سەرەکی » وتار » د.ئه‌رسه‌لان بايز‌ » گەردنیان ئازاد بێت

کـــۆڵـــەپـشـــــت

گەردنیان ئازاد بێت

(9)

لەو چەند رۆژانەی رابردوودا وەك یەكێ لە ئەندام‌و پێشمەرگە دانەبڕاوو ماندووەكانی (ی.ن.ك) زنجیرە وتارێكی گلەیی ئامێزم لەڕۆژنامەی خۆشەویستی كوردستانی نوێ بڵاوكردەوە. وتارەكانم هەر چۆنێ بووبن، چاك خراپ، بەپێز بێپێز، هەموویان زادەی هەڵقوڵاوی قەناعەت‌و بیرو بۆچوونی تایبەتی‌و شەخسی خۆمن. خوێنەریش بۆ خۆی ئازادە پەسەندیان بكات، یان سەرلەبەریان رەتبكاتەوە.
بەپێی ئەو كۆمێنتانەی كە برادەرەكانم بۆیان گێڕاومەتەوە (چونكە خۆم هیچ پەیج‌و سایتێكی تایبەتی فەرمی ئیدارە نادەم) جنێوەكان (نەك رەخنەو بۆچوونی جیاواز) لەپشتیوانی‌و دەستخۆشییەكان كەمتر نەبوون. پێشەكی بە دڵ‌و گیان گەردنی هەموو قەڵەمە جنێوفرۆشەكان ئازاددەكەم. چ ئەوانەی بە وتار، یان شیعر، یان بە چەند وشەیەك جنێودان رای خۆیان دەربڕیوە، بەڵام بەمەرجێك تەواوی ناو هەگبەی جنێوەكانیان بەسەر وتارو كەسایەتی مندا هەڵڕشتبـێ‌و بەشی كەسێكی تری تێدا نەمابێتەوە. دەشتوانن ئەوەندەی لە هەگبەكانیاندا ماوە سەرلەنوێ دەستپێبكەنەوە، با بزانم بەو جنێوە سووكانە دەگەنە كوێ؟. ئومێد دەكەم بەو دەربڕینانە رق‌وكینەی پەنگخواردووی چەندین ساڵەی ناخیان كۆتایی بێت‌و دەروونیان پاك ببێتەوە، یان بەڵكو بەو جنێوانە گرێی دەروونیان بكرێتەوە.
لێرەدا، دەمەوێ راستییەك بڵێم، لە ماوەی ئەو دەیان ساڵەی ژیانمدا هەرگیز بڕوام بە پۆپۆلیستی (شعبوی) نەبووە. چونكە ئەو جۆرە سیاسەت‌و بیروڕایانە وەكو بڵقی سەر ئاو وان، بەپەلە دێن‌و بە پەلەش دەكوژێنەوە. بۆیە ئەو كارە نەشیاوانە هیچ كارم تێناكەن‌و نابنە كۆسپ لەبەردەم رێڕەوی ژیانی ئاساییم.
بەپێی گێڕانەوەی برادەرەكانم، یەكێ لە كۆمێنتەكان دەڵێ: (من نازانم ئەو ئەرسەلان بایزە لە كەیەوە پەیدا بووە، لە كەیەوە بووە بە نووسەر ئاوا زنجیرە وتار لەسەر وتار بڵاودەكاتەوەو وەتەنیەتمان پێ دەفرۆشێ). دواتر دەڵێ (دیارە نووسەری ئەو زنجیرە وتارە تووشی زەردوویی بووە. كاریگەریی زەردووییەكەی كردوویەتی بە نووسەر). بەخوا برالە لەوە دەچێ تۆ (كەشف‌و كەرامەتت) هەبێت‌و شتە نهێنییەكان بخوێنیتەوە. چونكە لە شۆڕشی ئەیلول (1974) كاتێ لە دەزگای راگەیاندنی شۆڕش لە چۆمان پێشمەرگە بووم، تووشی نەخۆشی زەردوویی بووم، بەڵام بەخواو بەپێغەمبەر دوای پانزە رۆژ خەوتن لە نەخۆشخانەی (شێرو خورشید) لە (ورمێ)، دكتۆرەكان بەڵگەنامەی چاكبوونەوەیان دامێ… بەپێی قسەی تۆش بێت ئێستاش هەر زەردووییەكەم ماوە.
نا…نا دیارە ئەو برادەرە مەبەستی زەردوویی سیاسییە… براكانم، پیاوێكی گەورەی دنیا دەڵێ (تا لە شتەكان نەكۆڵیتەوەو نەچیتە بنج‌و بناوانیان، هەق نییە هەروا لە خۆتەوە رای لەسەر دەرببڕی). بەندەش پێش دامەزراندنی (ی.ن.ك) رێبوارێكی دڵسۆزو دانەبڕاوی رێبازە سیاسییەكەی (مام) بووم. پێموابێ نووسینەكانیشم هەر لەو چوارچێوەیەدا بناوانیان هەڵگرتووە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

هـەولێر

(33) *هەولێر، دوای بەیاننامەی (11)ی ئازاری ساڵی (1970)، بوو بە ...