سەرەکی » دۆسێ » ناوەندی دەستبەسەركردنی كۆچەران لە لیبیا بۆردومان دەكرێتپەڕە 2

لانی كەم 40 كەس كوژران

ناوەندی دەستبەسەركردنی كۆچەران لە لیبیا بۆردومان دەكرێت

ژمارەیەك فڕۆكەی جەنگی نەناسراو، ناوەندی دەستبەسەركردنی كۆچبەران لە پایتەختی لیبیا بۆردومان دەكەن، ئەمەش بە گوتەی بەرپرسانی حكومەت.
لە 3ی تەمموزی 2019، ئاژانسی رۆیتەرز لە زاری چەند بەرپرسێك لە دەزگای تەندروستی لە تەرابلوس بڵاویكردەوە، لانی كەم 40 كەس لەو بۆردومانەدا كوژران كە ناوەندێكی دەستبەسەركردنی كۆچبەرانی لە ناوچەی تاجورا كردبوو ئامانج.
بە گوتەی ئەو بەرپرسانە، 80 كەسی تر لەو بۆردومانەدا برینداربوون.
پێشبینی دەكرێت، زۆربەی كوژراوەكان لەو ئەفریقاییانە بن كە هەوڵیاندەدات لەڕێی رێڕەوە دەریاییەكان لە لیبیاوە بگەنە ئەوروپا.
هەزاران كۆچبەری ئەفریقایی لەو ناوەندانەدا دەستبەسەرن كە لەلایەن حكومەتەوە بەڕێوەدەبرێن.

زانیارییەكان لەبارەی هێرشەكەوە
حكومەتی ویفاق كە لەسەر ئاستی نێودەوڵەتی دانپێدانراوە و هێزەكانی سەر بە جەنەراڵ خەلیفە حەفتەر، یەكتر بە ئەنجامدانی هێرشەكە تۆمەتبار دەكەن.
ئاژانسی پەنابەرانی سەر بە نەتەوە یەكگرتووەكانیش» نیگەرانی زۆری خۆی بەرانبەر بە گیانلەدەستدانی پەنابەران و كۆچبەران دەربڕیبوو».
بەپێی ئەو وێنانەی لەلایەن بەرپرسانی لیبیاوە بڵاوكرانەوە، كۆچبەرانی ئەفریقایی دەردەكەون كە لە دوای هێرشەكەوە لە نەخۆشخانەكان چارەسەر دەكرێن.
ئاژانسی فرانس پرێس لە زاری هوسمان عەلی وتەبێژی فریاكەوتن لە تەرابلوس بڵاویكردبۆوە»120 كۆچبەر لەو پەناگەیەدا دەستبەسەربوون كە بەشێوەیەكی راستەوخۆ رووبەڕووی هێرشەكە بووەوە».
هەر بە گوتەی ئەو بەرپرسە، ئەو زانیارییانەی لەبارەی قوربانییەكانەوە هەن، سەرەتایین و رەنگە ژمارەك روو لە بەرزبوونەوە بكات.
تیمەكانی فریاكەوتن بە هەڵەداوان روویان لە شوێنی رووداوەكە كردبوو بۆ گەڕان بەشوێن رزگاربووەكان لەژێر داروپەردووەكاندا.

