سەرەکی » چاوپێکه‌وتن » هه‌ڵدانه‌وه‌ی لاپه‌ڕه‌ گه‌شه‌كانی په‌روه‌رده‌كارێكی رۆح جوان

گفتوگۆی نه‌رمین عوسمان له‌گه‌ڵ رووناک صائیب

هه‌ڵدانه‌وه‌ی لاپه‌ڕه‌ گه‌شه‌كانی په‌روه‌رده‌كارێكی رۆح جوان

 چەند ژنە کەسایەتییەکی ناسراو لە مێژووی کورددا هەن کە لەبواری جیاجیادا کەسانی لێوەشاوەو چالاک بوون، بەڵام هەرگیز ئەو چالاکییانەیان نەکردووەتە بانگەشەو کایەیەک بۆ خۆناساندن، لەوبارەیەوە لە ماوەی رابردوودا خاتوو نەرمین عوسمان کە بۆ خۆشی ژنێکی چالاکی بواری پەروەردەو  تێکۆشەرێکی کایەی سیاسیشە زنجیرەیەک سەردان و بەسەرکردنەوەی دەستپێکردووە بۆ گفتوگۆو هەڵدانەوەی لاپەڕە پرشنگدارەکانی ژیان و کارو چالاکیی ئەو خانمانەی کوردستان کە وەک سەربازی ون خزمەتێکی زۆریان بە چەند نەوەیەک کردووە لە بواری جیاجیادا، بەڵام نەوەی نوێ وەک پێویست ئاشنا نییە بە بەخشش و کۆششە مرۆڤدۆستامەکانیان، بۆیە بەسوپاسەوە خاتوو نەرمین پوختەی ئەو گفتوگۆیانە و ئەرشیفی وێنەو بیرەوەرییەکانی ئەو خانمە چالاکوانانە دەنووسێتەوەو بۆ دەربازکرنیشیان لە فەوتان و لەبیرچوونەوە، پێشکەشی کوردستانی نوێ-ی دەکات و کوردستانی نوێش ناوبەناو وێنەکان و چیرۆکی ژیانی پڕ بەخششی ئەو کەسایەتییانە بڵاودەکاتەوە.

یه‌كێكی تر له‌ چیرۆكه‌ ونه‌كانی ژنان، چیرۆكی ژیانی خاتوو رووناك صائیبه‌. خاتوو رووناك مامۆستاو په‌روه‌رده‌كارو هونه‌رمه‌ند، سیما ساف و رۆح جوان و ساده‌، له‌ ژینگه‌یه‌كی ئه‌ده‌بی و هونه‌ریی و مرۆڤدۆستی وه‌ك ماڵی جه‌میل صائیب و حه‌پسه‌ عیرفان، پیره‌مێرد، مه‌لا عارف، جه‌مال عیرفان و حه‌پسه‌ خانی نه‌قیبدا گه‌وره‌ بووه‌و گه‌شه‌ی كردووه‌، گه‌نجینه‌یه‌ك له‌ بیره‌وه‌ریه‌كانی له‌ مێژووه‌ جوانه‌كانی ئه‌وێ رۆژێن.

خاتوو رووناك له‌ (19/1/1938) له‌ كه‌ركوك له‌ دایكبووه‌، كاتێك جه‌میل صائیبـی باوكی به‌ڕێوه‌به‌ری گه‌نجینه‌ ده‌بێ، به‌هۆی ئه‌وه‌ی (حه‌پسه‌ عیرفان)ی دایكی منداڵه‌كانی ته‌مه‌نیان زۆر له‌یه‌كه‌وه‌ نزیك ده‌بێت و رووناك خان سێیه‌م منداڵی ده‌بێت، له‌دوای نه‌وزادو ئازاد دێت، ده‌ینێرنه‌ سلێمانی بۆ لای دایه‌ن بۆ ( ماڵی حه‌مه‌ی پوتێ) بۆئه‌وه‌ی له‌وێ به‌خێوی بكه‌ن، كه‌ تائێستا هه‌ستێكی قووڵ و جوانی به‌رامبه‌ریان هه‌یه‌. شه‌هید شازاد و به‌هزادی برای له‌دوای رووناك خانه‌وه‌ چاویان بۆ ژیان هه‌ڵدێنن.
حه‌پسه‌ عیرفان-ی دایكی رووناك خان خوشكی جه‌مال عیرفانی هونه‌رمه‌ندو ئه‌دیبه‌، له‌ یه‌كه‌م وه‌جبه‌ی خوێندكاره‌كانی سلێمانی بووه‌، مامۆستاكانی زه‌هره‌ خان و گوزیده‌ خان و مه‌لیحه‌ خانی شێخ قادر نوری و …. هتد ده‌بن. دوای ئه‌وه‌ سه‌ره‌تایی له‌ سلێمانی ته‌واو ده‌كات، له‌گه‌ڵ شه‌فیقه‌ سه‌عیدو به‌هیه‌ عه‌زیزو هه‌ندێك خوێندكاری دیكه‌ ده‌چنه‌ به‌غدا بۆ خوێندن له‌ خانه‌ی مامۆستایان.

