ئەدەبیاتی تەنز لە ئەزموونی رۆژنامەگەریی دکتۆر شێرکۆ عەبدوڵڵادا – knwe.org
سەرەکی » ساڵۆنی کوردستانی نوێ » ئەدەبیاتی تەنز لە ئەزموونی رۆژنامەگەریی دکتۆر شێرکۆ عەبدوڵڵادا

ساڵۆنی کوردستانی نوێ

ئەدەبیاتی تەنز لە ئەزموونی رۆژنامەگەریی دکتۆر شێرکۆ عەبدوڵڵادا

بۆ رۆشنایی خستنە سەر ئەزموونی تەنز بەگشتی لە بواری رۆژنامە نووسی و لە رۆژنامەنووسیی کوردی بەتایبەتی و بەتایبەتتریش ئەزموونی دکتۆر شێرکۆ عەبدوڵڵا کە بە سوارچاکی ئەو بوارە لە رۆژنامەنووسیی کوردیدا ناسراوە، ساڵۆنی کوردستانی نوێ کۆڕێکی بۆ سازکرد بەمەبەستی قسەکردن لە سەر ئەزموونی خۆی و سەرەتاکانی ئەو جۆرە لە نووسین و ئەو ئاستەنگ و کێشانەی لەو بوارەدا رووبەڕووی بۆتەوە، هەروەها بۆ زانینی پێشنیاز و تێبینییەکانی لەبارەی ئەو کەموکوڕیی و کێماسییانەی کە لەو بوارەدا هەبووە لە رۆژنامەگەریی کوردی و بەتایبەتیش رۆژنامەگەریی دوای راپەڕیندا.
کۆڕەکەی ساڵۆنی کوردستانی نوێ لە رۆژی سێشەممە 12/6/2018 بە ئامادەبوونی ژمارەیەک لە رووناکبیران و نووسەران بەڕێوەچوو.

ساڵۆنی کوردستانی نوێ

سەرنووسەر: هەموو لایەك بەخێربێن بۆ ساڵۆنی كوردستانی هەرچەندە ئەو زنجیرە كۆڕەی دامان نابوو بۆ یادی رۆژنامەنووسیی كوردیی، بەداخەوە بەهۆی هەڵبژاردنەكان‌و چەند هۆكارێكی دیكەوە دواكەوت.
ئەمرۆ كۆڕی دكتۆر شێركۆ عەبدوڵڵایە كە لەسەر تەنزە، بەتایبەتی ئەزموونی خۆی لەسەر تەنز لە بواری رۆژنامەنووسیدا قسەمان بۆ دەكات.
پێویست ناكات من دكتۆر شێركۆ بەئێوە بناسێنم، هەم وەكو كارئەكتەرێكی رۆژنامەوانی ‌و هەم وەكو نووسەرێك لای هەمووتان ناسراوە، هەروەها ئەوانەی كە رۆژانە رۆژنامەی كوردستانی نوێ دەخوێننەوە، پێش ئەوەی سەروتار بخوێننەوە كە سەروتار تەعبیر لەڕای هەر رۆژنامەیەك دەكات، یەكسەر گۆشەكەی دكتۆر شێركۆ دەخوێننەوە، ئەمەش شانازییە بۆ ئێمە‌و هەم شانازییە بۆ دكتۆر شێركۆش.
ئەمڕۆ كاك شێركۆ لە ئەزموونی خۆیەوە لەسەر بواری تەنز قسەتان بۆ دەكات ‌و خۆتان دەزانن كە لە چەند بوارێكی تەنز نووسیندا كاری كردووە، وەك چۆن لە چەندین بواری رۆژنامەگەریدا كاری كردووە، لەستوونی رۆژنامەی كوردستانی نوێدا، هەروەها دراماشی هەیە‌و هەرچی بینووسێت هەر دەچێتە بواری تەنزەوە، چونكە دكتۆر شێركۆ بەوە ناسراوە.
ئەو پڕۆگرامانەی وەك كەشكۆڵ ‌و بەرنامەی بەرنامە بەگشتی دكتۆر شێركۆ لەهەر بوارێكدا كاری كردبێت هەر دەچێتەوە ناو بواری دنیای تەنزەوە.
ئەم شێوازەی دكتۆر شێركۆی پێ ناسراوە لە رۆژنامەگەریی كوردیدا، لەپاش راپەڕینەوە بەردەوام لە گەشەدایە‌و تائێستا خوێنەران چێژ لە بابەت‌و كارەكانی د.شێركۆ دەبینن.
تا ئێستا د.شێركۆ سێ كتێبی لەو بوارەدا چاپكراوە كە خۆشبەختانە شەرەفی چاپكردنی یەكێكیان بەر كوردستانی نوێ كەوتووە كە لەساڵی 2011 زنجیرە نووسینەكانی خۆی بوو كە لەماوەی ساڵێكدا كۆمانكردەوە‌و چاپمانكرد. بەداخەوە وا بڕیار بوو راستەخۆ ئەوانەی تریشی بۆ چاپ بكەین، بەڵام بەهۆی بارودۆخی داراییەوە پڕۆژەكە پەكی كەوتووە، بەڵام هەر دەگەڕێینەوە سەری.
جگە لەوەش پەرتوكێكی تر كە شیعرە بەشێوەی كاریكاتێر، ئەویش هەر دەچێتە بواری تەنزەوە‌و لەلایەن دەزگای خاكەوە چاپكراوە، هیوادارم بەرهەمەكانی تریشی وەكو بەرپرسیارێتییەكی ئەخلاقی بەچاپ بگەیەنرێت ‌و بڵاوبكرێتەوە.
ئەمڕۆ د.شێركۆ لەسەر ئەزموونی خۆی بێگومان قسە دەكات كە بێگومان دەكاتە قسەكردن لەسەر ئەزموونی رۆژنامەنووسیش، لەپاش راپەڕین.


دكتۆر شێركۆ عەبدوڵڵا:
پێشەكی زۆر سوپاستان دەكەم، كە ئەركتان كێشاوە ئامادەبوون بۆ گوێگرتن لەم باسەی من، هەروەها سوپاسی كارمەندان ‌و لێپرسراوانی كوردستانی نوێی ئازیز دەكەم كە هەمیشە هاندەرم بوون بۆ نووسینی تەنز. من دەمەوێت لە ناونیشانەكەوە دەستپێبكەم، ئەوەی من پێشكەشی ئێوەی دەكەم، بەشێك لە بیرەوەرییەكانی خۆمە لە نووسینی تەنزدا، ئەزموون نییە، ئەزموون شتێكی گەورەیە.
