سەرەکی » راپۆرت » تاوانباران دەستگیركران ‌و پارە دزراوەكەش گەڕێنرایەوە بۆ مووچەخۆرانی نەخۆشخانەی شار

دژە تیرۆر و ئاسایش و پۆلیس: ئارامیی سلێمانی هێڵی سوورە

تاوانباران دەستگیركران ‌و پارە دزراوەكەش گەڕێنرایەوە بۆ مووچەخۆرانی نەخۆشخانەی شار

راپۆرتی، كوردۆ عەلی-كەناڵی گەلی كوردستان

بەرەبەیانی دوێنێ سەعات 4:15 دەقیقە، دوای كەمتر لە 24 سەعات، لەهەوڵێكی هاوبەشدا هێزەكانی ئاسایش‌و دژەتیرۆرو پۆلیسی سلێمانی، توانیان ئەو باندە چەكدارە دەستگیربكەن كە رۆژی 12/3/2019 مووچەی كارمەندانی نەخۆشخانەی شاریان، دزی‌، هەردوێنێش مووچە دزراوەكە گەڕێنرایەوەو بەسەر مووچەخۆرانی نەخۆشخانەكەدا دابەشكرا.

تاوانباران لە سلێمانی دەستگیركراون
دوای چەند سەعاتێك لەڕووداوی دزییەكە، سەرەداو دەست ئاژانسی پاراستن‌و زانیاری/زانیاری‌و دژەتیرۆر كەوت، بۆ ئەوەش چەندین تیمی لێكۆڵینەوەی هاوبەش لەنێوان ئاسایشی سلێمانی‌و دەزگای دژەتیرۆر‌و پۆلیسی سلێمانی پێكهێنرا‌و لەسەر بنەمای هەمان سەرەداو، زانیاریی بەدەستهات لەسەر باندێكی دزیی 7 كەسی كە ئەو تاوانەیان ئەنجامداوە. بۆ رێگرییش لەچوونە دەرەوەی ئەو باندی دزییەو بردنە دەرەوەی پارەكە، لەسەر شەقامەكان‌و لەچەندین شوێن‌و جێگە ژمارەیەكی زۆر مەفرەزەی ئەمنیی دانران‌و هێزە هاوبەشەكانیش ئۆپەراسیۆنی دەستگیركردنی تۆمەتبارانیان دەستپێكرد‌و ئامانجەكان زۆر بەوردی دیاریكران‌و تیمی كەناڵی گەلی كوردستانیش یاوەریی دەزگا ئەمنییەكانی دەكرد. ئەوەبوو پاش چەند سەعاتێك، لەسنووری سلێمانی، چەند تۆمەتبارێكی پەیوەست بەڕووداوەكەوە دەستگیركران‌و ئەو ئۆتۆمبیلەشی لەجۆری نیسان پاترۆڵ، كە تاوانەكەی پێ ئەنجامدرابوو، لە گەڕەكی قولەرەیسی لەسلێمانی، دۆزرایەوە.
هەر بۆ هەمان مەبەست‌و دەستگیركردنی تەواوی ئەندامانی باندەكە، هێزەكانی ئاسایش‌و پۆلیسی سلێمانی‌و دژەتیرۆر لێكۆڵینەوەكانیان چڕتركردەوە‌و لەچەند ئۆپەراسیۆنێكی جیاجیادا، توانیان تەواوی ئەندامانی باندەكە دەستگیر بكەن‌و پاش بەدواداچوونی وردیش، ئەو ئۆتۆمبیلەشیان دۆزییەوە كە پارە دزراوەكەی تێدا حەشاردرابوو و لەیەكێك لەگەڕەكەكانی شاری سلێمانی، پارك كرابوو.

10 رۆژ ئامادەكارییان بۆ كردووە
بەپێی زانیارییەكانی كەناڵی گەلی كوردستان، فەرمانبەرێکی نەخۆشخانەی شار، بەشداربووە لەو تاوانەدا، بەجۆرێك زانیاریی لەسەر رێگەی رۆیشتن‌و كاتی گواستنەوەی پارەكە، داوەتە تاوانبارەكان‌و بەهۆیەوە دزییەكە كراوە. هەروەها 10 رۆژ پێش دزییەكە، تاوانبارەكان ئۆتۆمبیلیان بۆ دزییەكە دابینكردووەو ئامادەكاریی تەواویشیان بۆ كردووە، كە بەشێوەیەك بووە «دوای هەڵكوتانەسەر ئەو ئۆتۆمبیلەی پارەی مووچەی نەخۆشخانەی شار-ی پێ دەگوازرێتەوە، پارەكە ببەنە گەڕەكی مامەیارە لای گۆڕستانەكان، لەوێش ئۆتۆمبیلێك لەجۆری نیسان سیدریك چاوەڕێیان دەبێت، تا پارەكەی پێ بگوازنەوە بۆ ماڵێك‌و پاترۆڵەكەش لەشوێنێكی تر بشارنەوە» تاوانەكەشیان هەر بەو شێوەیە ئەنجامداوە كە نەخشەڕێژییان بۆ كردبوو.
هەر دوێنێ لەكۆنگرەیەكی رۆژنامەنووسیدا، لیوا حەسەن نوری بەڕێوەبەری ئاسایشی پارێزگای سلێمانی‌و عەمید ئاسۆ شێخ تەها بەڕێوەبەری پۆلیسی پارێزگای سلێمانی، وردەكاریی ئاشكراكردن‌و دەستگیركردنی باندەكەیان، خستەڕوو.

