سەرەکی » دۆسێ » خوێندنه‌وه‌یه‌ك بۆ مادده‌ی‌ 12ی پڕۆژه‌یاسای‌ دادگای‌ باڵای‌ فیدراڵی‌

خوێندنه‌وه‌یه‌ك بۆ مادده‌ی‌ 12ی پڕۆژه‌یاسای‌ دادگای‌ باڵای‌ فیدراڵی‌

دادوه‌ر ناسر عومران ئه‌لموسه‌وی‌

له‌و هۆكارانه‌ی‌ باس كراوه‌ بۆ پێویستبوونی‌ پرۆژه‌یاسای‌ دادگای‌ باڵای‌ فیدرالیی به‌ پێی‌ مادده‌كانی‌ (52، 92، 93، 94، 97)ی‌ ده‌ستووری‌ كۆماری‌ عیراقی‌ ساڵی‌ 2005‌و هه‌روه‌ها بۆ ئه‌وه‌ی‌ هاوشانی‌ گۆڕانكارییه‌ پرۆسه‌ی‌ دیموكراسی‌‌و دامه‌زراوه‌ ده‌ستوورییه‌كان بین‌و وه‌ك ده‌رهاویشته‌یه‌كی ئه‌حكامه‌كانی‌ یاسای‌ جێبه‌جێ كردنی‌ داڕشتنی‌ ئه‌م یاسایه‌ش هاته‌ ئاراوه‌، له‌ مادده‌ی‌ 2/یه‌كه‌مدا هاتووه‌، دادگاكه‌ پێكدێت له‌ سه‌رۆك و جێگره‌كه‌ی‌‌و یازده‌ ئه‌ندام به‌م شێوه‌یه‌ی‌ خواره‌وه‌:
أ-سه‌رۆكی‌ دادگا، كه‌ ده‌بێ یه‌كێك بێت له‌ دادوه‌ره‌كان، ب- جێگری‌ سه‌رۆك كه‌ ده‌بێ یه‌كێك بێت له‌ دادوه‌ره‌كان، ج- پێنج ئه‌ندام له‌ دادوه‌ران، د- چوار ئه‌ندام له‌ پسپۆڕانی‌ فیقهی‌ ئیسلامی‌، ه- دوو ئه‌ندام له‌ پسپۆڕانی‌ فیقهی‌ یاسا.
ئه‌م پڕۆژه‌یاسایه‌ بۆ ئه‌وه‌ هاتووه‌ كه‌ یاسای‌ دادگای‌ فیدراڵی‌ ژماره‌ 30ی‌ ساڵی‌ 2005 هه‌ڵبوه‌شێنێته‌وه‌، ئه‌ویش دوای‌ ئه‌وه‌ی‌ له‌لایه‌ن ئه‌نجومه‌نی‌ نوێنه‌رانی‌ عیراقه‌وه‌ په‌سه‌ند كراوه‌‌و به‌ پێی‌ مادده‌ی‌ 22/یه‌كه‌م له‌ پڕۆژه‌كه‌، دامه‌زراندنی‌ دادگای‌ باڵای‌ فیدراڵی‌ به‌ فه‌رمانی‌ ژماره‌ 30ی‌ ساڵی‌ 2005 كه‌ سه‌ربه‌خۆ كار ده‌كات‌و جگه‌ له‌ یاسا هیچ لایه‌نێك ده‌سه‌ڵاتی‌ به‌سه‌ریدا نییه‌، وه‌ك به‌ره‌نجامێكی‌ راسته‌قینه‌ی‌ قۆناغی‌ دامه‌زراندنی‌ نوێ دێت كه‌ تیایدا دادوه‌ران توانیان ئه‌نجومه‌نی‌ دادوه‌ری‌ پێكبهێنن به‌ شێوه‌یه‌ك كه‌ چیتر پاشكۆی‌ ده‌سه‌ڵاتی‌ جێبه‌جێكار نه‌بێت، كه‌ خۆی‌ له‌ وه‌زاره‌تی‌ داددا