سەرەکی » وتار » مستەفا محەمەد » یەکێتی چی کردووە و پێویستە چی بکا؟

شەن و كەو

یەکێتی چی کردووە و پێویستە چی بکا؟

لەدوای کێشەکەی تەڤگەر
لە دیرۆکی میللەتی کوردا هەمیشە سیاسەتی هەڵە و ستراتیژیەتێکی دژبەر و ناڕوون لە نێوخۆدا حزب و ڕێکخراوە سیاسی و بزاوتە نیشتمانیە کوردیەکانی پێوە گیرۆدەن و ئەم نەهجەش لە شکاندنی شکۆی یەکتر بۆتە بەشێک لە بۆشایی تێفکرین و بێ پڕەنسیپی و ڕاستەڕێی سیاسەت کردن لایان، خراپتر لەوەش لە جیاتی ڕەچاوکردنی دۆخ و هاوکێشە سیاسیە گۆڕاوەکانی ناوچەک، ڕەفتار و کردەی نامەدروس لە تەوقیتی نەخوازراودا زۆرجار بە زیانی دەستکەوتی نەتەوەیی و بزاوتی شۆڕشگێڕی و حوکمڕانی کوردیدا شکاوەتەوە.
شاراوە نییە لە ڕووی فکر و ئایدۆلۆژیاوە بە هۆی حزوری سیاسی و عەسکەریەوە پارتی کرێکارانی کوردستان ڕێکخستنەکانی لە پارچەکانی کوردستاندا پەرت پەرت کردووە و هەر جێیەی بەناوێکی جودا گروپێکی هاوسۆزی ئەو پارتە چالاکن ، لە باشور بزاوتێک هەیە بەناوی تەڤگەری ئازادی کوردستان، کە چالاکی سیاسیان هەیە و بە پێی یاسا کارپێکراوەکانی عیراقیش لەهەڵبژاردنەکانی ئەم دواییەی ئەنجومەنی نوێنەرانی عیراقدا بەشداریان کردووە و ئەندامێکیشیان لەناو ئەو پەرلەمانەدا ھەیە.
ئەوەی جێی سەرنج و تێبینیە، بەهۆی خراپ سود وەرگرتن لە پەیڕەوی ئازادی و دیموکراسی و مافی ڕادەربڕین و بێ گەڕانەوە بۆ ڕابردووی نزیکایەتی لە تێڕوانین و هاریکاری و هەماهەنگی یەکێتی بۆ خەباتی کوردانی باکوور و پارچەکانی تریش ، ئەم تەڤگەرە ماوەیەکە لە باوەشی گەرمی یەکێتیەوە کەوتونەتە پلار و تانە ، دۆزینەوەی ناو و ناتۆرەی دوور لە ئەخلاقیەتی سیاسی و تەخوینکردن و وێناکردنی یەکێتی بە مورتەزەقە و عەمیل، ئەمەش دواجار ڕۆڵی گێڕاوە لە نابوتکردنی خەباتی پارتی کرێکاران لای زۆرێک لە هەوادار و کادری یەکێتی و کەمبوونەوەی وەلائی نیشتمانپەروەری و خۆشویستنی خەباتی دوێنیان.
ئەوانەی ئەمڕۆ بەناوی تەڤگەر و ڕاژاکەوە سەنگەر لە دژی یەکێتی دەکوتن و هیچ موڕاعاتی دۆخەکە ناکەن، بیریان چۆتەوە کە هەر یەکێتی بوو قوربانی بە بەرژەوەندی سیاسی خۆی داوە لە پێناوی کەیسە نەتەوەییەکان و بۆئەوان تاکە پەناگەی ئەمین و ئەمان و حازنەی گەشەسەندنیان بووە، هەر یەکێتی بووە لە باری مەنزوری نیشتمانپەروەرێتی و ڕۆڵی پێشەنگ و دوور مەودایی لە بینینی کوردستانی گەورە و کارکردن بۆ سەرخستنی ڕەوت و ڕێکخراوە مەدەنیەکان لە پارچەکانی تر دا سەرکەوتوانە گێڕاوە و تاک لایەنە بە سیاسەتێکی ژیرانە. لە ڕووی ماددی و مەعنەویشەوە لەسەر جەستەی خۆی هەماهەنگی لەگەڵیاندا درێژە پێداوە، لەم نێوەشدا ئەوەی بەهۆی ئەم بارگاوی بوونە نەتەوەییەوە زیانمەندی یەکەم هاتۆتە دەر، هەر یەکێتی خۆی بووە!
