سەرەکی » راپۆرت » زۆرینه‌یان ده‌وڵه‌مه‌ندن و ئالووده‌بوون به‌وكاره‌وه‌

چیرۆكەکانی پشت حاڵەتەکانی سواڵکردن

زۆرینه‌یان ده‌وڵه‌مه‌ندن و ئالووده‌بوون به‌وكاره‌وه‌

به‌دواداچوونی/ رێزه‌ حسێن

سه‌ره‌تا بۆ نزیكبوونه‌وه‌، بڕێك پاره‌م دایه‌ ده‌ستی، دواتر پرسیاری ناوه‌كه‌یم كرد به‌ شپرزه‌یی وتی “ناوم لەیلایەیه‌ یه‌، به‌ڵام ناوی منت بۆ چییه‌؟ پێم وت تۆ گه‌نجی توانای كارت هه‌یه‌ بۆ كارناكه‌یت و واز له‌ ده‌رۆزه‌كردن بێنیت، ئه‌گه‌ر كارت بۆ بدۆزمه‌وه‌ ئاماده‌یت وازبهێنیت؟، لەیلای ده‌رۆزه‌كه‌ر وتی» مناڵی وردم هه‌یه‌، ناتوانم كاربكه‌م، هاوسه‌ریشم نه‌خۆشه‌، ته‌نها ئه‌م كاره‌ باشترین و ئاسانترینه‌ بۆ من».

سواڵکردن دیارده‌یه‌كی به‌ربڵاوه‌ له‌ هه‌موو جیهاندا كه‌ وڵاتانی تازه‌پێشكه‌وتوو له‌ ریزبه‌ندی یه‌كه‌مدان، هه‌روه‌ك هه‌رێمی كوردستانیش یه‌كێكه‌ له‌و ناوچانه‌ی به‌رده‌وام ئه‌و حاڵه‌ته‌ی تێدا به‌دیده‌كرێت، وته‌بێژی راگه‌یاندن و په‌یوه‌ندییه‌كانی پۆلیسی سلێمانیش له‌وباره‌یه‌وه‌ ئاماژه‌ به‌وه‌ده‌كات، ژنه‌ ده‌رۆزه‌كه‌ره‌كان بوختانی ئابڕووبه‌رانه‌ بۆ هه‌ندێك له‌ پیاوان هه‌ڵده‌به‌ستن كه‌ ژماره‌یه‌ك له‌و ژنانه‌یان ده‌ستگیركردووه‌.

زیاتر له‌ 100 ژن و پیاو ده‌ستگیرده‌كرێن
شه‌هلا ئه‌مین وه‌ك هاووڵاتییه‌كی سلێمانی به‌ سه‌رسوڕمانه‌وه‌، پرسی له‌ لایه‌نی په‌یوه‌ندار هه‌بوو ‌ ئه‌و حاڵه‌ته‌ بۆ تا ئێستا بنبڕ نه‌كراوه‌؟، وتیشی: رۆژانه‌ كه‌ به‌ ڕێگه‌وه‌م بۆ سه‌ركاره‌كه‌م، له‌كاتی وه‌ستانم له‌ ترافیك، ژنێك یان پیاوێك، زۆرجاریش مناڵ سه‌رده‌هێننه‌ ناو ئۆتۆمبێله‌كه‌وه‌، پاره‌م لێ داواده‌كه‌ن، یان زۆرم لێده‌كه‌ن كلێنس یان شتێكی بێ به‌هایان لێبكڕم كه‌ زیاتر نوقڵ و بنێشته‌.

نه‌قیب سه‌ركه‌وت ئه‌حمه‌د، وته‌بێژی راگه‌یاندن و په‌یوه‌ندییه‌كانی پۆلیسی سلێمانی تایبه‌ت به‌ كوردستانی نوێ وتی: له‌ چوارچێوه‌ی كاروچالاكییه‌كانی پۆلیسی سلێمانی، رۆژانه‌ ژماره‌یه‌ك ژن و پیاوی ده‌رۆزه‌كه‌ر ده‌ست گیرده‌كه‌ین، هاوكات خه‌ڵكیش زۆر هاوكارمانن له‌وباره‌یه‌وه‌ له‌ هه‌رشوێنێك بڵاوبووبنه‌وه‌، په‌یوه‌ندیمان پێوه‌ ده‌كه‌ن و دواتر مه‌فره‌زەکانمان ده‌گه‌نه‌ شوێنه‌كه‌ و ده‌ستگیریانده‌كه‌ن.

