هاتوچۆسازی

مۆڵەتبەدەست هۆکاری سەرەکیی رووداوەکانی هاتوچۆیە

رووداوەكانی هاتوچۆ یەكێكە لە كێشە سەرەكییەكانی جیهان، ئاسەوارە كۆمەڵایەتی ‌و ماددی‌ و تەندروستییەكانی تەنیا روو لە قوربانی ناكەن، بەڵكو بە شێوەیەكی تایبەتی روو لە خێزانی قوربانی و بە شێوەیەكی گشتیش روو لە كۆمەڵگە و دەوڵەتان دەكەن. گەورەیی زیانە مرۆیی‌ و ماددییەكانی رووداوەكانی هاتوچۆ وایان لە حكومەتەكان‌ و دامەزراوەکانی ئۆتۆمبێل ‌و رێگەوبان كردووە توانای دارایی‌ زۆر و توێژینەوەی زەبەلاح بۆ لێكۆڵینەوە لە هۆکارە سەرەكییەكانی رووداوەكانی هاتوچۆ بخەنە گەڕ. لە كوردستانیش زیانە مرۆیی و داراییەکانی رووداوەكانی هاتوچۆ زۆرن. ئەگەر بانكێكی زانیاریی راستەقینەی هاوچەرخمان هەبوایە، کە هەموو رووداوە بچووك ‌و گەورەكانی تۆماربكردایە، ئەوا دەردەكەوت مەترسییەكە لە چ ئاستێكدایە و جدیتر هەڵوەستەی ‌لەئاستدا دەکرا. 
راستە لای خۆشمان هۆكاری رووداوەكانی هاتوچۆ هەمەجۆرن و پەیوەندییان بە مرۆڤ و رێگەوبان و ئۆتۆمبێلەوە هەیە، بەڵام وەك ئامار و بەڵگەكان دەریان خستووە، پشکی شێری بەر ئەوانە دەکەوێت کە ئۆتۆمبێل لێ دەخوڕن و مۆڵەتبەدەستن و شۆفێر نین. 
مۆڵەتبەدەست ئەو کەسەیە کە مۆڵەتی شۆفێریی هەیە، بەڵام لە ڕووی تیۆری و پراکتیکییەوە نەبووەتە شۆفێر، جا ئەو کەسە مۆڵەتی بە شێوازی کۆن یان تازە وەرگرتبێ. بۆیە هەنگاوی یەكەم بۆ بەرەنگاربوونەوەی رووداوەکانی هاتوچۆ و چارەسەرکردنی بنچینەیی، چاككردنی هەڵسوكەوتی ئەوانەیە کە ئۆتۆمبێل لێ دەخوڕن، بە پیادەکردنی سیستمێکی مۆڵەتپێدانی ئۆتۆمبێل لێخوڕینی هاوچەرخ بە ستاندارتە نێودەوڵەتیيەکان، چاودێریکردنی هەمەلایەنی ئۆتۆمبێل لێخوڕین، توندكردن و هەمەجۆرکردنی سزای سەرپێچییەكانی هاتوچۆ.
شۆفێر ئەو كەسە نییە كە دەتوانێت لەناو ئۆتۆمبێلێكدا دانیشێت‌، ئاوێنەكان‌ و كورسییەكەی رێكبخات، بزانێت چۆن سوكان‌ و پایدەرەكانی بەنزین‌ و ئیستۆپ ‌و كلاج بەكاردەهێنێت، بەڵكو ئەو كەسەیە كە لە رووی تەندروستییەوە شایستەبوونی سەلماوە، خولی راهێنانی شۆفێریی تەواوکردووە، ئینجا بە تاقیكردنەوەی تیۆری‌ و پراكتیكیی بەڕێوەبەرایەتیی هاتوچۆدا تێپەڕیوە ‌و لە رووی زانیاری و شارەزایی تیۆری و کردەییەوە شایستە و لێهاتووە و ئەم خاڵانەی بەدەستهێناوە:
* ئاشنابوون بە رێساكانی ئۆتۆمبێل لێخوڕین ‌و یاساكانی هاتوچۆ.
* ئاشنابوون بە ئۆتۆمبێل و چۆنێتی بەكارهێنانی ‌و وریایی بەرامبەر بەو خەوشیانەی پەیوەندییان بە لایەنی توندوتۆڵییەوەیە.
* شارەزابوون ‌و تێگەیشتن لە مەترسی ‌و سەختییەكانی ئۆتۆمبێل لێخوڕین.
* هۆشیاربوون بەرامبەر بە كاریگەریی دۆخی مرۆیی لەسەر كارامەیی ئۆتۆمبێل لێخوڕین.
* لێهاتوویی لە بواری هەڵسانگاندنی ئۆتۆمبێل لێخوڕین لە بارودۆخی مەترسیداردا.
* ئۆتۆمبێل لێخوڕین، بەبێ‌ دروستکردنی مەترسی ‌و سەخڵەتی بۆ خود و ئەوانی دیكە.
* هەڵوێستوەرگرتنی هۆشیارانە و بەرپرسیارانە بەرامبەر بە مانۆڕەكانی سەر رێگاوبان.
* ئاگایی بەرپرسیارانە بەرامبەر بە پیادە سست ‌و لاوازەكان (پیر و منداڵ).
(*) شارەزای بواری هاتوچۆ