سەرۆکی یەکێتیی نیشتمانیی کوردستان، بافڵ تاڵەبانی، ئەوەی لە چەند گردبوونەوەیەکی بانگەشەدا(کاتی شکاندنی مایکەکان) وەک لە تۆڕە کۆمەڵایەتییەکان وەک تەشەر باسی دەکەن، بەخەڵکی وت، بەڵێندان بوون بە مەرج، ئەو چەند جارێک وتی دەنگمان بدەنێ و تاقیبکەنەوە، ئەگەر دەنگی پێویستمان هێنا، هەرچی تاکڕەوییە رایدەگرین، دەیگۆڕین. نەیووت دوای هەڵبژاردن بە داری سیحرییەوە تووشی شۆکتان دەکەین و کۆتایی بە پارتی دیموکراتی کوردستان دەهێنین(چونکە دەیزانی ئەوە مەحاڵە)، بەڵکو وتی لە رێگەی بەدەستهێنانی کورسیی زۆرەوە دەسەڵاتمان لە پەرلەمان و حکومەتدا دەبێت و رێگریی دەکەین لەوەی کە ئێوە دەتانەوێت روونەدات و کێشەکانتان چارەسەر دەکەین.
لە هەموو جیهان هەروایە، ترەمپ و بایدن رووبەڕووی یەک، چەندین تۆمەتیان خستە پاڵ یەکتر لەکاتی بانگەشەدا لە مانگی سێپتەمبەری ساڵی رابردوو.
کەسی یەکەمی حزب کاتێک بەڵێن دەدات داواش دەکات، دەڵێ ئەگەر دەنگمان بدەنێ وادەکەین. بانگەشەی (شکاندنی مایکەکان)، بۆ سەرۆکایەتی هەرێم نەبوو، بەڵکو بۆ پەرلەمانی کوردستان بوو، ئەمیش پێویستی بە هەرچی زۆرتر کورسییە تا بتوانیت بەڵێنەکان جێبەجێ بکات.
ئەوانەی دژ بوون ئێستا گلەیی دەکەن
زۆرێک لە هاووڵاتییان، دەنگیان بە یەکێتی نەداوە، بەڵام ئەمڕۆ سوشیال میدیاکانیان تەنیوە و دەپرسن کوا بەڵێنەکانی کاک بافڵ؟ ئاخر ئەوانەی کە دەنگیان داوە بەم حزبە مافی خۆیانە لێپێچینەوە بکەن لە ئەنجامی دەنگەکانیان و هەنگاوەکانی یەکێتی بۆ پێکهێنانی حکومەت، بەڵام گێرەشێوێنێک تا دواساتەکانی هەڵبژاردن خەریکی پاشقول گرتن بووبێت لە یەکێتی، ئیتر ئێستا چ مافێکی هەیە لێمان بپرسێت کوا بەڵێنەکانتان؟ بەڵام هێشتا لێرەوە وەڵامی ئەوە دەدەمەوە کە بەڵێنەکان بە کوێ گەیشتن.
سەرەتا دەبێت هەمووان دان بەوەدا بنێن کە حزبی براوەی زۆرینەی کورسیی لە پەرلەمان، مافی قسەی یەکەمی هەیە، واتا ئەو دەبێت رازی بێت بە خواست و مەرجەکانی حزبی براوەی دووەم و سێیەم.
ئەمە راستییە دەبێت هەمووان بیزانین. لەسەروو ئەمەشەوە، جوگرافیای سیاسیی هەرێمی کوردستان دوو بەشە، هەردوو بەشەکەش هاوسەنگ نین لە پەیوەندییەکانیان لەگەڵ بەغدا و هەریەکەیان بە جۆرێکە، هەردووکیشیان پەیوەندیی دەرەکییان جیاوازە و پێچەوانەی ئاراستەی یەکن، هەرێم و بەغداش، لەژێر کاریگەریی ئەمریکادان و ناتوانن لێی دەربچن، ئەمریکاش نەخشەڕێی سیاسیی ناوچەکە دادەڕێژێت لەم سەردەمەدا کە تیایداین، وڵاتانی ئیقلیمییش هەژموونیان لەسەر رەوتی سیاسیی هەرێم هەیە.
