کاول

محەمەد رەوف مورادی

هەتاو لە ژێر
لێوەکانی تۆ هەڵدێ
کە پێ دەکەنی.
ئێوارە منم
ماتەم دام دەگرێ
لە خۆرنشینی بڕۆت
شەو تۆی دزیوە
تاکوو تاریک بێتە باوشم
ترس ڕژاوەتە مانگەشەوەو
دەنازی بە شەوقی دیدار
چرکەی دار بەڕوویەک کڵاو لەسەر من دەنێ و
خرپەی مار مەزووکێ
کۆنە کونایەکی دڵ تۆقێن دەئاماژێ
چمکی کراسەکەت لا مەدە
هەرمێ لە پاییز پێ دەگا و
ترس لە زلان
مردووەکانی بەهار گۆڕەو چاڵ دەکا
با بمبا با
لەرز گرتومی کاول
پێ کەنە
هەتاو دێر نیە لە دەمت کەوتووە
ئەم ڕێگایە چۆڵاییەکی لە خۆ حەشار داوە
تا حەشر حەشار دراوم
ماڵ کاول منم
بێ جێگە دەخولێمەوە
وا شەویش دێتە کۆتایی
چۆن بتگرمە تاریکی
بت پێکی
ئەو دەنگە لە دڵەوە هەرا دەکا
سوارەی شەوشکێن
بە هەڵکەوت دەم لە کانیاوی دەنێ
جندۆکەی بەخت
بە دەرزی و بیسمیلا پێ ئەکەنێ.
هەڵسە
پەیجی موبیلەکەت
پڕیەتی لە هەڵ پەڕکێ
خەنەت لە پرچی با بردووم بگرە
من سوورم بەتۆ
دەنگت هەڵکێشە
با قرچەی ددانم لە دەنگ بسرەوێ
ماچت لە لای خودا دەرکەوتووەو چمکی کراسەکەت لادە
پاییز ڕژاوتەو تەمەنم
لوتکەی سەرم
بەفری لێ دەبارێ و
تۆش لێوت کردوەتە هەڵاڵە بریمە
با شان شل کەم
لەژێر هەواری هەوارگەت
سوتام لەم شەوە بەختەوەرە
بەتەمای بەیانی مەبە و
من بنێژە
لە سەر دڵت
کاول

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

سابیر ره‌شید: ئه‌ده‌ب دیوی‌ دووه‌می‌ ژیانه‌

یه‌كێك له‌ چیرۆكنووس و رۆماننووسه‌ دیاره‌كانی ناو دونیای ئه‌ده‌بی كوردی ...