بۆ ئەوەی نەسرین بێناز نەبێت
حه‌پسه‌ خان تا پۆلی سێ ده‌خوێنێت، ئه‌وكات خوشكی حه‌پسه‌ خانی دایكی رووناك خان هاوسه‌ری جه‌میل صائیب ده‌بێ و به‌گه‌نجی كۆچی دوایی ده‌كا، تاكه‌ كچێكی منداڵی به‌ ناوی نه‌سرین له‌ پاش به‌جێ ده‌مێنێت، وه‌ك كه‌لتوری ئه‌وساش كه‌ باوبووه‌، داوای حه‌پسه‌ خان ده‌كه‌ن شوو به‌ جه‌میل صائیب بكات بۆئه‌وه‌ی نه‌سرین بێ ناز نه‌بێت، حه‌پسه‌ خان شووی پێ ده‌كات و واز له‌ خوێندن ده‌هێنێ، هه‌رچه‌نده‌ له‌ سلێمانی داوای لێده‌كه‌ن ببێته‌ مامۆستا (ئه‌وسا خوێنده‌واری له‌و ئاسته‌دا كه‌م بوون) ، به‌ڵام جه‌میل صائیب لای په‌سه‌ند نابێت، به‌هۆی وردیی منداڵه‌كانییه‌وه‌، له‌گه‌ڵ ئه‌وه‌شدا حه‌پسه‌ خان به‌رده‌وام خه‌ریكی خوێندنه‌وه‌و خۆ په‌روه‌رده‌كردن بووه‌.
(من خۆشم ده‌یان جار كتێب و رۆژنامه‌م بۆ بردووه‌ كاتێ دراوسێ بووین).
خاتوو رووناك گێڕایه‌وه‌ كه‌ داروسێكانیان ئه‌وكات ماڵی ( شێخ مه‌حمود، خه‌تیب، عارف به‌گ و ره‌فعه‌ت ئه‌فه‌ندی) بوون.
له‌ پۆلی چواره‌می سه‌ره‌تاییدا ماڵیان ده‌چێته‌ گه‌ڕه‌كی شێخان، له‌ نزیك ماڵی حه‌پسه‌ خانی نه‌قیب، به‌رامبه‌ر ناوه‌ندیی كچان و له‌وێ ده‌چێته‌ خوێندنگه‌ی ئه‌لعیراقییه‌ كه‌ وه‌هبیه‌خانی هاوسه‌ری شێخ ره‌ووف به‌ڕێوه‌به‌ری ئه‌و خوێندنگه‌یه‌ بووه‌.
خانووه‌كه‌یان گه‌وره‌ ده‌بێت، جه‌میل صائیبـی باوكی كتێبخانه‌یه‌كی گه‌وره‌ له‌ناو خانووه‌كه‌دا دروست ده‌كات. هه‌روه‌ها ده‌ڵێت: « به‌هۆی نزیكیی زۆرم له‌ باوكمه‌وه‌و ئاره‌زووی خوێندنه‌وه‌م، زۆربه‌ی كات له‌ كتێبخانه‌كه‌ له‌گه‌ڵ باوكمدا ده‌بووم و سه‌رقاڵی خوێندنه‌وه‌ بووم و هه‌م كتێبخانه‌كه‌شم رێكده‌خست، هه‌موو هه‌فته‌یه‌كیش رۆژنامه‌ی «ژین»مان بۆ ده‌هات.
به‌هۆی ئه‌وه‌ی پیره‌مێرد خاڵی باوكی بووه‌، زۆر نزیكبوون له‌ یه‌كترییه‌وه‌‌و په‌یوه‌ندیه‌كانیان له‌ خاڵ و خاڵۆزا زیاتر بوو، ته‌نانه‌ت ده‌ڵێت: «كاتێك پیره‌مێرد له‌ ئیستانبوڵ گه‌ڕایه‌وه‌، لای باوك بووه‌».
هه‌روه‌ها وتی: «هاتووچۆی زۆرمان هه‌بوو، هه‌ندێكجار به‌خۆی و كه‌بابه‌كه‌یه‌وه‌ ده‌هاته‌ ماڵی ئێمه‌و ده‌یوت: حه‌پسه‌ خان چیتان هه‌یه‌ وا كه‌بابه‌كه‌ی خۆمم هێناوه‌».
