سەرەکی » ئاراستە » بەهارێك بە رەنگی خوێن!

بەهارێك بە رەنگی خوێن!

گوڵاڵەی مامە عەزە

هەموو ساڵێك كە وەرزی بەهار نزیك دەبێتەوە، خەڵكی بەتاسەو ئاتەوە خۆیان بۆ پێشوازی نێرگزو گوڵاڵە سوورە ئامادە دەكەن، نازانن رەنگی گوڵاڵە سوورەكان خوێنی جەرگی من‌و شەونمی سەر پەڕی نێرگزكانیش فرمێسكی چاوی دایكێكە حەڤدە ساڵە بەداخی ئەو پارچەیەی جگەرییەوە دەناڵێنێ كە رووداوەكانی رۆژگار لێی دابڕیوە.
حەڤدە ساڵ بەر لەئێستاو لەم رۆژەدا شار وەكو بڵێی چاوەڕێی كارەساتێكی ویژدان هەژێن بێ، وەكو بڵێی چاوەڕوانی بیستنی هەواڵێكی جەرگ بڕ بێ، هەورەكان چاویان خوێن تێزاو بوو، باڵندەكان ئاوازی خەمگینیان دەچڕی، شەقامەكان دۆشدامابوون، بزەو خەندەی خەڵكی ئەمشارە روو خۆشە لەسەر لێوی هاونیشتمانییەكانم باریكردبوو.
ئەمە چییە خودایە ئەم هەموو خەمە؟؟ ئەم هەموو بێزارییە؟؟ ئەم هەموو دڵ تەنگییە؟؟ ئەم هەموو دوا دیدارە؟ ئەم هەموو جەرگە سووتاوەی دایكان؟؟ ئەم هەموو رەنگە بزڕكاوەی خوشكان؟؟ ئەم هەموو خۆ خواردنەوانەی باوكان؟؟ ئەم هەموو پشتشكانەی برایان؟؟ ئەم هەموو كۆستەی نیشتمان؟؟
حەڤدە ساڵی رێك بەر لەئێستاو لەمشارەدا، خوزنێكی گەورە لەدڵ‌و دەرونمدا جینگڵی دەدا، حوزنی دڵی دایك، حوزنی، دایكێك بۆ جگەر گۆشەكەی، حوزنی دوا دیدارو دوا ماڵاوایی.
ئەو، مام شێرەكەی كوڕی من، ئەوان مام شێرەكانی كوڕی من، نا نا ئەوان مام شێرەكانی كوڕی نیشتمان، كوڕی پارێزەری خاك‌و خەڵكی كوردستان، كوڕی بەرگری لەشكۆی حكومەت‌و دەستكەوتەكانی خوێنی شەهیدان لەوشوێنەدا گیانیان بەخشی كە دەبوو لێی بن، لە پێناوی ئەو ئامانجەی كە دەبوو خەباتی بۆ بكەن، لەرێی ئەو ئامانجەی كە دەبوو بۆی شەهید بن، شەهید بوون.
حەڤدە ساڵی رێك بەر لەئێستا دڵی شار زامدار كرا، دڵی دایك گڕی تێبەردرا، خوێنی ئامانج و ئامانجەكان شەقامەكانی سوور كرد، وەلێ شكۆی نیشتمان پارێزارو،شكۆی خاك پارێزراو، شكۆی گەل پارێزراو، شكۆی دایك پارێزراو، بەیداخی حوكمەتیش هەر بەرزو بڵند مایەوە، شەمشمە كوێرەكانیش رووناكی چاوی كوێركردن.
ئامانجەكەی دڵی دایە هێشتا شار وشكنەبۆتەوە لەخوێنی ئێوە، هێشتا زەویی باسی دواین هەناسەو وەسێتەكانی تۆی بۆ نەكردووم، هێشتا نیشتمان لەخەم نەڕەخسیوە، هێشتا وڵات سەرفراز نەبووە، هێشتا خەونی ناحەزانن لەگۆڕ نەنراوە، هێشتا زامەكانی دڵی دایە سارێژ نەبوو، هێشتا تا دواین هەناسەكانی ژیانیشم لەیادم ناچیت.
كوڕی خۆم ئارام بوون، ئێوە دڵی شارە زیندووەكانی سلێمانی‌و باشورە بەخوێن نەخشاوەكەی كوردستانن، ئێوە چراكانی چوار چرای دڵی مهابادو كازیوەكانی خۆر هەڵاتن، ئێوە خۆراگریی كۆبانی‌و بەرخودانی رۆژئاوای نیشتمانن، ئێوە قەڵای سووری ئامەدو بەفری سەر چیا سەركەشەكانی باكورن.
ماڵاوا ئامانجەكەی دڵی دایە، ماڵاوا ئامانجەكانی دڵی دایكانی نیشتمان، ئاسودەبن كەخوێنتان بۆتە رەنگی سووری بەیداخی كوردستان ‌و بەسەر هەموو ماڵێكدا، بەسەر هەموو پارچەیەكی دڵی نیشتماندا، بەسەر كۆشك‌و تەلاری پەڕلەمان‌و حكومەتی كوردستاندا دەشەكێتەوە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ته‌نگیسه‌ر.. ئارامگای شۆڕه‌سواران

م. عه‌لی 13 هه‌میشه‌ لادێكان خانه‌خوێی شۆڕش و ماڵه‌ جووتیاره‌كان ...