سەرەکی » وەرزش » چەندین سزا دران، گۆڕانكاریی لە خشتەی یارییەكاندا كرا

تۆپی پێی كوردستان

چەندین سزا دران، گۆڕانكاریی لە خشتەی یارییەكاندا كرا

یارییەكانی خولە جۆراو جۆرەكانی تۆپی پێی یانەكانی كوردستان بەردەوامن و ئەم هەفتەیەش لەسەرجەم خولەكاندا هەفتەیەكی نوێی یارییەكان بەڕێوەچوون.

سیروان هیچ یارییەكی نەدۆڕاندووە
سیروانی نوێ لە گروپی یەكەم و لەخولی نایابدا تەنیا یانەیە كە هیچ یارییەكی نەدۆڕاندووەو ئەم هەفتەیەش بردنەوەیەكی باشی تری تۆماركردو لەیاریگای خۆیدا 4-0 لە تیپی سۆرانی بردەوە، برایەتی ركابەریشی لە گروپەكەدا وەڵامی بۆ بردنەوەکەی سیروانی نوێ هەبوو، ئەمیش بردنەوەیەكی گرنگی تۆمار كرد، ئەویش لەسەر حسابی چەمچەماڵ و بردنەوەكەی برایەتی بەجیاوازی گۆڵێك و لە یاریگای خۆیدا بوو 3-2.

شیروانەی سێیەمی گروپەكەش لەدەرەوەی یاریگای خۆیەوە بە سێ خاڵی گرنگەوە گەڕایەوە كەلار، پاش ئەوەی توانی 2-1 لەهەڵۆ بباتەوە، بەم ئەنجامەش شیروانە پلەی سێیەمی بە 9 خاڵ گرتووەو یەك خاڵ لەپێش چەمچەماڵی چوارەمەوەیە.

بەو دۆڕاندنانەی ئەم هەفتەیەیان هەریەك لە هەڵۆ و سۆران پلەكانی پێنجەم و شەشەمی گروپەكەیان گرتووەو هەولێریش ئەم هەفتەیە چاوەڕوان بوو یاریی نەكرد و بەخاڵێكەوە دوا تیپی ریزبەندییە.

دووەم بردنەوەی نەورۆز
لە گروپی دووەمیشدا نەورۆز رێگای وونبووی بردنەوەكانی دۆزیوەتەوە و بۆ دووەم هەفتەی یەك لەسەر یەك یارییەكانی دەباتەوەو پلەیەكیش بۆ سەروی ریزبەندیی سەركەوتووە، زاخۆو دەربەندیخان ئەو دووتیپەن كە سەروی ریزبەندیی گروپەكەیان گرتووەو هەریەكەیان خاوەنی 11 خاڵن، زاخۆ ئەم هەفتەیە لەیاریگای دهۆك و لەدێربی دهۆكدا بردنەوەیەكی گرنگی تۆمار كردو 1-0 لە تیپی یانەی دهۆكی بردەوە، بەپێچەوانەوە دەربەندیخان لەیاریگای خۆیدا كەوتە داوی یەكسان بوون و بەبێ گۆڵ لەگەڵ ئاراراتی شەشەم یەكسان بوو.

هەردوو پێشمەرگەكەی سلێمانی و هەولێریش نەیانتوانی ئەم هەفتەیە بردنەوە تۆمار بكەن، پ.سلێمانی لەیاریگای خۆیدا بە نەورۆز 1-2 دۆڕا، پ.هەولێریش لەگەڵ هەندرێنی دوا تیپی ریزبەندیی بەبێ گۆڵ یەكسان بوو، نەورۆز بە بردنەوەكەی لە پێشمەرگەی سلێمانی لەدواخانەی ریزبەندییەوە بۆ پلەیەك سەروتر سەركەوت و ئێستا حەوتەمی ریزبەندییە.

هەفتەی حەوتەم
بریار وایە كۆتایی ئەم هەفتەیەش یارییەكانی هەفتەی حەوتەم بەمشێوەیەی لای خوارەوە بكرێن:

پێنجشەممە 21/1/2021
*نەورۆز×دهۆك.
*چەمچەماڵ×هەولێر.
*شیروانە×برایەتی.
*پ.هەولێر×پ.سلێمانی.

هەینی 22/1/2021
*سۆران×هەڵۆ.
*زاخۆ×دەربەندیخان.
*ئارارت×هەندرێن.