ئێمە كە باسی تەنز دەكەین، یەكەم شت ئەوە دێتە بەرگوێمان كە بۆچی شتێك نییە بەرامبەری بە زمانی كوردی، تەنز وشەیەكی عەرەبییە، ئێرانییەكان بردویانە بۆ خۆیان، عەرەب ئێستا لەباتی تەنز پێی دەڵێ ساخر، یان فوكاهە، خۆئاواییەكان ساتیر یان سەتەیار بەكار دەهێنن، كورد یان گاڵتە‌و گەپ یان ئەدەبی گاڵتەجاڕ بەكار دەهێنن، كە زۆر كت‌و مت ئەو واتایە نابەخشێت كە وشەی تەنز دەیبەخشێت.
كاتی خۆی وشەیەك هەبوو «تەوس»یان پێ دەوت، من پێموایە تەوس ‌و تەنز یەك ریشەیان هەیە، بەڵام ئەو وشەیە خەریكە بنەبڕ دەبێت.
تەنز كۆمەڵێك پێناسەی زۆری هەیە، دیارترینیان ئەوەیە تەنز ئەو نووسینەیە كە وەرگر یان خوێنەر دەخاتە پێكەنین، بەڵام ئامانجەكەی خستنە پێكەنین نییە، ئامانجێكی بەرزی هەیە‌و كاراییەكی یاریدەدەرە، دەیەوێت ئەم راستییە بگۆڕێت بۆ راستییەكی باشتر، لەڕێی دژایەتیكردنی خراپەكاری ‌و كەموكوڕیی ‌و شتە دزێوەكانی ناو كۆمەڵگەوە.
نووسەرەكانی نێو بواری تەنز بۆ روونكردنەوەی زیاتری ئەم پێناسەیە، كۆمەڵێك وتاریان هەیە، كە پێمخۆشە چەند نموونەیەكی بخەمەڕوو:
یەكێكیان دەڵێت: «تەنز ئەو ئاوێنەیەیە كە هەموو كەسێكی تێدا دەبینیت جگە لەخۆت نەبێت».
نهێنی تەنز لەوەدایە كە دەیخوێنیتەوە هەست ناكەیت مەبەستی لەتۆ بێت.
دووهەمینیان، «تەنز وەكو نەشتەریی نەشتەرگەر وایە، نەك چەقۆی قەساب، بەڵام بۆ لەتوپەتكردن نییە، بەڵكو بۆ چارەسەرە».
وتەیەكی تر هەیە دەڵێت: «تەنز وەكو هەنگ وایە، هەم چزووی هەیە ‌و هەم هەنگوین».
بەكورتی تەنز دوو خاسییەتی زۆر گەوهەریی تێدایە كە لە شێوازەكانی تری نووسین جیای دەكاتەوە :
یەكەم: غافڵگیرییە، دژێتییە لە نێوان ئەو شتەی چاوەڕێی دەكەیت ‌و ئەو شتەی كە روودەدات.
دووهەم: زمانەكەیەتی، زمانی تەنز زمانی خەڵكە، دەبێت زمانێكی زۆر سادە بێت، ئەدەبی نوخبە نییە، لە كۆمەڵگە دواكەوتووەكاندا ئەو كۆمەڵگەیانەی كە گوێگرن، زمان هەمیشە ئەو چەكە بووە كە خەڵك هەردەم خۆیان لەپشتەوە شاردووەتەوە‌و بەكاریان هێناوە.
نهێنیی تەنز لەوەدایە زمانێكی سادە‌و پاراو بێت. خۆشبەختانە من لە ژینەگەیەك ‌و لە ماڵێكدا گەورەبووم ئەو خەسڵەتی زمانە زۆر كاریگەریی هەبووە لەسەر دروستكردنی سەرچاوە رۆشبیرییەكانی من.
لەو ماوەیەدا لەكۆتایی ‌و ناوەڕاستی شەستەكاندا، من بە دوو گۆڤاری عەرەبی ئاشنابووم «المتفرج» و «الفكاهە»، ئەوانە من نەمدەزانی ئەدەبی ساخرە، پێمان دەوت گۆڤارە هەزەلییەكە.
هەر لەو ماوەیەشدا هەفتانە هەفتەنامەی ژین دەهات، لە ماڵی ئێمەدا دەبوو بە پێشبڕكێ كە ئاخۆ كێ زووتر پەندەكەی پیرەمێرد لەبەر بكات ‌و كێ نووسینەكانی ئەم ژمارەیە جوانتر بڵێتەوە؟.
ئەمانە سەرچاوە رۆشنبیرییەكانی من بوون ‌و هەر لەوكاتەوە هەستم دەكرد كە من خولیای ئەو جۆرە نووسینانە ‌و ئەو جۆرە شیعر‌و دەقانەم كە بەزمانێكی سادە نووسراوە ‌و لە پشتییەوە ئامانجێكی گەورە هەیە.
كاتێك كە چووینە زانكۆش، لەگەڵ دكتۆر قەلەندەر گۆڤارێكی هەفتانەمان دەردەكرد، كە هەرچەندە سنوورێكی تەسكی هەبوو، تەنها بۆ كوردەكانی زانكۆی سلێمانی بوو، بەناوی «بومەلەرزە»وە، بەڵام ئەوەش ئەزموونێك بوو، چووە سەر ئەو ئەزموونانەی من هەمە.
هەروەها لە سەرەتای حەفتاكاندا كە دەستمدایە نووسین تا كۆتایی هەشتاكان، هەرچەندە نووسینەكانم بابەتی نیشتمانی ‌و جدی بوون، بەردەوام كاریكاتێر‌و پارادۆكسی تێدا بووە.