خاتوو رووناك هه‌روه‌ك ئه‌وه‌شی گێڕایه‌وه‌ كه‌ یه‌كێك له‌و رووداوانه‌ی كه‌ هه‌رگیز بیری ناچێته‌وه‌ ئه‌وه‌یه‌ كه‌ جارێك پیره‌مێردو باوكی پێكه‌وه‌ ده‌چنه‌وه‌ بۆ ماڵیان و ئه‌ویش به‌ راكردن به‌ره‌و پیلیان ده‌چێ و ده‌ڵێت: «خاڵه‌ شیعرێكم بۆ بڵێ؟ ( له‌ زاری باوكییه‌وه‌ هه‌موویان پێیان وتووه‌ خاڵه‌)، پیره‌مێردیش یه‌كسه‌ر دوو به‌یتی بۆ ده‌ڵێت كه‌ تا ئێستا بیری ماوه‌و له‌ هیچ شوێنێك بڵاونه‌بووه‌ته‌وه‌ كه‌ فه‌رموویه‌تی:
گوێزێكم شكان ناوه‌كه‌ی پووت بوو
روناكی له‌گه‌ڵ تاریكی جووت بوو
ماڵی دایه‌نه‌كه‌ی روناك خان، حه‌مه‌ی پوتێ بووه‌
هـه‌روه‌ها رووناك خان باسی ره‌حمه‌ خانی كچی پێره‌مێردی بۆ كردم، ئه‌وان پێیان وتووه‌ ئاكا خان، وتیشی:»هه‌رچه‌نده‌ خوێنده‌واری نه‌بووه‌، به‌ڵام ژنێكی زۆر زیره‌ك بووه‌، هه‌موو ئه‌و په‌ندانه‌ی كه‌ له‌ رۆژنامه‌ی ژین بڵاوده‌كرانه‌وه‌ له‌به‌ری كردبوو، هه‌روه‌ها ژنێكی زۆر جوان و رۆح سووك و میهره‌بان و ماڵكراوه‌ بوو، زۆربه‌ی جار پیره‌مێرد مه‌ولود خوێندنه‌وه‌ی له‌ ماڵی كچه‌كه‌ی ده‌كرد».
پاشان گێڕایه‌وه‌و وتی: «ئێمه‌ش سه‌ردانی ماڵی پیره‌مێردمان زۆر ده‌كرد، به‌ تایبه‌تی له‌ بۆنه‌كانداو له‌شه‌وی نه‌ورۆز خزمان له‌ ماڵی پیره‌مێرد كۆده‌بووینه‌وه‌، یاپراخمان به‌ گه‌له‌كۆمه‌كێ ده‌پێچایه‌وه‌، به‌یانی نه‌ورۆز ده‌چووین بۆ گردی مامه‌یاره‌و له‌وێ چادری تایبه‌ت بۆ میوانان هه‌ڵده‌درا، دواتریش چالاكیی زۆر ده‌كراو تا ئێواره‌ ده‌ماینه‌وه‌.
جارجاریش ئێمه‌و ماڵی ره‌حمه‌ خان ( كچه‌كه‌ی پیره‌مێرد ) دایكی ( فایه‌ق وشیار و ئه‌حمه‌د زرنگ و فاتیمه‌ و په‌روین) كۆده‌بووینه‌وه‌ و پێكه‌وه‌ خواردنمان دروستده‌كرد».
رووناك خان باسی له‌وه‌ش كرد كه‌ «به‌هوی تێكه‌ڵیی زۆریانه‌وه‌، چۆن ماڵی خۆیانی بیره‌، به‌و جۆره‌ش ماڵی پیره‌مێردی له‌بیره‌».
وتیشی: جه‌میل صائیب-ی باوكم له‌گه‌ڵ خۆی ده‌یبردم بۆ چاپخانه‌ی (ژین) به‌هۆی ته‌مه‌نی منداڵیمه‌وه‌ یارییم تێدا ده‌كردو ده‌ستم ده‌برد بۆ هه‌موو شتێك و كه‌س رێگریی لێ نه‌ده‌كردم، پیته‌كانی چاپكردن له‌ ئاسن دروستكرابوون، سێ كرێكار له‌وێ كاریان ده‌كرد، پێیان ده‌وتن (موره‌تیب) واته‌ رێكخه‌ر، پیته‌ ئاسنه‌كانیان رێكده‌خست بۆ پێكهێنانی رسته‌كان، منیش رسته‌م به‌هه‌مان پیته‌ ئاسنه‌كان پێكده‌هێنا» و وه‌ك ئه‌و ده‌گێڕێته‌وه‌ تائێستاش مێزو دۆڵابه‌كه‌ی پیره‌مێردی له‌به‌رچاوه‌.
به‌هۆی ئه‌وه‌ی رووناك خان له‌ماڵه‌وه‌ خوشكی نه‌بووه‌ یاری كوڕانه‌ی كردووه‌، هه‌روه‌ها ده‌ستی بردووه‌ بۆ هه‌موو كارێكی پیاوانه‌، وه‌ك دارتاشی، دروستكردنی خشتی قوڕ و بانگوشی و باخه‌وانی و …هتد.
خاتوو رووناك هه‌روه‌ها گێڕایه‌وه‌ كه‌ حه‌پسه‌خانی دایكی له‌گه‌ڵ حه‌پسه‌خانی نه‌قیبدا زۆر هاوڕێ بوون، زۆریشیان كارو چالاكی پێكه‌وه‌ كردووه‌، هه‌ر له‌وكاته‌ی دایكی خوێندكار بووه‌، سكرتێری حه‌پسه‌خانی نه‌قیب بووه‌، دوای ئه‌وه‌ی كه‌ بووه‌ به‌دراوسێشیان، بۆ زۆربه‌ی شوێنه‌كان پێكه‌وه‌ ده‌چوون، له‌هه‌مان كاتیشدا دایكی رووناك خان سه‌رپه‌رشتیی گروپێكی ژنانی سلێمانیی كردووه‌.