به‌پێی زانیاری به‌ڕێوه‌به‌رایه‌تی پۆلیس سلێمانی له‌ ساڵی 2020 تا مانگی ئازاری ساڵی 2021، مه‌فره‌زه‌كانیان (107) ژن و پیاوی ده‌رۆزه‌كه‌ر، (سواڵكه‌ر) یان، ده‌ستگیر كردووه‌، دواتر دراونه‌ته‌ دادگا، هاوكات ژماره‌یه‌ك مناڵیش به‌و هۆكاره‌ راده‌ستی بنكه‌ی پۆلیسی نه‌وجه‌وانانی سلێمانی كراوه‌.

مامه‌ڵه‌ی سێكسی ده‌كه‌ن
كامه‌ران عوسمان، وه‌ك پیاوێكی كاسب له‌ یه‌كێك له‌ ناو پێشانگه‌كانی ئۆتۆمبێل له‌ سلێمانی له‌وباره‌یه‌وه‌ ئاماژه‌ی به‌وه‌كرد، (ژن و مناڵ)، زیاتر روو له‌م شوێنه‌ ده‌كه‌ن بۆ ده‌رۆزه‌كردن، وتیشی: ژنه‌كان زۆرینه‌یان له‌ پاڵ سواڵكردن و به‌ختگرتنه‌وه‌دا، ئاماده‌یی خۆیان نیشانی پیاوه‌كان ده‌ده‌ن كه‌ به‌ بڕێك پاره‌، سێكسیان له‌گه‌ڵ بكه‌ن، تا ئه‌و ئاسته‌ی نرخیان داناوه‌ به‌ شێوه‌یه‌ك بۆ ده‌ست بردن، بۆ به‌ شێكی جه‌سته‌یان بڕێك پاره‌یان دیاری كردووه‌.

به‌پێی زانیاری رۆژنامه‌ی كوردستانی نوێ، ده‌رۆزه‌كردن له‌ پارێزگای سلێمانی تا ئێستا حاڵه‌ته‌ و نه‌بووه‌ته‌ دیارده‌، ئه‌و شوێنانه‌شی بۆ ئه‌و كاره‌ رووی لێده‌كه‌ن زیاتر ترافیكی سه‌ر شه‌قامه‌كان و پێشانگای ئۆتۆمبێله‌كانه‌، به‌ كه‌میش به‌ نێو بازاڕ و گه‌ڕه‌كه‌كاندا بڵاوبوونه‌ته‌وه‌، به‌پێی هه‌مان زانیاری ده‌رۆزه‌كه‌ران، زۆرینه‌یان خه‌ڵكی ناوچه‌كانی خواروو و ناوه‌ڕاستی عیراقن، ژماره‌یه‌كیشیان خه‌ڵكی شاری هه‌ولێر و كه‌ركوك و ده‌ورووبه‌رن، هاوكات هاووڵاتیانی وڵاتانی دراوسی وه‌ك (وڵاتی ئێران، سوریا) ژماره‌یه‌كی تری ده‌رۆزه‌كه‌رانن و ژماره‌یه‌كی كه‌میش خه‌ڵكی شاری سلێمانی و قه‌زا و ناحییه‌كانێتی.

