سەرەکی » وەرزش » میسی و كریستیانۆ دوو چیرۆكی بێ كۆتایی

میسی و كریستیانۆ دوو چیرۆكی بێ كۆتایی

میسی و كریستیانۆ رۆناڵدۆ ئه‌و دوو یاریزانه‌ی مێژووی تۆپی پێین كه‌ نه‌ك له‌ یارییكردن و گۆڵكردن و ئاستی بێوێنه‌دا له‌م سه‌رده‌مه‌دا كه‌س نه‌یتوانیووه‌ شان له‌شانیان بدات، به‌ڵكو بونه‌ته‌ دوو ئەفسانە كه‌ یاریش به‌ ریكۆرده‌ جیهانی و مێژووییه‌كانی تۆپی پێش ده‌كه‌ن.
ریكۆردێكی ناوازه‌ له‌ شه‌وێكی ره‌شدا
له‌یاریی ئه‌م جه‌وله‌یه‌ی پاڵاوتنی هه‌ڵبژارده‌كانی ئه‌وروپادا بۆ گه‌یشتن به‌ یۆرۆی 2020، شه‌وی دووشه‌ممه‌ 14/10/2019 پورتوگال بووه‌ میوانی هه‌ڵبژارده‌ی ئۆكرانای چیڤچینكۆ و یاریی گه‌ڕانه‌وه‌ی نێوانیان بوو له‌ گروپی دووه‌می هه‌ڵبژارده‌كاندا.
ئه‌و شه‌وه‌ دوو رووداوی دژ به‌یه‌ك، دوو به‌سه‌رهاتی خۆش و ناخۆش رویانداو هه‌ردوو كیان بۆ كریستیانۆ رۆناڵدۆ بوون به‌ خۆشترین و له‌ هه‌مان كاتیشدا ناخۆشترین یادگاری، رووداوه‌ سه‌رنج راكێشو دڵخۆشكه‌ره‌كه‌ ئه‌وه‌بوو كریستیانۆ رۆناڵدۆ له‌و یارییه‌داگۆڵێكی به‌په‌نالتی كردو كۆی گۆڵه‌كانی له‌ ژیانی ئیحتیرافی خۆیدا گه‌یانده‌ 700 گۆڵ، هه‌رچی رووداوه‌ دژ و ناخۆشه‌كه‌ش ئه‌وه‌بوو ئه‌و ریكۆرده‌ مێژوویه‌ی له‌شه‌وێكی تاریكدا بوو به‌وه‌ی یارییه‌كه‌یان 1-2 به‌ ئۆكرانیا دۆڕاند و 8 خاڵ كه‌وتنه‌ دوای ئۆكرانیاو سه‌ركه‌وتنیشیان بۆ یۆرۆی 2020 كه‌وته‌ ده‌ستی دوو یاریی داهاتوویان به‌رامبه‌ر لیتوانیاو لۆكسمبۆرگ، به‌پێچه‌وانه‌شه‌وه‌ ئۆكرانیا هه‌رچه‌نده‌ یارییه‌كیشی له‌گه‌ڵ سربیا ماوه‌، به‌و بردنه‌وه‌یه‌ بوو به‌یه‌كێكی تر له‌ هه‌ڵبژارده‌ سه‌ركه‌وتووه‌كان بۆ دوا یارییه‌كانی یۆرۆی 2020.
ریكۆرده‌كه‌
با به‌ ووردی سه‌یرێكی ئه‌م 700 گۆڵه‌ی كریستیانۆ رۆناڵدۆ بكه‌ین، بابزانین چۆن ئه‌م ژماره‌ گۆڵه‌ی تۆمار كردووه‌، ئه‌ی میسی ركابه‌ری له‌كوێی هاوكێشه‌ی ئه‌م ریكۆرده‌دایه‌، ئه‌و یاریزانانه‌ش كامانه‌ن كه‌ زۆرترین گۆڵیان له‌ كریستیانۆ رۆناڵدۆ و میسی تۆمار كردووه‌.
كریستیانۆ رۆناڵدۆ
*ته‌مه‌نی 34 ساڵه‌.
*به‌ 974 یاریی ئه‌م ژماره‌ گۆڵه‌ی تۆمار كردووه‌.