رووناك خان له‌درێژه‌ی گفتوگۆكه‌دا ئه‌وه‌شی گێڕایه‌وه‌ كه‌ هه‌ندێك جار حه‌پسه‌خانی نه‌قیب (لۆچێكی) له‌ سینه‌ما سیروان یان ره‌شید بۆ داده‌نرا به‌تایبه‌تی كه‌ فیلمی نوێ بهاتایه‌و دایكی و هه‌ندێك ژنی تریش له‌گه‌ڵیدا ده‌چوون و ده‌ڵێت: «منیش هه‌موو جارێك له‌گه‌ڵیاندا ده‌چووم، ئاو و میوه‌و خه‌یار و ترۆزیان له‌گه‌ڵ خۆیاندا ده‌برد».
هه‌روه‌ها ده‌ڵێت: «جاری وا هه‌بوو حه‌پسه‌خانی نه‌قیب ژنانی كۆده‌كرده‌وه‌و ده‌چووینه‌ سه‌یرانگه‌كان، سه‌یرانه‌كان له‌ ده‌ره‌وه‌ی شار بوون، وه‌ك تووی مه‌لیك، قۆریه‌ شكاو به‌رامبه‌ر گردێك بوو (ئیستا گردی عه‌لی ناجیه‌) ، باخی زۆری لێبوو، به‌پێ بۆیان ده‌ڕۆیشتین، بۆ سه‌رچناریش كه‌ ئه‌وسا موڵكی میرزا تۆفیق بوو، به‌ وڵاخ بۆی ده‌چووین، له‌ باخه‌كه‌یان فستق و میوه‌ی زۆری لێبوو، هه‌موو كه‌سێكیش بۆی نه‌بوو بچێت بۆ ئه‌وێ «.
كارێزی ئه‌حمه‌د زه‌نگه‌نه‌ و باخەکەمان
رووناك خان هه‌روه‌ك ده‌گێڕێته‌وه‌: «خۆشتیرین شت بۆ من كه‌ له‌گه‌ڵ باوكم و پیاوان ده‌چووین بۆ چه‌می زه‌ڵم بۆ راوه‌ ماسی ئه‌وه‌بوو كه‌ به‌ فه‌رده‌ ماسی-یان ده‌هێنایه‌وه‌‌و له‌به‌ر نه‌بوونی سه‌لاجه‌، به‌ سه‌به‌ته‌ به‌سه‌ر گه‌ڕه‌كدا دابه‌ش ده‌كرا».
هه‌وه‌ها ئه‌وه‌شی بۆ باسكرم كه‌ «باوكی زۆر حه‌زی له‌ باخ و باخچه‌ بووه‌، خۆشی سه‌رپه‌رشتیی كردووه‌ و وتی: «له‌پاڵ باخی گوڵ و گوڵزاره‌وه‌ هه‌موو جۆره‌ سه‌وزه‌یه‌كمان هه‌بوو». كارێزی ئه‌حمه‌د زه‌نگه‌نه‌ به‌ناو باخه‌كه‌ماندا ده‌ڕۆیشت. به‌یانیان كه‌ باوكم ده‌هاته‌ خواره‌وه‌ بۆ باخه‌كه‌، له‌گه‌ڵیدا ده‌چووم، ئیتر به‌رووبووممان لێده‌كرده‌وه‌، دایكیشم سه‌به‌ته‌ی رێكده‌خست و به‌ گوڵیش ده‌یڕازانده‌وه‌و به‌ مندا ده‌ینارد بۆ ماڵی شێخ قادرو شێخ مه‌حمودو ماڵه‌ نزیكه‌كان».
هه‌روه‌ها وتی: «یه‌كێكی تر له‌ بیره‌وه‌رییه‌كانم له‌گه‌ڵ حه‌پسه‌ خانی نه‌قیبدا ئه‌وه‌بوو كه‌ ده‌چووم سه‌به‌ته‌كه‌م بۆ ده‌برد، زۆرجار دیارییه‌كی ده‌دامێ، جارێك ئه‌و مێخه‌ك به‌نده‌ی دامێ كه‌ وێنه‌كه‌ی حه‌پسه‌خانی پێوه‌ گیراوه‌ «.