تەنانەت ئەو شیعرەی بۆ دووسەد ساڵەی سلێمانیم نووسی، ئەگەر ئیستا سەیری بكەیت، چەندین وێنەی كاریكاتێریی تێدایە. بیرمە شەهید دڵشاد مەریوانی لە دانیشتنێكدا زۆر موتەوازیعانە وتی:
«كەسمان ناتوانین وەكو شێركۆ «سەهلی ممتەنیع» بنووسین، ئەو كاتە نە منیش نە ئەو برادەرانەش كەسمان نەمان دەزانی ئەمە نەوات ‌و چەكەرەی ئەدەبی ساخیرە، تا ئەوكاتەی دوای ئەنفالەكە رێمان كەوتە ئێران ‌و لەوێ وەرچەرخانێكی گەورە لە ژیانی مندا دروستبوو، كەوتم بەسەر كەلەپوورێكی زۆر قووڵ ‌و بەریندا لە ئەدەب ‌و رۆژنامەگەریی تەنز، هەرچی كتێب ‌و نامیلكە ‌و بڵاوكراوە هەیە لەسەر ئەدەبی تەنز خوێندمەوە‌و بۆم دەركەوت كە ئەمە ئەو شتەیە كە من بۆی دەگەڕێم، پێی دەوترێت تەنز، ئەمە مێژووی هەیە ‌و رەگ ‌و ریشەی هەیە‌و رۆڵی هەبووە لە گۆڕانكارییە سیاسی ‌و كۆمەڵایەتییەكانی وڵاتاندا. بەڵام بۆچی لای ئێمە نییە‌و تەنانەت لای ئەدیبەكانی خۆرهەڵاتیش كە راستەوخۆ لەژێر كاریگەریی ئەدەبی فارسدان، تەنز زۆر ساكار‌و سادە‌و سەرەتاییە، ئایا پرسیارەكە هەر بەوە كۆتایی دێت كە بۆچی نییە، یان دەبێت بەدوای وەڵامی تردا بگەڕێین؟
بۆ نموونە ئەگەر بگەڕێینەوە بە ناو نووسین ‌و دەقەكانی شاعیر‌و نووسەرە كۆنەكاندا، كەم تا زۆرێك دەقی تەنزیان هەبووە، لە حاجی قادر ‌و مەولەوی ‌و نالی ‌و گۆران ‌و… چەندانی تر، یان بەشێوەی وێنەی شیعری لە شعرەكانیاندا دەیبینیت، یاخود لە نێو دیوانەكانیاندا چەند دەقێك دەبینی تەنزن، بۆ نموونە مەحوی لە دێڕە شیعرێكدا دەڵێت:
«شێخێك هەمەوەندێكی ئەدا وەعز‌و نەسیحەت،
ئەو قوڕبەسەرەی دابووە بەر فەحش ‌و فەزیحەت
خۆشهاتە جواب ‌و وتی تۆ هەقتە‌و فەقەت
من قوتاعی تەریقم نەك قوتاعی تەریقەت»
ئەو بەراوردە لە نێو قوتاعی تەریق ‌و قوتاعی تەریقەتدا ئەوە تەنزە هیچی تر نییە.
مەبەست لێرەدا هەموویان هەیانە، بەڵام بۆچی نەبووەتە ئەدەبێك ‌و رۆژنامەگەرییەكی سەربەخۆ، ئەوە لێكۆڵینەوەیەكی زۆری دەوێت، بەڵام هۆكارە دیارەكانی ئەوانەن كە پەیامی تەنز رەخنەییە ‌و نالی ‌و ئەوان كەمتر رەخنەگر بوون.
هەروەها لای ئەوان تەنز پلەی دووەمی هەبووە، حەزیان كردووە بەزمانی خەڵك نەنووسن، بەڵكو بەزمانێكی سەخت ‌و قورس‌و پڕ لە گرێ ‌و گۆڵ بنووسن، هەروەها نەبوونی ئازادییە، چونكە ئازادیی پێوەرێكی گرنگە بۆ بوونی تەنز.
دوای ئەنفالەكە كە ئاشنایەتیم پەیداكرد لەگەڵ ئەدەبی تەنزدا، دوو بابەتم بڵاوكردەوە، یەكێكیان چیرۆكێكی تەنز بوو بەناوی جاش ‌و پەیژەی مێژوو، هەر لەو ماوەیەدا وتارێكم بڵاوكردەوە بەراورد بوو لە نێوان رێكخراوەكانی فەڵەستین ‌و حزبەكانی كوردستاندا لە گۆڤاری نۆژەن بڵاوكرایەوە كە ئەو وەختە زمانحاڵی ئاڵای شۆڕش بوو. بیرمە مەلا بەختیار تەفۆنی بۆ كردم لە «ورمێ»وە، ئەوكات من لە «سنە» بووم وتی: «ئەو شێوازی نووسینە زۆر جوانە، تۆ هەقە هەر بەو شێوازە بنووسیت».


پاش راپەڕین كە هاتینەوە، دەستەی كاتی نووسەرانی كوردمان دامەزراند، لەچەند چالاكییەكدا شیعری ساتیرم بڵاوكردەوە، هەر ئەوكاتە نامیلكەیەكم بڵاوكردەوە بەناوێكی وەرگیراوە نزیكەی 200 كۆپی لێ بڵاوبووەوە، لە ئۆرگانەكانی ئاڵای شۆرشیشدا چەند بابەتێكم بڵاوكردەوە، پاشان لەگەڵ بەهادین نوری ‌و خوالێخۆشبوو خالید دلێر، حەمە فەریق حەسەن گۆڤاری دیموكراسیمان دەركرد، لاپەڕەی كۆتایی درا بە من، لاپەڕەی تەنز بوو، خوێنەرێكی زۆری هەبوو، پاشان ئاڵای ئازادیمان دەركرد، هەفتانە گۆشەیەكم هەبوو چەند ساڵێك درێژەی كێشا، ئەویش هەر تەنز بوو، پاشان لە كوردستانی نوێ ناو بەناو پاشان بوو بە هەفتانە، هەر لەو ماوەیەدا ویستمان ئەو كەلێنەی كە لە رۆژنامەگەریی كوردیدا هەبوو پڕی بكەینەوە، ئەویش لە بڵاوكردنەوەی گۆڤارێكی سەربەخۆی كاریكاتێری ‌و تەنز بوو كە نەبوو، بۆیە زۆر هەوڵم بۆدا، سەرەتا ئامانجم ئەوەبوو گۆڤارێكی سەربەخۆ بێت ‌و هاوڕێیەكم لە ئەوروپا دەژیا، باری ماددیی باش بوو، ئەو بەڵێنی پێدام لەو گۆڤارەدا كۆمەكمان بكات، كە هاتەوە وتی: ئەوا من مانگی 2000 دۆلاریشم دا، ئەی كێ دەتان پارێزێت؟ ئێوە مل لە چەقۆ دەسوون، مەترسیدارە، ئەوە ئەگەر خۆدزینەوەش بووبێت لە بەڵێنەكەی، خۆی هەر جۆرێك لەعاقەڵییەتی تێدا بوو، لەبەرئەوە لەڕێی سكرتاریەتی جەنابی مام جەلال-ەوە هەوڵماندا، ئەوكات كاك سوارەی كوڕی شەهید ئارام لە نێواندا بوو، كارەكەیان زۆر لێ قورس كردین، زۆر درێژەی كێشا، پاشان تێگەیشتین كە نایكەن، بۆ جاری سێیەم لەگەڵ كاك شوان كابان ‌و چەند برادەرێك چوینە لای خواڵیخۆشبوو كاك نەوشیروان كە یارمەتیمان بدات بۆ دەركردنی گۆڤارێكی لەو جۆرە، راشكاوانە وتی: «هێشتا كۆمەڵگە نەگەیشتووەتە ئەو ئاستە ‌و دەتانكوژن لەسەری، لەبەرئەوە وازی لێ بهێنن، ئەو ئارەزووە بە جوانەمەرگی مایەوە تا دوای 31ی ئاب.
