سەرەکی » راپۆرت » ئەمریكا هێزی زیاتر ڕەوانەی خۆرهەڵاتی..

ئەمریكا هێزی زیاتر ڕەوانەی خۆرهەڵاتی..

ئەمریكا هێزی زیاتر ڕەوانەی خۆرهەڵاتی ناوەڕاست دەکات

رەوتەكان-

لەنێوەندی زیادبوونی تەنگژەكان لەگەڵ ئێران، وەزەتی بەرگری ئەمریكا (پنتاگۆن) رایدەگەیەنێت، ویلایەتە یەكگرتووەكان 1000 سەربازی تر رەوانەی خۆرهەڵاتی ناوەڕاست دەكات.
پاتریك شاناهان، وەزیری بەرگری ئەمریكا بە وەكالەت لە 18ی حوزەیرانی 2019 رایگەیاندبوو، رەوانەكردنی هێزی زیاتر، بۆ «مەبەستی بەرگری و مامەڵەكردنە لەگەڵ هەڕەشەكانی ئێران».
هێزەكانی دەریایی ئەمریكا، وێنەی زیاتری بڵاوكردەوە كە لەبارەیانەوە دەڵێت، پاڵپشتی لە تۆمەتباركردنی ئێران دەكەن سەبارەت بە تێوەگلانی وڵاتەكە لە پەلامارەكانی ئەم دواییەی كەنداوی عوممان.
ئێران لە رایگەیاندبوو، لە 27ی حوزەیرانی 2019، قەبارەی عەمباركردنی رێگەپێدراوی لە یۆرانیۆمی پیتێنراو بەپێی رێكەوتنی ئەتۆمی لەگەڵ هێزە نێودەوڵەتییەكان كە لە ساڵی 2015دا ئیمزاكرا، تێدەپەڕێنێت.
رەوانەكردنی هێزی زیاتر
لە بەیاننامەیەكدا، پنتاگۆن رایگەیاندبوو»ویلایەتە یەكگرتووەكان هەوڵی دروستكردنی ناكۆكی لەگەڵ ئێراندا نادات، ئەو رێوشوێنەی دەیگرێتەبەر، بۆ زامنكردنی سەلامەتی سەربازەكانی سوپای ئەمریكا و كارمەندانی وڵاتەكەیە لە ناوچەكە و بۆ پاراستنی بەرژەوەندییە نەتەوەییەكانی ویلایەتە یەكگرتووەكانە».
بەپێی بەیاننامەكە»پەلامارەكانی ئەم دواییەی ئێران، ڕاستی ئەو زانیارییانە دەردەخەن كە بەدەستمان گەیشتوون سەبارەت بە هەڵسوكەوتی دوژمنكارانەی هێزە ئێرانییەكان و گروپە لایەنگرەكانی كە هەڕەشە لەسەر ئەمریكاییەكان و بەرژەوەندییەكانی ئەمریكا لە تێكڕای ناوچەكە دروست دەكەن».
هەروەها دەڵێت»سوپا بەردەوام دەبێت لەسەر چاودێریكردنی ڕەوشەكە و دەستكاریكردنی ژمارەی هێزەكانی بەپێی پێویست.
رەوانەكردنی ئەو هێزەی كە 17ی حوزەیرانی 2019 ئاماژەی پێكرا، 1500 سەرباز لەخۆدەگرێت و پێشتر لەلایەن دۆناڵد ترەمپ سەرۆكی ئەمریكاوە رەوانەكردنیان لە مانگی رابردوودا راگەیەندرابوو.
هەر لەو چوارچێوەیەدا راپۆرتە رۆژنامەوانییەكان، ڕەوانەكردنی ژمارەیەكی زیاتری فڕۆكەی (ئێف15-ئەی) ئاشكرا كرد لەلایەن ئەمریكاوە بۆ كەنداو.
راپۆرتێكی كەناڵی (الحرە)ی ئەمریكایی لە 18ی حوزەیرانی 2019، لە زاری بەرپرسێكی پنتاگۆنەوە بڵاویكردبۆوە، “پۆلێكی تری فڕۆكەكانی (ئێف15-ئەی)ی ئەمریكایی لە بنكەی (سایمۆر)ی ئاسمانی لە ویلایەتی نۆرس كارۆڵایناوە، بەرەو كەنداو بەڕێخراون”.
بە گوتەی بەرپرسێكی پنتاگۆنیش، ” فڕۆكەكانی (ئێف15-ئەی) كە بە (سترایك ئیگڵ) ناودەبرێن، لە بنكەی زەفرەی ئاسمانی لە ئیمارات جێگیر دەكرێن.
ئەو بەرپرسە، هۆشداریی دابووە ئێران لە خراپ هەڵسەنگاندنی توانای هێزەكانی ئەمریكا.
(بی.بی.سی) لە زاری بەرپرسێكی وەزارەتی بەرگری ئەمریكا (پنتاگۆن)ەوە بڵاویكردبۆوە، “ئەمریكا زیاتر لە هەزار سەربازی تری ڕەوانەی كەنداو كردووە، ئەمەش لەكاتێكدایە تەنگژەكان لەنێوان ئەمریكا و ئێراندا ڕوو لە زیادبوون دەكەن.
لەبەرانبەر رەوانەكردنی هێزی زیاتر لەلایەن ئەمریكاوە بۆ كەنداو، جێگری وەزیری دەرەوەی ڕوسیا ڕایگەیاندبوو، زیادكردنی هێزەكانی ئەمریكا لە خۆرهەڵاتی ناوەڕاست مەترسیی پێكدادانی سەربازی لە ناوچەكە زۆرتر دەكات.
ئاژانسی ئینتەرفاكس، لە زاری سێرگی ریابكۆفەوە بڵاویكردبۆوە، زیادكردنی هێزەكانی ئەمریكا لە خۆرهەڵااتی ناوەڕاست وروژاندنە و مۆسكۆ نیگەرانە لە هەوڵ و پلانەكانی واشنتۆن بۆ زیادكردنی هێز و پێكهاتە سەربازییەكانی لە خۆرهەڵاتی ناوەڕاست.
ریابكۆف دەڵێت “واشنتۆن پێویستە پلانی زیادكردنی هێزەكانی و بوونی سەربازی لە خۆرهەڵاتی ناوەڕاست ڕەتبكاتەوە و دەبێت ویلاتە یەكگرتووەكان خۆی لە شەڕ لەگەڵ ئێراندا لابدات».
ئەمەش لەكاتێكدایە كە راپۆتە رژنامەوانییەكان دەڵێن، ئەمریكا هێزی زۆرتر رەوانەی خۆرهەڵاتی ناوەڕاست دەكات كە هاوكاتە لەگەڵ پەرەسەندنەكانی تەنگژەكان نێوان تاران و واشنتۆن.
مایك پۆمپیۆ، وەزیری دەرەوەی ئەمریكا لە 16ی حوزەیرانی 2019 رایگەیاندبوو، ویلایەتە یەكگرتووەكان نایەوێت بكەوێتە جەنگەوە لەگەڵ ئێران، بەڵام لەگەڵ ئەوەشدا گكۆمەڵێكی تەواو رێگەچارە تاوتوێ‌ دەكات».
ئەمەش لەكاتێكدایە كە پۆمپیۆ لە 18ی حوزەیرانی 2019 چاوی بە فەرماندەكانی هێزی ناوەندی ئەمریكا كەوت كە بەرپرسن لە ناوچەی خۆرهەڵاتی ناوەڕاست.