منداڵان ده‌ستگیر ناكرێن
زۆرینه‌ی كات خێزانی ده‌رۆزه‌كه‌ره‌كان بۆ ده‌ستكه‌وتنی پاره‌ی زیاتر، په‌نا بۆ به‌كارهێنانی مناڵه‌كانیان ده‌به‌ن، چونكه‌ سوود له‌ سۆز و به‌زه‌یی خه‌ڵك ده‌بینن بۆ مناڵی سه‌رشه‌قام، له‌وباره‌یه‌وه‌ نه‌قیب سه‌ركه‌وت زانیاری زیاتر خسته‌ڕوو ئاماژه‌ی به‌وه‌كرد كه‌ بۆ مناڵانی ده‌رۆزه‌كه‌ر له‌سه‌ر شه‌قام، له‌لایه‌ن تیمه‌كانمان به‌پێی یاسا كۆده‌كرێنه‌وه‌ و دواتر راده‌ستی بنكه‌ی پۆلیسی نه‌وجه‌وانان ده‌كرێن، دواتر له‌گه‌ڵ سه‌رپه‌شتیاری مناڵه‌كان مامه‌ڵه‌ی یاسایی ده‌كه‌ین، چونك به‌پێی یاسا رێگه‌ پێدراو نییه‌، مناڵ ده‌ستگیر بكرێت، هه‌روه‌ك ده‌رۆزه‌كه‌ر له‌ هه‌ر شوێنێك هه‌بێت، راسته‌خۆ له‌لایه‌ن پۆلیسه‌وه‌ ده‌ستگیرده‌كرێن، به‌ شێوه‌یه‌ك تا ئێستا توانیومانه‌ حاڵه‌ته‌كه‌، كه‌م بكه‌ینه‌وه‌، به‌ڵام كۆنتڕۆڵ و بنبڕ نه‌كراوه‌، چونكه‌ هه‌ركات له‌ سلێمانی ده‌ستگیر بكرێن، رووده‌كه‌نه‌ شارێكی تری هه‌رێمی كوردستان و به‌رده‌وام ده‌بن، وتیشی: ئه‌وانه‌ كۆمه‌ڵێك خه‌ڵكن، زۆركات دوای به‌دواداچوونی پۆلیس ده‌ركه‌وتووه‌ باری دارییان باشه‌، به‌ڵام فێری كاره‌كه‌بوون و ناتوانن ده‌ستبه‌رداری بن، بۆ ئه‌وانه‌شی كه‌ له‌نزیك فولكه‌كان شمه‌ك ده‌فرۆشن، ژماره‌یه‌كمان لێ ده‌ستگیركردووه‌و داومانه‌ته‌ دادگا، چونكه‌ زۆركات ده‌بنه‌ هۆكاری رووداوی هاتووچۆ له‌سه‌ر شه‌قامه‌كان.

پیاوه‌كانیان ده‌رۆزه‌یان پێده‌كه‌ن
ئه‌وانه‌ی ده‌رۆزه‌كه‌رن زۆرینه‌یان (ژن و مناڵن)، به‌ ژماره‌یه‌كی كه‌میش پیاوی سه‌ر و ته‌مه‌ن (70 ) ساڵی تێدایه‌، هه‌روه‌ك رۆژانه‌ تا دره‌نگانی شه‌و له‌ لایه‌ن پیاوه‌ سه‌رپه‌رشتیاره‌كانیانه‌وه‌، دابه‌شده‌كرێن به‌سه‌ر شه‌قام و شوێنه‌ گشتییه‌كاندا، به‌ مه‌به‌ستی كۆكردنه‌وه‌ی پاره‌ی زیاتر.

نه‌قیب سه‌ركه‌وت ئه‌حمه‌د، وته‌بێژی راگه‌یاندن و په‌یوه‌ندییه‌كانی پۆلیسی سلێمانی چیرۆك و به‌سه‌رهاته‌كانی پشت ده‌رۆزه‌كردنی ژنان، تایبه‌ت به‌ كوردستانی نوێ باس ده‌كات، به‌ جۆرێك زۆر كات سكاڵا له‌لایه‌ن هه‌ندێك له‌ پیاوانه‌وه‌ تۆماركراوه‌ كه‌ له‌ كاتی نزیكبوونه‌وه‌ و چوونه‌ ناو ئۆتۆمبێله‌كه‌یانه‌وه‌، دزییان لێكراوه‌ یان بووختانیان بۆ هه‌ڵبه‌ستراوه‌، به‌ شێوه‌یه‌ك سه‌ره‌تا ژنه‌ ده‌رۆزه‌كه‌ره‌كه‌ نزیك بووه‌ته‌وه‌ له‌ پیاوه‌كه‌ و داوای بڕێك پاره‌ی لێكردووه‌، دواتر هه‌ڕه‌شه‌ی ئه‌وه‌ی له‌و پیاوه‌ كردووه‌، ئه‌گه‌ر بێت و ئه‌و بڕه‌ پاره‌یەی كه‌ داوایكردووه‌ پێینه‌دات، ئابڕووی ده‌بات و هاوار ده‌كات له‌ نێو خه‌ڵكی، به‌وه‌ی ده‌ستدرێژی سێكسی كردووه‌ته‌ سه‌ر، به‌ ده‌ست بردن بۆ جه‌سته‌ی.

سومه‌یه‌ی ده‌رۆزه‌كه‌ر، گومانی ئه‌وه‌ی لێكردم هه‌واڵ به‌ پۆلیس بده‌م بۆ ده‌ستگیركردنی، بۆیه‌ به‌ خێرایی شوێنه‌كه‌ی به‌جێهێشت و به‌دوایدا چه‌ند منداڵیكی كوڕ و كچ كه‌ له‌ دووری خۆی ده‌رۆزه‌یان ده‌كرد به‌ دوایدا ئەوانیش رایان كرد.

 492 جار بینراوە