ده‌بینێته‌وه‌، ئه‌وه‌بوو به‌ پێی‌ فه‌رمانی‌ ژماره‌ 35ی‌ رۆژی‌ 18/9/2003 دامه‌زرا‌و به‌هۆی‌ ئه‌وه‌شه‌وه‌ دادوه‌ریی بووه‌ ده‌سه‌ڵاتێكی‌ سه‌نتراڵی‌‌و توانی‌ رۆڵی‌ گرنگی‌ خۆی‌ له‌ بنیاتنانی‌ ده‌وڵه‌تی‌ عیراقدا ببینێت، ده‌وڵه‌تی‌ یاسا‌و دامه‌زراوه‌ ده‌ستوورییه‌كانی‌، بێگومان ئه‌وه‌ش وا ده‌كات هه‌ندێك ده‌سته‌ی‌ یاسایی‌و ده‌ستووری‌ په‌یدا بن، چونكه‌ دوای‌ قۆناغی‌ ده‌رچوونی‌ یاسای‌ به‌ڕێوه‌بردنی‌ ده‌وڵه‌تی‌ عیراق له‌ قۆناغێكی‌ راگوزه‌ر‌و كاتیدا، ئه‌وه‌بوو ده‌ستووری‌ هه‌میشه‌یی عیراق ده‌رچوو، كۆتایی به‌ ئیداره‌ی‌ كاتیی عیراق هێنا‌و دامه‌زراوه‌كانی‌ ده‌وڵه‌تی‌ ده‌ستووری‌ دروستبوون‌و عیراقیان خسته‌ر سه‌ر رێی‌ قۆناغی‌ دیموكراسی‌ نوێ تا ده‌سه‌ڵات بۆ یاسا بێت له‌ ژێر چه‌تری‌ ده‌ستووردا كه‌ ده‌وڵه‌تی‌ فیدراڵی‌ له‌سه‌ربوونیات نراوه‌، ده‌وڵه‌تێكی‌ خاوه‌ن سه‌روه‌ری‌ ته‌واو‌و سیستمی‌ ده‌سه‌ڵاتیش تیایدا كۆماری‌ نوێنه‌رایه‌تی‌ دیموكراسییه‌، له‌سه‌ر بنه‌مای‌ جیاكردنه‌وه‌ی‌ ده‌سه‌ڵاته‌كانی‌ یاسادانان‌و جێبه‌جێ كردن‌و دادوه‌ری‌، به‌ پێی‌ مادده‌كانی‌ (1‌و 47)ی‌ ده‌ستوور هه‌ریه‌كه‌ له‌و ده‌سه‌ڵاتانه‌ كاری‌ خۆی‌ به‌ پێی‌ پسپۆڕیی خۆی‌ ده‌كات.
له‌به‌ر ئه‌وه‌ی‌ ده‌سه‌ڵاتی‌ دادوه‌ری‌ ده‌سه‌ڵاتی‌ ئه‌وه‌ی‌ هه‌یه‌ ئه‌و یاسایانه‌ جێبه‌جێ بكات كه‌ له‌ ئه‌نجومه‌نی‌ نوێنه‌رانه‌وه‌ ده‌رده‌چن‌و دواتریش ده‌سه‌ڵاتی‌ جێبه‌جێكار كاریان پێده‌كات به‌ پسپۆڕییه‌كه‌ی‌ خۆی‌، له‌به‌ر ئه‌وه‌ ده‌سه‌ڵاتی‌ دادوه‌ری‌ سه‌ربه‌خۆیی پێدراوه‌ كه‌ به‌ جۆری‌ كاره‌كانی‌ له‌ رێگه‌ی‌ چه‌ند دادگایه‌كه‌وه‌ كاره‌كانی‌ رایی ده‌كات، هه‌ریه‌ك له‌و دادگایانه‌ش پله‌ی‌ جیاجیایان هه‌یه‌‌و حوكمه‌كانیان به‌ پێی‌ یاسا ده‌رده‌كه‌ن، كه‌ له‌ مادده‌كانی‌ (87‌و 88)ی‌ ده‌ستووردا باس كراوه‌.
