سەرەکی » ساڵۆنی کوردستانی نوێ » هەڵەبجە و ئەنفال و کۆڕەوێکی تر لە هەمان بێدەنگیی نێودەوڵەتیدا

ستایشی رۆڵی یەکێتی و راگەیاندنەکانی کرا کە هەردەم پشتیوانیی رۆژئاڤا بەگشتی و عەفرین بووە

هەڵەبجە و ئەنفال و کۆڕەوێکی تر لە هەمان بێدەنگیی نێودەوڵەتیدا

هێرش و پەلامارەکانی سوپای تورکیا و هێزە ئیسلامگەراو قەومەچییەکانی هاوپەیمانی لە چوارچێوەی بەناو (سوپای ئازادی سوریادا)و داگیرکردنی ئەو شارە لەدوای 59 رۆژ لە بەرخۆدان و بەرگریی تا داگیرکردنی ئەو کانتۆنەی رۆژئاوای کوردستان لەژێر سایەی بێدەنگیی کۆمەڵی نێودەوڵەتی و زلهێزە جیهانییەکان و کاولکاریی و کوشت و بڕ و کۆڕەو و سوتماککانی ئەو شارە رەنگینە لەم سەدەیەدا، دووبارەبوونەوەی هەمان دیمەنەکانی هەڵەبجەو ئەنفال و کۆڕەوی کۆتایی سەدەی رابردوو بوو کە لە باشووری کوردستان روویدا.
ئەگەر ئەوێ رۆژێ پاساوەکە ئەوە بووبێت کە کارەسات و مەرگەساتەکانی باشوور لەو سەردەمەدا فۆکسی میدیاکانی لەسەر نەبووەو رژێمی عیراق رێگەی رۆژنامەنووسان و لیژنەکانی دەرخستنی راستییەکان نەدەدا دیمەنەکە وەک خۆی ببینن، ئەوا مەرگەساتی عەفرین لە سەردەمێکدا روویدا کە هەموو جیهان بە هەموو زلهێزە تەباو ناتەباکانەوەو بە هەموو میدیا ئازادو پابەندەکانەوە لەسەر خاکی سوریاو رۆژئاوای کوردستان ئامادەییان هەبوو هەموو دیمەنەکانیان دەگواستەوە، بەڵام عەفرین ئەو وانەیەی پێی وتینەوە کە کورد جگە لەخۆی هیچ دۆستێکی نییەو یەکێتیی نیشتمانیی کوردستانیش وەک هێزێکی کوردستانی راستگۆ لەگەڵ دروشمەکانی خۆی سەرەڕای هەموو ئەو باجەی لەسەر هەڵوێستەکانی دەیدات، وەک عەفرینییەکان لە ساڵۆنی کوردستانی نوێدا جەختیان لێکردەوە، تاکە هێز بووە لەڕووی مەعنەوی و ماددی و میدیاییەوە گرنگیی بەو کارەساتەو خەڵکەکەی داوە.
ساڵۆنی کوردستانی نوێ کۆڕێکی بۆ هۆزان عەفرینی و ئەو گروپەی باشوور رێکخست کە بەشێوەی مەیدانی بەر لە داگیرکردنی عەفرین لە نزیکەوە شایەتی بەرخۆدان و هێرش و کۆمەڵکوژیی تورکیاو هاوپەیمانەکانی بوون.

سەرنووسەر: بەخێربێن سەرچاومان هاتن بۆ كۆڕەكەمان، ئەمڕۆ كۆڕەكەمان کەمێک تایبەتە لەسەر عەفرین‌ و مەرگەساتی عەفرینە، لە هەمووی گرنگتر خۆڕاگریی گەلی كورد لە عەفرین، قسەی زۆر لەسەر كراوە‌و كۆڕیش زۆر كراوە، بەڵام لە هەمووی گرنگتر كەسێكی عەفرینی كۆڕەكە بەڕێوە دەبات، و بەشێك لەو بەڕێزانەش کە میوانن ، لە عەفرینەوە هاتوون و بەشێكی دیکەشیان ئەو كەسانەن كە پێش ئەوەی عەفرین داگیر بكرێت، سەردانی عەفرینیان كردبوو، گفتوگۆكان كاك هۆزان ئیدارەی دەدات‌و چەند گرتە ڤیدیۆییەكیش نمایش دەکرێت، کە هیوادارین ناوەڕۆکی ئەم کۆڕەش ببێتە ئەو هەوڵە میدیاییەی بۆ خزمەتكردن‌و خستنەڕووی مەرگەساتی عەفرین‌و ناساندنی عەفرین بە كۆمەڵگەی دەرەوە کە جگە لە كەناڵەكان كە ئامادەن دەقی ئەو قسانە بگوازنەوە، بۆ مێژووش دەمێنێـتەوەو هیوادارم هەرچی لە دڵتاندایە بیڵێن، چ حیكایەتەکانی بینیوتانە دەیگێرنەوەو وەک مێژوویەکی رەشیش تۆماری دەکەن بۆ ئەو كەسانە ئەو كارەساتەیان بەسەر عەفرین هێناو کە كۆمەڵگەی نیودەوڵەتیش بێدەنگ بوو لەئاستیدا تا بزانرێ كە مێژوو و وێژدانێك لەسەر ئەو قسانە بێـتە جواب‌ دووبارە بەخێربێن.


هۆزان عەفرینی:
سڵاو رێز بۆ هەموو میوانان، سەبارەت بە سیمیناری ئەمڕۆ كاك ستران ئاماژەی پێدا، زۆر سوپاسی كاك ستران‌و ساڵۆنی كوردستانی نوێ دەكەم بۆ ئەم دەرفەتەی كە بۆ ئێمەی رەخساند، تا قسە لەسەر عەفرین بكەین‌و ئەو شاندەش كە چوو بۆ عەفرین ئەوەی بەچاوی خۆیان بینوویانە دەتوانن بیگێرنەوە‌و شرۆڤەی بكەن، ئەوەی لەعەفرین روویداوە، ئەو خەڵكەی تووشی نەهامەتی بووە، یەكێك لەوانە باوكی رێزانە کە خەڵكی گوندی بەركاشییە، برینداربووە گوندەكەیان بە بۆردومانی فڕۆکە وێران بووەو شاندی باشووریش كە چوونە عەفرین، دواتر قسەی خۆیان دەكەن‌، با ئێستا تەماشای ئەو گرتە ڤیدیۆییانە بكەین، گرتە ڤیدیۆییەكیان یەکێکیان لەسەر مێژووی عەفرینە‌و ئەوی دیکەشیان دوای داگیركاریی عەفرینە کە هاووڵاتیان لە چ بارودۆخێكدان‌. پاشان گفتوگۆ دەكەین.
