ئەو یانەیە مێژووی دامەزراندنی دەگەڕێتەوە بۆ ساڵی 1968، جگە لە یاری تۆپی پێ، یاری تۆپی دەست و باسكە و پاسكیلسواریی و بەرزکردنەوەی قورسایی و گۆڕەپان و مەیدان و چەندان یاری دیكەی وەك شەترەنج و تۆپی سەرمێز وهتد.... تێدایە، یانەی هەولێر چوارجار بووەتە پاڵەوانی خولی نایابی عیراقی (سێ جاریان لەسەر یەك بووە). هەروەها چەندینجار بەشداری پاڵەوانییەتی جامی یەكێتیی ئاسیایی كردووە، كە دووجار پلەی دووەمی بەدەستهێناوە لە ساڵانی 2014- 2016 .
یانەی هەولێر لە خولی نایابی كوردستانیش بەشداری چالاكی هەبووە، كە سێ جار بووەتە پاڵەوان تیایدا. جگە لە یاری تۆپی پێ لە یارییەكانی دیكەشدا یانەی هەولێر، هەمیشە پلەی بەرزی بەدەستهێناوە. لە حاڵی حازردا یانەی هەولێر تووشی قەیرانی دارایی بووە، جگە لەوەی یاریزانەكان بایكۆتی راهێنانەكانیان كردووە، چەند ئەندامێكی دەستەی كارگێڕیش بایكۆتیان كردووە، چونكە چەند مانگێكە وەك پێویست نەیتوانیوە مووچەی یاریزانەكانی بدات و بەشێك لە یاریزانەكانیش پێشەكی گرێبەستەكانیان وەرنەگرتووە. بەهۆی نەبوونی پارەی پێویستیش تاوەكو ئێستا یانەكە هیچ گرێبەستێكی رانەگەیاندووە. بێگومان بەهۆی كۆمەڵێك لەم گرفتی دارایی و كارگێڕییەوە چارەنووسی یانەكە و یاریزانەكانیش نادیارە.
هەموومان نیگەرانین لە بەرانبەر خراپیی یانەكە، بەڵام تا ئێستاكەش وەك پێویست نەتواندراوە كێشەكانیان چارەبكرێت. بەوپێیەی كە لە رووی سەرپەرشیكردنەوە خاوەندارییەتییەكەی بۆ پارێزگای هەولێر دەگەڕێتەوە، لەم پێناوەش جەنابی پارێزگار توانیویانە تا سنوورێك گرفتەكانیان چارەسەر بكەن، بەڵام هێشتا هاندەرانی یانەكە و بەشێك لە كارگێڕان و یاریزانانی یانەی هەولێر دڵخۆشنین بە ئاییندەی یانەكەیان.
هۆی نیگەرانی هاندەرانیش بە پلەی یەك دەگەڕێتەوە بۆ خۆشویستنی یانەكەیان، بۆیە هەر ئاكامێكی دژوار بەسەر یانەكەدا بێت، دواجار هەموومان نیگەران دەكات. لێرەوە ئەوباڵی خراپی توانای یاریكردنی یاریزانان و گرنگینەدان بە هەموو بەشەكانی یانەكە، كە ئێستا بەداخەوە خەریكی پاشەكشێ دەكات و چارەنووسی بەرەو نادیار دەڕوات، دەگەڕێتەوە بۆ لایەنی پێوەندیدار، كە لەخەمی چارەكردنی بنەڕەتی گرفتەكەدا نین.
باشە لێرە با ئەو پرسیارە بكەین، چ بكرێ بۆ ئەوەی یانەی هەولێر دۆخی بەرەو باشتر بچێ؟ چۆن چۆنی بتوانرێت كێشەی دارایی و كارگێڕی یانە نەهێڵدرێ؟ بە بۆچونی من دیاریكردنی بودجە و داراییەكی سەربەخۆ، گرفتەكە تا سنوورێك چارەدەكات. پاشان دەستەی بەڕێوەبەرانی یانەكە، لەسەر بنەمای حزبایەتیی و مەحسوبیەت و خزم خزمێنە نەبێت، پشت بە كەسانی شارەزا و پسپۆر لەم بوارە ببەسترێ، بۆ ئەوەی كێشەكان بەتەواوی چارەبكرێت. لەگەڵ ئەوەشدا وەك جاری جاران گرنگی بە هەموو بەشە وەرزشیەكانی یانەكە بدرێ، بۆ ئەوەی یانەی هەولێر ئاستی بەرە و پاشتر بچێ و تواناكانیان بگەینە ئاستی جیهان و وڵاتان.