ده‌سه‌ڵاتی‌ دادوه‌ریش به‌ پێی‌ مادده‌ (89)، پێكهاتووه‌ له‌ ئه‌نجومه‌نی‌ باڵای‌ دادوه‌ری‌‌و دادگای‌ باڵای‌ فیدراڵی‌‌و دادگای‌ تێهه‌ڵچوونه‌وه‌‌و ده‌زگای‌ داواكاری‌ گشتی‌‌و ده‌سته‌ی‌ سه‌رپه‌رشتی‌ دادوه‌ریی‌و دادگا فیدراڵییه‌كانی‌ تر، دادگای‌ باڵای‌ فیدراڵی‌ پسپۆڕیی‌و تایبه‌تمه‌ندی‌ ئه‌وه‌ی‌ پێدراوه‌، كه‌ به‌ پێی‌ مادده‌ی‌ (93)، چاودێری‌ ده‌ستووریبوونی‌ یاساكان‌و سیستمه‌ جێبه‌جێ كراوه‌كان بكات‌و لێكدانه‌وه‌ بۆ ده‌قه‌كانی‌ ده‌ستوور‌و جیاكردنه‌وه‌‌و ساغكردنه‌وه‌ی‌ ئه‌و بابه‌تانه‌ی‌ له‌ كاتی‌ جێبه‌جێ كردنی‌ یاسا فیدراڵییه‌كان‌و بڕیاره‌كان‌و كاره‌ سیستمییه‌كان‌و رێنمایی‌و گرتنه‌به‌ری‌ رێوشوێنه‌كاندا دێنه‌پێش‌و ئه‌و بڕیار‌و رێنماییانه‌ی‌ له‌لایه‌ن ده‌سه‌ڵاتی‌ فیدراڵی‌ ده‌ریان ده‌كات، هه‌روه‌ها یه‌كلایی كردنه‌وه‌‌و جیاكردنه‌وه‌ی‌ ئه‌و ناكۆكیانه‌ی‌ له‌ نێوان حكومه‌تی‌ فیدراڵ‌و حكومه‌تی‌ هه‌رێمه‌كان‌و پارێزگاكان‌و شاره‌وانییه‌كان‌و ئیداره‌ خۆجێییه‌كان سه‌ر هه‌ڵده‌دات، له‌گه‌ڵ جیاكردنه‌وه‌‌و ساغ كردنه‌وه‌ی‌ كێشه‌كانی‌ نێوان هه‌رێمه‌كان‌و پارێزگا رێكنه‌خراوه‌كانی‌ هه‌رێمێك‌و جیاكردنه‌وه‌ی‌ ناكۆكی‌ له‌سه‌ر پسپۆڕیی له‌ نێوان ده‌سته‌ دادوه‌رییه‌كانی‌ هه‌رێم یان ئه‌و پارێزگایانه‌ی‌ له‌ هه‌رێمێكدا رێك نه‌خراون، له‌گه‌ڵ یه‌كلایی كردنه‌وه‌ی‌ ئه‌و تۆمه‌تانه‌ی‌ ده‌خرێنه‌ پاڵ سه‌رۆك كۆمار‌و سه‌رۆكی‌ ئه‌نجومه‌نی‌ وه‌زیران‌و په‌سه‌ند كردنی‌ ئه‌نجامی‌ كۆتایی هه‌ڵبژاردنی‌ ئه‌ندامێتی‌ ئه‌نجومه‌نی‌ نوێنه‌ران، وه‌ك ئه‌وه‌ی‌ مادده‌ی‌ (94)ی‌ ده‌ستوور باسی‌ ده‌كات، بڕیاره‌كانی‌ دادگای‌ باڵای‌ فیدراڵی‌ له‌سه‌رو هه‌موو ده‌سه‌ڵاته‌كانه‌وه‌یه‌.
هه‌رچه‌نده‌ پڕۆژه‌یاسای‌ دادگای‌ فیدراڵی‌ رێگه‌ی‌ داوه‌ كار به‌ په‌ێڕه‌وی‌ ناوخۆی‌ ژماره‌ (1)ی‌ دادگاكه‌ بكرێت كه‌ ساڵی‌ 2005 دانراوه‌‌و له‌ مادده‌ی‌ (17)ی‌ پڕۆژه‌یاساكه‌شدا جه‌خت كراوه‌ته‌وه‌ له‌سه‌ر جێبه‌جێ كردنی‌ حوكمه‌كانی‌ یاسای‌ مورافه‌عه‌ی‌ مه‌ده‌نی‌ ژماره‌ (83)ی‌ ساڵی‌ 1969‌و یاسای‌ بنه‌ماكانی‌ دادگای‌ سزادانی‌ ژماره‌ (23)ی‌ ساڵی‌ 1971‌و یاسای‌ سه‌لماندنی‌ ژماره‌ (107)ی‌ ساڵی‌ 1979 یان هه‌ر یاسایه‌ك كه‌ جێگه‌ی‌ بگرێته‌وه‌‌و له‌م یاسایه‌دا یان له‌ په‌یڕه‌وی‌ ناوخۆی‌ دادگاكه‌دا نه‌هاتبێ.