عەفرین تاكە شارە لە رۆژئاوای کوردسیان کە 95%ی كوردەو ئەو شەڕەی لە عەفرین كراوە، دژی كورد‌و كوردستانە نەك لایەنێكی سیاسی. ئەوە باش بزانن ئەو ڤیدیۆیە نیشانەی ئەوەبوو کە داگیركردنی عەفرین شەڕی كورد‌و مێژووی كورد بوو، بۆیە پێمانخۆشە ئەو برادەرانەی سەردانی عەفرینیان كردووە چیان بەچاوی خۆیان بینیووە ئەوان باسی بكەن و راستیی ئەو بەرخۆدانەی هێزی عەفرین كە بەرامبەر هێزی ناتۆ بەرخۆدانییان كرد، خۆیان بینیان و لەوێ بوون، ئەوان دەتوانن زیاتر شروڤەی بكەن.

مامۆستا مەلا نادر عەلی زانای ئایینی ئیسلام:
زۆر سوپاس بۆ ئەو هەلەی كە بۆتان رەخساندین، ئێمە چەند كەسێك بووین لەهەموو پێكهاتە جیاوازەكان‌و چالاكوانان کە سەردانی عەفرینمان كرد، ئێمە سوپاسی كۆنگرەی نەتەوەیی دەكەین ئەو دەرفەتەیان بۆ رەخساندین‌ تا لەگەڵیاندا بچین.
ئێمە نوێنەری شارو شارۆچكە‌و كەمە نەتەوەكانی باشوور‌و كەسوكاری هەڵەبجە‌و شەهیدانمان لەگەڵدا بوو، چووینە ئەوێ، ئێمە کارەساتێکی مرۆییمان بینی، لە خزمەتتاندا باسی بكەم. ئەو شارە چوار دەوری گیرابوو، لە پشتەوە حكومەتی سوریا، لای جەبەل ئەحلامەوە بەردەوامیش‌و بە چواردەوریدا توركیا بە تۆپ‌و تانک و فڕۆکە كەتبووە بۆردومانی شارەكە، هاووڵاتیان نەیان دەتوانی لە شارەكە بچنە دەرەوە، فڕۆكەی چاودێریی هەبوو بەردەوام دەسوڕایەوە، ئەوەی دەبینرا ژیان لە شارەكەدا هەبوو، نزیكەی چارەکە ملیۆنێك خەڵك لە شارەكەدا مابوو، پێویستییان زۆربوو، ئەو كەسانەی شەهید دەبوون تەواو، بریندارەكانیش وەك پێویست چارەسەر نەدەكران، داودەرمان نەمابوو، شەهید‌و بریندارەكان زۆربەی ژن‌و منداڵ بوون، شەڕڤانان لە دەرەوەی شارەكە بوون، بەرگرییان دەكرد، بەردەوام بۆردومان دەكران، لە ماوەی شەوێكدا ئێمە لەناو عەفریندا بووین، بیست جار زیاتر بۆردومان کرا. حكومەتی سوریا بواری نەدەدا كەس بچێتە ناوچەکانی ژێر کۆنترۆڵی ئەوەوە، حكومەتی توركیاش هێرشێکی نا مرۆڤانەو بەمەبەستی قڕكردنی دەکرد، دەیوست هیچ لە مرۆڤەکان نەهێڵێت.
بەڕێزان بیهێننە بەرچاوی خۆتان، شارێك چواردەوری گیرابێت‌و بەردەوام بۆردومان بكرێت، ئەوكاتەی ئێمە لەوێ بووین، 54 رۆژ بوو بەرگرییان دەكرد، دوو شەو و سێ رۆژ لەناو عەفریندا بووین، ئەوان داوایان دەكرد ئێمە بەئەمانەتەوە مەینەتییەکانیان بگەیەنین، ئەوان پێویستیی رۆژانەی ژیانیان نەمابوو نە ئاو، نە كارەبا، نە دەرمان، نە خواردن، ئەوەی من دەیبینم بەداخەوە لایەنە ئیسلامییەكان هاژوهوژ بكەن دەیانەوێ هێرشی ئایینی بێننە ئاراوە، مامۆستا مەلا سامان دەزانێت زیاتر لە 10 مزگەوت بۆردومان کرابوو، خوێنی ئاڵی نوێژخوێنانی نوێژی جەماعەت مان بە بەرماڵەوە بینی، کەچی ئێستا كورد بەوە تۆمەتبار دەكرێت كاتێك یەك پەڕەی قورئان لێدەكاتەوە كە سورەتی فەتحە، زیاتر لە 800 مەلای ئەوان فتوایان دا بەو سورەتە بێنە ناو عەفرینەوە كەس قسەی نەكرد. ئەوەی ئێمە بینیمان زیاتر لە 1000 قورئان سوتاوە بە قەسفی تەیارە‌و تۆپ لەناو مزگەوتەكان بە دەستی چەتەكانی ئەردۆغان بەدەر لەو هەموو ژن‌و منداڵانە ئەوەی ئێمە بینیمان كاتی چوینە نەخۆشخانە دەبین منداڵێك لایەكی سەری لێبۆتەوە‌و دڵی لێ ئەدا لە ماوەی یەك سەعاتدا 34 شەهیدمان ناشتووە بەدەستی خۆمان، ئێستاش ئەوەی ئەوان داوامان لێدەكەن هیچ رێكخراوێك دەوڵەتێك قسەی نەكرد بێدەنگ بوو ئەو بێدەنگییە توركی فاشی‌و دیكتاتۆر سوودی لێبینی، هیچ رێكخراوێكی نیودەوڵەتی هاوكاریی عەفرینی نەكرد، عەفرین تەنها بوو كاتی ئێمە چوین زۆر دڵخۆش بوون حەزیان دەكرد زوو بگەڕێینەوە تا دەنگیان بە جیهان بگەێنیین، چەندە پێویستیان بە هاوكاریی مرۆیی بوو، ئەوەندەش پێویستیان بەوە بوو دەنگیان بە جیهان بگەیەنرێت، بە خەڵكی ویژدان زیندوو و كەسانی ئاینی، لەگەڵ ئەوەشدا ئەو هەموو خوێنەیان لێ دەڕژا دەستی ئاشتییان درێژ دەكرد، بەڕاستی کارەساتە زۆر قورسە تەعبیر لەوە بە گێڕانەوە بکرێت، ئێستاش كە بەتەنها دەبم شتەكان دێتەوە خەیاڵم خۆگرتن زۆر قۆرسە گریانم بۆ ئەو دۆخە دێت.