بەرپرسیارێتی ئەنجامدانی هێرشەكە
تائێستا (تا كاتی ئامادەكردنی ئەم نوسینە) رووننەبۆتەوە ئەو فڕۆكانە سەر بە كێن كە هێرشەكەیان ئەنجامداوە.
حكومەتی ویفاقی نیشتمانی كە لەلایەن نەتەوە یەكگرتووەكانەوە دانپێدانراوە و لەلایەن فایز سەراجەوە پشتیوانی لێدەكرێت، هێزەكانی حەفتەری بە ئەنجامدانی هێرشەكەی سەر ناوەندی دەستبەسەركردنی كۆچبەران، تۆمەتبار كردبوو.
بەڵام هێزەكانی حەفتەر كە خۆیان بە سوپای نیشتمانی لیبیا ناودەبەن، رەتیانكردبۆوە فڕۆكەكانیان هێرشەكەی ئەنجامدابێت.
وتەبێژی ئەو هێزانەش رایگەیاندبوو، میلیشیاكانی سەر بە حكومەت پێگەكەیان بۆردومان كردووە.
بە گوتەی هێزەكانی حەفتەر»تاوانە قێزەونەكە» رێكخراوە و بە مەبەست بووە و «بەوردی» ئەنجامدراوە.
هێزەكانی حەفتەر لە 3ی تەموزدا رایانگەیاندبوو، هێرشی چڕ دەكەنە سەر ئامانجەكان لە تەرابلوس لە دوای خستنەگەڕی تەواوی «ئامرازە تەقلیدییەكانی جەنگ».
ئەو هێزانە دەڵێن»فڕۆكەكانیان سەربازگەیەكی سەر بە حكومەتییان لە نزیك ناوەندێكی كۆچبەران بۆردومان كردووە، و هێزەكانی حكومەتیش بە تەقەكردن بەرپەرچییان داوەتەوە».

ئەو مەترسیانەی لە لیبیا رووبەڕووی كۆچبەران دەبنەوە
ئەو پشێوییە سیاسییەی كە لیبیای گرتەوە، بووە مایەی ژیانەوەی بەقاچاخبردنی كۆچبەران لەلایەن باندەكانەوە كە دۆخی كۆچبەرانیان لە باشووری بیابانی قۆستۆتەوە و هەزاران دۆلارییان لەبەرانبەر گەیاندنییان بە ئەوروپا لێوەردەگرتن.
گروپ و رێكخراوەكانی مافی مرۆڤ، ئەو دۆخە نالەبارەی كۆچبەران رووبەڕووی دەبنەوە لە ناوەندەكانی دەستبەسەركردنی كۆچبەران زەقدەكەنەوە كە زۆربەیان لە كۆتاییدا كەوتوونەتە چنگی پاسەوانەكانی كەناردەریا لە ئەوروپا و لیبیا.
تاجورا مۆڵگەی زۆرێك لە سەربازگەكانی سوپای حكومەتی ویفاقی نیشتمانی لەخۆدەگرێت كە لەلایەن نەتەوە یەكگرتووەكانەوە وەك دەسەڵاتی شەرعی لە لیبیا دانی پێدانراوە.
ئەو سوپایە لە دژی هێزەكانی سەر بە خەلیفە حەفتەر كە بۆ چەند مانگێكە هەوڵ دەدات دەست بەسەر تەرابلوسدا بگرێت شەڕ دەكات.
هێزەكانی حەفتەر كە بە هێزەكانی خۆرهەڵاتی لیبیا دەناسرێن، لە 3ی تەمموزی 2019 رایانگەیاندبوو، هێرشێكی ئاسمانی چڕ بۆ سەر چەند ئامانجێك لە تەرابلوس ئەنجام دەدەن ئەمەش پاش «كەمبوونەوە و تەوابوونی ئامرازە تەقلیدییەكانی جەنگ».
هێزەكانی حكومەتی ویفاق چەند رۆژێك لەمەوبەر، بنكەیەكی سەربازی گرنگییان لە غریان لە چنگی هێزەكانی حەفتەر دەرهێنا.
كۆچبەرانی سەر بە وڵاتە ئەفریقایی و عەرەبییەكان، لیبیا وەك خاڵی سەرەكی بۆ پەڕینەوە بۆ گەیشتن بە ئەوروپا لەڕێگەی دەریاوە بەكاردەهێنن، بە تایبەت بۆ گەیشتن بە ئیتاڵیا.
هەزاران كۆچبەر لە ناوەندەكانی دەستبەسەركردندا دەژین كە لەئێستا لەژێر كۆنترۆڵی دەسەڵاتدارانی لیبیادان.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*