ئه‌وه‌ی‌ له‌ پڕۆژه‌یاساكه‌دا‌و له‌ مادده‌ی‌ (12)دا هاتووه‌، میكانیزمی‌ نوێی‌ تێدایه‌ بۆ كاتی‌ حوكمدان‌و بڕیاردان كه‌ له‌و ده‌قه‌ یاساییانه‌دا نه‌هاتووه‌ كه‌ باس كران‌و له‌ په‌یڕه‌وی‌ ناوخۆی‌ دادگای‌ فیدراڵیشدا نه‌هاتووه‌، له‌ بڕگه‌ی‌ یه‌كه‌می‌ ئه‌و مادده‌یه‌دا هاتووه‌: (حوكم‌و بڕیاره‌كان یان به‌ رێكه‌وتن، یان به‌ ده‌نگی‌ زۆرینه‌ ده‌درێن، مه‌گه‌ر ناكۆكییه‌كه‌ له‌ نێوان حكومه‌تی‌ فیدراڵی‌‌و حكومه‌تی‌ هه‌رێم یان هه‌ر پارێزگایه‌كدا بێت كه‌ له‌ چوارچێوه‌ی‌ هه‌رێمدا رێك نه‌خراوه‌، ئه‌و كاته‌ بڕیاره‌كه‌ به‌ زۆرینه‌ی‌ دوو له‌سه‌ر سێ ده‌رده‌كرێت).
ئه‌مه‌ش مانای‌ ئه‌وه‌یه‌ كه‌ هه‌ندێك بڕیار‌و حوكم هه‌ن كه‌ رێژه‌ی‌ رێكه‌وتن له‌سه‌ر ده‌رچوونیان جیاوازه‌‌و هاوشێوه‌ی‌ ئه‌و زۆرینه‌‌و رێكه‌وتنه‌ی‌ كه‌ له‌ مادده‌ی‌ (158)ی‌ یاسای‌ مورافه‌عاتی‌ مه‌ده‌نیدا هاتووه‌‌و ده‌ڵێ: (حوكمه‌كان به‌ رێكه‌وتن یان به‌ زۆرینه‌ی‌ ده‌نگ ده‌رده‌چن، ئه‌گه‌ر راو بۆچوونه‌كانیش ئاڵۆز بوون‌و لق‌و پۆپیان زۆر لێبۆوه‌، پێویسته‌ ئه‌و ئه‌ندامه‌ی‌ پله‌ی‌ نزمتره‌ له‌وانی‌ دی‌ بچێته‌ پاڵ یه‌كێك له‌ خاوه‌ن بۆچوونه‌كان زۆرینه‌ دروست ببێت)، هه‌ڵبه‌ت مه‌به‌ست له‌ زۆرینه‌یه‌كی‌ ساده‌یه‌.
وه‌ك ئاشكرایه‌ پێكهێنانی‌ ده‌سته‌ی‌ دادوه‌ری‌ هه‌میشه‌ ده‌بێ ژماره‌ی‌ تاك بێت، هه‌روه‌ها له‌ مادده‌ی‌ (224)ی‌ یاسای‌ بنه‌ماكانی‌ دادگای‌ سزادانی‌ عیراقی‌ له‌ بڕگه‌ی‌ (ب)دا جه‌خت له‌سه‌ر ئه‌وه‌ ده‌كاته‌وه‌ كه‌ (حوكم‌و بڕیاره‌كان به‌ رێكه‌وتنی‌ راو بۆچوونه‌كان یان به‌ زۆرینه‌ی‌ ده‌نگ ده‌رده‌چن، هه‌ر ئه‌ندامێكی ده‌سته‌كه‌ش ناكۆك بێت، ده‌بێ به‌ نووسین بۆچوونی‌ خۆی‌ باس بكات)، په‌یڕه‌وی‌ ناوخۆی‌ دادگاش له‌ مادده‌ی‌ (16)یدا ده‌ڵێ: (ده‌بێ حوكم‌و بڕیاره‌كان هۆكاریان له‌گه‌ڵدا باس كرابێت، ئه‌گه‌ر كۆده‌نگی‌ له‌سه‌ر نه‌بوو، ده‌بێ ئه‌وه‌ی‌ رای‌ جیاوازی‌ هه‌یه‌ بۆچوونه‌كه‌ی‌ خۆی‌ له‌گه‌ڵ هۆكاره‌كه‌شی‌ بنووسێت، به‌ڵام وشه‌ی‌ (مه‌گه‌ر)ی‌ تایبه‌ت به‌ هه‌ڵاوێرد كردن هاتووه‌، كه‌ بۆ جیاكردنه‌وه‌‌و یه‌كلایی كردنه‌وه‌ی‌ ناكۆكییه‌كانی‌ نێوان حكومه‌تی‌ فیدراڵی‌‌و حكومه‌تی‌ هه‌رێم، یان ئه‌و پارێزگایانه‌ی‌ له‌ چوارچێوه‌ی‌ هه‌رێمدا رێك نه‌خراون‌و ئه‌گه‌ر وابوو ده‌بێ به‌ زۆرینه‌ی‌ دوو له‌سه‌ر سێی‌ ده‌نگه‌كان بێت). ئه‌وه‌ش بۆ جیاوازی‌ كردن‌و ساغ كردنه‌وه‌یه‌ به‌ پێی‌ جۆری‌ ناكۆكییه‌كه‌‌و میكانیزمی‌ حوكمدان، ئه‌م جۆره‌ له‌ بڕیاردان تازه‌یه‌‌و پێشتر دادگای‌ عیراقی‌ پێی‌ رانه‌هاتووه‌، له‌گه‌ڵ جیاكاری‌ له‌ نێوان ئه‌ندامانی‌ دادگا‌و سیفاته‌كانیان له‌ كاتی‌ ده‌نگدان به‌ پێی‌ جۆری‌ بابه‌ت‌و حوكمه‌كه‌، كه‌ له‌ بڕگه‌ی‌ دووه‌می‌ ئه‌و مادده‌یه‌ی‌ پڕۆژه‌یاساكه‌دا هاتووه‌: له‌و حوكم‌و بڕیارانه‌ی‌ تایبه‌تن به‌ ده‌ستووریبوونی‌ یاساكان‌و سیستمی‌ جێبه‌جێ كردنه‌وه‌، به‌ تایبه‌ت له‌و رووه‌وه‌ كه‌ دژی‌ بنه‌ما جێگیر‌و نه‌گۆڕه‌كانی‌ ئیسلام نه‌بێت، وه‌ك له‌ مادده‌ی‌ دووی‌ ده‌ستووردا هاتووه‌، مه‌رجه‌ سێ له‌سه‌ر چواری‌ دادگا له‌ پسپۆڕانی‌ فیقهی‌ ئیسلامی‌ لێی‌ رازی‌ بن، بڕگه‌ی‌ سێیه‌میش ده‌ڵێ: ئه‌و حوكم‌و بڕیارانه‌ی‌ تایبه‌تن به‌ ده‌ستووریبوونی‌ یاساكان‌و سیستمی‌ جێبه‌جێ كردن، له‌و رووه‌وه‌ كه‌ دژی‌ بنه‌ماكانی‌ دیموكراسی‌‌ ‌و ئازادییه‌كانی‌ ناو ده‌ستوور نه‌بێت، وه‌ك ئه‌وه‌ی‌ له‌ مادده‌ی‌ دووه‌می‌ ده‌ستووردا هاتووه‌، مه‌رجه‌ سێ له‌سه‌ر چواری‌ ئه‌ندامانی‌ دادگا له‌ دادوه‌ر‌و پسپۆڕانی‌ یاسایی لێی‌ رازی‌ بن.