باسی له‌وه‌شكرد كه‌ هه‌موو شه‌وێكی هاوین به‌تایبه‌تی ژنان لای حه‌پسه‌ خان كۆده‌بوونه‌وه‌، چێشت و خواردنیان له‌گه‌ڵ خۆیاندا ده‌بردو له‌ ماڵی حه‌پسه‌ خان چێشتخانه‌یه‌ك له‌لای خواره‌وه‌ هه‌بوو شۆربایان بۆ فه‌قێكان لێده‌نا، فه‌قێش ده‌هاتن ده‌یانبرد، دواتریش پێكه‌وه‌ ژنان له‌سه‌ر یه‌ك سفره‌ نانیان ده‌خوارد. وه‌ك باسیشی ده‌كات، ئه‌وكاته‌ هه‌رچه‌نده‌ منداڵ بووه‌، به‌ڵام زۆری به‌لاوه‌ خۆش بووه‌.
ئه‌و خانمه‌ رۆح سوكه‌ ئه‌وه‌شی گێڕایه‌وه‌ كه‌ «ژنێك به‌رده‌وام لای حه‌پسه‌ خانی نه‌قیب بووه‌، به‌ناوی به‌هییه‌ خان، ژنێكی له‌سه‌رخۆ و ده‌ستڕه‌نگین و ژیر بووه‌.
ماڵی خاتوو رووناك گوڵه‌باخ و نه‌عنای زۆریان هه‌بووه‌، به‌هییه‌ خان چووه‌ لێیكردۆته‌وه‌و بردوویانه‌ گوڵاوو عاره‌قی نه‌عنایان لێ دروستكردووه‌و به‌شی ماڵی جه‌میل صائبیشیان لێداوه‌ «.
هه‌روه‌ها له‌ ماڵی شێخ قادری حه‌فید ئاهه‌نگده‌گێڕدرا به‌ناوی (پۆست و ئیداره‌) كه‌ تایبه‌ت بوو به‌ پیاوان، ئه‌وانه‌ی ئاماده‌ده‌بوون ئه‌وه‌نده‌ی له‌بیری ئه‌ودا ماوه‌، ره‌شۆڵ و مه‌حمودی حه‌مه‌ی له‌یلێ، به‌ڵام میوزیك ژه‌نه‌كانی بیرنه‌ماوه‌، پیاوان كۆده‌كرانه‌وه‌، منداڵانیش له‌ سه‌ربان كۆده‌بوونه‌وه‌‌و سه‌یریان كردوون.
شێخی نەمر بۆ دڵنەوایی سەردانی باوکمی کرد
خاتوو رووناك هه‌روه‌ها ده‌گێڕێته‌وه‌ كه‌ مه‌لا عارفی مامی كه‌ ئه‌ویش شاعیر و نووسه‌ر بووه‌، هه‌روه‌ها خاڵیشی جه‌مال عیرفان (ئه‌دیب و هونه‌رمه‌ند) له‌ سه‌رده‌می شێخ مه‌حموددا ده‌كوژرێن، ئه‌و دوو كه‌ڵه‌ پیاوه‌ عه‌لمانی بوون، بۆیه‌ باوكیشی (جه‌میل صائیب) دڵی له‌ شێخی نه‌مر ره‌نجابوو، چونكه‌ نه‌یتوانی بوو بكوژه‌كان بدۆزێته‌وه‌، هه‌ر له‌به‌ر ئه‌و هۆیه‌شه‌ كاتێك شێخ ده‌گه‌ڕێته‌وه‌ سلێمانی، باوكی ناچێت بۆلای، هه‌رچه‌نده‌ له‌ماڵی شێخ قادری دراوسێیان بوو، به‌ڵام شێخ مه‌حمودی نه‌مر خۆی سه‌ردانی باوكی كردووه‌ بۆ دڵنه‌وایی و له‌و باره‌یه‌شه‌وه‌ ده‌ڵێت:»وه‌ك فیلم ئه‌و سه‌رده‌مانه‌م له‌به‌رچاوه‌ «.
خاتو رووناكی بیر رووناك باسی باوكی ده‌كات ‌و ده‌ڵێت: «باوكم پیاوێكی یه‌كجار خوێنده‌وار بوو، زمانزان بوو، كوردی و عه‌ره‌بی و توركی و فارسی به‌ باشی ده‌زانی، زۆرێك له‌و شتانه‌ی ده‌یخوێنده‌وه‌، بۆی باسده‌كردین «.
هه‌روه‌ها وتی: «باوكم له‌ ساڵی 1924دا سه‌رنووسه‌ری رۆژنامه‌ی پێشكه‌وتن بووه‌، دوای كۆچی دوایی پیره‌مێرد له‌ 19/7/1950 باوكم سه‌رپه‌رشتیی رۆژنامه‌ی ژینی گرتۆته‌ ئه‌ستۆی خۆی، به‌ڵام به‌داخه‌وه‌ و ئه‌وه‌نده‌ی نه‌برد له‌ 13/10/1951 له‌ 13/10/1951 باوكم له‌ یه‌كێك له‌ نه‌خۆشخانه‌كانی به‌غدا كۆچی دوای كرد.