*له‌و ژماره‌ گۆڵه‌ 54 هاتریكی كردووه‌.
*113 گۆڵی به‌ په‌نالتی بووه‌.
*رێژه‌ی گۆڵكردنی كریستیانۆ له‌ هه‌ر یارییه‌كدا 0:71 گۆڵه‌ له‌ هه‌ر یارییه‌كدا.
*ته‌نانه‌ت گۆڵی ژماره‌ 700 یشی هه‌ر به‌په‌نالتی بووه‌.
*خاوه‌نی 4 پێڵاوی زێڕینی گۆڵكه‌ری ئه‌وروپایه‌.
میسی
*ته‌مه‌نی 32 ساڵه‌.
*ئه‌م 673 گۆڵی كردووه‌.
*له‌و ژماره‌ گۆڵه‌ 51 هاتریكی كردووه‌.
*ئه‌و ژماره‌ گۆڵه‌شی له‌ 829 یارییدا تۆمار كردووه‌.
*له‌و ژماره‌ گۆڵه‌ی 84 گۆڵی به‌په‌نالتی بووه‌.
*رێژه‌ی گۆڵكردنی میسی له‌ هه‌ر یارییه‌كدا 0:81 گۆڵه‌ له‌ هه‌ر یارییه‌كدا.
*خاوه‌نی 6 پێڵاوی زێڕینی گۆڵكه‌ری ئه‌وروپایه‌.
یاریزانه‌كانی تر
كاتێكیش سێرج بۆ ناوی ئه‌و یاریزانانه‌ی دەكه‌ین كه‌ زۆرترین گۆڵیان تۆمار كردووه‌، ئه‌وا تێكه‌ڵییه‌ك له‌و رووه‌وه‌ هه‌یه‌، راپۆرتی زۆر هه‌یه‌ و ناوی یاریزانی زۆر له‌ ئارادان، به‌ڵام دامه‌زراوه‌ی (rssst) كه‌ دامه‌زراوه‌یه‌كی باوه‌ڕپێكراوه‌، ئاماره‌كانی ئه‌م ده‌كرێنه‌ پێوه‌ر چونكه‌ ئه‌م ته‌نیا دان به‌و گۆڵانه‌دا ده‌نێت كه‌ له‌ یاریی ره‌سمیدا تۆمار كراون و به‌ره‌سمیش لای رێكخراوه‌كه‌ تۆمار كراون.
تۆمار كردنی 700 گۆڵ یان زیاتر كار و ئه‌ركێكی هه‌روا ئاسان نییه‌، هه‌رله‌به‌ر ئه‌وه‌یه‌ ئه‌و یاریزانانه‌ی 700 گۆڵ یان زیاتر یان شتێك كه‌متریان تۆمار كردووه‌ زۆر كه‌من، ئه‌مه‌ش لیستی ئه‌و یاریزانه‌ ده‌گمه‌نانه‌یه‌ كه‌ دامه‌زراوه‌ی (rssst) دان به‌ ئاماره‌كه‌یاندا ده‌نێت و ئه‌و یاریزانانه‌ش كه‌ له‌ لیسته‌كه‌ی دامه‌زراوه‌ی (rssst) دا هاتووه‌ ئه‌م یاریزانانه‌:
-1جۆزێف بیكانی چیكی به‌ڕه‌گه‌ز نه‌مساوی (805 گۆڵ).
-2رۆماریۆ- به‌رازیل (772 گۆڵ).
-3پیلییه‌-به‌رازیل (767 گۆڵ).
-4پۆشكاش- هه‌نگاریا(746 گۆڵ).
-5مۆله‌ر- ئه‌ڵمانی (735 گۆڵ).
-6كریستیانۆ رۆناڵدۆ (700 گۆڵ).
-7لیۆنێل میسی (672 گۆڵ).
-8فرینكدیك- هه‌نگاریا(576 گۆڵ).
-9زیله‌ر- ئه‌ڵمانی (575 گۆڵ).
-10تۆلیۆ مارفیلها (575گۆڵ).