ئه‌وه‌ی‌ سه‌یره‌ لێره‌دا پڕۆژه‌یاساكه‌ له‌و شوێنه‌دا كه‌ مه‌رجی‌ داناوه‌ بۆ حوكمدان‌و بڕیاردان له‌سه‌ر ده‌ستووریبوونی‌ یاساكان‌و سیستمی‌ جێبه‌جێ كردن له‌و رووه‌وه‌ كه‌ نابێ دژی‌ بنه‌ما جێگیر‌و نه‌گۆڕه‌كانی‌ ئیسلام بێت، له‌گه‌ڵ ئه‌و حوكم بڕیارانه‌ی‌ كه‌ تایبه‌تن به‌ ده‌ستووریبوونی‌ یاساكان‌و سیستمه‌كانی‌ جێبه‌جێ كردن له‌و رووه‌وه‌ كه‌ نابێ دژی‌ بنه‌ماكانی‌ دیموكراسی‌ بێت، جیاوازییه‌كی‌ جێگیر كردووه‌ له‌ نێوان پسپۆڕانی‌ فیقهی‌ ئیسلامی‌‌و پسپۆڕانی‌ فیقهی‌ یاسا له‌ كاتی‌ ده‌نگداندا، جیاوازییه‌كه‌ به‌وه‌ زه‌ق ده‌بێته‌وه‌ كه‌ له‌مادده‌ی‌ سێیه‌مدا كاتێك ده‌ڵێ: (ئه‌و حوكم‌و بڕیارانه‌ی‌ تایبه‌تن به‌ ده‌ستووریبوونی‌ یاساكان‌و سیستمی‌ جێبه‌جێ كردن، له‌و رووه‌وه‌ كه‌ دژی‌ بنه‌ماكانی‌ دیموكراسی‌‌و مافی‌‌و ئازادییه‌كانی‌ ناو ده‌ستوور نه‌بێت، وه‌ك ئه‌وه‌ی‌ له‌ مادده‌ی‌ دووه‌می‌ ده‌ستووردا هاتووه‌، مه‌رجه‌ سێ له‌سه‌ر چواری‌ ئه‌ندامانی‌ دادگا له‌ دادوه‌ر‌و پسپۆڕانی‌ یاسایی لێی‌ رازی‌ بن) وشه‌ی‌ دادوه‌ری‌ بۆ پێش پسپۆڕانه‌كه‌ زیاد كردووه‌، ئه‌وه‌ش له‌ بڕگه‌ی‌ دووه‌مدا نییه‌ كه‌ تایبه‌ته‌ به‌ بڕیاردان له‌سه‌ر ده‌ستووریبوونی‌ ئه‌و یاسایانه‌ی‌ دژی‌ بنه‌ما جێگیره‌كانی‌ ئیسلام نین، به‌مه‌ش ئاسانكاریی ره‌خساندووه‌ بۆ پسپۆڕانی‌ فیقهی‌ ئیسلامی‌ كه‌ حوكم‌و بڕیاره‌كانی‌ تایبه‌ت به‌ ده‌ستووریبوونی‌ ئه‌و یاسایانه‌ی‌ دژی‌ بنه‌ما جێگیره‌كانی‌ ئیسلام نین، یه‌كلایی بكه‌نه‌وه‌، جیاوازی‌ له‌ ژماره‌ی‌ ئه‌ندامه‌كان جیاوازی‌ له‌ رێژه‌ی‌ ده‌نگدانه‌كه‌دا دروست ده‌كات.
ئه‌م جیاكارییه‌ له‌ نێوان ئه‌ندامانی‌ دادگا‌و دانانی‌ مه‌رجی‌ یاسایی بۆ سیفاتی‌ ئه‌ندامه‌كانی‌ دادگا له‌ كاتی‌ ده‌ركردنی‌ حوكم‌و بڕیاره‌كاندا، بێ پشتبه‌ستن به‌ میكانیزمی‌ را‌و بۆچوونی‌ جیاواز، له‌گه‌ڵ ده‌ركردنی‌ حوكمه‌كان به‌ رێژه‌ی‌ جیاواز‌و هه‌ڵاوێرد كردنی‌ هه‌ندێك ناكۆكی‌ دوو بابه‌تی‌ تازه‌ن كه‌ پڕۆژه‌یاسای‌ دادگای‌ باڵای‌ فیدراڵی‌ هێناونی‌، ره‌نگه‌ ئه‌وه‌ی‌ جیاوازیش بێت كه‌ مادده‌ی‌ (12) هێنابێتی‌ به‌ هه‌رسێ بڕگه‌كه‌ی‌ پڕۆژه‌یاسای‌ دادگای‌ فیدراڵی، هۆكاره‌كه‌ی‌ سروشتی‌ كاری‌ دادگای‌ باڵای‌ فیدراڵی‌ بێت كه‌ شێوازی‌ چاودێری‌ كردن‌و ده‌سه‌ڵاته‌ ده‌ستوورییه‌كه‌یه‌تی‌‌و له‌ سروشتی‌ كاری‌ دادگا ئاساییه‌كانی‌ تری‌ جیا ده‌كاته‌وه‌.

سایتی‌ دادگای‌ فیدراڵی‌

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

هەناردەی نەوتی ئێران كەمی كردووە

سەرچاوەیەكی كەرتی نەوت رایگەیاندووە، بەهۆی سزا سەپێنراوەكانی ئەمریكاوە رێژەی هەناردەی ...