راستەوخۆ پاش 31ی ئاب دەزگای خاك دامەزرا، هێرۆخان ناردی بەدوای من ‌و بەڕێزان زاهیر سدیق ‌و ئاكۆ غەریب ‌و خەڵات عومەر بۆ دروستكردنی تەلەفزیۆنی خاك، لەوێ هێرۆخان بە منی وت: «تۆ هەوڵتدا گۆڤارێكی كاریكاتێری ‌و ساخر دەربكەیت، من دەمێكە بەدوای شتێكی وادا دەگەڕێم با دەریبكەین».
ژمارەی سفرمان لێ بڵاوكردەوە، سەركەوتنێكی باشی بەدەستهێنا بەپێی پێوەری ئەو كاتە، گۆڤاری سیخورمە بوو بە ئەزموونێكی گەورە لە 1997 تا 2016، سەرەتا دوو هەفتە جارێك دەردەچوو، پاشان بوو بە مانگانە.
سیخورمە چوار سەركەوتنی گەورەی بەدەستهێنا، یەكەمیان وەك چۆن شێخ رەزا ئەدەبی كوردی كامڵ كرد‌و هەجوی خستە نێو شیعری كوردییەوە، سیخورمەش رۆژنامەگەریی كوردیی كامڵ كرد بەوەی كە تەنزی هێنایە نێو رۆژنامەگەریی كوردییەوە‌و یەكەمجاریش بوو حزبێكی دەسەڵاتدار‌و شەریكی دەسەڵات خۆی پشتگیریی لە گۆڤارێك بكات كە رەخنەی قووڵ بگرێت لە سیستمی حوكمرانی ‌و حزبی كوردی ‌و دەوڵەت ‌و حكومەت ‌و دیاردەی گەندەڵی.
لەڕووی تەكنیكییەوە، یەكەم بڵاوكراوە بووین كە توانیمان لە مێژووی رۆژنامەگەریی كوردیدا وێنەی رەنگاوڕەنگ بخەینە نێو گۆڤارەكەوە، پێشتر هیچ گۆڤار‌و بڵاوكراوەیەك نەیدەوێرا، چونكە ئەوكات تەكنیكی چاپكردن زۆر سەرەتایی بوو، هەروەها ئێمە زۆر پێش بڵاوكراوە سەربەخۆكان ‌و ئەوانەی بەخۆیان دەڵێن رۆژنامەگەریی ئازاد، ئێمە رەخنەمان گرتووە‌و رەخنەی جدیش، لەمەشدا ئەگەر سەروەرییەك هەبێت بۆ خاتوو هێرۆ ئیبراهیم ئەحمەد دەگەڕێتەوە، هەروەها جەنابی مام جەلال كە بێ هیچ مەرجێك پشتیوانیی لێ دەكردین ‌و تاكە مەرجی ئەوەبوو كە راستگۆبین ‌و بڵاوكراوەكانمان راست بێت، بوختان نەبێت.
لەو ماوە درێژەدا، ئێمە سێجار لە دادگا سكاڵامان لەسەر تۆماركراوە، هەر سێ جارەكە كەیسەكەمان بردووەتەوە، چونكە راستگۆ بووین ‌و بوختانمان نەكرد.
ئێستا گۆڤاری سیخورمە بووەتە گۆڤارێكی ئەلەكترۆنی ‌و بەنیازین بەم نزیكانە بیكەینەوە بە كاغەزی، ئەویش وەكو هەموو گۆڤار ‌و بڵاوكراوەكانی تر تووشی ئەو ئەزمەیە بووە كە لە ئەنجامی هاتنە كایەی سۆشیال میدیاوە تووشی رۆژنامەگەریی كاغەزی دەبێت.
لە دەرەوەی گۆڤاری سیخورمە لە تەلەفزیۆنیشدا بەرنامەی بەرنامەم هەبوو، هەروەها چەند دراما‌و زنجیرەیەكم نووسیوە، لە رۆژنامەكانی چاودێر ‌و ئاسۆ ‌و ئاوێنەكان ‌و ئاوێنە گۆشەم هەبووە، ماوەیەكی زۆری خایاندووە.
كۆتا ئەزموونم رۆژنامەی كوردستانی نوێیە، بەڵام چەند تێبینیەك هەیە سەبارەت بە گۆڤاری سیخورمە، كە دەمەوێت بیخەمە ڕوو:
گۆڤاری سیخورمە هەرچەندە گۆڤارێكی ئازادبوو، بەڵام بمانەوێت ‌و نەمانەوێت حزبی بوو، ئەوە وا لە مرۆڤ دەكات خۆی سانسۆری خۆی بكات ‌و هەندێك سنوور هەیە نەیبەزێنێت كە ئەمە كۆتێكی زۆر قورسە لە دەست ‌و پێی رۆژنامەگەریی رەخنەگردا.
دووەەمینیان ئێمە لەو ماوە درێژەدا نەمانتوانی كاریكاتێریست ‌و نووسەری تەنز پێبگەنین، خولێكمان نەكردەوە‌و خەڵكمان پێنەگەیاند.
خاڵێكی لاوازی تری سیخورمە ئەوەبوو هەر خۆم تیایدا دەمنووسی، دیاربوو، هەمووی یەك ستایل ‌و یەك قەڵەم ‌و یەك نەفەسە، دەبوایە ئێمە شانبەشانی بەڕێوەبردنی گۆڤارەكە، هەوڵمان بدایە خوول بكەینەوە ‌و خەڵك پێبگەیەنین، مامۆستا بێنین لە دەرەوە، ئەو كەموكوڕییە زۆرترین دەزگاكانی گرتووەتەوە.