ئەو بزاوتانە لە ئێستای گێرمە و کێشەی پێکنەهاتنی حکومەتی هەرێم و شەڕی خاک و ئاڵا زماندا، لە ساتەوەختی تەنگژە و قەیرانی دارایی و گەماڕۆی سیاسی و ئابوریدا، لە جیاتی هەڵگرتنی لێپرسراوێتی و ڕاستکردنەوەی لاڕێکانیان، بێ نمەکی دەنوێنن و چاویان لە هەڵدێران و گلانی یەکێتیە، دوورتر لەوەش پلان و نیەتی سڕینەوەشیان پێیە و بەدەنگی بەرز دەڵێن: کە دەیانەوێ لە زۆنی سەوزدا بەدیلی ئەو بن! وەک ئەوەی کوردستانی گەورە بە نەمانی یەکێتی ئازاد بکرێ ، یاخود بە بنکۆڵکردنی یەکێتی لەودیو دێگەڵەوە، دەرگایان بۆ چالاکی سیاسی دەکەوێتە سەر پشت و حکومەتی ئاکەپە لە سلێمانیەوە بڕوخێنن!
ئاخر ناکرێ جوڵانەوەیەک هیچ ئەرزش و تەقدیرێک بۆ ئەو هەموو قوربانیدان و مەترسیانەی سەر یەکێتی و تەحەددیەکانی بەردەم حوکمڕانی کوردی دانەنێی ، تەحەددیەک کە هەلومەرجە هەرێمایەتیەکان تەحەکومی پێوە دەکەن ، پێچەوانەی ئەوەش سەنگەری ناوخۆیی لە دژدا پەرە پێ بددەن و لەگەڵ پارت و نەیاری تریاندا بیخەنە یەک تای تەرازووەوە !
ئەگەرچی یەکێتی لە ڕووی مەبدەئی و لۆژیکیەوە، سیاسەتێکی نەگۆڕی هەیە کە بۆ بەهێزکردنی ڕەکیزەکانی ئاشتی لە پارچەکانی تردا گرتویەتیە بەر و دڵنیاشم بەردەوامیان پێ دەدا، لێ هاوشانی ئەوەش پێویستە لەمەودوا پەیوەندیە ستراتیژیەکانی خۆی لە ناوخۆدا بەجۆرێک وێنا بکاتەوە، کە دۆست لە نەیار و هاوسۆز لە بێ ئەمەک و هاوپەیمان لە دژبەر لێکتر جودا بکاتەوە ، تا هیچی تر حزبەکەی « مام» نەکرێتە بەردەبازی بەرژەوەندی هێز و قەوارەی سیاسی هەلپەرست کە لە باوەشی خۆیدا پەروەردەیان دەکات، بەڵام لە هەر وێستگەیەکدا دژ بە یەکێتی ئەگەر بۆیان بلوێ لەجیاتی گۆشت، ئێسقانەکەشی وورد دەهاڕن.
بە واتایەکی تر بۆ یەکێتی پێویستە هەڵوەستەی جددی هەبێت لەسەر ئەدا و وێستگەی خوێندنەوەی واقعی ململانێی حزب و تەیارە ناوخۆییەکان و وورد و بەدیقەت بۆ پێشهاتەکان بڕوانێ و لە هەر ئەگەرێکیشدا دوور لە تەشەنوج دید و ڕوئیایەکی هاوسەنگ پەیڕەو بکا، هەر لەسەر ئەو پێودانگەش سیاسەتی خۆی بۆ ئاییندە دابڕێژێتەوە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

كورد چۆن سوود له‌ كابینه‌كه‌ی…

كورد چۆن سوود له‌ كابینه‌كه‌ی مه‌هدی وه‌رده‌گرێ؟ له‌ كه‌وتنی‌ رژێمی‌ ...