من و كەركوك

1
لە 15-16 ساڵیدا بۆ كەركوك شیعرێكم نووسی بوو ، دێڕی سەرەتای بەو جۆرە بوو :
هەر بژی كوردی كەركوكم یەك دڵ و گیان و ئیمانە
شاری رازاوەی وەك بوكم شەنگە گوڵی كوردستانە
ئەو سەردەمە لانی كەم حزب بەو جۆرەی ئێستا پارچە پارچەی نەكردبوین و یەكترمان خۆش دەویست ، ئەو رۆژگارە رۆژگاری خۆشەویستی و رێزگرتن بوو لە یەكتر ،ئومێدێكی گەورەش لە دڵی هەمووماندا هەبوو كە رۆژێك دێت ستەمكاری و دیكتاتۆریەت كۆتای دێت و سەردەمێكی نوێ‌ دەستپێدەكات .
خەوبینین بە سەردەمی نوێوە ، خەوبینین نەبوو بە لێدانی بیرە نەوت و دەوڵەمەندبوونی كەسانێك و شتی لەو بابەتەوە ، خەوبینینەكە بۆ شتێكی دیكە بوو كە هێشتا نەهاتوەتە دی ، هێشتا ئێمە خەونمان هەیەو بە ئومێدی ئەوەین بەیانی باش بێت تا رۆژی دواتر باشترو باشتر بێت ،دوای ئەو هەموو ساڵە كە ئێستا سەیری كوردی كەركوك دەكەم دەڵێم «ئەو یەك دڵ و گیان و ئیمانە» چی بەسەرهات ؟.

2
تازە دوای ئەو هەموو ساڵە جارێكی تر من شیعرم بۆ كەركوك نووسی ، بەڵام ئەم جارەیان ئەڵێم :
كەركوك ئەكەین بە نیشانەی برایەتی
بە نیشانەی پێكەوە بوون
بە نیشانەی كوردایەتی
بە نیشانەی لە یەك خۆش بوون
لە سەر كەركوك قسەم زۆرەو وەك شێخ رەزای شاعیریش منیش دڵشكاوی ئەو شارەم ، لێ‌ پرسیاری من لێرەدا ئەوەیە گەلۆ ئەرێ‌ بارو دۆخی كوردایەتیەكەمان چۆنەو لە چیدایە ، هەر بەڕاست ئەو كوردایەتیەی باسمان دەكردو لاوانمان بۆ مردن بۆ ئامادە دەكرد ئەمە بوو ، یان شتێكی دیكە ،ئەگەر ئەمەی ئێستا بوو دەبوو هەر لە سەرەتاوە هیچمان نەكردبا ، گەر شتێكی دیكەش بوو ئەوە خێر ئاوا بە تەواوەتی پشتمان لە خاك و خەڵكی شارەكە كردوەو نەوتەكەی نا .

3
كەركوك بۆ من ئازارو خەم و نیگەرانی بووە ، بۆشكە نەوت و پارچە زەوی و ڤێلاو شتی لەو بابەتە نەبووە ، ئەوەی بۆ هەندێك وابووە ، لە گەڵ ئەوەش هەمیشە وەك شارێكی پیرۆز سەیرم كردووە ، كوچەو كۆڵانەكانیم بە پیرۆز زانیووە ، لام وابووە ناكرێت بە هیچ جۆرێك ئازاری ئەو شارە بدرێت ، كەچی ئەوانەی كەركوك بۆیان بۆشكە نەوت و سامان و دەفتەرە دۆلار بووە پێچەوانەی ئەم خەیاڵكاریەی من بۆ یەك چركە خەمیان خەمی كەركوك نەبوەو خەمیان خەمی ئەوە بووە كە چیان لەوێ‌ دەست دەكەوێت ، هەر كاتێكیش كەركوك لەبەردەم هەڕەشەدا بووە جێیان هێشتوە ، من پێم وابووە دەبێت خۆمان كەركوك بكەینەوەو شارو گرێیبدەینەوە بە نیشتمانەوە ، لێ‌ ئەوان پێیان وابووە دەكرێت نەوەكانیان ئەوە بكەن .

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

په‌ڵكانه‌و شوێنه‌كانی‌ تر

1 زه‌ڕه‌یه‌ك خاكی‌ وه‌ته‌ن ناده‌م به‌ قه‌سری‌ قه‌یسه‌ری‌ جۆگه‌له‌و ئاوی‌ ...