ئەمریكا وێنە و بەڵگەنامەكان دەخاتەڕوو
ماوەیەكی كەم پێش رەوانەكردنی هێزی زیاتر لەلایەن ئەمریكاوە بۆ خۆرهەڵاتی ناوەڕاست، سوپای ئەمریكا وێنەی نوێی بڵاوكردەوە كە بەڵگەكانی زیاتر دەكات سەبارەت بە تێوەگلانی ئێران لە پەلامارەكانی ئەم دواییە.
لە یەكێك لە وێنەكاندا، بەهۆی تەقینەوەكە، كەلێنێك لە لاشەی بارهەڵگرە نەوتییە ژاپۆنییەكە (كوكوكا كاریدجس) دەردەكەوێت.
لە ‌وێنەكاندا هێزێكی سوپای پاسدارانی ئێران دەردەكەوێت كە بومبێكی لكێنراوی نەتەقیو لە لاشەی كەشتییە نەوتهەڵگرە ژاپۆنییەكە لێدەكەنەوە كە لە كەنداوی عوممان رووبەڕووی هێرش بۆوە.
كەشتی نەوتهەڵگری نەرویجی «فرۆنت ئەلیتێر» بەهەمان شێوە رووبەڕووی ئەو تەقینەوانە بووە.
ویلایەتە یەكگرتووەكان دەڵێت، ئێران لە پەلامارەكانی ئەم دواییە و چوار پەلاماری تر لە دەرەوەی نۆكەندی هرمز لە مانگی ئایاری رابردوو تێوەگلاوە.
لەبەرانبەردا ئێران تێوەگلانی لەو پەلامارانەدا رەتدەكاتەوە و تۆمەتەكانی ئەمریكاش لەو بارەیەوە بە «بێ‌ بنەما» وەسف دەكات.

تەنگژەی نوێ‌
لە ساڵی 2015 ئێران رێكەوتنێكی مێژوویی لەگەڵ زلهێزەكانی جیهاندا ئیمزا كرد بۆ لەناوبردنی یۆرانیۆنە پیتێنراوەكانی، و لەبەریەكهەڵوەشاندنەوەی هەندێك لە ژێرخانەكانی كە زەمینەسازی بۆ پیتاندن دەكەن، ئەمەش لەبەرانبەر هەڵگرتنی سزا سەپێنراوەكانی سەر وڵاتەكە، بەڵام دۆناڵد ترەمپ لە رێكەوتنەكە پاشەكشەی كرد و سزاكانی بەسەر ئێراندا سەپاندەوە، ئەمەش زیانێكی زۆری بە ئابوری ئێران گەیاند كە پشت بە نەوت دەبەستێت، و ئەمەش وایلێكرد ئاستی بەرهەمهێنانی یۆرانیۆمی پیتێنراز یاتربكات.
وتەبێژی دەزگای ئەتۆمی لە ئێران رایگەیاندبوو، بەنیازن سنوری رێگەپێدراوی عەمباری یۆرانیۆمی پیتێنراو تێبپەڕێنن، بەڵام تاران دەڵێت»تائێستاش كات رەخساوەگ تا وڵاتە ئەوروپاییەكان، ئێران لە سزا سەپێنراوەكانی ئەمریكا كە سەپێنرانەتەوە، بپارێزن.
ویلایەتە یەكگرتووەكان، ئێرانی بە «گێچەڵكردنی ئەتۆمی» تۆمەتباردەكات.
بەریتانیا و فەرەنسا و ئەڵمانیا، هۆشداریی دەدەنە ئێران لە پێشێلكردنی رێكەوتنی ئەتۆمی كە لە ساڵی 2015دا ئیمزاكرا.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ساڵی رابردوو 20 ملیۆن منداڵ لە کوتان بێبەشبوون

ھەردوو رێکخراوی تەندروستی جیهانیی و یونسێف ئاشکرایانکرد: لە ساڵی رابردوودا ...