گرێدانی كۆمەڵێك كۆنفرانس، كە لەچوارچێوەی خولی دووەمی دیداری یەكێتیدا، لەناوچەو پارێزگا جیاجیاكاندا بەڕێوەدەچن، لەڕووی مەبدەئییەوە، دەرفەتێكن بۆ ئەندامانی یەكێتی بۆ ئەوەی هەر بابەتێك وەك تێبینی، رەخنە، سكاڵا، نیگەرانی، هاوكات وەك بیرۆكە، پێشنیار، پرۆژە، نەخشەڕێ، لەلایان كۆبووبێتەوە، گوزارشتی لێبكەن.
تائێستا زانیاریی پێویست لای میدیاكان نییە كە ئەو دەرفەتە، بەپراكتیك، تاكوێ رەخساوەو رێی پێدراوە، یان لەناو ئەنداماندا تاچەند خواست هەبووە بۆ بەشدارییەكی پەرۆش و بابەتی و دوور لە موجامەلە. ئەوەی دەزانرێت ئەوەیە كە دیدارەكە لەسەریەتی پرۆژەیەكی یارمەتیدەری نەریتەكانی دیموكراسی بێت لەناو حزبی سیاسیدا، لەوانە: گوێگرتن لەخوارەوە، وەرگرتنی باری سەرنج و رەخنەكانیان، وەرگرتنی سكاڵاو داواكارییەكانیان، تەبەنیكردنی پێشنیارو پرۆژە باشەكانیان، وەڵامدانەوەی پرسیارو خەمەكانیان، هەموو ئەوانەش بە میكانیزمێكی شەفاف Transparent، واتە لەكۆتایی هەر كۆنفرانسێكدا، دوای گفتوگۆی لیژنە فەرعییە جیاجیاكان، كۆمەڵێك راسپاردەو پێشنیار گەڵاڵە كرابن و لە هۆڵی كۆنفرانسە لۆكاڵییەكاندا بە دەنگی بەرز خوێنرابێتنەوە، هاوكات بەشدارانی ناو كۆنفرانسەكانی دیداریش پەسەندیان كردبن بۆ ئەوەی بخرێنە بەردەستی ئەندامانی كۆنفرانسی سەرەكیی خولی دووەمی دیدارەوە.
تائێستا نازانرێت بەم میكانیزمە كاركراوە یان نا، بەڵام رێكاری گونجاو بۆ بەدیموكراسیكردنی Democratization هەندێ نەریت لەپارتی سیاسیدا، پێویستیی بەمەیە. لەلایەكی تر، وا پێویستە راسپاردەو پێشنیارە گەڵاڵەكراوەكانیش، ئەوانەیان كە لەئاشكراكردندا زیانیان بۆ پەزەكان نابێت!، بەشێوەی نووسراو، لای هەموو ئەندامێكی كۆنفرانسی ناوچەو پارێزگاكان هەبن نەك بخرێنە هەگبەیەكەوەو نەزانرێت چەندیان قبوڵكراون و چەندیان پشتگوێخراو!، واتە بەجۆرێكی وا پێچرابێتنەوە بواری بەدواداچوون بۆ بەشدارانی دیدار نەمێنێتەوە كە بزانن سوودی بەشدارییەكانیان چی بووە؟ بۆ نموونە، ئەو سەدان پیشنیارو بیرۆكانەی كە لەخولی یەكەمی دیداردا خرابوونەڕوو كار بەچەندیان كراو چەندیان وەلانران و بۆ و لەبەرچی؟ كە ئەوەش بێگومان هەر بە جاڕدانی رێژەو ژمارە ناكرێت، بەڵكو بە ناوبردن و بەڵگەو سامپڵی زیندوو، بەتایبەتی بۆ حزبێك كە رووبەڕووی كێشەو گرفتی ناوخۆیی و بەربەرەكانیی زۆری دەرەكی بووبێتەوەو ئەندامانی بیانەوێت رۆڵێكیان لەتێپەڕاندنیاندا هەبێت.
ئەگەر دیدار لە كۆنفرانسەكانیدا ئاوها كارنەكات، ئاسان نابێت كە بڕیاری سیاسی لەیەكێتیدا بەدیموكراسی بكرێت، خواستێكی جاڕدراوی هەڤاڵانی سەرپەرشتیاری دیدار خۆشی ئەوەیە كە پرۆسەی بڕیاری سیاسی لە سەرەوەو سەركردایەتیدا پاوان نەكرێت، جا بۆ ئەوەی ئەمە رووبدات، هێشتا كات لەپێشدا ماوە، كۆنفرانسە سەرەكییەكەش تاقیكردنەوە گەورەكەیە!.
[email protected]
