دەبێت كورد زۆر وریا و ئامادەباش بێت، شەڕ نەكات و هێزی خۆی بپارێزێت و پاسا و نەدات بۆ هێرشكردنە سەری، بەڵام دەبێت ئامادە بێت بۆ بەرگری لەهەر دەستدرێژییەک بۆ سەر ناوچەکانی ژێردەستی
ساڵی 2011 زۆربەی هاووڵاتیانی سوریا دژ بە دەسەڵات و دیكتاتۆریەت و ستەمی رژیمی بەشار ئەسەد راپەڕین، بەڵام بە یارمەتی بێ سنووری ئێران، حزبوڵڵا و روسیا و گۆرێنی هەڵوێستی كەنداو و دەوڵەتانی خۆرئاوا، ئەوكاتە مایەوە و زۆر شوێنی گرتەوە، جگە لە ناوچە كوردییەكان (رۆژئاوا) و باكووری خۆرئاوای سوریا، كە گروپەكانی نزیك لە توركیای تێدا مابوون.
پاشگەز بۆوە لە گۆڕانكاری و چاكسازی
لەو كاتەوە بەشار ئەسەد، لە دانوستاندن و لە بەڵێنی گۆڕانكاری وچاكسازی پاشگەز بۆوە، ئەو جێگیرییە رەواڵەتیەش كە هەبوو، خۆڵەمێش بوو كە ئاگری لە ژێرەوە بوو، ئەسەد كۆمەڵێك فاكتەری پشتگوێ خست، لەوانە شەڕی ئۆكرایین و روسیا و لاوازبوون و کەمبوونەوەی هاوكاری روسیا بۆ ئەسەد، ئەوەش دەریخست روسیا ئەو وورچە نییە وەکو باس دەكرا.
هەروەها شەڕی غەززەو خەریكبوونی ئێران بە كێشەی ناوخۆی و نەتوانینی بەڕیوەبردنی ململانێ لە غەززە و یەمەن و لوبنان و سوریا و عیراقیش وەكو جاران لەو فاکتەرانەن، کە ئەسەد پشتگوێی خست، ئەمە چ جای هەوڵدانی حكومەتی عیراق بۆ سەربەخۆیی زیاتر لە ئێران و نەمانی ئەو رۆڵەی جارانی تاران، گۆڕانی حكومەتیش لە ئێران و شكستی حزبوڵڵا لە شەڕ و رێككەوتن لەگەڵ ئیسرائیل بەشێکی ترن لەو فاکتەرانە، دەریشكەوت سوپاكەی ئەسەد بێ ئێران و روسیا و حزبوڵڵا و میلیشیا شیعەکان، ئەمادە نەبوو بۆ خەڵك كوشتنی زیاتر و شەڕكردن بۆ ئەو رژێمە.
ململانێی وڵاتانی زلهێز و ئیقلیمی
سوریا لە ماوەی چەند ساڵی رابردوو ببووە شوێنی گروپی مافیایی سەر بە بنەماڵەی دەسەڵاتدار و گۆڕەپانی ململانێی هەموو لایەن و ئاراستەكان (روسیا، ئێران، توركیا، ئەمریکا، حزبوڵڵا، گرۆپە ئیسلامییەكان، دیموكراتخواز، داعش، قاعیدە، چەپ)، تا ئۆكرایین و ئیسرائیلیش دەستیان وەردەدایە کاروباری ناوخۆی سوریا .
ئەوەی كاری راستەوخۆی لە رووداوەكان كرد: نەتوانینی روسیا و ئێران و حزبوڵڵا یان نەویستنی هاوكاری زیاتری ئەسەد بوو، رێكەوتنێكیش هەبوو لە نێوان ئەمریكا و ئیسرائیل کە بە ئامانج گرتنی سەركردەكانی حەماس و حزبوڵڵا و كۆمەڵیكی بەرپرسی سەربازی ئێران دەستی پێكرد، تا گەیشتە شەڕی غەززە و لوبنان، ئەمە چ جای ئامادەنەبوونی ئەسەد بۆ هیچ چاكسازیەكی بنەڕەتی و قەبوڵنەكردنی مەرجەكانی توركیا و رێنەكەوتن لەگەڵ كوردی رۆژئاواش .
ئەگەرەكان چین؟
ئەگەرەكان ئێستا ئەمانەن، پاش ونبوون و راكردنی ئەسەد و داواکردنی ئۆپۆزسون لە حکومەتی پێشوو وڵات بەڕێوەببات تا رادەستكردنی دەسەڵات، بە مەبەستی دروستنەبوونی فەوزا(كە ئەوە بە هەنگاویكی ئەرێنی دەژمێردرێت)، ئێستا چەند هێزێک لە سوریا بوونیان هەیە، (ئیدارەی كوردی رۆژئاوا، گروپە ئیسلامییەكان، پاشماوەی سوپا، خەڵكی دیموكراتخواز، كە زۆرینەن هەرچەند خۆشیان رێكنەخستبێت.
- بەردەوامی حكومەتی پێشوو، بە هاوكاری هەموو گروپەكانی ئۆپوزسیون تا ئەنجامدانی هەڵبژاردنی گشتی ئازاد، لە ژێر چاودێرییەکی نێودەوڵەتی (روسیا و ئێرانی لێ دەردەكرێت، بە هۆی هاوكاریان بۆ ئەسەد)، دامەزراندنی حوكمێكی دیموكراسی راستەقینە كە حساب بۆ كورد و هەموو پێكهاتە نەتەوەیی و ئاینییەكان بكات، رەنگە ئەو كاتە سیستەمیكی فیدراڵی بێتە كایەوە.
- هەوڵدانی هەندێك گروپ، بۆ دەستبەسەرداگرتنی دەسەڵات (بە پشتگیری توركیا)، لێدانی ئیدارەی سەربەخۆی رۆژئاوا، كە زۆرینەی خەڵك ئەوەیان ناوێت، لەبەر ئەوەی شەڕی ناوخۆ و تێوەگلانی زۆر لایەن و دەوڵەتی تێ دەکەوێت و مەترسی دروستبوونەوەی داعشیشی لێ دەکەوێتەوە.
لە کۆتاییدا دەبێت كورد زۆر وریا و ئامادەباش بێت، شەڕ نەكات و هێزی خۆی بپارێزێت و پاسا و نەدات بۆ هێرشكردنە سەری، بەڵام دەبێت ئامادە بێت بۆ بەرگری لەهەر دەستدرێژییەک بۆ سەر ناوچەکانی ژێردەستی و هەروەها بیسەلمێنن كە بۆ خۆیان و سوریا كار دەكەن.