سالار مستەفا جاف بەرپرسی كەنیسەی مورمون لە سلێمانی:
سڵاو برادەران، سڵاوو ستایش بۆ گەلی عەفرین‌و ئەو بەرخودانەی كە بەدڵ‌و بەگیان كردیان، لێرەوە لەگەڵ ئەو برادەرانە بەڕێكەوتین بۆ عەفرین كەسمان بە تەمای خۆمان نەبووین، من خۆم وەسێتم نووسیبوو، منداڵەكانم زۆر هانیاندام، من وەك نوێنەری مەسیحییەكانی مورمون رۆشتم، مەعنەوییەن لەلایەن دادە هێرۆوە پشگیریی دەكرێین، لەوێ هاوارم بۆ كەنیسەی خۆمان بردووە بڕیارە 16ی مانگ بچین بۆ ئەمریکا، ئەو بردەرانە بچنە ئەوێ دەنگی گەلی عەفرین بگەیەننە ئەوێ و لەوێ دەسەڵاتیان هەیە لە نێو دەسەڵاتدارانی ئەمریكادا.
من چوم مژدەیان بۆ بەرم پشگیریان بكەم، بەڵام كە چووم سەیرم كرد خەڵكێكی خۆڕاگریی لێیە تۆپبارانە، خەڵكی گوێی لێ نییە، خەڵكەكە زۆر هۆشیاربوون، هەمووی جلوبەرگی كۆن‌و شەڕیان لەبەردابوو، بەڵام خاوەنی ئیرادەبوون، توركیا بەناوی ئیسلامەوە قسە دەكات، ئەو وەهمەی دروستی دەكات جاڕی سەرخستنی مەسەلەی فەلەستین دەكات، یەكێک لەوانە فەلەستین میدیاکانی خستبووەگەڕ، غەززە ویرانكرا، میللەتەكەی هەنجن هەنجن دەكرا، كەچی لەولاوە باسی شتی تر دەكات، عەفرین ویرانكراوە كەچی باسی بڕینی مووچە دەكرێت، راگەیاندنی توركیا باسی میللەتی غەززەی نەكرد، باسی تەلەفۆنەكەی یاسر عەرەفاتی دەكرد، دەیانوت شەحنی نییە، پاتریی زیادەی نییە.
من وەك مەسیحییەك لەگەڵ ئەو بەڕێزانەدا رۆشتووم مامۆستا سامان چاوی منە، دەبێـت ئێمە پێكەوە بژین، كاكەیمان تێدابوو مەسیحیمان تێدابوو، شەو خەوتوم مامۆستا سامان، مامۆستا نادر عەباكەی خۆیان پێداداوم.
توركیا شەڕ لەگەڵ نەتەوەكەمان دەكات، بە تەئکید ئەردۆغان تا جەنگاوەرێك مابێت كوردی بۆ لەناو ناچێت و هەر کورد سەردەكەوێت، چونکە كورد ئیرادەی هەیە، كورد هەمووی یەكە، بەهەموو پێكهاتەكانەوە هەموومان عەفرینین، كورد بە پیرو منداڵەوە هاوكاریی عەفرینی كردووە، مێژووش رەحم بەكەس ناكات، ئەوەی بە كۆمێنتێك پشتگیریی داگیركردنی عەفرینی كردبێت، ریسوا دەبێت، چەندین مزگەوتیان تۆپباران دەكرد.
لەیەکێک لەو دیمەنانەدا کە لەرێگادا بینیمان، سێ ئاسایشی رۆژئاوامان بینی لە قووللەیەكدا بوون کە بە بلۆك دروستیان كردبوو، دوای ماوەیەكی كورت بە فڕۆکە لێی درابوو.
خەڵكەکە نەیاندەتوانی بێنە دەرەوە، بەڵام كاربەدەستانی كاتنۆنی عەفرین خزمەتكاری ئەو خەڵكە بوون.
كورد گەلێکی قارەمانە، فەزڵی هەیە بەسەر هەموو ئاینەكاندا، كورد چەندین كەسایەتی ئاینی دیاری هەیە وەك سەڵاحەدینی ئەیوبی‌و چەندین زانای ترمان هەیە، لێگەڕێن با بەئاشتی بژین و زۆر سوپاس.
قادرۆك: نوێنەری زەردەشتیەكان لەپەرستگای زەردەشتیان:
زۆر سوپاس درود بۆ هەمووان ئەو شەرەفەم پێ بڕا بەشداربووم لەو وەفدە، چونكە تەنها بۆ سەردان نەبوو، ئەركێكی پیتاک كۆكردنەوەمان لەسەر بوو بیگەیەنییە جێ بەهاوكاریی كۆنگرەی نەتەوەیی كورد.
من دەمەوێ بە چەند خاڵێك پیرۆزی خەڵكی عەفرین‌ و شەرڤانان هەڵبەسەنگێنم، هەر لە سنوورەوە وڵاتێكی بە ئەزموونی 15 ساڵەم بینی، سیستمێكی جوانمان بینی لە هەمووی گرنگتر خەڵكەكە نیشتمانی خۆیان خۆشدەوێ، لای ئێمە پێشمەرگایەتی بۆ چینێكی دیاریكراو بوو، ئەوانی تر لە دوورەوە سەیریان دەكرد، بەڵام لەوێ هەموویان شەڕڤان بوون، جوانترین شت ئەوەیە بە درێژای مێژوو ژن بەو شێوەیە بەشدارنەبووە، ئێمە سەردانی گۆڕستانەكانمان كرد لە كۆبانی‌و عەفرین، شێوازی بەڕێوەبردنی ئەو وڵاتە لەخۆوە نییە ئەوە ئەقڵێكی سیاسی مەعریفی پەروەردەی كردوون ئەویش بیرو بۆچوونی سەرۆك ئاپۆیە، بیری ماركسی و بیروبۆچونی ئاینی زەردەشتی پەروەردەی كردوون، چونكە هەموویان وەك بەرخۆدانیان هەبوو، هەموو كەسێك لەو وڵاتە ئەركی هەبوو، خەڵكی بەتەمەن ئەگەر نەتوانێ بچێتە شەڕ، شارەكەیان دەپاراست، قوەت‌و مەبدەئی بەهێزیان هەبوو، لە هەموو دونیادا سەربازەكان دەترسن‌ و رادەكەن، ئەوەی من بینیم چەند كەسێكیان دابەزاند وتیان ئەمانە لە مەشقدان، دەیانەوێـت بەدزییەوە بچن بۆ شەڕ، ئەوە جوانترین شت بوو لە لەشكری چ میللەتێكدا ئەوە كراوە بۆیە ئەو میللەتە قەت نافەوتێ‌و هەر سەردەكەوێ، ژنانی ئەوێ وەك ژن مامەڵەی ژنانە ناكەن، میكیاج ناكەن قژ رەنگ ناكەن، خۆبەخشی ژنان بووە بە چاولێكەری، شانازییان پێوە دەكەین، ئێمە قسەمان بۆ خەڵكی دەكرد، دەمانویست ورەیان بەرز بكەینەوە، فڕۆکە بۆردومانی دەكردن كەچی خەڵكی ناو شارەكە بە هێمنی كاریان دەكرد، ورەشیان بە ئێمە دەدا.