پاشان گێڕایه‌وه‌ كه‌ «ئه‌وه‌ی زۆر جێگای داخه‌، ئێمه‌ منداڵبووین نه‌مانزانی چۆن ئه‌و كتێبخانه‌ ده‌وڵه‌مه‌نده‌ لای خۆمان بپارێزین، دایكم كتێبخانه‌كه‌ی دا به‌ كاك عه‌لادین سوجادی و كاك ئه‌حمه‌د زرنگ كاروباری رۆژنامه‌كه‌شی كه‌وته‌ ده‌ستی ئه‌وان دوای ئه‌ویش حه‌مه‌ ره‌سوڵ ( ره‌سوڵ هاوار ) كه‌ ئه‌ویش هه‌ر خزممان بوو «.
ئه‌و وتی» به‌ خه‌تای دایكمی ده‌زانم كه‌ نه‌یتوانی بیانهێڵێته‌وه‌و بیانپارێزێت، ته‌نانه‌ت باوكم ئاره‌زووی پول كۆكردنه‌وه‌ی هه‌بوو، چه‌ند ئه‌لبومێكی هه‌بوو هه‌مووی به‌خشی، هه‌رچه‌نده‌ دوو برای گه‌وره‌م هه‌بوو له‌دایكم نه‌بوون و له‌ به‌غدا بوون، دواییش خانووه‌كه‌مان چۆڵكردوو پاش ماوه‌یه‌ك چوینه‌ به‌غدا، له‌وێ براو مامم (مسته‌فا صائیبـی ) نووسه‌ر له‌وێ بوون و سه‌رپه‌رشتییان ده‌كردین، تا گه‌یشتمه‌ پۆلی سێیه‌می ناوه‌ندی، ئه‌وسا ئازادی برام چووه‌ توركیا بۆ خوێندن و نه‌وزادی براشم له‌ كۆلێجی یاسا ده‌یخوێند، ئیتر دایكم و به‌هزاد و شازاد گه‌ڕانه‌وه‌ سلێمانی و دایكیشم به‌ په‌له‌ منی خسته‌ خانه‌ی مامۆستایان» .
خاتوو رووناك له‌درێژه‌ی گفتوگۆكه‌ماندا وتی: «حه‌زم له‌ خانه‌ی مامۆستایان نه‌بوو، ئاره‌زووم بوو كۆلێج ته‌واوبكه‌م و خه‌ونی باوكم بهێنمه‌ دی، به‌ڵام دایكم به‌هۆی باری ئابووریی خۆیه‌وه‌ منی خسته‌ خانه‌ی مامۆستایان». له‌ پۆلی دووه‌می خانه‌ی مامۆستایان خاتوو روناك نه‌خۆش ده‌كه‌وێت، بۆیه‌ تاقیكردنه‌وه‌ی ده‌ره‌كی ده‌كات و ده‌رده‌چێ بۆ پۆلی سێ و ده‌گه‌ڕێته‌وه‌ سلێمانی، ئه‌وكات خانه‌ی مامۆستایان له‌ سلێمانی ده‌كرێته‌وه‌. له‌ سلێمانی له‌ ساڵی 1959 خوێندن ته‌واوده‌كات و به‌ دووه‌م ده‌رده‌چێت، هه‌روه‌ها ده‌ڵێت: «ئاهه‌نگێكی زۆر قه‌شه‌نگیان بۆ كردین له‌ (یانه‌ی ئه‌فسه‌ران)و یه‌كه‌م خول بووین، ئاهه‌نگه‌كه‌ له‌سه‌ر ئاستێكی زۆر به‌رزبوو، خه‌ڵكێكی زۆر بانگهێشت كرابوون « .


“ئاگر له‌سه‌ر سیمفۆنیا”
له‌ باسكردنی زیاتری ئاهه‌نگه‌كه‌دا ده‌ڵێت: « ده‌یان خه‌ڵاتیان پێ به‌خشین و ئاكاخانی كچی پیره‌ مێردیش له‌وێ بوو، بازنگێكی ئاڵتونی به‌ دیاری دامێ، یه‌كه‌مه‌كان یه‌كسه‌ر له‌ناو شار دامه‌زراین، له‌ خوێندنگای (ئه‌لعیراقیه‌) دامه‌زرام، چونكه‌ نزیك ماڵی خۆمان بوو، هه‌روه‌ها له‌هه‌مان خوێندنگه‌ راهێنانی ئاماده‌كردنی مامۆستاییم كردبوو، به‌ڕێوه‌به‌ره‌كه‌مان ناوی سه‌بریه‌ حوسێن نازم بوو، خوشكی سامیه‌ فه‌ندی بوو .
كاتێك كه‌ راهێنانه‌كه‌م ده‌كرد، خوێندنگه‌كه‌ ئاهه‌نگێكی گه‌وره‌ی سازكرد، منیش سه‌رپه‌رشتیم ده‌كرد بۆ ئاهه‌نگه‌كه‌ سه‌مایه‌كم دیزاین كرد به‌ ناوی «ئاگر له‌سه‌ر سیمفۆنیا» و جله‌كانیش خۆم رێكم خستبوو، له‌گه‌ڵ كۆمه‌ڵێك چالاكیی ترو دیواره‌كانم به‌ وێنه‌ی دوانزه‌ سواره‌ی مه‌ریوان رازاندبووه‌وه‌، ( رووناك خان ده‌ستی وێنه‌كێشانی هه‌یه‌و هونه‌رمه‌نده‌، زۆربه‌ی مامۆستایانی جاران فره‌ به‌هره‌بوون).