ئەگەر ئەمانەمان لەبەرچاو گرت، دەبێت بزانین کە ململانێ سیاسییەکانیش بە ئاسایی ناڕۆن، کۆنترۆڵێک هەیە کە پارسەنگەکان دەپارێزێت و ناهێڵێت هیچکامیان زاڵ بێت بەسەر ئەوی تردا، هەرچۆن ئێستای سوریایان کۆنترۆڵ کردووە.
لە عیراقدا یەک هەرێمی فیدراڵی هەیە و بەپێی دەستوور ناوی هەرێمی کوردستانە و پایتەختەکەی هەولێرە و بەغداش مامەڵە لەگەڵ ئەو حکومەتە دەکات بەپێی دەستووری عیراق.
مەحاڵە لەم هەرێمەدا، یەکێتی بچێتە بەغدا و بە جیا داوای مافی خەڵک بکات و راستەوخۆ سلێمانی ببەستێتەوە بە بەغداوە، ئەمە دەبێت بە گەڕانەوە بۆ دەستوور رێک بخرێت.
دەیان رستەی بێ مانا لەم سوشیال میدیایانەوە بڵاودەکەنەوە بۆ تێکدانی مێشکی خەڵك کە راستییەکەی شتی دیکەیە.
کۆبوونەوەی لووتکەی یەکێتی و پارتی
دوا کۆبوونەوەی سەرۆک بافڵ تاڵەبانی و جێگری سەرۆکی پارتی، مەسرور بارزانی، لە رۆژی 16-3 دا، وەک خۆیان لێدوانیان لەسەر دا، ئەنجامی باشی دەبێت، ئەمەش بەو مانایە نییە ئیتر هەموو شت چارەسەر دەبێت، نەخێر دەیان کۆبوونەوە و رێککەوتن کراوە لەلایەن دوو لایەنی سیاسییەوە، بەڵام دواتر کۆسپیان بۆ دروستکردووە، ئێمە نەیار و مونافیقمان زۆرە وەک کورد، ئەوان نایانەوێت تەبا بین و رێکبکەوین، هەڕەشەمان لێدەکەن بەوەی ئاسمان و زەویمان لێدادەخەن، هەربۆیە باشترە کە گرنگیی و فۆکەسی هەردوو حزبی سەرەکی لەسەر ناوخۆی هەرێم و چۆنێتیی پەیوەندییەکانمان بێت لەگەڵ بەغدا و چۆنێتی باشترکردنی گوزەرانی خەڵک، گرنگیی نەدەین بە کاریگەریی دەرەکی، ئەوان ئەوەیان دەوێت ئێمە بەیەکدا بدەن، تەنانەت لە بەغداش نەیارمان زۆرە و ئەوانن ئاگرەکە خۆش دەکەن بۆ ئەوەی هەرێم سەقامگیر نەبێت.
دوا کۆبوونەوەی لووتکەی یەکێتی و پارتی، ئەو هیوایەمان پێدەدات کە کات زۆری نەماوە بۆ پێکهێنانی حکومەتێک کە جێگەی رەزامەندیی خەڵک بێت، هەر ئەوەش راستە کە پەلە بکرێت لە دروستکردنی و کۆتایی بە کێشە هەڵواسراوەکان بهێنرێت، ئەم هەرێمە پێویستی بە ئیدارەدان هەیە، پێویستە هەرچی زووتر پێکهێنانی حکومەت،هەنگاوی بە پەلە و جددی بۆ بنرێت و دۆخی خەڵک لەبەرچاو بگیرێت.
کۆبوونەوەی سەرۆک بافڵ تاڵەبانی لەگەڵ کاک مەسرور بارزانی