ئەوەی سەرنجی راكێشام ئەو بێدەنگییەی جیهان بوو، ئەوان چاویان لەوە بوو ئێمە وێنەیان بگرین‌و بە دونیادا بڵاوی بكەینەوە، خەڵكی عەفرین ناكەوێ نیشتمان بەدایكی خۆیان دەزانن.
مامۆستا سامان عوسمان زانای ئاینی:
بەناوی خوا: ئەوەی كە لەحەدیسدا هاتووە ئەوەی كە بەهەواڵ‌و خەبەر دەیبیستی وەك ئەوە نییە بە چاوی خۆت بیبینی، ئێمە راستە لە رێگەی KNK ەوە چوینە عەفرین، بەڕاستی كۆمەڵێك شتمان بینی من كۆمەڵێك دیمەن باس دەكەم لە ئازایەتی خەڵكی عەفرین، ئێمە لەناو خەڵكی عەفرین بووین كاتی ئەو كەسانەی شەهید دەكران بەدەستی چەتەكانی ئەردۆغان، من خۆم یەكێك بووم لەو كەسانەی وتارم لەسەر جەستەی پیرۆزی شەهیدان خوێندەوە، دیاربوو ئەو وتارە كاریگەرێكی باشی هەبوو لە پارچەكانی كوردستان، وتارەكە دژ بەو لە شكركێشییەی توركیا بوو، من وەك كەسێكی عاتفی ئەو دیمەنانەم دەبینی دەستم كرد بەگریان، بەڵام كاتێک ورەی دایك‌و خیزانی شەهیدانم دەبینی لە چ ئاستێكی بەرزدایە، بۆیە كاتی من ئەو موڕاڵ‌و ئیرادەیەم بینی لەوان، دەگریام بۆ ئەوەی كە كەس نییە پشتمان بێت، تەنها كورد خۆی نەبێ، دایكی شەهیدان خۆیان جگەرگۆشەكانیان تەسلیم بە خاك دەكرد، ئەوە زۆر سەرنجی راكیشام لە كوردستانی باشووردا، ئەگەر كەسێكی شەهید ببێت یان ماڵئاوایی بكات، ناهێڵن ئافرەتان بێنە گۆڕستان، بەڵام لە رۆژئاوای كوردستان لە عەفرین ئافرەتان خۆیان بە دەستی خۆیان تەرمی ئازیزانیان تەسلیمی خاك دەكرد، ئەوە زۆر كاریگەر بوو، كۆمەڵێك دەرس‌و عیبرەت لەوەدایە، لەوێ ئافرەت زۆر بە هیمەتە، خاوەن ئیرادەیە، لە كەم جێگەی دونیا هەیە، لەوێ كوڕێكی گەنجم بینی وێنەی خوشكێكی پێبوو شەهید ببوو، شانازیی دەكرد پێوەی، نەمان بیستبوو، لای ئێمە فەخرمان بە باوك‌و براكانمانەوە كردووە كە شەهید بووە، تا ئەوكاتەی توركیا بۆردومانی شارەكەی دەكرد، خەڵك هەر لەشاردا بوو، كاری رۆژانەی خۆیان دەكرد، ئێمە چەندین كۆڕمان لەناو شارەكاندا دەكرد، خەڵكی حزوریان هەبوو، فڕۆکە دەسوڕایەوە دواییش ئەو جێگایانەیان بۆردومان دەكرد، دایكی شەهیدێكم بینی لە قامیشلۆ كوڕەكەی ناوی ئەحمەد بوو، هاتە سەر ستەیجەکە وتاری پێشكەش كرد، پڕ لە ئازایەتی‌و ئیرادە بوو، كوڕەزاكەشی ناونا ئەحمەد‌و وتی: ئەمیش دەبێتە شەڕڤانێك بۆ پارێزگاریكردن، بەڕاستی ئەوە ئیرادەیەو هەمووی بوو بە ئەزموون و پەندێک بۆ من.
بەدەر لەوەی شەڕڤانان توانییان 60 رۆژ شەڕێكی نابەرامبەر بكەن، بە كڵاشینكۆف بەرامبەر تۆپ‌و فڕۆکە، ئەوە قارەمانێتییە ئێستاش پارتیزانی شەڕ دەكەن، بەڵام من داخ لەوە دەخۆم عەفرین ئەو هەموو مزگەوتەی تێدایە، ئەردۆغانی دەست بەدەست نوێژ چۆن دەبێ بۆردومانی شارێك بكات كە خودای گەورە پیغەمبەرێكی موحاسەبە كرد لەسەرئەوەی شارێكی مێروولەی تەواو كرد لەبەر ئەوەی یەك مێروولە ئازاردابوو، لەسەر ئەوە خودا موحاسەبەی كرد، خودا چۆن موحاسەبەی ئەردۆغان ناكات شارێك كاول دەكات پڕە لە مزگەوت‌و ژن‌و منداڵ‌و خەڵكی دەست بەدەستنوێژ چۆن مزگەوت دەڕوخێنێت و قورئان دەسوتێنێت؟
لەباشووری کوردستان كەسێك قورئانی سووتاند، مەلاكان كردیان بە هەڵڵا، بەڵام ئەوەی لە عەفرین كرا لە مزگەوت‌و قورئان‌و خەڵكی مەلا نەیكرد بە هەڵڵا، ئێمە كە دەڵێین شەڕڤانان شەهیدن، تەكفیر دەكرێین لەلایەن مەلاكانی باشوورەوە، من داوا لە حكومەتی هەرێم دەكەم، كاتی ئەوە هاتووە ئەو مەلایانەی تەعریبی تاكی كورد دەكەن‌و دژی شەرڤانان‌و پێشمەرگە قسە دەكەن لەسەر میمبەر لایان بەرن، ئەو سەروەت‌و سامانەی بۆ عەمرەو حەج كۆمان كردۆتەوە بیدەین بە خەڵكی عەفرین چونكە برسین لێقەوماون خەڵكی لەم كاتەدا دروست نییە بچێت بۆ عەمرەو حەج مانەوەی مروڤ گرنگە لە پێش نیشتمانیشەوەیە من چەند رۆژێكە لەگەڵ چەند كەسێكی ئیسلامی موناقەشەمە لە شەڕڤانان شەهید یان نا، ئەردۆغان ئەو هەموو كاولكارییەی دروست كردووە بەڵام لەسەر شەهید بوونی شەرڤانێك هەموی دێتە سەر خەت‌و موناقەشە دەكات كچە شەرڤانێك شەهید دەكرێت مەمكی دەبڕنەوە ئیتر نازانم ناوی چی لێدەنێین، من وەك مەلایەك رووبەرووی هەموو مەلایەكی جاش دەبمەوە بۆ ئەوەی هەیمەنەمان هەبێـت ئایینی كوردی بە خەڵكی بڵێین، خەبات بكەین میللەتەكەمان لە ژێر دەستی فارس‌و تورك‌و عەرەب دەربهێنین، ئەوە مافی خۆمانە‌و دژی وڵاتێكی ئیسلامی دەبینەوە كە خوای گەورە مافێكی پێمان داوە‌و ئەوان دەیانەوێ لێمان بسەنەوە.
