سەرەکی » دۆسێ » هێزێكی چەكدار لە دەرەوەی هێزی رەسمی لە هیرات دامەزرا

شەڕی تالیبان دەكەن و دەیانەوێت ناوچەكانی خۆیان وەربگرنەوە

هێزێكی چەكدار لە دەرەوەی هێزی رەسمی لە هیرات دامەزرا

لە هەرێمی هیرات کە دەکەوێتە سەر سنووری نێوان ئەفغانستان و ئێران، هێزێكی چەكداریی نوێ لە دەرەوەی سوپای رەسمی حكومەتی كابول دروستبووە كە دەیانەوێت شەڕی تالیبان بكەن و ناوچەكانی هیراتیان لێ وەربگرنەوە.

كۆنترۆڵكردنەوەی ناوچە سنوورییەكانی ئێران و ئەفغانستان
دروستبوونی ئەم گروپە چەكدارییە هاوكاتە لەگەڵ ناردنی هیزێكی سوپای ئەفغانستان بۆ ناوچەكە بۆ كۆنترۆڵكردنەوەی ناوچە سنوورییەكانی ئێران و ئەفغانستان كە چەند رۆژێكە لە لایەن تالیبانەوە كۆنترۆڵ كراون.

ئەم چەكدارانە، سەربە گروپێكن کە فەرماندەیەكی پێشووی ئەفغانستان سەرکردایەتی دەکات، كە ئەویش گرووپی ئیسماعیل خان، یەکێک لە سەركردەکانی پێشووی موجاهیدینی ئەفغانە.

عەتائوڵڵا عەلیمی چەكداری گروپی ئیسماعیل خان دەڵێت: كاتێك هێرش دەكرێتە سەر شارەكەمان و دەیانەوێت وێرانی بكەن، ئامادە دەبین شەڕ بكەین و هیچ ترسێكیشمان لە دوژمن نییە، چونكە سەركەوتن بۆ ئێمەیە.

دەیانەوێت مێژوو دووبارە بكەنەوە
گروپی موجاهیدینی ئەفغانی لەساڵی 2001 یەكێك بوون لەو گروپە چەكدارییانەی هاوكاریی ئەمریكایان دەكرد بۆ روبەڕوبوونەوەی تالیبان، ئێستاش دەیانەوێت مێژوو دووبارە بكەنەوە و دوای كشانەوەی ئەمریكا، دووبارە بەرەنگاری چەكدارەكانی تالیبان ببنەوە.

چەكدارێكی تری ئەو گروپە بەناوی بەسیر ئەحمەد دەڵێت: «ئێمە لێرەین بۆ بەرگریكردن لە خەڵك و خاکەکەمان، ئامادەین تا دوا دڵۆپی خوێنمان بەرگریی لە خەڵك و شار و ناوچەكەمان بكەین».

گروپەكەی خان، هەزار چەكدار زیاترن و لە هەرێمی هیرات كەوتونەتە كاركردن، لە هەندێك بەرەشدا هاوشانی سوپای ئەفغانستان لەگەڵ تالیباندا شەڕ دەكەن.

هێزەكانمان رەوانەی ناوچەكانی تری هیرات كردووە
مەعروف غوڵامی فەرماندەی گروپی ئیسماعیل خان دەڵێت: هێزەكانمان لە چەند خاڵێكی نزیك لە ناوچەكانی تالیبان دامەزراندووە، هەندێكی دیكەشمان رەوانەی ناوچەكانی تری سەربە هیرات كردووە.

ئەو پێشهاتانە لە كاتێكدایە كە بزووتنەوەی تالیبان دەڵێت: «زیاتر لە %90ی ئەفغانستانی كۆنترۆڵ كردووە، بەشێك لە دەروازە سنوورییەكانی ئێران و توركمانستان و تاجیكستان و ئۆزبەكستانی كۆنترۆڵ كردووە.

هاوكات، ئەمریكا نزیكەی %90ی سەربازەكانی كشاندۆتەوە و چاوەڕوان دەكرێت تاوەكو 31ی ئابی داهاتوو هەموو سەربازەكانی ئەو وڵاتە بەجێبهێڵن.

كابول ئامادە نییە گفتوگۆ لەگەڵ تالیبان بكات
لەو بارەیەشەوە، بزووتنەوەی تالیبان دەڵێت: «ئێستاش ئامادەی دانوستاندنین لەگەڵ حكومەتی ئەفغانستان، بەڵام ئەشرەف غەنی، سەرۆكی ئەفغانستان لە دوایین لێدوانیدا ئاشكرای كرد كە حكومەتی كابول ئامادە نییە گفتوگۆ لەگەڵ تالیباندا بكات».

هەروەها لۆید ئۆستن، وەزیری بەرگریی ئەمریكا داوایكردووە كۆمەڵگەی نێودەوڵەتی كار بۆ رێكەوتنی ئاشتی لە ئەفغانستان بكات.

 199 جار بینراوە