سەرەکی » راپۆرت » هاوپەیمانیی کوردستان کەمپینی بانگەشەی لەکەرکوکەوە راگەیاندپەڕە 3

هاوپەیمانیی کوردستان کەمپینی بانگەشەی لەکەرکوکەوە راگەیاند

کەرکوک، سیروان محەمەد

ئێوارەی رۆژی پێنج شەممە هاوپەیمانیی کوردستان کەمپینی فەرمی بانگەشەی لە شاری کەرکوک راگەیاند.

لە کەرنەڤاڵێکی جەماوەریدا کە ژمارەیەک لە سەرکرایەتی ی.ن.ک و بزوتنەوەی گۆران و جەماوەرێکی زۆری شاری کەرکوک ئامادەیبوون، کاندیدانی هاوپەیمانیی کوردستان لە هەموو ناوچەکان خۆیان ناساند. پاشان پەیامی هاوپەیمانیی کوردستان بەزمانی کوردی لەلایەن قوباد تاڵەبانی و پەیامی هاوپەیمانیی کوردستان بەزمانی عەرەبی لەلایەن دەرباز محەمەد ئەندامی خانەی راپەڕاندنی بزوتنەوەی گۆڕانەوە پێشکەشکران.

لە پەیامی هاوپەیمانیی کورستاندا ئاماژە بۆ راگەیاندنی بانگەشەی هاوپەیمانێتییەکە لە کەرکوک کرا. روونکرایەوە کە راگەیاندنی هاوپەیمانێتییەکە لە کەرکوکەوە گرنگی و بایەخی خۆی هەیە. جەخت لەسەر پەرۆشی هەردوو رەوانشاد مام جەلال و کاک نەوشیروان مستەفا بۆ قەزیەی کەرکوک کرایەوە. لە بەشێکی تری پەیامی هاوپەیمانی کوردستاندا تەئکید لەسەر پتەوترکردنی تەبایی و هەماهەنگی نێوان ی.ن.ک و بزوتنەوەی گۆڕان کرایەوە. تەئکیدیش لەسەر بایەخی کەرکوک و ناسنامەی کەرکوک وەک شارێکی کوردستانی کرایەوە. راشیانگەیاند وەکو چۆن دەستپێکی بانگەشەکەیان لە کەرکوک رادەگەیەنن بەهەمان شێوە مژدەی سەرکەوتنی هاوپەیمانیی کورستانیش هەر لە کەرکوکەوە رادەگەیەندرێت.

لە پەیامەکەی هاوپەیمانیی کوردستاندا رونکرایەوە وەک هاوپەیمانیی کوردستان کاری جددی دەکەن بۆ یەکلاییکردنەوەی پرسی کەرکوک بەپێی دەستور.

راشگەیەندرا بۆ پرسەکانی پەیوەست بەهەرێمی کوردستان هاوپەیمانیی کوردستان خەمخۆرانە کار دەکات بۆ چارەسەری کێشەکانی هەرێم لە رووی بودجە و مووچە و خزمەتگوزاری و پرسەکانی دیکەشەوە. ئەوەشیان دووپات کردەوە کە چۆن لە رابردوو لە نووسینەوەی دەستوور و یەکلاییکردنەوەی کێشە داراییەکان رۆڵیان بینیوە لە داهاتوو وەکو یەکێتی و گۆران شێلگیرانە تر لەبەغدا دانوستان دەکەن.

داواشیان لە جەماوەری کوردستان و کەرکوک کرد رۆژی ١٠/١٠ بچنە سەر سندوقەکانی دەنگدان و دەنگ بەهاوپەیمانیی کوردستان و کاندیداکانی بدەن.

 260 جار بینراوە