محەمەد قامیشی نوێنەری پێشمەرگە دێرینەكان:
زۆر سوپاس من بەشداریمكرد لەو سەفەرە، 13 ی مانگ لە عەفرین بووین، خەڵكێكی بە ئیرادەو بە ورە جگە لەوەی تۆپ‌و فڕۆکە بۆردومانی دەكرد، بەڵام ئیدارەیەكی مەدەنییان بەڕێوە دەبرد، عەقڵێكی زور گەورەیان بەكاردەهێنا لە جیاكردنەوەی كاروباری سەربازی‌و مەدەنیدا، من زۆر سەرسام بووم پێیان لە رۆشتماندا عەفرینی خنجیلانەی جوانی خۆ بەڕێوەبەر، شەوی 15-16 تا بەرە بەیانی عەفرین تۆپ باران دەكرا، من دەڵێم عەفرین داگیركراوە نەبەزیووە، چونكە ئەگەر ببەزیایە ئەو چەند مقاومە مەدەكرا، داگیر كرا بۆ ئەوەی موڵكی كوردی نەمێنی شارێكی حەزاری ‌و كۆنە لە دێر زەمانەوە كوردی تێدایە بە هەموو ئەدیانەكانەوە، ئێمە وەك پێشمەرگە شەرمان بینییوە ئەنفال‌و هەڵەبجەمان بینیووە بەڵام ئەردۆغان تەقریبەن روی سەدامی سپیكردەوە، ئەو زیاتر وڵاتی ویرانكردووە خەڵكی شەهید كردووە ئەوان ورەیان ئەدا بە ئێمە ئەوان بە بێ جیاوازی خەبات دەكەن شەرڤانان كاری خۆی دەكات ئیدارەی خۆجێیش كاری خۆی دەكات زۆر سوپاس.
هاوار نەجمەدین كەسایەتی كاكەیی:
زۆر سوپاس من وەك كاكەییەك بەشدار بووم، لێرەوە سەری رێز بۆ شەهیدانی عەفرین نەوی دەكەم زۆر سوپاس كۆنگرەی نەتەوەیەی دەكەم كە ئەو شەرەفەمان پێدرا لەو د‌وخەدا سەردانی عەفرین بكەین، ئەوەی ئێمە بینیمان شەڕێكی نابەرامبەر هەبوو بەڕاستی جینۆساید بوو، تۆ نەخۆشخانە بۆردومان بكەیت هیچی تیا نامێنی، ئەو ماوەی ئێمە لەوێ بووین، بۆردومانێکی زۆر دەكرا، ئافەرین بۆ خەڵكی عەفرین ‌و شەڕڤانان دوو مانگ خۆت رابگری لە دۆخێكی ئاوهادا، ئەم خۆڕاگرییە سەلماندی بۆ گەلی كورد من وەك كەسێكی هەڵەبجەییش لەوێ بووم، لەیادی هەڵەبجەدا من لەوێ بووم بەداخەوە مەرگەساتی هەڵەبجە‌و عەفرین پێمان دەڵێت كورد میللەتێكی بێ پشت‌و پەنایە، میللەتێكین ئەگەر دوێنی لە هەڵەبجە هۆکاری راگەیاندن وەك پێویست نەبووبێت، بەڵام ئەو بێدەنگییەی ئێستا هیچی تێدا نەهێشتووەتەوە، عەفرین سەلماندی كورد بێ پشت‌و پەنایە دەبێت خۆمان یەك بین هەموو شتە لاوەكیەكان وەلا بنێین، وەك پێكهاتە ئاینیەكانیش سەردانی عەفرینمان كرد مەبەستمان بوو بڵێین سەرباری جیاوازیی بیروڕاكان ، بەڵام لەسەر مەسەلە نەتەوەییەکان ئێمە یەكین، دوا قسەم خەڵكی عەفرین ئەوەی شارەكەیان جێهێشتووە لە حاڵەتێكی زۆر خراپدا دەژین داوا دەكەم هاوكارییان بكەن زۆر پێویستیان پێیەتی زۆر سوپاس.
ئەسعەد شاوری چالاكی مەدەنی لە رانیە:
زۆر سوپاس دیارە هاوڕییان زۆر بەوردی باسی رەوشی عەفرینیان كرد ئەوەی بۆ من گرنگە، من 2005 چومە عەفرین 2018 چومە عەفرین لەو ماوەیەدا عەفرین گەشەكردنێكی زۆری بە خۆیەوە بینیووە، ئەوەش ئەوە دەردەخات کە عەفرینییەكان حەزیان لە ژیان‌و پێشكەوتنە.
