خەبات و هەوڵدان بۆ گەیشتن بە مەرامێک بەرنامەڕێژیی بۆ دەکرێت و دەبێت ساڵ بەساڵ بەرەو پێش بچێت تادەگاتە مەبەست و ئامانج، ئەگەر ئەمە نەبوو، دەبێت رێڕەوی خەباتەکە و شێوازی سیاسەتکردن و مامەڵەکردنەکان بگۆڕدرێت تا بگاتەجێ.
بۆچی کورد دوای دەیان ساڵ خەبات هێشتا نەگەیشتووە بەوەی کە دەیەوێت و نیوەشی بەدەست نەهێناوە، ئەی دەکرێت بێین لە هۆکارەکانی بکۆڵینەوە؟
دیارە بە درێژایی مێژوو زۆرێکمان دەزانین کە لە 70 ساڵی رابردوەوە چین ئەو هۆکارانە و چۆن ئەو دەیان ساڵە تێپەڕیون؟ بەڵام ئێستاش جار جار و هەرچەند ساڵ جارێک ئەو هەڵە گەورانە دووبارە دەبنەوە کە دەبنە هۆکاری راگرتنی رێڕەوی ئەم خەباتە یان زیانی پێدەگەیەنن و دوای دەخەن.
زۆرترینی ئەو هۆکارانە، پەیوەندییە دەرەکییەکانی بزووتنەوەکەیە کە یاریی پێدەکرێت و زوو ئاڕاستەکەی دەگۆڕێت، بێ ئەوەی ستراتیژییانە بیر بکرێتەوە و بە دووربینی دابڕێژرێت. ئێمە دەخزێینە سەنگەری ئەوەی هێزی رۆژگارە، وڵاتی زلهێز لامان جیاواز نییە، کێ وتی فەرموون ملی بۆ دەنێین، بە ئێستاشەوە.
بە ئاڵاوە خۆیان دەخزێننە ناومان
لەدوا (ریفراندۆمدا)ساڵی 2017 تۆڕە کۆمەڵایەتییەکان تەنرا بە تێکەڵ کردنی ئاڵای ئیسرائیل و کوردستان، گوایە مادام ئەوان پشتگیرمانن، ئیتر ئێمە (ریفراندۆم) سەردەخەین، بەڵام گەمژەیی سیاسیی زۆرێک لەوەدا بوو، نەیاندەزانی ئەگەر بە راستی ئیسرائیل بیەوێت پشتگیریی کورد بکات، ئەوا دەبێت پێشتر چرای سەوزی ئەمریکا و خۆرئاوای بۆ هەڵکرابێت، ئەگەر ئەوەشی بۆ کرابێت دەبوو هاوپشتییەکی باشی بۆ کورد مسۆگەر بکردایە تا(ریفراندۆم) نەبێتە هۆکاری ئیفلیجکردنی ئەوەی کە بنیاتنرابوو!.
لەپێش مەراسیمی سوێندخواردنی ترەمپ، بۆ وەرگرتنەوەی پۆستی سەرۆکی ئەمریکا، دیسان تۆڕە کۆمەڵایەتییەکان تەنرا بە بەڵێنی باق و بریقی ناتەنیاهۆی سەرۆک وەزیرانی ئیسرائیل، هەر رەسمی ئەو بوو بە تابلۆیەکەوە، گوایە نەخشەی نوێی ناوچەکەی لەسەر بوو تیایدا کورد تا سەر دەریای ناوەڕاست چووبوو، ئیتر وتیان ئەم پیاوە دەوڵەتی کوردی دادەمەزرێنێت( ئەمە لە کاتێکدا رۆژانە رۆحی هەزاران کەسی بێتاوانی مەدەنیی لە غەززە، دەکرد بەژێر ئاسن و بەردی بیناکانەوە، بە تۆپبارانکردنی کوێرانە).
