سەرەکی » وتار » رۆژنامەیەك بۆ هەموو سەردەم و قۆناغێك

کوردستانی نوێ

رۆژنامەیەك بۆ هەموو سەردەم و قۆناغێك

لەتیف حسێن

بەشبەحاڵی خۆم هەموو ساڵێك كە ساڵیادی ئەم رۆژنامەیە نزیك دەبێتەوە، بە هەفتەیەك خۆمی بۆ ئامادە دەكەم، دەچمە ئەرشیفی كارەكانم كە لە رۆژگاری خۆیدا كارم تێدا كردووە، هاوڕێ‌ و هاوپیشەكانم لەو سەردەمەدا دێتەوە یاد، بەجۆرێك وەك ئەوەیە لە ئێستاداو بەیادی جاران هەر لەم رۆژنامەیەدا كار دەكەم.

ئەكرێت لە بەرامبەر ئەمەدا دەنگ گەلێك هەبن، پرسیاری ئەوە بكەن ئاخۆ لە سەردەمی تەكنەلۆژیا و سۆشیال میدیادا، رۆژنامە كاغەزییەكان دەبێت چ سەرمایە گوزارییەكیان كردبێت تا هەنووكەش لە یادەورەی زۆرێكدا مابێتەوە، رەنگە ئەوانەی ئەهلی ئەم پرسیارەن هەق بەخۆیان بدەن و پرسیاری وەها بە مێشكیاندا بێت، بەڵام خۆ دەشكرێت ئەوانە چاوەڕێی وەڵام گەلێك بن، كە لێیەوە هەقیقەتی كوردستانی نوێ‌ و ئەم رۆژنامە كاغەزییەی ئێستای ناومیدیای كوردی بەباشی بخوێننەوە.

کاروانەکە درێژەی هەیە
هەڵبەت پێش بەندەش ژمارەیەكی زۆر لە هاوڕێ‌ و هاوپیشەم لەم رۆژنامەیەدا كاریان كردووە و پێوەی ماندوو بوون، دوای ئێمەش و تا ئێستاش ژمارەیەك كادری دڵسۆزی تر درێژە بەكاروانەكەی دەدەن و بەردەوامن، ئەوانیش و بەندەش باش ئەوە دەزانین یەكێك لەو دەستكەوتانەی كە كورستانی نوێ‌، وەك رۆژنامە و زمانحاڵی رەسمی یەكێتیی نیشتمانیی كوردستان، كە وەك شانازی بۆی ماوەتەوە، ئەو سەرمایە گوزارییە مرۆییەیە كە كوردستانی نوێ‌ خاوەنییەتی، یان روونتر میدیای یەكێتی خاوەنییەتی و تەنانەت بۆتە هەوێنی لە دایك بوونی سەدان میدیای كوردی كە ئێستا خۆیان بە یەكەم و گەورە و زۆر شتی تر دەزانن، ئەم سەرمایە گوزارییەش بۆ میدیای یەكێتی و كوردستانی نوێ‌ و كەناڵەكانی تری وەك دایك یەكێتی وەك حزب و وەك میدیایەك دەخاتە بەردەم بەرپرسیارێتییەكەوە كە پێویستی بە بەخۆداچوونەوە و خۆ رێكخستنەوە هەیە، بەجۆرێك كە لەگەڵ سەردەم و قۆناغی ئێستادا بگونجێ‌ و هەڵبكات، بەجۆرێك وەك چۆن پێشتر خەڵك و وەرگرو خوێنەرو بینەرو بیسەری ئاراستە كردووە، ئێستاش پێویستی بەهەمان بەرنامە و مەنهەج هەیە، بەڵام بەشێوازی نوێ‌ و سەردەمیانە.

دەمەوێ‌ بەراشكاوی لەمسەردەمی فەوزاو شێواویەی ئێستای میدیای كوردی كە هەندێکجار مرۆڤ رووی نایەت تەماشا یان خەیاڵ بداتە هەندێ‌ میدیا، یان میدیاكار خۆی بە رۆژنامەوان بزانێت، كوردستانی نوێ‌ و میدیای یەكێتی دەتوانێت زۆر بەئاسانی بەهۆی ئەو سەرمایە گەورەیەی لە میدیاو میدیاكارانی كورد كە هەیەتی و زۆربەی هەر زۆری میدیاكانی ئێستا میدیاكاری یەكێتی دایمەزراندون و كاری تێدا دەكەن و ئێستاش بەشی سەدان میدیای تر كادری هەیە، بۆیە جێی خۆیەتی ئەم میدیایە جێ‌ نەخشی خۆی دیاری بكاتەوە و ببێتەوە بە تاكە مینبەری راگەیاندن.