خاڵێكی تر بەڕاستی لە ئیستادا زەرورە، مەكتەبی راگەیاندنی یەكێتی گرنگییەكی زۆری بە رۆژئاوا داوە، زەروورە لە ئێستادا پەیامنێرێك بنێرێتە نێو ئاوارەكان، لەبەرئەوە لەوێ هیچ پەیامنێرێك نەبوو دەنگی نەبوو، بۆیە وەك چۆن لە رابردوو دەوری باشیان بینیووە، ئێستاش ئەو دەورە ببینێ. گرنگیشە خەڵكی باشوور لە كەمپینەكانیان بەردەوام بن، سوپاسی مامۆستا نادرو ئەوان دەكەم شتی باش بكەن لایەنی مەعنیش ئاگاداربكەینەوە پارێزگار‌و لایەنەكانی تر، چونكە ئەوەی ئێمە بینیمان، شیر و دایبی بۆ منداڵ زۆر پێویستە، چۆن لە رابردوشدا دەزگای میدیای كوردستات كەمپینیان هەبوو، ئاوهاش كەمپینێكی بۆ عەفرین رابگەێنین بۆ ئەوەی چیمان پێبكری بیكەین زۆر سوپاس.
رەشید سیدۆ :
زۆر سوپاس، من خەڵكی عەفرینم بریندار بووم، چوینە عەفرین لە نەخۆشخانە بووم، دیسانەوە بە تۆپ‌و فڕۆكە بۆردومان دەكرا‌و دیسانەوە رامانكرد، بۆیە لە نەخۆشخانە چوومە دەرەوە، هێشتا هەر لەعەفرین بووم، دووبارە تۆپ ‌و دەستڕێژی هێزەكانی ئەردۆغان دەستیپێكردەوە، زۆر لە تەنگەتاویدا بووین، بۆیە كاتێك چەتەكانی ئەردۆغان نزیكبوونەوە لە سەنتەری شارەكە، ئێمە ‌و بریندارەكانی تر لە عەفرین دەرچووین بەرەو شەهباو لەوێ بەبێ هیچ یارمەتییەكی مرۆیی بەو ناوچەیەدا بڵاوبووینەوە.
بۆیە هەر كە دەرفەتێكمان بۆ رەخسا، من ‌و چەند بریندارێكی دیكە بەرەو باشووری كوردستان هاتین. لێرەوە داوا لە سەرجەم جیهان ‌و مرۆڤدۆستان دەكەم كە بچن بەهانای خەڵكی بەشمەینەتی عەفرینەوە چ ئەوانەی لەناو شارەكەدا لەژێر ستەمی سوپاو چەتەكانی ئەردۆغاندا ماونەتەوە‌و چ ئەوانەش كە دەربازبوون ‌و لە ناوچەكانی شەهبا‌و تەل رەفعەت بەبێ سادەترین پێویستیی مرۆیی ئاوارەو ماڵوێڕان بوون، بەتایبەتی منداڵان ‌و پیرو پەككەوتەكان. هێشتا هیچ رێكخراوو لایەنێك نەهاتووە بەهانای ئەو خەڵكەوە.

حاجی عەفرینی:
زۆر سوپاس من زۆر ناچمە ناو وردەکاریی بابەتەكەوە، برادەران باسی ئەو داگیركاریەیان كرد كە لە عەفرین كراوە، من رۆژانە لەسەر خەتم لەگەڵ چالاكوان‌و سیاسی‌و مەدەنی لە ناوچەی شەهبا‌و روبۆل‌و زەهرا رۆژانە پەیوەندیمان هەیە بەڕاستی وەزع لەوی زۆر خراپە چەندە باس بكەم ناتوانم گوزارشت لە خراپی ئاوارەكان بكەم،هەر بۆ نمونە خاڵی رەوشەن خان مردووە كە ئامۆزای خۆمە، بە دەیان كەس خەڵكی عەفرین رۆژانە گیانی خۆیان لە دەست دەدەن نەك بە فیشەك بە ڵكو لە خەفەتا، بۆیە خەڵكی عەفرین لە رەوشێكی وا دەژین تەحەمولی ئەو بارودۆخەی ئێستا ناكات كارەسات لەوە گەورەتر نیە، بەداخەوە راگەیاندنی كوردی ناتوانی دەورێكی گرنگ ببینی، ئەو پارچە ڤیدۆیە زۆر گرنگ بوو بەراستی راگەیاندنی كوردی هەقە ئێستا دەوری هەبێت‌و بارودۆخی پەنابەران بۆ هەموو دونیا بگوازێتەوە بۆیە من لێرەوە پێشنیاز دەكەم سوپاسی راگەیاندنی یەكێتیی دەكەم كە هەر دەم پشتیوانمان بوون سات بە سات لەگەڵ عەفرین بوون، دەشیان وت عەفرین داگیر كرا، بەڵام هەندێ راگەیاندن دەیان وت عەفرین ئازاد بوو لە كێ ئازاد كرا، بۆ نمونە ئەردۆغان توانی 9 هەزار مەلا بێنێتە قسە‌و بە سورەتی فتح هێرشی دەست پێكرد لە بەرامبەریشدا راگەیاندنی كوردی بە هەموو جۆرەكانییەوە پشگیری ئەردۆغان دەكەن، بەڵام بەداخەوە لای خۆمان هەر یەكەی بە شێوازێك باسی عەفرین دەكەن، پێشنیاز دەكەم راگەیاندنی كوردی كۆنگرەیەك ببەستن، كاكە شەڕی عەفرین شەڕی ناسنامەی كوردە شەڕی حزبێكی سیاسی نییە، عەفرین شارێكی پێكەوە ژیانە، حەزارییە، دەوڵەتی تورکیا بۆیە عەفرینی هەڵبژاردووە تا ئیرادەی كورد بڕوخێنی، بۆیە داوا لە هەمووان دەكەم بە دەم عەفرینەوە بچن.
