سەرەکی » دۆسێ » ئەگەری هەڵاتنی دیلەكانی داعش لە ئارادایە

ئۆردوگای (الهول) بۆمبێكی تەوقیتكراو

ئەگەری هەڵاتنی دیلەكانی داعش لە ئارادایە

گرتوخانەكانی ژێر دەسەڵاتی هێزەكانی سوریای دیموكرات (هەسەدە) كە زۆربەیان چەكدارە دیلەكانی رێكخراوی تیرۆرستی داعشیان تێدایە، لەئێستادا و لە دوای بڕیاری پاشەكشەكردنی هێزەكانی ئەمریكا لە ناوچەكە و دەستپێكردنی ئۆپەراسیۆنە سەربازییەكەی توركیا، بوونەتە مایەی هەڕەشەیەكی گەورە و وەك بۆمبێكی تەوقیتكراو تەماشا دەكرێن لەحاڵەتی كراونەوەی دەرگاكانی و ئازادبوونی زیندانییەكان، لەو بارەیەشەوە زۆرێك لە لایەنەكان وەك دەروازەیەك بۆ دروستبوونەوە و هاتنەوە كایەی رێكخراوەكە توندڕەوەكە تەماشای دەكەن كە لەماوەی چەند ساڵی رابردوودا گەورەترین هەڕەشەی لەسەر ناوچەكە و جیهان دروستكردبوو.

هۆشداریی دەدرێت
هێزەكانی سوریای دیموكرات (هەسەدە) هۆشداریی دەدەن لەبارەی هەڵاتنی چەكدارانی ڕێكخراوی داعش كە لەئێستادا لە گرتوخانەكانی ئەواندا دەستبەرن، لەو بارەیەشەوە كۆمەڵی نێودەوڵًەتی بە گشتی و هاوپەیمانی نێودەوڵەتی ئاگاداردەكەنەوە.
فەرماندەی ئەنجومەنی سەربازی تەبەقە لە 9ی تشرینی یەكەمی 2019، لە بەیاننامەیەكدا ڕایگەیاندبوو”دەستدرێژییەكان بۆسەر ناوچەكانی باكووری خۆرهەڵاتی سوریا بە بیانووی ناجۆر، بۆ هێنانەدی ئامانجی توركیایە لەڕووی دروستكردنەوەی هەرەمی چڵكاوخۆرەكانی داعش و ڕێكخستنەوەی ڕیزەكانیان و بوژاندنەوەی ڕێكخراوەكە”.
هەر لە بەیاننامەكەدا، هێزەكانی سوریای دیموكرات بەرپرسیارێتی مەترسی گرتووخانەكانی داعشییان خستووەتە ئەستۆی كۆمەڵی نێودەوڵەتی بە گشتی و هاوپەیمانی نێودەوڵەتی بە تایبەتی كە هەزاران كەس لە مەترسیدارترین چەكدارانی داعش لەخۆدەگرن.

گرتوخانەكان بۆردومان دەكرێن
ناوەندی ڕاگەیاندنی (هەسەدە) لە 10ی تشرینی یەكەمنی 2019 رایگەیاندبوو، سوپای توركیا دەوروبەری ئەو گرتوخانانە بۆردوومان دەكات كە دیلەكانی داعشی تێاندا زیندانین.
ناوەندی ڕاگەیاندنی هێزەكانی سوریای دیموكرات (هەسەدە) لە بەیاننامەیەكدا رایگەیاندبوو، سوپای توركیا دەوروبەری ئەو زگرتوخانانە بۆردوومان دەكات كە دیلەكانی داعشی تێاندا زیندانیكراون، ‌وئەمەش لەكاتێكدایە كە ئەو زیندانەی تیرۆریستە دیلكراوەكانی داعشی تێدایە دەكەوێتە شاری حەسەكە لە ڕۆژئاوای كوردستان كە دەكاتە باكووری ڕۆژهەڵاتی سوریا.