یاریی ئاشتی و سەید سادق تەواو دەكرێت
لە خولی پلەیەكی یانەكانی كوردستانیشدا یاریی هەردوو یانەی ئاشتی و سەید سادق تەنیا تایمی یەكەمی كراو تایمی دووەمی تەواو نەكرا، ئەم یارییە و رووداوەكانی یارییەكەو ئاژاوەی نێو یاریگا لەلایەن هێندێك لە هاندەرانی یانەی سەیدسادقەوە و ئەو زەرەر و زیانانەی بەر یاریگای یانەی ئاشتی كەوتوون و ئەو نا ئارامییەی توشی یارییەكە بوو، باسی گەرمی ئەم هەفتەیەی خولەكانی كوردستان بوو.

یەكێتیی تۆپی پێی كوردستان بۆ بڕیاردان لەسەر رووداوەكانی یارییەكە لە كۆبوونەوەی رۆژی شەممەی رابردوی خۆیدا بڕیاریدا:

*یارییەكە لەتایمی دووەمییەوە دەستپێدەكرێتەوە.

*ستافی ناوبژیوانی نوێی بۆ دادەنرێت.

* یارییەكە سبەی سێشممە 19/1/2021 بەبێ ئامادە بوونی هاندەرانی یانەكان لە یاریگای یانەی پێشمەرگەی سلێمانی لە فەرماندەیی تەواو دەكرێت و تایمی دووەمی تەواو دەكرێت بە هەمان لیستی ناوی یاریزانان و ئەنجام و سزاكانیەوە.

*محەمەد لە تیف-ی یاریدەدەری ناوبژیوانی یارییەكە كە تەواو نەكرا، تا كۆتایی چالاكییەكانی ئەم وەرزەی یەكێتیی تۆپی پێی كوردستان راگیرا.

*رەمزی ساڵح-ی راهێنەری یانەی سەید سادق بۆ یارییەك راگیراو بەبڕی 250 هەزار دیناریش سزادرا بەهۆی دەرچوونی لە سنوری گیانی وەرزشیی و لە یارییەكەشدا كارتی سوری وەرگرتووە.

*هاندەرانی سەید سادق بۆ دواجار ئاگادار كرانەوە كە لە كاتی رێز نەگرتن لە ڕێنماییەكان و ئەگەر دوور نەكەونەوە لە هاندانی ناتەندروست، یارییەكانی یانەكەیان دەگوێزرێتەوە بۆ یاریگایەك كە 100 كیلۆ مەتر لە یاریگاكەیانەوە دووربێت.

ئەم دوو تیپە بەرلە یارییەكەی ئەم هەفتەیەیان دووەم و سێیەمی گروپی یەكەم بوون، لەبەر ئەوە ئەنجامی یارییەكە بۆ هەردووكیان گرنگ بوو، بەتایبەتی تیپی ئاڵتون كۆپری ئەم هەفتەیە لەگەڵ رزگاری 2-2 یەكشان بووە.

هەرلەم گروپەدا هەڵەبجەی شەهید و خانەقین 1-1 یەكسان بوون.

خاك یەكەمی گروپەكەیەتی
هەرچی یارییەكانی گروپی دووەمە بەبێ هیچ كێشەیەك تەواو بوون و خاكی یەكەمی گروپەكە لەیاریگای خۆیدا نەیتوانی بردنەوە دەستبەر بكات و بەبێ گۆڵ لەگەڵ ئاكرێ یەكسانبوو، لەگەڵ ئەم ئەنجامەشدا بە 6 خاڵ یەكەمی گروپەكەیەتی.

لەیارییەكی تریشدا شەقڵاوە 2-0 لەئاسۆی دواتیپی ریزبەندی بردەوەو كۆیە لەیاریگای خۆیدا بەگۆڵێكی بێ وەڵام لەگارای پێنجەمی بردەوەو كۆیەش سێیەمی گروپەكەیە.

لەلایەكی تریشەوە یەكێتیی تۆپی پێی كوردستان بڕیاریدا هەردوو یاریی رزگاری × ئاشتی و سەیدسادق×خانەقین كە دوو یاریی ئەم هەفتەیەی خولەكەن، رۆژی هەینی 22/1 سەعات 2 ی نیوەڕۆ بكرێن، یارییەكانی تری خولەكە رۆژی چوارشەممە 20/1 بەمشێوەیە دەكرێن:

گروپی یەكەم
هەڵەبجەی شەهید×ئاڵتونكۆپری.