بە نوێی دەمێنێتەوە
هەندێك میدیا وەك چۆن لە سێكتەرەكانی تری ژیان و قۆناغەكانی ژیاندا، هەندێك كار هەن كە تا كۆن بن هەر بە نوێی دەمێننەوە، كوردستانی نوێش تا تەمەن و ژیانی دێرین و مێژوویی بێت، هێشتا بەگەنجی دەمێنێتەوە، چونكە بۆ خۆی بۆتە بەشێك لەیاد و یادەوەری خوێنەری كورد و رۆشنبیر و نووسەرانی كورد و تەنانەت غەیرە كوردیش، ئەمە جگە لەوەی كە هەر میدیاكارێك لە كوردستانی نوێ‌ و میدیای یەكێتی دەربچوایە بەراستی دەبووە میدیاكار و كەسێكی پیشەیی و تەواو پابەند بە ئیتیك و ئەخلاقی كاری رۆژنامەوانی و ئەم كاروانەشی هەتا ئێستاش بەردەوامە، چونكە لە ئەسڵدا دامەزراندن و دروستكردنی میدیای یەكێتی لە شاخ تا بەشار دەگات، مەنهەج و بەرنامەی تایبەتی خۆی هەبوو، سەرۆك مام جەلال خۆی هەم نووسەری بوو، هەم خوێنەری بوو، بۆ كەناڵەكانی تریش هەر بەهەمان رۆحییەت كاری بۆ دەكردن.

راسپاردەکانی سەرۆک مام جەلال
بیرمەو قەتیش بیرم ناچێت، زۆر بەیانی كە بۆ كاری لاپەڕەی لێكۆڵینەوەی ئەوكاتی كوردستانی نوێ‌ دەچوومە لای سەرنووسەر، دەمبینی سەرنووسەر سەرقاڵی تەلەفۆنە و بە تێڕامانەوە گوێی دەگرت، كە نزیك دەبوومەوە، گوێم لە دەنگی سەرۆك مام جەلال بوو، هێشتا بەیانی زوو بوو، ئەو كوردستانی نوێی خوێندبویەوە و سەرنج و تێبینییەكانی خۆی بە سەرنووسەر دەدا، تا ئەویش بە ئێمەی بگەیەنێ‌، یان كە دەچووینە كۆبوونەوەیەكی سەرۆك مام جەلال وەك میدیاكارانی یەكێتی، بە سەعاتێك بەشی چەند مانگێك شیكاریی پێدەدای تا كاری لەسەر بكەی و بەرچاو روونی لەكاری میدیادا هەبێت.

كەوابێ‌ میدیایەك بناغە و كۆڵەكەكەی بەمجۆرە رەگی داكوتابێ‌، چۆن دەتوانرێ‌ فەرامۆش و پەراوێز بخرێ، هەر ئەوەندەی پڕۆژەیەك- ئیرادەیەك بۆ سەرپێخستنەوەی میدیای یەكێتی و میدیاكارانی لەئارادا بێت بەسن بۆ ئەوەی میدیای یەكێتی خۆی ئاراستەكاری بەشێكی زۆری خەڵك و رووداوەكانیش بێت.

هەر خودی ئەم میدیایەش ببێتەوە بە قوتابخانەیەك تا ئەوانەی لێیەوە دەردەچن بە پەروەردەیەكی میدیای گەورەوە لێی دەربچن، كە هەموو پارەوپولی دنیای بخەیتە بەردەست، نایگۆڕێتەوە بە بەهاو پرەنسیپە گرنگ و گەورەكانی میدیا كە لەسەری گۆش و پەروەردە كراوە، لە هەر قۆناغ و سەردەمێكی خراپ و ئاڵۆزدا نابێتە بەشێك لە خراپتركردنی دۆخەكاندا، بۆ خۆی ئەگەر بە وردی لە مێژووی میدیای یەكێتی بكۆڵیتەوە ئەمەت بە باشی بۆ روون دەبێتەوە كە میدیای چ پەیام و ئامانجێكی گەورەی هەیە، لەبری چەند كەرتكردنی كۆمەڵگە، كۆمەڵگەت بۆ كۆدەكاتەوە و پەروەردە و بەها باڵاكانی كۆمەڵگە و ئاشتی و ئاسایشی كۆمەڵگەت چۆن بۆ دەپارێزێ‌.

بۆ ئاشتكردنەوەی ئەم كۆمەڵگەیە، ئێمە پێویستمان بە رێكخستنەوە و چاككردنەوەو راستكردنەوەی میدیاكەمان هەیە، بۆ ئەوەی هەموو ئەو كەناڵانەی كە یادو یادگاری مامی كۆچكردوومانە، بە زیندوویی و بە گەشاوەیی بیانهێڵینەوە، پێویستمان بە خۆرێكخستنەوە هەیە، هەموان كێشەكان دەزانین و چارەسەرەكانیشمان لەلایە، تەنها ئیرادەو حەرەكەتێكی دەوێت.

 

 74 جار بینراوە