سەرەکی » دۆسێ » چەپكێك پەیڤی گوڵ بۆ چلەی كاك ئەحمەدی حاجی حەمە باقی

چەپكێك پەیڤی گوڵ بۆ چلەی كاك ئەحمەدی حاجی حەمە باقی

چەپكێك پەیڤی گوڵ بۆ چلەی پیاوە بە ویقار و كەسایەتییەكەی شار كاك ئەحمەدی حاجی حەمە باقی

عەبدولی حەمە باقی

برای گەورە و كاكی سەروەرم كاك ئەحمەد گیان هەرگیز بڕوام نەدەكرد ڕۆژێ لە ڕۆژان وشە بۆ مەرگی ناوادەی بەڕێزتان ڕیزبكەم وێڕای هەموو ماندووبوون و ئاستەنگەكانی ژیان تۆ یەك هەمیشە بەڕووی ژیانەوە دەتریقایتەوە و خەندە جوان و ڕاستەقینەكانی سەر لێوت ون نەدەبوون.
ڕاستە مردن یاسای ژیان و بڕیارێكی سروشت و ئەزەلی یە، خۆ تۆ هێشتا هەگبەی دڵسۆزی و پیاوەتی و نانبدەریت لێوڕێژبوو بۆ كەسوكار!!
(كاكە گیان) ئەوە چل شەوی تەواوە ئەو سەفەرە بێ پرس و ڕایە چی بوو لەماوەیەكی كەمدا بێ دەنگ جێمان بێڵی و لەچاوانمان ون بیت !!
خۆ بڕیار بوو هەر ئەو ڕۆژە كە یەكەم ڕۆژی سەرلەبەیانی جەژنی ڕەمەزان بوو بێمە خزمەتت و لەنزیكەوە تێر تێر بەدڵ دەستەكانت زیارەت بكەم و گوێ لە قسەی خۆش و ئامۆژگارییەكانت بگرم، وەكو جاران جەژنانەم بدەیتێ !!
كاكی گەورە و هەمیشە لەڕۆح و یادم، سەیرە و نازانم ئەم مەرگی ناوادەیە وەك خەو دێتە پێش چاوم، هەروا دەزانم لەسوێ ی ئەو كۆمەڵە ئازارەی لە گیانت ئاڵابوو چاوەكانت لێكناوەو كەمێك پشوو دەدەی !!
بەڵام بێدەنگی دیارنەمانی ئەو ڕوخسار و ویقارە جوانە خەمی قووڵی باراندۆتە هەناو و گیانمانەوە.
كاكی شیرینمان !! غەریبیت دەكەین،دەهەستەوە وەكو جاران ڕۆژانی چوارشمووان بەئوتۆمبێلە پاك و جوانەكەی دەستت كە لەشاری سلێمانی دا ئەو كاتە تەنها چەند سەد دانەیەك هەبوو، كۆمانبكەوە و لەگەڵ خوشكەزاكاندا پێكەوە بمانبەوە بۆ سەیران و سەردانی (كانی با) و (پیری كۆكە) و قەشقۆڵی و هەر بەپێكەنینە جوانەكەی خۆت بمانلاوێنە، دەی وەرەوە كاكە گیان وەرەوە !!
كێ لەئێمە دەتوانێ خاوەنی ئەو دڵگەورەیی و لەخۆبردووە بێت هەر لەسەرەتای جوانی و لاویەوە ئەو هەست و بیركردنەوە مرۆڤانەیەی تۆی هەبێ و سەردانی نەخۆش و لێپرسینەوە و دڵنەوایی و هاوكاری بەسەر و ماڵ كردبێ !!
زۆرت هەوڵی چاكە و پیاوەتی و جوامێریت بۆ هەمووان هەبوو، ئەی ئەوە نی یە ئەمێستا دوای دیارنەمانت ڕۆژانە ناوی شیرینی (كاكە ئەحمەد) و هەواڵ پرسینت بەسەر زارانی دۆستان و خۆشەویستانەوەیە و باسی یادەوەرییەكان كۆتاییان نایە و دەبنە مایەی ڕەوینەوەی خەممان و ئۆقرە بەگیانمان دەبەخشن !!
كاكی جوامێرم، سوێند بەیەزدانی دلۆڤان و گیانی مەزنت، وادەزانم هەروەكو جاران چوویتە سەفەری دەرەوەی سلێمانی و لەگەڕانەوەتدا (كاتژمێر) ێكی جوانت بۆ كڕیوم و پێم دەڵی ی دیارییەكی جوانم بۆ هێناوی پیرۆزت بێ.
ئای (كاكە) ئەحمەد گیان شوێنت چەندە دیارە !! كەس لە (تۆ) ناچێ و جێگەت هەگیز پڕ نابێتەوە، تەنها ئەوەی ماوە یادگاری و پیاوەتی و دڵگەورەییت ئارامی بەدەروونی پڕ لەخەم و چاوانی پڕ لەفرمێسكمان دەبەخشێ، فێرت كردین خۆراگر و ورەبەرزبین، ناچار لەیەزدانی مەزن دەپاڕێمەوە لەعەرش و مەملەكەتی سەوزیدا ئارام بگری، دەزانم لە مێژە ئازارت زۆر هەبوو، بنووە ئیتر ئێمەش ناچینەوە سەردانی (كانی با) تەنها دێینە سەر مەزاری پیرۆزت چونكە سەر ڕێژیت لە دیرۆك و ناسنامەی بنەماڵكەمان.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

گەشتی کوردستانی نوێ بۆ وڵاتی چین و ماچین

دووەم گەشتم بۆ وڵاتی چین ئەردەڵان عەبدوڵڵا ماوەی 12 ساڵە ...