دواكاریشم كە ئێستاش بەردەوامم، ئەو گۆشەیە كە لە كوردستانی نوێ رۆژانە بە خزمەتتان دەگات، كە ئەمەش ئەزموونێكی نوێیە لە مێژووی رۆژنامەگەریی كوردیدا، گۆشەی رۆژانە نەبووە، چ جای ئەوەی گۆشەی رۆژانەی تەنز، ئێستا ئەوە پێ دەنێتە ساڵی دەیەمەوە، لە ماوەی ئەو 10 ساڵەدا بە هەمووی 20 گۆشەم رەتنەكراوەتەوە، ئەمەش دەگەڕێتەوە بۆ پەرۆشیی ئازادیخوازی رۆژنامەی كوردستانی نوێ، كە رۆژنامەیەكی حزبییە، هونەرێكی زۆر گەورەیە رێگە بە نووسەرێكی رەخنەگر بدات هەندێك جار رەخنە لەسەر حزبەكە خۆی ‌و سیاسەتی حزبەكەشی بنووسێت.
من نازانم مێژوو چیم لەسەر دەڵێت، بەڵام ئەمە كورتەی ئەزموونی من بوو لە تەنزدا لەماوەی ئەو 27 ساڵەی لە خزمەتتاندا بووم، سوپاستان دەكەم.
ستران عەبدوڵڵا:
تۆ لەم هەموو بوارەدا تەنز دەنووسیت، بۆ تەلەفزیۆن ‌و رادیۆ ‌و رۆژنامەش جیاوازییان چییە؟ ئەم بوارانە چۆن هەست بە جیاوازییەكەی دەكەیت؟
دكتۆر شێركۆ:
دیارە نووسین بۆ رۆژنامە تەنها دیالۆگە، بەڵام بۆ رادیۆ ‌و تەلەفزیۆن سیناریۆ‌و دیالۆگە، هەروەها سەركەوتنی نووسین لە رۆژنامەدا هەمووی دەگەڕێتەوە بۆ خۆت، بەڵام لە تەلەفزیۆن ‌و رادیۆ ئەكتەر ‌و دەرهێنەر رۆڵی گەورەیان هەیە لە گەیاندنی پەیامەكەی تۆدا، هەندێكجار شتێك دەنووسیت دەرهێنەر مرداری دەكاتەوە، یان ئەكتەرەكە بەو شێوەیەی تۆ دەتەوێت دەری نابڕێت، یان لێی تێنەگەیشتووە، لەبەرئەوە شوێنی نووسەر زیاتر ستوونە، بەتایبەتی لای ئێمە كە ئەو پیشانە جیا نەكراونەتەوە .
حەمە سدیقی محامی:
كاتێك كاك نەوشیروان وتی نەكەن دەتانكوژن، كێ بوون ئەوانەی ئەو تەنزە قبوڵ ناكەن؟ یان هۆكاری چییە دواكەوتنی میلەتەكەمانە یان هەزم نەكردنی رەخنەیە؟ ئەگەر سەركردەیەكی سیاسی هەست بەوە بكات كە مەترسیی هەیە لەسەر یەكێك رەخنە بگرێت هۆكار چییە؟
دكتۆر شێركۆ عەبدوڵڵا:
یەكێك لە پێوەرەكانی پێشكەوتنی كۆمەڵگە، هەبوونی تەنز‌و رەخنەیە، ئەوكاتەش گەرمەی شەڕی ناوخۆ بوو، من باسی 24 ساڵ لەمەوپێش دەكەم، شەڕبوو، هەموو كەس چەكی پێبوو، كۆمەڵگەش لەم ئاستەی ئێستادا نەبوو، بەڵام هەر نەدەبوو وامان پێبڵێت.
محەمەد حەمە ساڵح تۆفیق:
من زۆر دەستخۆشی لە د.شێركۆ دەكەم، هەر لە سەرەتاكانییەوە دەستی پێكردووە، من موتابەعەی دەكەم، من ساڵی 2000 كتێبێكم چاپكرد بەناوی هۆنراوە و چیرۆكی میللیی كوردەواری، هەڵبەتە ئەوە بەرهەمی 18 ساڵ بوو، بەداخەوە تائێستا بەرگی دوومی چاپ نەبووە، كۆكردنەوەی 2600 بەیتی كوردەوارییە، زیاتر تەركیزی جوگرافی لەسەر شارەزوور و قەرەداغ ‌و گەرمیان بوو، من ئەم كتێبەم پێشكەش بە دكتۆر شێركۆ كرد، تائێستا ماوەی 18 ساڵە دەڵێت: كتێبەكە شڕبووە ئەوەندەم سوود لێ بینیووە.
هەندێكجار دوو بەیتییەكی بەكارهێناوە، شەتری بەیتەكەی وەك خۆی داناوە، عەجزی بەیتەكەی گۆڕیووە بۆ شتێك لەگەڵ زروف ‌و زەمەنی ئێستادا بگونجێت، بە رای من ئەمە جوانترین خستنەگەڕی كەلەپوورە بەڕاستی.
محەمەد كەریم:
من پێش هەموو شتێك سەری رێزی بۆ دادەنەوێنم، چەند ساڵێك پێش ئێستا ستوونێكم لەسەر دكتۆر شێركۆ نووسی كە بەداخەوە ئێمە تائێستا وەكو ئەوەی خۆی هەیە قەدرمان نەزانیووە. من ماوەی چەندین ساڵە دەنووسم، دەیانجار هەوڵمداوە تەنز بنووسم، فەشەلم هێناوە، هۆكارەكەی ئەوە نییە زمان نازانم، بەڵكو چونكە هونەرێكی قورسە، من ئەو توانایەم تەنها لە دكتۆر شێركۆ و لە موباساندا بینیوومە.
موباسان بۆ خۆی قوتابخانەیەك بووە‌و لەو كەسانە بووە كە رۆژانە چیرۆكی نووسیوە، بە سەدان چیرۆكی هەیە كە خۆی كۆی كردوونەتەوە ‌و دواتر زۆریانی لابردووە، لەهەر چیرۆكێكی موباسان كە دەیخوێنیتەوە، موفاجەئەیەكت تووش دەبێت، كە بابەتی دكتۆر شێركۆش دەخوێنیتەوە موفاجەئەت تووش دەبێت، هەروەك خۆشی باسی كرد.
