانی حزب، سیاسەتی ئایندەیی یەكێتی لەناوخۆ و لەسەر گۆڕەپانی سیاسیی هەرێم و عیراق دابڕێژێتەوە.
ئەنجامدانی دیداری ئەمساڵیش، دوای سەركەوتنی دیداری یەكەم دێت، كە بەشێك لە بڕیارەكانی چوونە بواری جێبەجێكردنەوە و كار بۆ ئەوەش دەكرێت، ئەو بڕیار و خاڵانەی لەم دیدارەشدا لە رێگەی گفتوگۆی هەڤاڵانەی نێوشار و ناوچە جیاجیاكانەوە هەڤاڵان پێی دەگەن، بكرێن بە هەوێنێك بۆ باشتركردن و دەوڵەمەندكردنی كارو سیاسەتی یەكێتی وەكو حزب و بەهێزكردنی شووناسی سیاسیی و كۆمەڵایەتی حزبیش.
وەک حزبێكی نوێگەر
یەكێتیش وەك حزبێكی نوێگەر، هەردەم چاوەڕوانی هەنگاوی لەم جۆرەی لێكراوە، هەوڵ دەدات، لەگەڵ گۆڕانكارییە سیاسییە ناوخۆیی و هەروەها هەرێمی جیهانییەكاندا خۆی ئەبدەیت بكاتەوە بۆ ئەوەی بتوانێت لەگەڵ ئەو گۆڕانكارییانەدا رێبكات و خۆی بگونجێنێت، هەوڵیش دەدات دیدار بكات بە كەرەستەیەك بۆ خۆنوێكردنەوە و باشتركردنی كارەكانی خۆی، ئەمە چ جای چارەسەركردنی هەر خۆش و كێشەیەك كە پێشتر رووبەرووی بووبێتەوە.
سبەی چوارشەممە، دیدار دەگاتە سلێمانی و كۆنفرانسی سلێمانی- چەمچەماڵ بەڕێوەدەچێت، دوای ئەوەی كۆنفرانس لە موسڵ و بادینان و كۆیە و هەولێر و گەرمیان- خانەقین و شارەزوور ئەنجام درا، بڕیارە دواتریش كۆنفرانسەكانی راپەڕین و كەركوك- دوزیش بكرێت، بۆ ئەوەی دواجار  دیدارە گەورەكە بە ئامادەبوونی سەرۆك بافڵ جەلال تاڵەبانی ببەسترێت و خاڵە بڕیارلێدراوەكانی دیدار جێگیربكرێت.
دواجار دیداری یەكێتیی نیشتمانیی كوردستان، بەهەوڵ و هیممەتی یەكێتییەكان، دەبێتە بناغەیەكی پتەو بۆ بەهێزبوونەوەی ئەم حزبە لەسەر ئاستی هەرێمی كوردستان و عیراق و ناوچەكە.