تەواوی تاوانباران دەستگیركراون
لەسەرەتای كۆنگرەكەدا، بەڕێوەبەری ئاسایشی پارێزگای سلێمانی، رایگەیاند: راستەوخۆ دوای ماوەیەكی زۆر كەم لەڕووداوی دزییەكە، هێزەكانی ئاسایشی سلێمانی‌و ئاژانسی پاراستن‌و زانیاری/زانیاری‌و بەڕێوەبەرایەتیی پۆلیسی سلێمانی‌و دژەتیرۆر، بەهەماهەنگی‌و بەپلانێكی وردو تۆكمە، توانییان لەماوەیەكی زۆر كەمدا سەرەداو لەسەر رووداوەكە ئاشكرابكەن‌و زۆر بەوردی توانییان ئەندامانی ئەو باندە دەستگیربكەن‌و پارەكەش بگەڕێننەوە، وتیشی: باندەكە لە حەوت كەس پێكهاتوون‌و سەرجەمیان پێشتر پێشینەی تاوانی دزی‌و كوشتنیان هەبووەو زیندانی كراون‌و پێشتر پیلانیان بۆ كارەكە داناوەو ئامادەكاریی تەواویان بۆ كردووە، ئێستاش سەرجەمیان دەستگیركراون‌و دانیشیان بەتاوانەكەیاندا ناوە.
هەر لەكۆنگرەكەدا، بەڕێوەبەری پۆلیسی سلێمانی، رایگەیاند: سەرەتا دەستخۆشی لەبرایانی ئاسایش‌و دژەتیرۆر دەكەم كە توانیان شانبەشانی برایانی پۆلیس رۆڵێكی باش بگێڕن بۆ دۆزینەوەی ئەو تاوانبارانە، هەروەك زۆر سوپاسی د.خەسرەو گوڵ محەمەد‌و لیوا حەسەن نوری‌و لاهور شێخ جەنگی‌و پۆڵاد شێخ جەنگی دەكەم كە هەمووان بەهەماهەنگی لیژنەیەكیان پێكهێناو بەهۆیەوە توانرا تاوانباران دەستگیربكرێن. وتیشی: لەگەڵ رووداوەكەدا هێزە ئەمنییەكان ژووری عەمەلیات‌و هەماهەنگییان پێكهێناو بە تەنها لەناو شاردا 150 بازگەو مەفرەزە دانرا‌و لەماوەیەكی كەمدا توانرا سەرجەم ئەندامانی باندەكە بەبێ ئەوەی بهێڵرێت بچنە دەرەوەی شار، دەستگیربكەن.

سەروماڵی هاووڵاتیان پارێزراوە
بەڕێوەبەری پۆلیسی سلێمانی، داواشی لەهاووڵاتیان‌و كەناڵەكانی راگەیاندن كرد، كە پێش رووداوەكان نەكەون‌و بەبێ بوونی بەڵگەی پێویست هیچ لایەنێك‌و كەسێك تۆمەتبار نەكەن، چونكە ئەوە كاری هێزە ئەمنییەكانە كە لێكۆڵینەوە لەڕووداوەكان دەكەن‌و لەكۆتاییدا سەرجەم زانیارییە راست‌و دروستەكان لەسەر رووداوەكان ئاشكرا دەكەن. هاووڵاتیانی سلێمانی‌و دەوروبەریشی دڵنیاكردەوە، كە سەروماڵیان پارێزراو دەبێت‌و بۆ هیچ كەسێكیش نییە بیەوێت ئاسایش‌و ئارامیی سلێمانی بشێوێنێت، چونكە ئاسایشی‌و ئارامیی سلێمانی هێڵی سوورە.

پارەكە گەڕێنراوەتەوە بۆ مووچەخۆران‌و دابەشكراوە
هەر لەبارەی رووداوەكەوە، د.سەباح هەورامی بەڕێوەبەری گشتیی تەندروستیی سلێمانی لەكۆنگرەیەكی رۆژنامەنووسیدا، سوپاسی هەوڵەكانی قوباد تاڵەبانی كرد كە دوای رووداوەكە دەستبەجێ هاتۆتە سەر خەت‌و بەڵێنی گەڕاندنەوەی مووچەی كارمەندانی نەخۆشخانەكەی دا. هەروەها سوپاسی هێزەكانی دژەتیرۆرو ئاسایش‌و پۆلیسی سلێمانی كرد، كە توانیان پارەكەی نەخۆشخانەی شار بۆ كارمەندەكان بگەڕێننەوەو تۆمەتبارەكانیش دەستگیربكەن، ئەوەشی ئاماژەپێكرد كە لەبارەی رووداوەكەوە ژمارەیەك كارمەندی نەخۆشخانەی شار بەمەبەستی لێكۆڵینەوە، بانگهێشتی دادگا كراون.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

قوباد تاڵەبانی: ئەركی كابینەی داهاتوو بەردەوام بوون ‌و پەرەدانە بە چاكسازییەكان

جێگری سەرۆك وەزیرانی هەرێمی كوردستان، لەكۆبوونەوەیەكدا لەگەڵ وەفدێكی ئەمریكی، رایگەیاند: ...