سێ جووت پێڵاوی زێڕین
له‌لایه‌كی تریشه‌وه‌ میسی و كریستاینۆ رۆناڵدۆ له‌ڕوی بردنه‌وه‌ی خه‌ڵاتی پێڵاوی زێڕینیشه‌وه‌ ركابه‌ری یه‌كترن،ئەم خەڵاتە ساڵانه‌ به‌و یاریزانه‌ ده‌درێت كه‌ زۆرترین گۆڵی له‌ خوله‌ ناوخۆییه‌كانی وڵاتانی ئه‌وروپادا كردووه‌.
مێژووی ئه‌م خه‌ڵاته‌ ده‌گه‌ڕێته‌وه‌ بۆ ساڵی 1968، ئه‌و ساڵه‌و بۆ یه‌كه‌مین جار ئۆزیبیۆ-ی یاریزانی یانه‌ی به‌نفیكا خه‌ڵاته‌كه‌ی بردۆته‌وه‌، ئیتر ساڵانه‌ ئه‌م خه‌ڵاته‌ به‌گۆڵكاری یه‌كه‌می ئه‌وروپا دراوه‌.
له‌م خه‌ڵاته‌شدا میسی و كریستیانۆ رۆناڵدۆ ركابه‌ری بێ وێنه‌ن، ته‌نیا دوو یاریزانن كه‌ زۆرترین خه‌ڵاتیان بردۆته‌وه‌، به‌ڵام له‌مه‌دا میسی زۆر له‌پێش كریستیانۆوه‌یه‌، میسی ئه‌مساڵیش خه‌ڵاته‌كه‌ی بردۆته‌وه‌و پارساڵ 2018-2019 گۆڵكه‌ری یه‌كه‌می خوله‌كانی ئه‌وروپا بووه‌، به‌وه‌ش كۆی خه‌ڵاته‌كانی میسی بوون به‌ 6 خه‌ڵات و پێڵاو، به‌رامبه‌ر به‌ 4 پێڵاوی كریستیانۆ رۆناڵدۆ.
میسی یه‌كه‌م پێڵاوی له‌ته‌مه‌نی 24 ساڵیدا وه‌رگرتووه‌، هه‌رچی كریستیانۆ رۆناڵدۆیه‌ له‌ته‌مه‌نی 26 ساڵیدا بووه‌.
ته‌نیا یاریزانێك كه‌ ئێستا له‌یارییكردن به‌رده‌وامه‌و له‌پله‌ی سێیه‌می براوه‌ی خه‌ڵاته‌كاندایه‌، لویس سوارێزی هێرشبه‌ری یانه‌ی بارسیلۆنایه‌ به‌ 2 پێڵاو.
ئه‌و یانانه‌ش كه‌ یاریزانه‌كانی زۆرترین پێلاوی زێڕینیان بردۆته‌وه‌ بارسیلۆنا به‌ پله‌ی یه‌كه‌م دێت به‌ 8 پێڵاو كە سێ یاریزان بردوویانه‌ (میسی 6 خه‌ڵات، سوارێز، رۆناڵدۆی به‌رازیلی هه‌ریه‌كیان خه‌ڵاتێك).
سه‌باره‌ت به‌و وڵاتانه‌ش كه‌ یاریزانه‌كانیان زۆرترین خه‌ڵاتیان بردۆته‌وه‌، پورتوگال یه‌كه‌مه‌ به‌ 8 خه‌ڵات كه‌ 3 یاریزانی پورتوگالی بردویانه‌ (كریستیانۆ 4 خه‌ڵات و گۆمێش 2 خه‌ڵات و ئۆزیبیۆ 2 خه‌ڵات)، ئه‌رجه‌نتین دووه‌مه‌ به‌ 7 خه‌ڵات كه‌ 2 یاریزان بردویانه‌ (میسی 6 خه‌ڵات و هیكتۆر بازالی بۆ یانه‌ی سپۆرتینگ لشبۆنه‌ (1973-1974)، هۆڵه‌نداو ئۆرۆگوای سێیه‌من هه‌ریه‌كه‌و به‌ 4 خه‌ڵات كه‌ هۆڵه‌ندا به‌ 4 یاریزان (كیس كیست، ویم كیفت، ڤان باستن، رۆی ماكای) و ئۆرۆگوای به‌ دوو یاریزان(سوارێز دووخه‌ڵات و فۆرلان دوو خه‌ڵات) یان بردووە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*