ئه‌م كونجه‌ش

تلیاك

ئێستا زۆر باسی تلیاك و تلیاكخۆر دەكرێ و زۆر لەوە دەدوێن كە یەك تلیاك خۆر و دوو سێ گیراون كە لە (ئێرانەوە هاتوون)- وا دیارە ئەم ئێرانە بۆ ئێمە بووە بە بەڵا و چی خراپ لەوێ هەیە – ئەمدیوی دەكەن.
ئەوەی من بیرمە – لە سلێمانی هەر یەكێك هەبوو بە تلیاك خۆر بەناوبانگ بوو ئەویش (عەبباس) ناوێك بوو، توونچیی یەكێك لە حەمامەكانی سلێمانی بوو – واتە لە توونی حەمامدا ئاگری هەڵدەگیرسان و خۆشی دەكرد. خەڵك (دوكتۆر عەبباس) یان پێ دەووت: (بۆچی؟). چونكە كە یەكێك دانی كلۆر بو بوو ئازاری دەدا – دەیانووت: بچۆ لای كاك عەبباس، یەك دەنك تلیاكت بداتێ، بیخە سەر شوێن ئازارەكە سڕی دەكا و ئازارت نامێنێ. ئەو دەمە (دیارە كە من منداڵ بووم) لە سلێمانی دوكتۆری دان نەبوو – تەنیا وەك دیبووم یا بیستبووم. دوو دانساز هەبوون. یەكەمیان: شەوكەتی دانساز. كاك شەوكەتی سەعید ئەفەندیی جعێتنی. ئەویتر رەحمەتی شێخ لەتیفی دانساز بوو. كە دیار بوو مەلایەكی چاك بوو. مەلای مزگەوتێك بوو لە گەڕەكی دەرگەزێن، كە هەر مزگەوتی (شێخ لەتیف) یان پێ دەووت.
دەیانووت: رەحمەتی شێخ لەتیف لە سنەوە هاتووە و لەوێ بووە بە مەلا و دانسازیش فێربووە. بیرمە كاك عەبدوڵلای كوڕی پاش خۆی دانسازیی دەكرد.
بێمەوە سەر تلیاك – نازانم ووشەكە لە عەرەبی یەوە هاتووە و بووە بە كوردی، یا نا؟ چونكە (حەشیشە) شیان پێدەوت، كە دیارە ئەو عەرەبی یە. بۆ ووشەی (تلیاك) یش كە من بە زۆر خۆم كردووە بە زمانەوان، ئەوا شیعرێكی (ڕەئیف خووری) ی شاعیری پێشكەوتنخوازی لوبنانم لە بیرە – كە لە نەمر (نەژادی ئەحمەدی عەزیز ئاغا)م بیستووە – كە لە لوبنان خوێندبووی. لە شیعرەكەدا دەڵێت:

عراق. یا بلد التریاق
كم شدنا. شوق الی تریاقك العجب

واتە: ( عیراق – ئەی ووڵاتی تریاق – ئای چەند سۆز بۆ لای تریاقە سەیرەكەتی ڕاكێشاوین).
كەواتە (تلیاك) یش كە عەرەب (تریاق) یان پێ ووتوە دەبێ كوردی نەبێ – ئیتر (تلیاك) و (تریاق) ەكەش هەر یەكێ یا دوو شتن – بە داخەوە من ناتوانم بڕیار بدەم.
بۆ (توون) – واتە توونی حەمامیش لە یەكچوونێ لەگەڵ ووشەی (تونێل) دا دەبینم كە دیارە لە زمانە ئەوروپایی یەكانەوە هاتوونەتە ناو كوردی یەوە.
توونێل بە داڵانێكی سەر داپۆشراو دەڵێن كە دوو دیوی چیایەك بە یەك دەگەێنێت. ئەوەتا ئێستا ئێمە لە دەربەندیخان و لە چیای هەیبەت سوڵتان – دوو تونێلمان هەیە – كە زۆر كۆن نین. بەڵام تۆ بڵێی ئەم ووشەی (توونێل) ی ئەوروپایی یە خزمی ووشەی (توون) ی كوردی نەبێ. بۆ ووشەی (حەمام) یش قسەیەكم هەیە. لە عەرەبیی كۆندا ووشەی (حەمام) م نەبیستووە. ئێستا لە ووشەی ڕۆژانە – واتە (جڵفە) ی بەغدادا – (حەمام) و (إستحموا) بەكاردێ. خۆزگە كەسێك ئەوەشی بۆ ساغ ئەكردینەوە. وا شوكور ئەویشیان كردووە بە (گەرماو) هەرچەندە ئاوی ساردیشی تێدایە. بەڵام خەڵك و نەزانانی ئەم كوردی یەی ئێستا. وەك ئێمە – هەر (حەمام) دەڵێن.

ئیتر هەر خۆش بن.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

شەیتان

دیسان نازانم – (كونجە) یا یاداشت – بەڵام هەر دەینووسم ...