پاش ماوه‌یه‌ك موسا سه‌مه‌د داوای لێكردم ببمه‌ سه‌رپه‌رشتیاری هۆكاره‌كانی فێربوون، ناردمیانه‌ خولێك بۆ به‌غدا له‌سه‌ر هه‌مان بابه‌ت و له‌وێ زۆر شت فێربووم».
باسیشی له‌وه‌ كرد كه‌ له‌وێ له‌گه‌ڵ مامۆستاكانی خوله‌كه‌دا چوون بۆ سه‌ردانی به‌ڕێوبه‌رایه‌تی ( به‌عسات)، له‌وێ داوایان لێكردووه‌ بچێته‌ ئه‌مریكا بۆ خوێندن بۆ ماوه‌ی پێنج ساڵ، له‌و باره‌یه‌شه‌وه‌ ده‌ڵێت: «منیش هه‌ر له‌وێ هه‌موو پێداویستییه‌كانم ته‌واوكرد، به‌ڵام كه‌ گه‌ڕامه‌وه‌ سلێمانی، برایه‌كم په‌شیمانی كردمه‌وه‌ به‌هۆی ئه‌وه‌ی كه‌ كچێكی گه‌نجم و ئه‌سته‌مه‌ به‌ ته‌نها بچمه‌ وڵاتێكی بیانی، ئیتر نه‌ڕۆشتم و تائێستاش په‌شیمانم «.
دوای ماوه‌یه‌ك خاتوو رووناك هاوسه‌رگیریی ده‌كا له‌گه‌ڵ ئه‌فراسیاب سدیق شاوه‌یس ده‌كات ‌و ئێستا (خاوه‌نی پێنج منداڵن، سێ كوڕو دوو كچ)، دوای ئه‌وه‌ی هاوسه‌رگیرییش ده‌كات، ده‌چنه‌ هه‌ڵه‌بجه‌. له‌ساڵی 1963دا ده‌گه‌ڕێنه‌وه‌ سلێمانی و كاك ئه‌فراسیاب ده‌گیرێت ‌و پاش ساڵێك زیندانی ئازاد ده‌كرێ .
ساڵی 1969 ده‌چن بۆ به‌غداو كاك ئه‌فراسیابی هاوسه‌ری هه‌م سیاسه‌ت و هه‌میش له‌ پاڵیدا به‌شی زمانی ئینگلیزی له‌ كۆلێج ته‌واوده‌كات، دوای (10) ساڵ له‌ به‌غدا ده‌گه‌ڕێنه‌وه‌ سلێمانی و له‌خوێندنگه‌ی پێشڕه‌وی عه‌ره‌بی داده‌مه‌زرێته‌وه‌، دواتر ده‌بێته‌ یاریده‌ده‌رو پاشانیش ده‌بێته‌ به‌ڕێوه‌به‌ری قوتابخانه‌ی باخچه‌كان و كاك ئه‌فراسیاب ده‌بێته‌ مامۆستا له‌ ناوه‌ندیی كاژاو.
(12) ساڵ منداڵه‌كانی باوكیان نه‌ بینیووه‌
له‌ ساڵی 1981 ده‌چن مامۆستا ئه‌فراسیاب بگرن، به‌ڵام ناكه‌وێته‌ به‌رده‌ستیان و ده‌بێته‌ پێشمه‌رگه‌. وه‌ك خاتوو رووناك بۆی گێرامه‌وه‌ هه‌موو مانگێك ئیستیخبارات به‌ دوایاندا ناردووه‌و هه‌ڕه‌شه‌یان لێكردووه‌.
كچه‌كه‌ی پزیشك ده‌بێت و له‌سه‌ر كار لای ده‌به‌ن، كوڕه‌كه‌ی له‌ كۆلێجی ئه‌ندازیاری به‌شی میكانیكی ده‌بێت، له‌ زانكۆ ده‌ری ده‌كه‌ن، (12) ساڵ ته‌نها ده‌بێ و به‌ دڵه‌ڕاوكێ ژیان به‌ڕێده‌كات، كاك ئه‌فراسیاب له‌ ساڵی 1992 ده‌گاته‌ له‌نده‌ن.
