سەرەکی » ئابووری » مەڕدارەكان خورییەكانیان دەسووتێنن

لە كوردستان ئەم بەرهەمە بە هەدەر دەدرێت

مەڕدارەكان خورییەكانیان دەسووتێنن

ئا: دێدەوانی یەعقوب

لەوكاتەی ئەم بەدواداچوونە ئامادە دەكەین، رەوەندەكانی سنووری شاری كۆیە لەبەهارە هەواران هۆبە بەهۆبە رەشماڵیان هەڵداوەو دوای ماوەیەكی تریش بەرەو كوێستانەكان دەكەونەڕێ‌و كاتەكەشی كاتی جۆبر واتا مێگەل بڕینەوەیە.
ئەوەی ئێمە مەبەستمانە ئەوە نییە باس لە جۆبڕ و جۆرەكانی موو و خوری‌و سوودەكانیان‌و هەروەزی جۆبڕ و سوودی بڕینەوەی مەڕو بزن بۆ ئاژەڵەكانیان‌و شێوەی بڕینەوەو جۆرەكانی جەو و كەلەخ‌و برینگ‌و ناوەكانی جۆبری بكەین، وەك مەبەستیشمان نییە باس لەناو كاری مەڕهێن‌و مەڕگرو مەڕبەست‌و مەڕبڕو خوری خڕكەرو تیسك‌و گنجی‌و جۆرەكانیان بكەین، بەڵكو دەمەوێ باسی ئەوە بكەم ئەو هەموو خوری‌و مووە بەدەستی خاوەنەكانیان دەسوتێنرێ!.

حكومەت نایكڕێت
لەبارەی هۆكاری سوتاندنی خوری‌و مووی بڕاوەی ئاژەڵەكانیان، بیلال حامید مەنتك لە هەواری (كانی شینك)ی بنەباوی كۆیە وتی: «جاران خوری‌و موو پارەی زۆری دەكرد‌و دەفڕۆشراو تەنانەت لە وەرزی زستانەوە كڕیارەكان بەڵێنی ئەوەیان لە خاوەن مێگەلەكان وەردەگرت كە خوری‌و مووەكانیان بەوان بیفڕۆشن نەیدەنە كەسی تر، تەنانەت ماڵی واهەبوو بۆ تەنیا دوو خوری چەندین جار دەهاتن بۆ ئەوەی بە پارە خورو یان چەند كیلۆ موویان بدەینێ، چونكە بۆ دروستكردنی (بەرماڵ، جاجم، مافوور، لباد، فەرەنجی، قاپوت، كڵاو، كەژی، پوزەوانە، تورەگە، تێڕ و بەڕە)و زۆر شتی تر بەكاردەهێنرا، بەڵام ئێستا نە كەس ئەو كارانە دەكات‌و نە حكومەتیش موو و خوری دەكڕێت، نە رێگایەكیش دۆزراوەتەوە بۆ هەناردەكردنی، بۆیە بە ناچاری بەدەستی خۆمان دەیسوتێنینن».

زۆر شتی لێ دروست دەكرا
هاوكات، خەدیجە ئەحمەد دەڵێ: «جاران كەم ماڵ هەبوو كە ژنی تەونكەرو دەستڕەنگینی تێدا نەبێت، جا ئەوانەی خۆیان مێگەلیان هەبوو بەشێك لە خوری‌و مووی ئاژەڵەكانیان بەكاردەهێناو ئەوانەی تریشیان دەفرۆشت، ئەو خێزانانەشی كە مەڕو بزنیان نەبوو دەبوایە ساڵانە بەپێی پێویست موو و خوری بكڕن، چونكە جگە لەوەی خوری زۆر شتی لێ دروست دەكرا نمونەی (رەشماڵ، گوریس، خرار، جەواڵ)، دەیان پێداویستی تر لە مووی بزن دروستدەكرا».

هەناردەی دەرەوە دەكرا
لای خۆیەوە، مامۆستا عەبدولوەهاب شێخ مەمودیش ئاماژە بەوە دەكات، پێشتر خوری هێندە بە بەها بوو كە زۆر كەس بژێوی ژیانیان بە كۆكردنەوەو خاوێنكردنەوەو فرۆشتنی ئەو گنجی‌و تیسكە خوری‌و پاشماوەو وەریوی شوێنی مەڕ بڕینەوە دابین دەكرد، ئێستاش ئەو سامانە خۆماڵییە هیچ بەهایەكی نییە.
مارف ئەحمەدیش لە هەواری بنەباوی وتی: «پێستر خوری‌و مووی خۆماڵی بەدەر لەوەی بۆ پێویستی ناوماڵ‌و رستن‌و چنین‌و تەنكاری بەكاردەهات، هاوكات كارگەكانی رستن‌و چنین‌و مافوور بەكاریاندەهێنا‌و بە هەزاران تۆنیش بۆ وڵاتان دەرەوە هەناردە دەكرا».

بە ناچاری دەیسووتێنین
زرار حاجی برایم لە هەواری ئاوڕێژ لەسەر ئەم پرسە قسەی هەیەو روونیدەكاتەوە، بەرهەم‌و دەستكەوتی خاوەن مێگەلەكان سێ شتە ئەوانیش (فرۆشتنی شیرمەنی، فرۆشتنی ئاژەڵ وەك گیسك‌و كاوڕ، هەروەها خوری‌و مووی ئاژەڵەكان)، كەچی بۆ چەند ساڵێك دەچێت خوری‌و موو نافرۆشرێ.
وتیشی: «هەر دەبێت مووی مەڕو بزنەكانمان ببڕینەوە، جا دوای ئەو هەموو ماندوبوونەمان‌و ئەو هەموو خەرجییە، بە ناچاری دەبێت موو و خورییەكان بسوتێنین، بۆ ئەوەی بڵاونەبێتەوەو ژینگە پیس نەكات».

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

پیشەسازكارانی هەرێم روو لە پیشەسازیی خۆراك بكەن

یەکەی ئابووری بێگەرد تاڵەبانی، وەزیری كشتوكاڵ‌و سەرچاوەكانی ئاوی هەرێم، پێشوازیكرد ...