راهاتووین لەوەی دەچینە هەر مۆڵ و بازاڕێک، کارمەندی بیانی پێشوازیمان لێ بکات، جاران شتێکی نامۆ و جوان بوو لامان کە کەسانی بیانیمان بە دەگمەن دەبینی کار دەکەن، بەڵام ئێستا نەک جوان نییە بگرە زۆریش ناشیرینە و هۆکاری شکستە، لەبەرئەوەی بە رێژەیەک زۆر بووە چیتر بە دەگمەن کوردەکەی خۆمان دەبینین لەو شوێنانەدا کار بکەن، لە هەواڵێکدا باسی ئەوە کرا لە شاری هەولێر، کرێکارێکی بەنگلادشی کۆشکێکی بۆخۆی دروست کردووە بەبێ مۆڵەت، لەسەر شەقامێکی گشتیی تا پێداویستی بفرۆشێت، هاووڵاتییەکی کوردیش لە نزیک کۆشکەکە بە شێوەیەکی گەڕۆک خەریکی شت فرۆشتن بووە، بەڵام ئەوەی جێی سەرنجە بەنگلادشییەکە سکاڵای لەسەر کوردەکە تۆمار کردووە کە ئەو شوێنە لەو شەقامە تەنیا مافی ئەوە و کوردەکە بۆی نییە لەوێدا شت بفرۆشێت.!
شارەکانی هەرێم پڕ بوون لە هاووڵاتی بێگانەی بێ بیانوو، دەچیتە هەر کۆڵانێک شاورما سوورییەک هەیە، هەندێک لەو بیانییانه لە کاتی ئاڵۆزبوونی دۆخی سیاسی و حکومداری وڵاتەکەی خۆیان چەند ساڵێک بەر لە ئێستا هاتن، بەڵام ئەوە ماوەی چەند ساڵێکیشە دۆخی وڵاتی خۆیان جێگیرە، بەڵام ئەوان هەر لێرەن!. هاووڵاتی هیندستان، نیپاڵ، بەنگلادیش، غانایی و ئەوروپی...هتد تەنیا بە مەبەستی بازرگانی هاتوون بۆ هەرێم، لە کاتێکدا هەرێم نان و کاری نییە بیدات بە هاووڵاتییەکانی خۆی، راویان دەنێت بۆ ئەوروپا، بەڵام کەسێکی بیانی لە شوێنێکی کاری زۆر باڵادا کاری پێدەدرێت کە کوردەکە بە خەویش نایبینێت، بە نموونە لە هەرێمدا ئەوەی دەستەی ژینگەپارێزییە، کەسانی گەورە ساڵان و خانەنشینانن لەو کەسانەدا باپیر و باوکی زۆرینەمانی تێدایە، کە دەبێ پشوو بدەن، بەڵام بە سەرما و گەرما بێوچان شەقامەکان پاک دەکەنەوە، تەنانەت پاسێکیشیان بۆ دابین نەکراوە تا بیانبەنە سەر کارەکەیان بەڵکو بە پشتی دووتەنی باریان دەکەن و لە شوێنی مەبەست هەڵیاندەڕژن!.
ئەمە لە کاتێکدا بیانییەک لە هەمان هەرێمدا باشترین ژیانیان بۆ دابین کراوە، بێگومان لە زۆرینەی وڵاتانی جیهاندا پەنابەر هەیە، تەنانەت ئێستا رێژەیەکی زۆری کورد لە زۆرینەی وڵاتەکاندا پەنابەرن، بەڵام ئەوانە وڵاتی گەورە و ماف بەخشن، خاوەنی گەورەترین کارگەکانی پۆشاک و خۆراک و ئۆتۆمبێلی جیهانن، لە کاتێکدا هاووڵاتیانی دیکە وەک پەنابەر وەردەگرن کە هاووڵاتیانی خۆیان بێ کار و موچە و نان نین، نەک لە هەرێمێکی وەک کوردستاندا کە هێشتا سەربەخۆ نییە و ناتوانێت هاووڵاتی خۆی بژیەنێت، هەزارەها بێکار و کرێنشین و خوێندکاری دانەمەزراوی هەبێت، بەڵام بە هەزارەها بیانیش بکات بە خاوەن ماڵ لێمان.!
زۆر هەنگاومان ماوە بینێین تا بگەینە ئەوەی پێویستمان بە دەستی کاری بیانی بێت، داواکارم لە لایەنی بەرپرس ئەم بابەتە زۆر گرنگە، بۆ گەیشتنی هەرێم بە قۆناغێکی تێر و پڕ جارێ سکی هاووڵاتییەکانی خۆی تێربکات، هەلیکار لە بیانی وەربگرنەوە و بیدەنە ژنان و گەنجانی خۆمان، کارگەکانی سلێمانی مەکەن بە کافتریا دووبارە بیانخەنەوە کار بۆ دابینکردنی بەرهەمی خۆماڵی و داهاتی ناوخۆیی، شار پڕە لە دارتاش، جووتیار، بەرگدروو، ئاسنگەر و دەرچووی دەستڕەنگین و کارامە، ئەگەر لە نیشتمانی خۆیاندا رێز لە بەهرەیان بگیرێت نابنە پەنابەری وڵاتانی دیکە.