لەو ستوونەدا كە چەند ساڵێك پێش ئێستا نووسیومە، باسی عەلائەدین سەجادیم كردووە، پاشان باسی دكتۆر شێركۆم كردووە، عەلائەدین سەجادی راستە لە ئەدەبی كوردیدا پێگەیەكی خۆی هەیە ‌و رشتەی مرواریی كۆكردۆتەوە، بەڵام گرنگیی دكتۆر شێركۆ لەوەدایە خۆی دەینووسێت. بەرای من تەنها دوو شێركۆمان هەیە، شێركۆ بێكەس‌و دكتۆر شێركۆ عەبدوڵڵا كە هیچیان دووبارە نابنەوە.
ئەمەل جەلال:
دكتۆر شێركۆ لەجیاتی هەموومان ئەوەی خەڵكانێك حەزیان دەركرد بووترێت ‌و دەرببڕدرێت، لەباتی هەمووان رەخنەكانی قسەی ناخی خەڵكی دەردەبڕی.
لەهەمان كاتیشدا ببوو بە بەشێك لە رەوینەوەی خەمەكان بۆ دڵخۆشكردن.
بەڵام ئەو رەخنانەی بەڕێزتان لەڕێی كۆمیدیاوە گەیاندووتە تا چەند كاریگەریی لەسەر دامەزراوەكان هەبووە؟
دكتۆر شێركۆ عەبدوڵڵا:
سوپاس ئەمەل خان، یەكێك لە نووسەرەكانی بواری تەنز دەڵێت: «ئامانجی تەنز ئەوە نییە خراپە كارەكان چاك بكات، بەڵكو خەڵكە باشەكە نەبن بە خراپ»، بەڵام لەگەڵ ئەوەشدا ئێمە لە ساڵانی سەرەتای گۆڤاری سیخورمە، زۆرجار توانیومانە كێشەی گەورە چارەسەر بكەین، دوژمنایەتییەكی زۆریشمان بۆ دروست بووە، بەڵام مرۆڤ دەبێت قوربانی بدات.
ئەكرەم میهرداد:
گرنگتر لە نووسەر بووندا ئەوەیە كە تایبەتمەندیی خۆی هەبێت، ئەو تایبەتمەندییەی تۆ هەتە، بەڕاستی زۆر سەرنجڕاكێشە‌و شتێكت هەڵبژاردووە كە لەناو كۆمەڵگەی كوردییدا نەبوو.
من دوو پێشنیازم هەیە، ئەویش سەبارەت بەوەی دووبارە بە وشەی تەنز بووترێتەوە تەوس، چونكە لەنێو خەڵكی سلێمانی ئەو وشەیە زۆر باوە، دووەم ئەو تەنزانەی هەبوو لەنێو كوردا‌و تائێستا كۆنەكراوەتەوە، ئەگەر تۆ ئەو ئەركە بگریتە ئەستۆ زۆر باش دەبێت سوپاس.
محەمەد سەعید:
من ئەم چل پەنجا ساڵەی هاوڕێی دكتۆر شێركۆ بووم، هەرگیز لە تەنز‌و بەرهەمەكانی تێر نەبووم، بە شارەزووری ئێمە هەندێك جار وابزانم بە تەنز دەڵێن لاقرتێ وایە؟ نازانم رای دكتۆر شێركۆ رای چییە لەسەر ئەمە؟
دكتۆر شێركۆ عەبدوڵڵا:
ئەو داتاشینی زاراوەو ناونانە دەسەڵاتی یەك كەس نییە، دەبێت ئەكادیمیایەك یان دەزگایەكی رۆشنبیریی ئەوە بكات، تەوسیش ‌و لاقرتێش هەقە بیری لێ بكرێتەوە زۆر راستە.
مستەفا ساڵح كەریم:
كاكە دكتۆر دەستخۆشیت لێدەكەم ‌و پیرۆزبایی ئەم رێزلێنانەت لێ دەكەم، ئەگەر بەوردیی بچینە بنج ‌و بناوانی ئەدەبی «ساخر»ەوە دەبینین لەعیراقدا پێشینەی هەبووەو رەگی داكوتاوە، یەكێك لە پاڵەوانانی ئەو بوارە، نوری سائبە، خاوەنی گۆڤاری بەناوبانگی «حەبەزبوز». ئەم رۆژنامەنووسە لەدایكبووی شاری سلێمانییە، لەبەغدا كەسانی تر هەبوون چ بەنووسین یان بە كاریكاتێر دەردەكەوتن، لەم سی ساڵەی دواییدا ناوی خالید قشتینی زۆر لەناو ناواندایە ‌و جوان دەنووسێ.
نووسینەكانی دكتۆر شێركۆی خۆمان مۆركی كوردانەی پێوەیە و زۆریش تایبەتمەندە.
لەم چەند ساڵەی رابردوودا كەسانی تر هاتنە مەیدانەوە بۆئەوەی لەم بوارەدا ئەسپی خۆیان تاوبدەن، بەڵام بەداخەوە زوو توانەوە، ئەگەرچی ئێمە خوازیارین هەزاران گوڵ بگەشێنەوە.
دكتۆر شێركۆ لە نووسینە كاریكاتێرەكانیدا راستەوخۆ لەو شتە دەدا كە مەبەستێتی.
لەكۆتاییدا دەبێ ئەوەش بڵێم كە ئێمەی هاوڕێیانی نزیكی دكتۆر شێركۆ دەزانین زۆرجار تووشی دەردەسەری ‌و گیروگرفت بووە، بەڵام سەرەنجام قەڵەمەكەی دكتۆر شێركۆو نووسینەكانی بە زیندویی دەمێنێتەوە‌و جارێكی تریش لە دڵەوە هیوای سەركەوتنی بۆ دەخوازم.
د. محەمەد سابیر:
زۆر سوپاسی دكتۆر شێركۆ دەكەم بۆ هەموو ئەو بەرهەمە جوانانەو دەستخۆشیی لێدەكەم، من راستە رەخنەگرێكی ئەدەبی نیم، بەڵام زۆر چێژ لەبابەتەكانی دكتۆر شێركۆ دەبینم، هەمیشەش سەرسام بووم بەتواناكانی، تەنها تەماشای ستوونەكانی بكەن، كە هەموو رۆژێك لە كوردستانی نوێدا شتێكی نوێ دەنووسێت، ئەوەش مەگەر هەر لە تواناو لێوەشاوەیی دكتۆر شێركۆدا هەبێت،
من جگە لەوە پرسیارێكیشم لە دكتۆر شێركۆ هەیە، وەكو باست كرد لە ئێران كە خاوەنی كەلەپوورو گەنجینەیەكی گەورەی ئەدەبی ‌و مێژووییە، لای خۆشمان لە زۆر بواردا ئەدەب ‌و مێژووی كوردی چووەتە پێشەوە، بۆچی لەبواری تەنزدا هیچ بەرەوپێشچوونێك بەدیی ناكرێت؟ سەرنجێكیشم هەیە لەسەر ئەوەی لاقرتێ ‌و تەوس، من لاقرتێ بە گونجاوتر دەزانم وەك لە تەوس، كە ئەوە بەشتێكی سەلبی دەزانرێت. هیوای سەركەوتنت بۆ دەخوازم ‌و ئومێدەوارم گەشەكردنی زیاتر بدرێت بەو جۆرە لە ئەدەب ‌و نووسین.