بە تەقاندنەوەی ئۆتۆمبێلی بۆمڕێژكراو
ئۆتۆمبێلێكی بۆمبڕێژكراو لە نزیك یەكێك لە گرتوخانەكداندا لە گەڕەكی جویران لە پارێزگەی حەسەكەی ڕۆژئاوای كوردستان دەتەقێتەوە كە هەزاران دیلی داعشی تێدایە و دیلەكانیش بە چەكدارە مەترسیدارەكانی ڕێكخراوەكە دادەنرێن.
لە 12ی تشرینی یەكەمی 2019، تەلەفیزیۆنی فەرمی سوریا بڵاویكردەوە، ئۆتۆمبێلێكی بۆمبڕێژكراو لە نزیك گرتوخانەیەك لە پارێزگەی حەسەكە ڕویداوە و لە دوای تەقینەوەكەش دەستڕێژی گوللـە لە دەوروبەری گرتوخانەی ناوەندی حەسەكە بیستراوە، ئاماژەی بە بوونی هەزاران چەكداری مەترسیداری ڕێخكراوی داعش كردووە لە نێو گرتوخانەكەدا.
لە 11ی تشرینی یەكەمی 2019، بەرپرسێكی باڵای وەزەتی دەرەوەی ئەمریكا ڕایگەیاندبوو، هێزەكانی سوریای دیموكرات (هەسەدە) هاوپەیمانی ویلایەتە یەكگرتووەكان، لەئێستادا كۆنترۆڵی هەموو ئەو گرتوخانانەیان كردووە كە كەوتوونەتە ئەو ناوچانەی ئۆپەراسیۆنە سەربازییەكانی توركیایان تێدا بەڕێوەدەچێت.
بە گوتەی بەرپرسە ئەمریكاییەكە،” گرتوخانەكان 10 هەزار زیندانی داعشیان تێدایە و گفتوگۆش لەبارەی كاریگەریی چوونەناوەوەی توركیا ناكەین بۆ ئەو ناوچانە، چونكە بابەتەكە پەیوەندی بە هەواڵگری سەربازییەوە هەیە، بەڵام هەر ئەمەیە كە بۆتە مایەی نیگەرانی سەرۆك ترەمب”.
بەرپرسەكەی وەزارەتی دەرەوەی ئەمریكا دەڵێت”سەرۆك ترەمپ لەسەر ئاستێكی باڵا لەلایەن توركیاوە لەوە دڵنیاكراوە، گەر ئەو گرتوخانانە كۆنترۆڵ بكەن، بەرپرس دەبن بەرانبەر بە دەستگیركراوەكان”.

هەوڵی هەڵاتن
ژمارەیەك لە ژنانی چەكدارانی داعش لە كەمپی ئەلهول لە ڕیفی حەسەكە، پەلاماری پاسەوانانی كەمپەكە دەدەن و ئاگر لە هەندێك خێمە بەردەدەن، ئەمەش هاوكاتە لەگەڵ دەستپێكردنی ئۆپەراسیۆنە سەربازییەكەی توركیا بۆسەر باكووری خۆرهەڵاتی سوریا.
ڕوانگەی سوریا بۆ مافەكانی مرۆڤ لە 10ی تشرینی یەكەمی 2019 جەختی لەسەر ڕاستی هەواڵەكە كردبووەوە و باسی هێرشی ژنانی چەكدارانی داعش كردووە بۆسەر پاسەوانانی كەمپی ئەلهول، ڕەتیشیكردبووەوە زانیاریی لەبارەی بوونی قوربانیانەوە هەبێت لە ڕووداوەكەدا، بەڵام میدیا خۆجێییەكانی سوریا، باسیان لە هەڵاتنی ژمارەیەك لە داعشەكان كردووە (پێدەچێت ژنانی چەكدارانی داعش بن)، ئەمەش دوای سوتاندنی چەند خێمەیەك و هێرشكردنە سەر پاسەوانەكان.
ڕۆژنامەی (گاردیان)ی بەریتانی دەڵێت”هێزەكانی سوریای دیموكرات لە كەمپی ئەلهول دەیان هەزار كەسی سەر بە ڕێكخراوی داعشیان لە خۆرهەڵاتی سوریا دەستبەسەر كردووە كە نزیكەی هەزارییان ئەوروپایین و 70 هەزار ژن و منداڵیش لەنێو كەمپی ئەلهولدان”.
لە هەوڵێكی هاوشێوەدا و لە كەمپی ئەلهولی باشووری خۆرهەڵاتی شاری حەسەكە، كە بە مەترسیدارترین كەمپ لە جیهاندا دادەنرێت، ئاژاوە و پشێوی دروست دەبێت و ژنانی سەر بە (الحسبە النسائیە)ی سەر بەڕێكخراوی داعش، پەلاماری هێزەكانی ئاسایشی ژنی سەر بە هێزەكانی سوریای دیموكرات (هەسەدە) دەدەن.
ڕوانگەی سوریا بۆ مافەكانی مرۆڤ لە 30ی ئەیلولی 2019 لە بەیاننامەیەكدا رایگەیاندبوو، گروپێك لە ژنانی داعش، كە لە نێو كەمپی ئەلهول بەشێوەیەكی نهێنی وەك (حسبە نسائی) كاردەكەن، ژنێكیان جەڵد كردووە و لەو دەمەدا هێزە كوردییەكان دەستوەردانیان كردووە و ڕێگەیان لە كارەكە گرتووە، ئەمەش پەرەی سەندووە و بۆتە مایەی پێكداهەڵپژان بە چەك لەنێوان هەردوولادا”.
ڕوانگەی سوریا بۆ مافەكانی مرۆڤ دەڵێت: “لە پێكداهەڵپژانەكەدا ژمارەیەك كەس لە هەردوولا برینداربوون، پرسیارەكەش لێرەدا ئەوەیە سەرچاوی ئەو چەكانە لە كوێوەیە، كە كەوتوونەتە دەست ژنە داعشییەكان”.
ماڵپەڕە خۆجێییەكان باس لە كوژرانی ژنێكی داعش و برینداربوونی 7 ی تر دەكەن لەڕووداوەكەدا، وێڕای دەستگیركردنی 50ی تر لەلایەن هێزەكانی ئاسایشی كوردی لە كەمپەكەدا.
دانیشتووی كەمپی ئەلهول لە باشووری خۆرهەڵاتی شاری حەسەكەی ڕۆژئاوای كوردستان، بە وتەی بەرپرسانی لیژنەی نێودەوڵەتی خاچی سور، نزیكەی 74 هەزار كەس دەبێت، ئەم ژمارەیەش بە ژمارەیەكی گەورە دادەنرێت و بە دوو هێندەی دانیشتوانی شاری كۆبانێ‌ دادەنرێت بەر لە بەرپابوونی جەنگ لە سوریا.

