كردەی تاوان بە هەموو جۆرەكانییەوە، بە هۆی نادادیی و كێشەكانی ژیانەوە رۆژ بە رۆژ لە زیادبووندایە. هەرێمی كوردستانیش وەك بەشێك لە ژینگەی ئەو جیهانە بەرینە، پشكی خۆی بەركەوتووە. حكومەتی هەرێمی كوردستان، لە رووی بەڕێوەبردنەوە خاوەنی چوار شار و چوار یەكەی ئیدارییە. هەر یەكێك لەم شار و ناوچانە، سروشتی ژیان و پێكهاتەی كۆمەڵایەتییان جیاوازە. شارێك لە شارێك ژیان تیایدا جیاوازترە و خەڵكەكەی بە شێوازێكی تایبەت ژیان دەگوزەرێنن. ئەگەر بگەڕێیتەوە بۆ داتا و ئاماری تاوانەكان، دۆخی شارەكانی دیكە باشترە لە شاری هەولێر، چونكە دۆخی ژیان بە بەراورد بە شارەكانی دیكە، ئاڵۆز و دژوارترە. بێگومان ژینگەی شاری هەولێر، لە كۆندا وا نەبووە. گەر بگەڕێینەوە دواوە و سەیری جۆری ژیانی ئەو خەڵكە بكەین، دەبینین خەڵكی ئەو شارە، لە رابردوودا بە شارستان و بێ كێشە و میواندۆست و ئارام ناسراو بووە.
باشە ئەی بۆ سروشتی دانیشتوانی ئەو شارە بە شێوەیەك لە شێوەكان تێكچووە و بەداخەوە كام تاوانی قێزەوەنە لێرە روودەدات!؟ هەقی خۆمانە ئەو پرسیارە لە خۆمان بكەین، باشە ژینگەی هەولێر بۆ ئەوهای لێهاتووە؟ بۆ ئاسایشی كۆمەڵایەتیی و تەبایی خێزان و هاوڕێیەتی نێوان برادەرەكان، بەمشێوەیە تێكچووە و خەریكە دەبێتە دیاردەیەكی ناشیرین.
هەموومان لە خۆمان دەپرسین كێ لە پشتی ئەو شێواندنە دایە، كێ ئەو ژینگە پاك و جوانەی هەولێرییەكانی تێكداوە؟ سیاسەت، باری خراپی ئابووری خەڵك! نەخێر، ئەگەر ئەوانە هۆكاریش بن، بەڵام بابەتێكی دیكە كە جەوهەری كێشەكانە، ئەویش نەمانی رۆحی هاوكاری و دۆستایەتیی و پێكەوەژیانی كۆمەڵایەتییمانە، كە پەیوەندیی بە چەمكی ئاسایشی ژیانەوە هەیە.
لە شاری هەولێر ئاسایشی ژیان تێكچووە، كە زۆر مەترسیدارترە لە ئاسایشی خۆراك و ژینگە و تەندروستی. هۆكاری ئەوەش دەگەڕێتەوە بۆ قەیرانی پەروەردە و فێركردن، كە لە هەرێمی كوردستان بە تەواوی پشت لە پەروەردە و فێركردن كراوە، بۆیە مرۆڤ لێرە هەست بە ئاسوودەیی ناكات. دەروونی خراپ تێكچووە، باوەڕی بە ژیان نەماوە، رەشبینە، نەخۆی خۆشدەوێ، نە بەرامبەرەكەی، رقی لەهەموو شتێكە.
بەڕاستی ئەو جۆرە كردارانە جێگەی پرسیارە، گەر بەچاوی سەر تەماشا بكەیت، دەبینین شاری هەولێر زۆر لە شارەكانی دیكە زیاتر بەرەوپێشەوە چووە، بەتایبەتی لە رووی باڵاخانە دروستکردنەوە، بەڵام خەڵكی سلێمانیی و دهۆك و شوێنەكانی دیكە ئاسوود ترن. بە گوێرەی قسەی خەڵك بێت، هاووڵاتیانی هەولێر دۆخی ئابوورییان باشترە لەوانی دیكە، بەڵام بڕۆ سەیری دۆخی بیركردنەوە و ژیان و گوزەرانیان بكە، ئەوان باشتر و ئاسوودەتر دەژین، كەواتە ئێمە لە هەولێر كێشەمان لەگەڵ ئاسایشی ژیاندا هەیە، چونكە لە هەولێر ئاسایشی ژیان تێكچووە.