عەلی شاهین:
پێش هەموو شتێک سلاو رێزو بەخێرهێنانی هەموو لایەك، دەمەوێت ئەوە بڵێم كە بینیوومە، بەراستی من كاتێك چوومە عەفرین ئەو پێشكەوتنەم بینی تووشی سەرسوڕمان هاتم، ئێمە بیستبوومان كە پێشكەوتن هەیە بەتایبەتی لە 2005ەوە، بەڵام ئەو وەرچەرخانەی كە لەو چەند ساڵەدا لە ڕووی ئابووریی ‌و كۆمەڵایەتی ‌و ئاوەدانییەوە هاتبووە ئاراوە، جێگای سەرسوڕمان بوو، بۆنموونە لەڕووی ئابوورییەوە جاران خەڵك لە عەفرینەوە دەچوونە لوبنان ‌و شام ‌و حەلەب بۆ كاركردن ‌و گەڕان بەشوێن كاردا، بەڵام كە بەم دواییانە دەمانبینی بە هۆی دۆخێ خراپی ناوچەكانی ترەوە، خەڵكێكی زۆر لە ناوچەكانی ترەوە ئاوارە ببوون ‌و هاتبوون لە عەفرین كاریان دەكرد، جگە لەوەش زۆربوونی كارو ئاوەدانی لەو شارە وایكردبوو خەڵكی شارەكەی پەیوەستكردبووەوە بە عەفرینەوە، تەنانەت وای لێهاتبوو كە خاوەن كار بەشوێن دەستی كاردا دەگەڕا چ لە مەزراكان ‌و چ لە كارگە لۆكاڵییەكان، چ لە ریستۆرانت ‌و كافیتریاكان، دەگەڕان بەشوێن گەنج ‌و دەستی كاردا، بەو هۆیەشەوە ژمارەیەكی زۆر گەنج ‌و ئاوارەی عەرەب هاتبوونە عەفرین بۆ كاركردن. ئەوە ش ببووە هۆكارێك بۆ گرانبوونی نرخی زەوی.
لەڕووی ئارامی ‌و ئاسایشەوە 24 سەعات مرۆڤ دەیتوانی بە ناو عەفریندا بگەڕێت ‌و ئاسایشێكی زۆر بەرقەراربوو، تەنانەت دزیی ‌و راووڕوت بەڕێژەیەكی زۆر زۆر كەمی كردبوو، بگرە زۆر لەناوچەكانی ژێر دەسەڵاتی رژێم باشتربوو.
تەنانەت پێشتر زۆر حاڵەت هەبوو لەڕووی وەبەرهێنان ‌و كردنەوەی کارگەو پڕۆژەی بچووك ‌و مامناوەندی كە رژێم رێگەی نەدەدا لە عەفرین بكرێتەوە، بەڵام ئەوە لەم دواییانەدا زۆر پەرەی سەندبوو، جگە لەوەش خەڵكی عەفرین خۆیان خەڵكی بەرهەمهێن بوون، لە هەموو بوارەكانی سەوزەو میووەو گۆشت ‌و شیرەمەنی و ….هتد، عەفرین نەك پێویستی بە هاوردەی ئەو شتانە نەبوو، بەڵكو ئەوەی لەخۆی زیادبوو دەینارد بۆ ناوچەكانی دیكەش.
بۆیبە بەلای خەڵكی عەفرینەوە ئەوە زۆر قورسە كە ئێستا لە خاكی خۆی دەربەدەربووە چونكە ئەو لەڕووی مێژووییەوە بە خاكەكەی خۆیەوە گرێدرابوو.
كاروان ئەنوەر:
هەموو لایەك بەخێربێن زۆر سوپاس بۆ ئەو جۆرە كۆڕانە، كە لەدەرەوەی باشوری كوردستان چی دەگوزەری ئێمە وەك راگەیاندنی یەكێتیی كوردستانی نوێ كەم تا زۆر ئاگامان لێیی بێ لە نزیك یان لە دوور. من كۆمەڵی شتم لا گەڵەڵا بوو لەگەڵ دەسپێكردنی بەرخودانی عەفرین پەیامنێرێكی كچ بنێرینە عەفرین زۆر نارەحەت بوو 21 سەعات بە پێ رۆشتووە لە سێ شوێن بە قاچاخ رۆشتووە یەكەم لەلایەن پارتی دیموكراتی كوردستانەوە، لای جەیشی سوری هەر بە قاچاخ پەڕییەوە، لای سوپای موعارەزە بە هەمان شێوە. بەو شێوەیە تا گەشتە ئەوێ ئێمە دەقە بە دەقە هەواڵەكانمان بڵاو دەكردەوە بە ڤیدیۆ، راگەیاندنی یەكێتیی باجەكەشی دا ئەوەتا توركیا ناوی ئێمەی وەك لیستی تیرۆر مامەڵەمان لەگەڵ دەكات مەتاریان داخستوین ئەمە مەرحەمەت نییە بۆ یەكێتیی بەڵكو ئەركی خۆمانە، ئەوەتەی یەكێتیی دروستبووە خوێنی لە هەر چوار پارچەی كوردستان رژاوە، ئەوە ئەخلاقی یەكێتییە، ئێمەش كۆمەڵی گلەییمان هەیە لە برایانمان لە باكوور‌و رۆژئاوا، ئەم هەموو خۆبەخش‌و باجدانە ئێستا یەك پەیجی راگەیاندنمان ئیش ناكات توركیا هەمووی بلۆك كردووە، لەسەر ئەوە نییە ئێمە لەسەر توركیا نووسیومانە، بەڵکو لەسەر ئەوەیە ئێمە هەڵمەتی نەتەوەییمان هەیە، ئێمە پشتی باكوور‌و رۆژئاوا‌و رۆژهەڵات دەگرین، لەلایەكی ترەوە كومەڵی لە برادەرانی باشوور دێن هاوپەیمانیی دەكەن ئەو هەموو بەرخودانەی یەكێتی لەبیردەكەن و دێن لەگەڵ لایەنی تردا هاوپەیمانی دەكەن، ئەمە بۆ ئێمە وەك یەكێتی برینداربووین.
ئێمە ئەوكاتە چەك‌و تەقەمەنیمان نارد بۆ كۆبانی سێ مانگ مووچەمان وەرنەگرت، كاك هۆزان باش دەزانێ موچەكەی ئێمە درا بە چەك‌و تەقەمەنی ‌و خواردن و فڕۆكەیەكی ئەمریكی بە 60 دەفتەر دۆلار گیرا تەنها خواردنەكە لە كوەیتەوە بگوازێتەوە بۆ كۆبانێ تا كۆبانێ نەكەوێت. بەڵام بەداخەوە تەڤگەر لەگەڵ لیستێكی دیکەد هاوپەیمانی دەكات.
من پرسیارێكم لە برادەران هەیە چۆڵكردنی عەفرین دەستی پێكرد، دوو كەناڵی لێبوو یەكێکیان ئەو پەیامنێرەی ئێمە بوو ئەوی تریشیان كەناڵی مەیادین، هەڤاڵانی شەڕڤانان نەیانهێشت یەك وێنەی چۆڵكردنی بڵاوبكرێتەوە، زۆر سوپاستان دەكەم.