شەهاب عوسمان:
دەستخۆشی لە دكتۆر شێركۆ دەكەم، بەدرێژایی ئەو چەند ساڵەی دكتۆر شێركۆم ناسیووە، جگە لەوەی خوێندەوارێكی زۆر چاك بووە، هەمیشە بەدواداچوونی بۆ نوێگەری دەكرد، من پێموایە دكتۆر شێركۆ نەك هەر توانیی بۆشاییەك پڕ بكاتەوە، بەڵكو بووە رێچكەیەك. دكتۆر شێركۆ بۆخۆی دەكرێت خوێندنەوە لەسەر ئەزموونەكانی بكرێت، هەروەها رەنگدانەوەی هەلومەرجی ناتەبایی ‌و كۆمەڵێك دیاردەی دزێوە لەنێو كۆمەڵگەدا زۆر هۆشیارانە توانیوییەتی پەنجەی بخاتە سەر‌و شوێنی خۆی قایم بكات.
دەوەن مەعروف:
من سەرەتا گوێم لە هەموو ئەو شتانە بوو، دكتۆر شێركۆ باسی كرد، بەڵام بازێكی گەورەیدا بەسەر كۆمەڵێك شتی خۆیدا، ئەوەش غەدرێكی گەورەیە كە ماوەی دوو ساڵە سەرۆكی دەزگای دواڕۆژە كە زیاتر لە بیست كتێبی نایاب لەلایەن ئەو دەزگایەوە لە زمانەكانی بێگانەوە وەربگێڕدرێتە سەر زمانی كوردی.
پرسیارێكیشم هەی كە بۆچی تائێستا نووسەری بواری تەنز یاخود بڵێین لاقرتێ دروست نەبووە؟
دكتۆر شێركۆ عەبدوڵڵا:
هۆكاری دروست نەبوونی ئەو تەرزە لە نووسەری تەنز، منیش ئەو تێبینییەم هەیە كە سەرەڕای بوونی پەیمانگەو كۆڵێجی راگەیاندن ‌و هونەرە جوانەكان، بەڵام تائێستا كەمترین بایەخیان بەم ستایڵی نووسین ‌و كاریكاتێر داوە، لەوڵاتان ساڵانە چەندین پیشانگە دەكرێتەوە، چەندین پێشبڕكێ دەهێنرێتە كایەوە، چەندین خەڵات دادەنرێت بۆ نووسینی تەنز، بۆ كاریكاتێر، لای ئێمە ئەوانە نییە، رەنگە هۆكارەكەی ئەوە بێت كە ئێمە هێشتا دەوڵەت نین.
جگە لەوەش هیچ بوارێك هێندەی بواری تەنز پێویستی بە ئازادیی نییە، بۆئەوەی بتوانێت گەشە بكات، بەڵام دەكرا لانیكەم لەدوای راپەڕینەوە 10-15 نووسەری تەنزمان هەبووایە. 40-50 كاریكاتێریستمان هەبووایە، بەڵام ئەوەی گلەییان لێ دەكرێت، دەزگا رۆژنامەوانیی ‌و دەزگا رووناكبیرییەكانن.
محەمەد عوسمان:
وێڕای سوپاس، ئەگەر تۆ پرسیاری ئەوەت كرد كە ئاخۆ مێژوو چۆن حوكمت لەسەر دەدات، ئەوە دەتوانم بڵێم تائێستا توێژینەوە مێژووییەكان بە سەرسوڕمانەوە باس لەو توانا فیكرییەی ئەنیشتاین دەكەن، سەرسامن بەوەی كە ئاخۆ ئەو توانا فیكرییەی لەكوێوە هێناوە، كە لەدوای 100 ساڵ زانست سەلماندی یەكێك لە بیردۆزەكانی راست دەرچوو، بۆیە من پێموایە مێژوو بەو شێوەیە حوكم لەسەر دكتۆر شێركۆ دەدات كە ئیمكانیات ‌و توانایەكی سەرسوڕهێنەری هەیە بەدەرە لەتوانای هەموو نووسەر‌و رۆژنامەنووسێكی تەنز، بۆ نموونە لەخوێنەردا دوو جۆر خوێنەر هەیە، خوێنەری ئاسایی هەیەو خوێنەری دەستەبژێر هەیە، نووسینەكانی دكتۆر شێركۆ جگە لەوەی خوێنەری ئاسایی بۆخۆی رادەكێشێت، بۆ خوێنەری دەستەبژێریش مایەی سەرسوڕمانە، بەتایبەتی كە ئەو قسەی دڵی خوێنەری ئاسایی دەكات، بەڵام خوێنەری دەستەبژێر پرسیار دەكات كە ئاخۆ ئەم توانایەی دكتۆر شێركۆ لەچیدایە كە هەموو رۆژێك حزوورێكی بەردەوامی هەیە لەگەڵ خەمی نەك تەنها كوردستاندا، بەڵكو لەگەڵ خەمی تاك بەتاكی خەڵك ‌و ناوچەكەشدایە.