گروپی دووەم
*ئاسۆ × كۆیە.
*ئاكرێ × شەقڵاوە.
*گارا × خاك.

هەشتەم بردنەوەی ئافرەتانی دهۆك
لەلایەکی تریشەوە، خولی نایابی فوتساڵی كچانی یانەكانی كوردستانیش بەردەوامن.

تیپی كچانی ئافرەتانی دهۆك تەنیا تیپی بەشداری خولەكەیە لە كۆی هەشت یاریی كەكردوونی، سەرجەم یارییەكانی لە ركابەرەكانی بردۆتەوەو 24 خاڵی هەیەو یەكەمی ریزبەندیی خولەكەیە هەرچەندە ئەم هەفتەیە چاوەڕوان بووەو یاریی نەكرد.

چۆمان ركابەری ئافرەتانی دهۆكە بەوەی تەنیا یەك دۆڕانی هەیە لەكۆی هەشت یاریی كەكردوونی و ئەم هەفتەیەش لەیاریگای رواندز 3-1 لە كچانی روانزیان بردەوە و بە 21 خاڵ پلەی دووەمی ریزبەندیی گرتووە.

سیروانی نوێ گەورەترین بردنەوەی تۆمار كرد
لەیارییەكی گرنگی تری خولەکەدا، سیروانی نوێ گەورەترین بردنەوەی هەفتەی تۆمار كرد بەوەی لەدەرەوەی یاریگای خۆیدا لە هەولێر 7-3 لە تیپی ئافرەتانی هەولێری بردەوە، بەم بردنەوەیەش سیروانی نوێ لەكۆی 7 یاریی كە كردوونی، پێنج بردنەوەو دوو دۆڕاندنی هەیەو بە 15 خاڵ چوارەمی ریزبەندیی خولەكەیە.

تەناهی سێیەمیش ئەم هەفتەیە 4-1 لە چوار قوڕنەی بردەوەو ئاكرێش 3-1 لە شێخانی بردەوەو ئاكرێ بە 7 خاڵ حەوتەمی ریزبەندییەو شێخانیش دوا تیپی ریزبەندییە.

یارییەكانی ئەم هەفتەیە
یەكێتیی تۆپی پێی كوردستان بڕیاریدا یارییەكانی هەفتەی دەیەم بۆ رۆژی 29/1 دوا بخات و بڕیار وایە رۆژی هەینی ئایندە 22/1/2021 یارییەكانی هەفتەی یانزەیەمی خولەكە بەمشێویە بكرێن:
*چۆمان ×شێخان.
*رواندز × سیروانی نوێ.
* ئا.هەولێر×چوارقوڕنە.
*ئاكرێ × ئەفرۆدێت

برایەتی و ئاشتی یەكەمی گروپەكانیانن
یارییەكانی خولی تازەپێگەیشتووانی یانەكانی كوردستانیش بەردەوامە و هەفتەی رابردوو یارییەكانی هەفتەی پێنجەمیش كران.

بەتەواو بوونی یارییەكانی ئەو هەفتەیە، لە گروپی یانەكانی سلێمانی و كەركوك، ئاشتی و پێشمەرگەی سلێمانی یەكەم و دووەمی گروپەكەن وئاشتی خاوەنی 11 خاڵ و پێشمەرگەش 10 خاڵی هەیە.

شۆرجەو خاكیش لە شاری كەركوك سێیەم و چوارەمن شۆرجە 9 خاڵ و خاك خاوەنی 8 خاڵە.

لەگورپ یانەكانی هەولێرو دهۆكیشدا برایەتی یەكەمی ریزبەندییە بە 13 خاڵ و سێ خاڵ لە پێش هەولێری دووەمەوەیە، دهۆكیش سێیەمەو 7 خاڵی هەیەو ئاراراتیش چوارەمە بە 6 خاڵ.

سبەی سێشەممە 19/1/2021 یارییەكانی هەفتەی شەشەمی خولەكە دەكرێن و یاریی پێشمەرگەی سلێمانی×دەربەندیخان لە هەفتەی شەشەمدا رۆژی چوار شەممە 20/1 سەعات 2 – ی پاش نیوەڕۆ دەكرێت.

 70 جار بینراوە