هۆزان عەفرینی:
ئەو رەخنانەی كاك كاروان سەبارەت بە رۆژئاوای كوردستان، رەوشی ئاوارەكان‌و رووخاندنی عەفرین پیشان نەدرا، من لە روناهی تیڤی ئەو رەخنەم گرت، ئەو شتەی كە دونیا پیویست بوو بیبینی ئێمە پیشانمان نەدا، ئێمە تەنها چالاكیی سەربازیمان دەگواستەوە، ئەو ڤیدۆییەی ئێمە نیشانماندا لە شەهبا تازەیە‌و حاڵی خەڵكی عەفرینە، بەڵام بەداخەوە راگەیاندنەكان ئەوە نەبوو، من وەك خەڵكی عەفرین، هەرچەندە یەكێتیی نەیتوانی لەرووی سەربازییەوە رۆڵی خۆی بگێری، بەڵام لە راگەیاندنەكانیانەوە رۆڵێكی مێژووی بەرچاویان بینی سوپاسیان دەكەین لەسەر هەر چوار پارچەی كوردستان یەكەم بوو، تا ئێستا لۆگۆی بەرخودانی عەفرین لەسەر شاشەی كوردسات نیوز بەردەوامە، زۆریان كرد بۆ كۆبانی ئەمڕۆش بۆ عەفرین هاوكارە بە راگەیاندنەكانیانەوە، لای ئێمە جێگەی رێزو پێزانینە، ئەوەی كاك كاروان باسی كرد منیش رەخنەم هەیە لەو رێكەوتنە سیاسیانە، بێدەنگییەك هەبوو لەسەر داگیركردنی عەفرین، نابێ ئەو هەڵەیە دووبارە بكرێتەوە رێگری لە راگەیاندنەكان بكرێت بۆ میادین هەموو شتێك بكات، من خۆم ئاگاداری هەڤاڵانی ئاسایشم كرد كە ئەو هەڤاڵە نێردراوی راگەیاندنی یەكێـتییە، بەداخەوە تكام لە راگەیاندنەكان هەیە رۆڵی خۆیان ببینن هەندێك راگەیاندن بووبوون بە پەیامنیری ئەنادۆڵ بەناوی ئەوانەوە قسەیان دەكرد، من زۆر سوپاسی راگەیاندنی یەكێـتی‌و كوردستانی نوێ دەكەم بۆ ئەو سیمینارە‌و هاوكاریەكانیان.
سەرتیپ عەلی:
من تێبینیەكم هەیە، دوو مانگێكە هاوكاریی عەفرین‌و پێشترین بۆ كۆبانی هەر لە شەقامی سەهۆڵەكە دەكرا ئەوە خێوەتەكەیە لەو لاشەوە دوكانێكی لێیە دوو مەتر بەینیانە ناوی تاتلیساسە ماركەی توركی هەیە ئەو هەموو هاوار‌و دەنگە نەیتوانی كاریگەریی لەو دووكاندارە بكات موراجەعەیەكی خۆی بكاتەوە‌و ناوەكەی بگۆڕی، بۆیە ئێمە لە رووی هۆشیاری نەتەوەییەوە راچڵەكینێكی گەورەمان ماوە هەموو خیتابی ئەو خێوەتە كاریگەریی بەرژەوەندی نەبوو.
ئەوەی ئێستا لە خۆرهەڵاتی ناوەڕاست روودەدات، تیمیك نەچوو دیالۆگێک لەگەڵ ئەو دوكاندارەدا بكات بڵی ناتوانی تەنها ناوی دوكانەكە بگۆڕی؟
لە كۆنفرانسی سوسیال دیموكراتەكان كە میوانی یەكێـتیی بوون لێرە، نوێنەری بزووتنەوەی فەتحی فەلەستینی باسی لە شەڕێكی ئابووریی كرد، لە ئاستی جیهاندا، تیمێكیان دروستكردووە ئەوەندەی پێیان كرابێ بۆ موقاتەعەی شتومەكی ئیسرائیلی، وتی: هیچ شتێك هێندەی ئەو شەڕە ئابوورییە كاریگەریی نەبووە، بۆیە ئێمە لەو بوارەدا مەوادمان كەمە بۆ ناوخۆ، بچووكترین شت ئاوە تەماتەیەكی شارەزوورمان هەیە، لەوانەیە لە ئاڵتون سا باشتربێت، هیچ شتێك هێندەی ئابووریی كاریگەری نابێ. بۆیە پێویستمان بە بەخۆداچوونەوەیەکی گەورەیە.
ئەسعەد شاوری:
ئەوەی كاك كاروان باسی زۆر راستە منیش گلەییەكی زۆرم لە تەڤگەر هەیە، ئێمە لە رانیە كەمپینمان كردووە بەبۆنەی 27 ساڵی راپەرین، حەوت كەس بووین شەشمان یەكێتـیی بووین، حەوت تۆن دەرمانمان كۆكردۆتەوە لە رێگەی كاك هۆزانەوە پێشكەشی مانگی سووری عیراقیمان كردووە هاتمەوە سەیر دەكەم كۆمەكەكانی ئێمە رادەستی تەڤگەری ئازادی كراوە‌و لۆگۆی خۆیانیان لێداوەو دەڵێن ئەوە هاوكاریی ئێمەیە. بەراستی ئێمەش ئەو گلەییەمان هەیە، ئەوەی یەكێتیی دەیكات، هەقە لەبەرچاو بگیریت هەر چالاكی هەیە لە سنوری سلێمانییە بۆ لە هەولێر‌و دهۆك ناتوانن لێرەوە دەرۆین دەبێ بە قاچاخ بڕۆین لای پارتییەوە ئەوانە دەبێ لەبەر چاو بگیرێ، ئێمە سارد بووینەوە لەكۆمەك كۆكردنەوە.
هۆزان عەفرینی:
بەراستی كاك ئەسعەد‌و برادەرانی رانییە هاوكاریی باشیان كردین، ئێستاش شەش تۆن دەرمانی تریان بۆ كۆكردووینەتەوە، هیوادرام هەموو برادەران واز لەو كارە بهێنن و نەیكەنە كاری حزبی، با خەڵكی هاوكاریی عەفرین بكات‌و دووبارە سوپاس بۆ ساڵۆنی كوردستانی نوێ.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

بونیاده‌ گێڕانه‌وه‌گه‌رییه‌كان له‌ڕۆمان و چیرۆكه‌كانی گه‌لاوێژدا گفتوگۆی‌ له‌باره‌وه‌ كرا

له‌چوارچێوه‌ی‌ كۆڕو سیمیناره‌كانی‌ ساڵۆنی‌ كوردستانی‌ نوێ‌، رۆژی‌ 16/10/2018، كۆڕی خستنه‌ڕوو ...