تارا شێخ عوسمان:
دەستخۆشی بۆ دكتۆر شێركۆ ‌و دەستخۆشی بۆ ساڵۆنی كوردستانی نوێ كە هەموو رۆژانی سێشەممەیەك ئێمە دەوڵەمەندتر دەكات بە كۆمەڵێك زانیاریی نوێ، من پرسیارێك ئاراستەی دكتۆر شێركۆ دەكەم، ئێمە هەموومان دەزانین نووسەری بەناوبانگ عەزیز نەسین توانیویەتی بەشێوەی تەنز كۆمەڵێك چیرۆك ‌و رۆمان پێشكەش بە خوێنەران بكات لەسەر ئاستی جیهاندا، ئەو نووسەرە هەمیشە كێشە‌و گرفتەكانی كۆمەڵگەكەی بەشێوەی رۆمان ‌و چیرۆكی تەنز ئامێز نووسیوە، بۆ كاك دكتۆر هەوڵی نەداوە تا ئێستا چیرۆك یان رۆمانێكی تەنز ئامێز بنووسێت؟
دكتۆر شێركۆ عەبدوڵڵا:
ئەوە كەمتەرخەمییە لە منەوە كە لە چەندین بواری تەنزی وەرزشی، تەنزی، تەنزی منداڵان‌و بابەتی درێژی ‌وەكو رۆمان ‌و چیرۆك نەمتوانیووە بنووسم یان نەمنووسیووە.
رێبوار محەمەد یوسف:
من دەمەوێت شتێك بەبیر دكتۆر شێركۆ عەبدوڵڵا بهێنمەوە، كاتێك فلكەكەی قەڵادزێ دروستكرا، ئەو فولكەیە چوار كیسە چیمەنتۆی تێچووبوو، هەواڵەكە وا بۆ دكتۆر شێركۆ چوو بوو كە 24 تۆن چیمەنتۆی تێچووە، ئەوكاتە كاك عومەر قەڵادزێیی قایمقامی قەزای پشدەر بوو، سێ رۆژ كەسێك لەسەر ئەوە بەند دەكات، كاتێك هەواڵەكە دەگاتە ئێرە، ئەو بەڕێزە ئازاد دەكەن، دەڵێن ئەوەی ئەو هەواڵەی داوە بە دكتۆر شێركۆ، رێبوارو محەمەد رەنجاوە، كاك عومەر هات بۆ ماڵی ئێمە، وتی: كاك رێبوار تۆ‌و حەمە رەنجاو بۆ وا لەمن دەكەن، ئێوە لەكوردستانی نوێ-ن؟ منیش پێموت: وەڵا كاك عومەر خوا شاهیدە من ئاگاداری ئەو هەواڵە نیم، ئیتر هەواڵەكە گەیشتە كاك حەمە تۆفیق رەحیم كە ئەوكاتە لێپرسراوی مەكتەبی راگەیاندن بوو بەوەكالەت، دیدارێك لەگەڵ كاك عومەر كرا لە كوردستانی نوێ، ئەوەبوو من سەردانی دكتۆر شێركۆم كرد نەمبینی، دواتر سەردانی كاك ئاكۆ غەریبم كرد، وتم هەرچۆنێك بێت، ئەو هەواڵە راست بكەنەوە، با كاك عومەر تووسی ئەو ماندوبوونە دەروونییە نەبێت، ئیتر دكتۆر شێركۆ بۆ ژمارەی داهاتوو بەو جۆرە هەواڵەكەی راستكردەوە كە نووسیبووی «خوا ئەو موخبیرە بگرێت كە ئەو هەواڵەی بەهەڵە پێداین»، ئەوەبوو من سیخورمەكەم بۆ كاك عومەر نارد‌و وتم ئەوە كاك دكتۆر شێركۆ هەواڵەكەی بۆ راستكردوویتەتەوەو جارێكی تر بەو شێوەیە خەڵك بەند مەكە، مەیە سەر من ‌و حەمە رەنجاویش.
رێز لەتیف:
شێوازێك كە ئێستا بەكاردێت، ستانداردە كۆمیدییەكەی كە ئێستا لەجیهاندا زۆر باوە، چێژێكی زۆر تایبەتی تیایە، هەم رەخنەكە دەگرێت، هەم كۆمیدیاكەی خۆشی دەكات، ئەمە تائێستا ئەوەمان نییە لای خۆمان، جگە لەوەش من ئێستا وردە وردە دەنووسم، بەڵام كێشەیەكم هەیە، تۆ كە دەنووسیت دەتەوێت رۆحی بابەتەكە بخەیتەڕوو ‌و بەزمانی خەڵكە سادەكەش دەنووسیت، كە ئەوە زۆر قورسە، ئەوە چۆن دەكرێت؟
دكتۆر شێركۆ عەبدوڵڵا:
ئاخر ئەوەیە كە پێی دەڵێن سەهلی مومتەنیع، ئەوە بە رواڵەت ئاسانە، بەڵام نووسینەكەی لە ئەنجامی خوێندنەوەی زۆر‌و ئەزموونەوەیە، هەتا دەتوانیت بابەتەكانی پیرەمێردی شاعیر بخوێنەرەوە سوودی هەیە بۆ ئەوە.


ستران عەبدوڵڵا:
ئێمە هیوادارین ئەوە سەرەتایەك بێت بۆ هەڵسەنگاندنی ئەدەبی تەنز لە رۆژنامەگەریی كوردیدا. زۆر بواری رۆژنامەگەریی كوردی ماوە لێكۆڵینەوەی لەسەر بكرێت. دكتۆر شێركۆ و هەروەها ئەوانەی تریش كە كەم‌و زۆر خەریكە پەیدا دەبن لە رۆژنامەگەریی كوردیدا، شایەنی ئەوەن كە لایان لێ بكرێتەوە، چونكە رۆژنامەگەریی هەر ئەوە نییە وتارێكی وشك بنووسیت، بەڵكو ئەوەشە ئەو بوارانەی خزمەت بە رۆژنامەگەریی دەكەن، كاری لەسەر بكرێت ‌و لەسەری بنووسرێت.
من ئەوەندە دەڵێم، ئەوەی ئێمە كارێكی بچووكە، هیوادارم كوردەواریش وەك وڵاتان ئەم فەرهەنگە پەیڕە و بكات ‌و بە زیندوویی لە لوتكەی توانا‌و بەخشیندا رێزی لێبگرن ‌و سوپاسی دكتۆر شێركۆ دەكەین ئەم بابەتەی ئامادەكرد‌و دەمەوێت لە كۆتاییدا سوپاسنامەیەكی بچووك پێشكەشی دكتۆر شێركۆ بكەین، هەرچەندە شتێكی زۆر بچووكە ‌و شایانی لەوە زیاترە، بەڵام با بۆ مێژووش بێت هەر بمێنێتەوە، دەستخۆش دكتۆر سوپاسی هەمووشتان دەكەم.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

فێستیڤاڵی پیرشالیار لە پیشانگەی تایبەتی حەمە عومەردا

لەبارەی ئامانجی کار یان هونەری فۆتۆگراف بەلای حەمە عومەرەوە رایدەگەیەنێت: ...