سەرەکی » وتار » لەتیف فاتیح فەرەج‌ » پارتیزانی و شیعر

خورجە

پارتیزانی و شیعر

1
ئێستا كە دەفتەرو بیرخەرەوەو نوسینەكانی یەكێك لە پارتیزانە هەرە پاك و شۆڕشگێڕەكانی كورد ئەم دیوو ئەو دیو دەكەم، لە هەندێ‌ شوێن گریان ئەوكم دەگرێت و لە خۆم دەپرسم قوربانی دان لە پێناوی ئازادیدا زۆر لاوی كوردی بە ئومێدەوە گەیاندە كەشكەڵانی فەلەك و شەهید بوون بووبە بەشیان، لێ‌ هێشتا نەئازادی ئەو ئازادیەیە كە ئێمە خەونمان پێوە دەبینی و، نە ئەو دادگەریەش بە دی هاتوە كە رۆژێك لە رۆژان چەند گەرمەسێریەك بۆ یەكەم جار لەو گەرمیانە بڕیاری پارتیزانیان دا لە پێناویدا، ئێستا كە سەیری یاداشتەكانی ئەو پارتیزانە دەكەم و لە نێو هەندێك نامەدا كۆدی ئازایەتی و قوربانی دان دەكەمەوە، دەڵێم داخوا ئەو رۆژە بێت مۆزیەكی شایستە بۆ ئەو نامەو یاداشت و وێنانە بكرێتەوە و كوردیش شانازی بەو دیرۆكەوە بكەن.
2
دێڕە شیعرێك لە نێو یاداشتەكەدا هەڵوەستەی پێكردم :
بە كام نەگەیوو لە كوردستانا
خوایە چەند زۆرن لە گۆڕستانا
ئەوە كاتێك نوسراوە تازەكی بەعسیەكان بە ئاگرو ئاسن بەربونەتە وێزەی كوردستان و هەر ئەو دەمیش خاوەنی ئەم یاداشتانە لە گەڵ چەند هاوڕێیەكیدا باسی مانەوەو بەردەوامی دان بە شۆڕش دەدات، ئەوە لە كاتێكا ئیدی گەرمەسێر قەرایی تیا نەماوەو بوە بە سوتمەرۆ، ئێمە دەمانەوێت دوای سێ‌ دەیە زیاتر لەو نەهامەتیە ئەو سوتماكە بێنینەوە بیری ئەوانەی كە لایان وایە شۆڕش بۆ ئەوە كرا هەندێك ببنە سەرمایەداری مەترسیدارو هەندێكیش نائومێد بكرێن،، دوای سێ دەیە زیاتر لەو رۆژە ڕەشانە ئێستا ئەو شیعرانە دەخوێنینەوە كە پارتیزانێك ویتویەتی لە رێگەیەوە خەمەكانی خۆی دەربڕێت .
شیعر هاوڕێیەكی باشی هەموو ئەوانەیە كەخەونێكیان هەیە، پارتیزانەكانیش خەونێكیان هەبوو خەونێكی گەورە .
3
لەو دەمەیدا گوێ‌ هەڵخە بۆ قەتارێ‌
لەو دەمەیدا ماملێ‌ ئەیڵێ‌ قەتارێ‌
یادم بكەن یادی منی دور وڵات
یادی منی رێبواری رێگەی خەبات
یادی منی بێبەش لە خۆشی و شادی
یادی منی سەودا سەری ئازادی
ئەوان سەودا سەری ئازادی بوون، بۆ ئەوەی میلەتەكەیان بە ئازادی بژێت بە گژ ستەمكاری و مەرگدا دەچوونەوە، ئەوان لە نێو ئەو دۆزەخەدا بە دوای دروستكردنی بە هەشتێكەوە بوون بۆ نەتەوەكەیان، نەیاندەزانی رۆژێك دێت بەشێكی زۆر لە بەرپرسان بە دووی بەهەشتی درۆینەی خۆیاندا دەستبەرداری میلەت دەبن و پشت دەكەنە ئەو بەڵێنانەی كە پێشتر بە كوردو بە پارتیزانەكانیان دابوو.
من ئێستاش كە ئەو پارتیزانەو بەشێك لە هاوڕێكانی دەبینم، كە كاتی خۆی بە گژ قولەی قافدا چونەتەوە وەك شێركۆ بێكەس دەڵێت، هەست دەكەم ئەو گیانی پارتیزانیە هێشتا بڵێسەی لێدەڵدەسێت .
ناگۆڕمه‌وه‌
خاكی‌ ئه‌و جێگه‌ی‌ كه‌ كورده‌ نه‌شته‌ری‌ خاری‌ وه‌ته‌ن

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*