هەڵگری هزری داعشین
ڕۆژنامەیەكی بەریتانی هۆشداریی دابوو لە مەترسییەكانی داعش لەسەر عیراق و سوریا و ئاماژە بە پاشەكشەكردنی هێزەكانی ئەمریكاش كردبوو لە ئۆردوگای ئەلهول لە سوریا، ئەمەش بە بۆچوونی ڕۆژناكە زەمینە سازی دەبێت بۆ بڵاوبوونەوەی هزری داعش لەنێو ئۆردوگاكە كە 70 هەزار كەس لەخۆدەگرێت.
ڕۆژنامەی (فاینانشاڵ تایمز)ی بەریتانی لە 10ی ئابی 2019 و لە ڕاپۆرتێكیدا كە لەلایەن كلوێ‌ كورنیش-ەوە لەژێرناوی “هەڕەشەی چەكدارانی داعش تائێستاش لە سوریا و عیراق بەردەوامە” نوسراوە، بڵاویكردووەتەوە”ڕێكخراوی داعش كە لە ساڵی 2015دا دەستی بەسەر ناوچەیەكی بەریندا گرتبوو لە سوریا عیراق، دەسەڵاتی پێشووی لەدەستدا و توانای ئەوەی نەما، وەك جاران تۆقاندن بڵاوبكاتەوە”.
ڕۆژنامەكە ئاماژەی بە هۆشدارییەكانی سوپای ئەمریكاش كردبوو لەبارەی ڕێكخراوی داعش كە “تائێستاش مایەی هەڕەشەیەكی بەهێزە”.
هەر لەو ماوەیەدا وەزارەتی بەرگری ئەمریكا ڕایگەیاندبوو”ڕێكخراوی داعش، بەهۆی پاشەكشەكردنی هێزەكانی ئەمریكا لە سوریا دەستیكردووەتەوە بە خۆدەرخستن، بە هەمان شێوە خەریكی ڕێكخستنەوەی تواناكانیەتی لە عیراق”.
وەزارەتی بەرگری ئەمریكا دەڵێت”داعش دەستیكردووە بە یەكخستن و پاڵپشتی هێرش و پەلامارەكانی لە سوریا و عیراق، هۆكاریی ئەمەش تا ئەندازەیەك پەیوەندی بە كەمی توانای هێزەكانی ئەو دوو وڵاتەوە هەیە لەڕووی ئەنجامدانی ئۆپەراسیۆنی درێژخایەن، یان ئەنجامدانی چەندان ئۆپەراسیۆن لە یەك كاتدا، یان پارێزگاریكردن لەو ناوچانەی لەژێر چنگی ڕێكخراوەكە ئازادكراون”.

print

 105 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*