ئەم هەواڵانە بەشێکی لە کوردی خۆشباوەڕ دوای خۆی دەخست و بەشێکیشی لە نەیار و دوژنامانی کورد بەخەبەر دەهێنا و دەکەوتنە دژایەتیکردنی کورد، بەمەش درزی گەورەتر دەکەوتە نێوانی کورد و ئەو نەتەوانەی کێشەیان هەیە لەگەڵمان.
چوونی بۆ سەفارەتی ئیسرائیل
ئیسرائیل 78 ساڵە دەوڵەتە، تائێستاش کێشەی لەگەڵ عەرەب و ئیسلامدا هەیە، ئێمەش بە رەسمی 64 ساڵە لە شۆڕشداین بۆ بنیاتنانی دەوڵەتی سەربەخۆ، بەڵام هێشتا لێی نزیک نەبووینەتەوە، دیارە دەبێت دان بەوەدا بنێین کە لە ئەنجامی سیاستی هەڵەی خۆمان بووە!.
لە چەند رۆژی رابردوودا، بەو هۆکارەی، نوێنەری حکومەتی هەرێم لە ئەڵمانیا، دڵشاد بارازنی لە سەفارەتی ئیسرائیل بۆ بەشداریی کردنی جەژنی نەورۆز بینراوە، زۆرێک لە میدیا عیراقییەکان بەستوویانەتەوە بە تاوانی ئاساییکردنەوەی پەیوەندیی لەگەڵ ئیسرائیل و سکاڵاشیان تۆمار کردووە، رەنگە ئەمە لای حکومەتی هەرێم بیانووی بۆ بهێنرێتەوە بەوەی کە تەنها نوێنەری هەرێم نەبووە و زۆرێکیش لە وڵاتانی ناوچەکەی لێبووە لە عەرەبی و ئیسلامی، هەرچەندە سیاسەتی دەرەوەی هەرێم دەبێت هاوتەریب بێت لەگەڵ ئەوەی بەغدا، بەڵام ئەوەی بەدوای ئەمەدا هات، ئەو ئاهەنگەی رۆژی شەممەی رابردوو بوو لە(کۆڵن)ی ئەڵمانیا کە لەلایەن کەناڵەکانی(رووداو و کوردستان تیڤی) سەر بە پارتی دیموکراتی کوردستانەوە رێکخرابوو تا درەنگانی ئێوارەش بەردەوام بوو، تیایدا ئاڵا و لۆگۆی هەریەک لە ئاڵای کوردستان، پ.دک، پەیەدە، هەسەدە، پەکەکە، گۆڕەپانی ئاهەنگەکەی تەنیبوو، لە ناویشیاندا ئاڵایەکی زۆر گەورەتر لەوان، ئەوەی ئیسرائل بوو کە لەناو خەڵکەکەوە بە بەرزیی دەشەکایەوە.
بوونی ئەو ئاڵایە بەو جۆرە دیارە، دوو پرسیار دروست دەکات، یەکەم ئایا ئەوە هاوپشتییەکی خودیی سەرکەشییە لە بەشدارییکردنی نوێنەری حکومەتی هەرێم لەو ئاهەنگەی سەفارەتی ئیسرائیل لە بەرلین؟ یان دەستتێوەردانی ناحەزانی کوردە بۆئەوەی پەیوەندییەکانی کورد لەگەڵ نەتەوەکانی تر تێک بدات، چونکە ئەمە نە هەڵوێستی حکومەتی ئیسرائیلە و نە حزبێکی یەهودی، ئیتر ئەم شێواندنە بۆچی؟ با نە پێداگریی هەڵە، نە دەستتێوەردانی شێوێنەر، جارێکی تر بەرۆکمان بگرێتەوە، لە رابردوودا زۆر خێرمان لێیان بینیوە تا ئێستاش ئاڵایان بە ئاڵامان تێکەڵ بکەن؟
کێ لە پشت بەرزکردنەوەی ئاڵای ئیسرائیلە لە یادی نەورۆزدا؟
