سەرەکی » مانشێت » لە ساڵیادی كۆچی دوایی سەركردە عادل مراد-دا

لە ساڵیادی كۆچی دوایی سەركردە عادل مراد-دا

قادر عەزیز

لە (18)ی ئەم مانگەدا ساڵێك بەسەر كۆچی دوایی كاك عادل موراد یەكێك لەدامەزرێنەرانی یەكێتیی نیشتمانیی كوردستان‌و سكرتێری ئەنجومەنی ناوەندی یەكێتی تێدەپەڕێت، بە لەدەستدانی كاك عادل، خانەوادەكەی‌و یەكێتییەكان‌و گەل‌و نەتەوەكەمان بەگشتی سەركردەیەكی بوێرو ئازاو پاكیان لەدەستدا، كە بۆ ئەمڕۆی خەباتی گەلەكەمان هەرگیز قەرەبوو ناكرێتەوە.
كاك عادل لە بنەماڵەیەكی دیاری كوردانی فەیلی شاری بەغداد بوو، هەر لەسەرەتای لاویەتیدا لە یەكێتی قوتابیانی كوردستان‌و شۆڕشی ئەیلولدا، دەستی بەخەباتكرد، لەدوای بەیانی (11) ئازاری ساڵی (1970)یش كە ئەوكاتە كاك عادل سكرتێری یەكێتی قوتابیانی كوردستان بوو لەململانێی گەرمی ئەوكاتە لەگەڵ بەعسییەكان‌و یەكێتی قوتابیانی گشتی سەر بەبەعسییەكان، كاك عادل ئازایانە وەك سەركردەیەك لەم قۆناغە دەركەوت.
لەدوای هەرەسی شۆڕشی ئەیلولیش (1975) كاك عادل سەنگەری خەباتی چۆڵنەكردو بەدوای سەرلەنوێ دروستكردنەوەی شۆڕش‌و مقاوەمەتدا دەگەڕا، بۆ ئەمەش هەر زوو چووە سوریاو دواتر بەپیر بانگەوازی ئەوكاتەی سەرۆك مام جەلال چوو كە لەگەڵ ژمارەیەك لە هەڤاڵەكانی، یەكێتی نیشتمانیی كوردستانیان دامەزراندو دوای ساڵێكیش لەدامەزراندنی یەكێتی نیشتمانی كوردستان‌و بەهەماهەنگی لەگەڵ هەڤاڵانی ناوخۆی كوردستان، شۆڕشی نوێی گەلەكەمانیان راگەیاند، كاك عادل بەدرێژایی هەموو ئەو ماوە، كە زیاتر لە نیو سەدە خەبات دەكات ئازایانەو بەبێ دابڕان درێژەی بەو خەباتەداو لەهەموو بوارەكانی ئەو تێكۆشانە رۆڵێكی دیارو بەرچاوی هەبوو، بەتایبەتیش لەبواری پەیوەندییەكان‌و كاری راگەیاندن‌و ئەرشیفكردن و دیبلۆماسیدا خاوەنی ئەزموونێكی زۆر بوو.
خوالێخۆشبوو كاك عادل مراد، لەكەسە نزیك‌و باوەڕپێكراوەكانی سەرۆك مام جەلال بوو، لەو ساڵانەی دوایشدا كە چ لەنێوخۆی یەكێتی‌و چ لەسەر ئاستی كوردستان‌و حوكمڕانیدا، گەندەڵی هەڕەشەیەكی گەورەی لەسەر ئایندەی گەل‌و نەتەوەكەمان دروستكردبوو، كاك عادل وەك سەركردە‌و كەسایەتییەكی دیارو خاوەن هەڵوێست‌و خاوەن ئەزموون دژ بەو دیاردەیە وەستایەوە، كە لەم هەڵوێستەداو لەهەڵوێستە نەتەوەییەكانیدا بەگشتی كێشەو گرفتی زۆری بۆ دروستكرا. لەكۆتایشدا دەبێ ئەوە بڵێم كە كاك عادل چۆن لە هەڵوێستەكانیدا هەمیشە ئازاو خۆڕاگر‌و بوێر بوو ساڵانێكیش، لەبەرامبەر نەخۆشیەكەی بەهەمان شێوە بوو.
لەساڵیادی كۆچی دوایی كاك عادل دا سڵاو لە گیانی پاكی ئەو سەركردە دڵسۆزەی گەلەكەمان‌و سەرجەم شەهیدانی گەل و نەتەوەكەمان.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

لە چاوەڕوانی كاره كانی کابینەی نوێدا

کۆژین سدیق ھەرێمی کوردستان لە ساڵی ٢٠١٤ەوە توشی قۆناغ و ...