پاش ئه‌وه‌ی ماوه‌یه‌ك له‌ سوریا ده‌بێت، له‌سه‌ر داوای كاك ئه‌فراسیاب ئه‌وانیش ده‌گه‌نه‌ لای وه‌ك ده‌شگێڕێته‌وه‌ (12) ساڵ منداڵه‌كانی باوكیان نه‌ بینیووه‌، له‌وكاته‌ی جه‌میل صائیب كۆچی دوای ده‌كات، شه‌هید شازاد صائیب ته‌مه‌نی (4) ساڵان بووه‌و خاتوو رووناكیش 12 ساڵان بووه‌، به‌رده‌وام به‌ كۆڵییه‌وه‌ ده‌بێت ‌و له‌وباره‌یه‌شه‌وه‌ وتی: «به‌هۆی جیاوازیی ته‌مه‌نه‌وه‌ رۆڵی دایكم بۆ شازاد ده‌بینی، خۆشه‌ویستیم بۆی وه‌ك دایك و كوڕ وابوو»، كاك به‌هزادی برایان فڕۆكه‌وانی سه‌ربازی ده‌بێت، ئه‌ویش ده‌گیرێت و ده‌برێته‌ گرتووخانه‌ی نوگره‌ سه‌لمان و یه‌كێكه‌ له‌وانه‌ی له‌ناو (شه‌مه‌ندۆفێری مه‌رگ)دا ده‌بێت دوای ئه‌وه‌ی به‌رده‌بێت له‌سه‌ر كاره‌كه‌ی لاده‌برێت.
خێزانێکی فرە بەهرە
ماڵێكی خاوه‌ن فره‌ به‌هره‌بوون، جگه‌ له‌ ئه‌ده‌ب و سیاسه‌تیش كاك شازاد گیتارو عود ژه‌ن بوو، كاك ئازاد نه‌ی لێ ده‌داو كاك به‌هزادیش وێنه‌ كێش بوو.
خاتوو رووناك هه‌ندێك بیره‌وه‌ریی دیكه‌ی گێڕایه‌وه‌و ده‌ڵێت: « له‌ساڵی 1948 له‌ قوتابخانه‌وه‌ چووین بۆ خۆپیشاندان دژی داگیركه‌ر (ئیستیعمار) به‌ دروشمی بڕوخێ ئیستیعماری بۆگه‌ن، هه‌ندێ جاریش له‌گه‌ڵ منداڵانی گه‌ڕه‌ك خۆپیشاندانمان ده‌كرد‌و هاوارمان ده‌كرد چیتان ده‌وێ ئه‌ی میلله‌ت، نانمان ده‌وێ بۆ میلله‌ت «. هه‌روه‌ها باسی له‌وه‌ش كرد كه‌ باوكی په‌یوه‌ندیی له‌گه‌ڵ مه‌سیحی و جوله‌كه‌ی ئه‌و سه‌رده‌مه‌دا زۆر باش بووه‌، دایكیشی زۆرجار ناردوویه‌تییه‌ لای هه‌ندێك دوكانداری جوله‌كه‌ وه‌ك شه‌له‌مۆ(كوتاڵ فرۆش بووه‌) عه‌به‌ی عوزه‌ره‌ زه‌ره‌نگه‌ر بوو، رۆفائیل ئه‌ویش زه‌ره‌نگه‌ر بووه‌و ده‌ڵێت له‌كاتی جه‌ژنی كه‌پره‌ شینه‌ی جوله‌كان، سینی خواردنمان بۆ ده‌هات و له‌كاتی گه‌ڕانه‌وه‌ی حاجییه‌كاندا به‌ وڵاخ ده‌هاتنه‌وه‌ به‌ ئاڵای ره‌نگاوڕه‌نگه‌وه‌‌و خه‌ڵكیش له‌سه‌ر جاده‌كان كۆ ده‌بوونه‌وه‌ بۆ سه‌یركردن و ده‌ست ماچكردنیان « .
له‌كۆتای گفتوگۆكه‌شدا به‌ هه‌ناسه‌یه‌كی پڕ میحنه‌ت و چاوێكی پڕله‌ خه‌مه‌وه‌ وتی: «ماڵێك سیاسه‌تی تێدا بێت، به‌شه‌ گه‌وره‌كه‌ی به‌ر ژن ده‌كه‌وێت و له‌م هه‌موو خوشك و برایه‌ ته‌نها خۆم ماوم، ژیان پڕه‌ له‌ ئازار له‌گه‌ڵ ئه‌وه‌شدا ده‌بێت به‌رده‌وامبیت «.
له‌كۆتاییدا ده‌بێت بڵێین: سڵاو له‌و ته‌وارانه‌ی له‌ نووسینه‌وه‌ی مێژووی پڕ سه‌روه‌ریی ئه‌م نیشتمانه‌دا هاوبه‌ش و به‌شداربوون، كه‌ خاتوو رووناك صائیبیش یه‌كێكه‌ له‌وان.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

خاتوو زه‌كیه‌ ره‌شید مامۆستا و په‌روه‌دكار و وه‌رزشه‌وان و نووسه‌ر و دایكێكی میهره‌بان

چەند ژنە کەسایەتییەکی ناسراو لە مێژووی کورددا هەن کە لەبواری ...

freier porno porno gratis
doğubayazıt escort afşin escort afyon escort afyon escort alanya masaj salonu afyon masaj salonu efeler masaj salonu polatlı masaj salonu merzifon masaj salonu afyon masaj salonu akhisar masaj salonu akçakale escort